Luka 6:27-49 “Ati eramak ni jihatai hulle itaniŋiete 'to jihoŋ: Itabuarata atajia jio amiorok hatai, ihaniete onno oyyu jio hia hullo oliwarik 'to itai, Omunoti aati hulle ipice 'to itai, omojoti buo fe to aati hu | Ecorit Aŋejuk 2003 (EA2003)

Luka 6:27-49 EA2003

“Ati eramak ni jihatai hulle itaniŋiete 'to jihoŋ: Itabuarata atajia jio amiorok hatai, ihaniete onno oyyu jio hia hullo oliwarik 'to itai, Omunoti aati hulle ipice 'to itai, omojoti buo fe to aati hullo omorie 'to itai. Alla annaŋ obo atulo amahalio hoi, isiarak buo fe inyi annaŋ ebotie; elle iyaru buo fe obo atulo akout hoi, isiarak buo fe inyi agamis hoi. Isiarak obo ariŋ jio lia, ollo omojo 'to jihoi; buo fe elle iyaru obo atulo ariŋ hoi, idehi jihonyi. Ihaniete jio aati ihuo iwahata itai isi ihanie jihatai. “Alla abuori atajia hatai ijiai aati hullo obuori atajia hosi itai, anyio yiji 'tadi enne inyiahata itai irumana! Ara duadi bu eyyak ihanie buo fe isi ihuo nyia. Elle ihaniete buo fe itai onno oyyu jio aati hulle ihanie 'to jihatai onno oyyu, anyio yiji 'tadi enne inyiak inyi iyaŋuno jihatai? Ara duadi bu eyyak, ihanie buo fe isi ihuo nyia! Elle ihuronia buo fe itai erre jio hia hama hulle iyihina itai jio ofuonni adi inyiahina jihatai, anyio yiji 'tadi enne inyiak inyi iyaŋuno jihatai? Ara duadi bu eyyak, ohurotiai buo fe isi jio eyyak ihuo isi, ifuotuniere onno orriama! Ati itabuarata atajia jio amiorok hatai, ihaniete onno oyyu jihosi, ohuronia jihosi buo fe hèyihina jio ofuonni adi isi inyiahina jihatai obo ariŋ. Tania, obolo adi esiorio jihatai; irata adi itai olonyirok Hollum elle Ilomohi 'to 'daŋ. Nyio, omehino inyi jio hia hullo obeŋi 'to ojiori humo iko jio arrohojak. Iwatta iko amehino ihuo anna awattari Monyatai. “Hèŋototo eram omuk, buo obeŋ adi Hollum oŋot eram hatai. Hèŋotonia epali jio omuk, buo fe Hollum adi obeŋ oŋotok epali jihatai. Idehina epalita huno hullomuk, buo fe Hollum adi idehi epalita hatai. Isiatta jio hullomuk, buo isiarak adi Hollum jihatai. Ifuotuna adi itai luŋa ekemit sudu hia eluahiti huno emorot hunne ijuhoni adi ihide hirre huttanatai. Nyio, ekemit ninyia ikemiette itai, inyi adi onno okemierek esiorita jihatai.” Attati Yesu iramana jihosi etarriamai ana: “Ittallik oloŋodo irik oloŋodo: elle ihan inyi ihuo nyia, ofuoi adi isi 'daŋ ikuahino itua wudori. Obeŋ obo eyiyanani agalik ettiyanani honyi; ati alla atuk inyi eyiyana honyi, ara adi inyi ihuo ettiyanani honyi. “Anyio imijio iyye jio aboroti otto honyek illahoi buo ibeŋ igonyu abeleri otto honyek hoi? Aŋai adi ijio iyye jio illahoi, ‘Illa, hadi eduhu ni aboroti otto honyek hoi,’ buo ibeŋ igonyu abeleri otto honyek hoi? Jai! Iyye etihanani huan, iduhu do addi abeleri otto honyek hoi; tania, iremik adi iyye ihum igonyuna buo fe iduhuna addi aboroti otto honyek illa hoi. “Obeŋ ayyani onno oyyu 'to oŋijak eŋijiti hunno orrohoji, buo fe ayyani onno orroho 'to obeŋ oŋijak eŋijiti hunno oyiji. Oherunie ayyani 'daŋ te eŋijiti hosi; ittallihoto itai ideuna aŋabolo to ŋarria, ittallihoto itai buo fe ideuna eŋijiti fino to hikua. Iyaŋuno oloyijio erre ayijok to hirre hunno oyiji 'to hunno ottunai 'to itua taji honyi, buo olorroho iyaŋuno erre arrohojak to hirre hunno orrohoji 'to hunno ottunai 'to itua taji honyi. Nyio, ikiana eetuk erre hunno owoni 'to itua taji. “Nyio iloŋoti itai ani ‘Lamonye, Lamonye,’ buo ibiaŋata ihaniete erre hunne eramak ni itai? Atulo ollo ottu 'to itaniŋio ekenita hoŋ buo fe oniŋio isi, eramak adi ni itai ara inyi ihuo ŋai. Ara inyi ihuo atulo aduhoni haji ollo obok 'to ewurio wir wir many ottuloniere imoruoi ette iduhonia etawojita haji honyi diya. Ninyia ifut olowore many aŋabiere olotifor, ette ibul aaji ania, obeŋ nyia inyi oritihoro nyio, ihum nyia inyi iduho. Ati atulo elle itaniŋu 'to ekenita hoŋ buo obeŋ oniŋio isi, ara inyi ihuo atulo ollo oduhok 'to aaji honyi ihide hifuoto buo obeŋ obok ewurio etawojita haji honyi. Ninyia ibul aari aaji ania, ette inyi iritihoro. Orroho nyia ekuahit honyi bebe!”

Read Luka 6

Listen to Luka 6