Matteyo 9
9
Itaŋida Yesu Atulo Ollo Oye Aŋati Huan
(Mar 2:1-12; Luk 5:17-26)
1Adak nyia Yesu atogol, ette illaŋan atafar many ibore gala Kapernaum anna amanyari inyi. 2Ojio teya, iyaŋunie nyia omuk aati jihonyi obo atulo ollo oye aŋati huan, ollo ofer ijotit. Ninyia igonyu Yesu abolori ono eruk hosi, ette inyi jiaran jio atulo ollo oye aŋati huan, “Lonyi hoŋ, itagolo atua! Ahohinie eyyata hoi.”
3Attati omuk ettiyanak Ifahita ikiana isi hama jiojio, “Ittarrohojo atulo olo afure Hollum!” 4Ati omijak nyia Yesu egigilita hosi, ania ette inyi jiaran, “Anyio owon egigilo onno orroho 'to itajia hatai? 5Anani enne iliaha 'to, ajiaran jio, ‘Ahohinie eyyata hoi,’ kuyya ajiaran jio, ‘Totte, adahai’? 6Ati, ijiara ani etahutak jihatai jiojio, owon Lonyi Tulo iko elohittok ifau ihohiniere eyyata.” Ania, ette inyi jiaran jio latulo ollo oye aŋati huan, “Totte, iduhu ejotit hoi, ilo haŋ!”
7Teya, ette latulo lia idioto, ette leten haŋ hosi. 8Ninyia igonyuni aati arriai eram ania, ette isi ibaŋi, ette itahabuyo Hollum te esiarana honyi aati elohittok ihuania.
Iloŋu Yesu Matteyo
(Mar 2:13-17; Luk 5:27-32)
9Ninyia alo Yesu teya, ette inyi igonyuna obo eddudduhani musuru alla anya Matteyo, itoŋo imahatab honyi, ette Yesu jiaran jihonyi, “Ijifunie ani.”
Odioto nyia Matteyo, ette ijifaru inyi.
10 #
Luk 15:1-2
Ninyia oŋiyere Yesu ihaŋ Matteyo#9:10 ihaŋ Matteyo : kuyya ihaŋ honyi (ono Yesu). ofuonni nyia eddudduhak musuru arriai iko leyyak hullomuk, ette iŋiyo ikonyi buo lejifak honyi. 11Ninyia igonyuni omuk hulo Farisei eram ania, ette isi ifiyo lejifak honyi jio, “Anyio oŋiyo ettiyanani hatai iko aati ihuo hulia?” 12Ati itaniŋu nyia Yesu ekiana hosi, ette jiaran jihosi, “Obeŋi busi aati hullo oŋidari 'to, awahi diktor, arari fe aŋuak hama. 13#Mat 12:7; Hos 6:6Ifuatta onyurana awoyo hiram enne ikiana Abuk Hollum jio, ‘Awak ni anyalami; obiaŋara erre ehumita.’ Abeŋ ni attu iloŋo abisak, ati attu ni iloŋo eyyak.”
Eram ono Aferuna
(Mar 2:18-22; Luk 5:33-39)
14Attati lejifak hulo Yoane Etifuotoni Batisimo ifuanna ette ifiyo Yesu jiojio, “Eferutta hohoi iko Farisei, nyio, ati obeŋi lejifak hoi oferuttai?”
15Itarraŋ nyia Yesu isi ojio, “Oremehini adi atamonok hutto ayamari ijiriŋa buo ayamani howon ikosi? Ati, ofuonni adi oŋitek hunne iyarik ayamani tehiji hosi addi, tania oferuni adi isi.
16“Obeŋ tulo attaf ettulit boŋo amaruani ta aboŋo aŋejuk, nyio iruna adi aboŋo aŋejuk ette iguasuno addi, ette tibuo italat ettulit boŋo amaruani. 17Obeŋ buo fe obo atulo iturak afino aŋejuk itua ihuloo amaruak, nyio ofudohoi adi ehuloo hunia, ette afino ijuhoro addi buo ehuloo hunia ette irrohoji. Ati iturani afino aŋejuk itua ihuloo aŋejuho. Tania, arasai adi isi 'daŋ hunno oyiji.”
Ŋarri Lettok Iko Aŋotte onno Ottir 'to Aboŋo Yesu
(Mar 5:21-43; Luk 8:40-56)
18Ninyia hèkiana Yesu jihosi, ottu nyia lobo elettok olo Yudei, ette irigoŋo ihosiere honyi, ette jiaran, “Hetek ŋarri hoŋ iye. Ati, waŋ ilo ottirok ahas hoi jihonyi, isu adi inyi luŋa.” 19Ania, ette Yesu idioto, ette ijifaru atulo lia, buo lejifak honyi ette ifuatan 'daŋ ikonyi.
20Teya, owon nyia nobo aŋotte ninyia oŋuai 'to iko ayaf yaf onno orroho, aŋasi 'tomon harrihai. Oliliebuno nyia inyi te ehalu Yesu, ette ittir esidi boŋo honyi. 21Igigilo nyia inyi ta ahuan honyi hama jiojio, “Alla attir ni aboŋo honyi ijiai, aŋida adi ni.” 22Attati Yesu iyito, ette igonyuna inyi, ette jiaran, “Ŋarri hoŋ, itagolo ataji hoi! Itaŋida eruk hoi iyye.” Teya teya, ette aŋotte ania iŋidari.
23Attati Yesu leten ihaŋ elettok lia. Ninyia igonyu inyi ahutak ikaŋahien buo aati 'daŋ oyyihinie, 24ette inyi jiaran, “Ifuatta 'daŋ allet. Obeŋ neto ania oye, ojoto inyi joto.” Buo isi ette isuhotiere inyi. 25Ati ninyia ifuhari aati 'daŋ allet, ette Yesu ijiŋara attua haji, ette inef aani neto nyia, ette inyi idioto. 26Attati eram ania isarrahina jio aŋati ono afau ania 'daŋ.
Itaŋida Yesu Laŋodok Arrihai
27Ninyia alo Yesu teya, ijifarai nyia omuk laŋodok arrihai inyi hulle iwuwoŋitai jihonyi jiojio, “Lonyi Dafide, omehinie jihohoi.”
28Ninyia lajiŋak Yesu itua haji, ette laŋodok hia ifuanna jihonyi, buo inyi ette ifiyo isi, “Iruhoto itai jio aremik ni itaŋida itai?”
Itarraŋi nyia isi inyi jiojio, “Aafe, Lettok.”
29Attati inyi ittir oŋite hosi, ette jiaran “Hétera eram ania jihatai ihuo iruhoto itai.” 30Attati oŋite hosi inyiak mijio. Buo Yesu ette ihum ikiana jihosi jiojio, “Hèramana eram ania jio obo atulo.”
31Ati, ofuoi nyia isi, ette itisarrahina asayyo huno Yesu jio aŋati afau nyia 'daŋ.
Itaŋida Yesu Atulo ollo Obeŋ 'to Ikiana
32Ninyia hofuoi aati hia ihuania, iyaŋunie nyia omuk aati jihonyi obo atulo ollo obeŋ ikiana, nyio, owon nyia inyi iko aminiaŋati. 33Ati ninyia hèfuhari aminiaŋati nyia ihuania, ette latulo lia itterio ekiana, attati aati 'daŋ illilliha, ette jiaran “Hèbeŋ hohoi egonyu obo ariŋ ihua ana ta fau Israele!”
34 #
Mat 10:25; 12:24; Mar 3:22; Luk 11:15 Ati ojiori nyia Farisei jio, hobu miniaŋa isiarak aduaran jio Yesu ifuhatiere aminiaŋa.
Amehino Taji Yesu jio Aati
35 #
Mat 4:23; Mar 1:39; Luk 4:44 Ilur nyia Yesu aborejin gala iko amisihi 'daŋ, ette ittiyenio buo fe ittittoyo ihasik imojiti, Asayyo Ayijok huno Nolobie. Itaŋida nyia buo fe inyi aati hunyia owoni 'to iko eŋuati buo ediahiti gele gele. 36#Mar 6:34; 9:37-38; Luk 10:2Ninyia igonyu inyi eluluŋi waati, ette inyi imehino jihosi nyio, ihawwai nyia isi buo fe omehinie ihuo akioro hunno obeŋ eyyahani. 37Tania, ikiana nyia inyi jio lejifak honyi jio, “Obolo amana, ati omutari adioŋok. 38Omojoti jio Lamonye mana oŋida ifahu adioŋok imana honyi.”
Currently Selected:
Matteyo 9: EA2003
Highlight
Share
Copy
Want to have your highlights saved across all your devices? Sign up or sign in
© The Bible Society in South Sudan 2003
