Luka 21

Nesiorita huno Ehidak

(Mar 12:41-44)

1Ihum nyia Yesu imijio, ette igonyuna asamak ibirotiai esiorita hosi itua senuk eddudduhi isiorita otto Haji emojit enne ittokon. 2Ette buo fe inyi igonyuna obo ehidak elociaŋ ibirok atarifat arrihai diya. 3Ette inyi jiaran, “Ahode eramak ni itai jio, ibirok ehidak elociaŋ ania agalik huno aati hullomuk 'daŋ. 4Nyio, isiori nyia isi allaŋo huno esamiti hosi; ati te elociaŋ ottononyi, isiarak inyi asaŋ hullo owoni 'to jihonyi 'daŋ.”

Ikiana Yesu Eram ono Atturo Haji Emojit enne Ittokon

(Mat 24:1-2; Mar 13:1-2)

5Ikianai nyia omuk aati te eram ono Aaji emojit enne ittokon jio ilamani amoruoi honyi bebe iko esiorita waati jio Hollum. Buo Yesu ette jiaran, 6“Ofuonni adi oŋitek hunne itatturierek erre hunne iŋiŋialati itai hunia. Obeŋ adi obo amoruo dinia arasa idellia ihide obo, ikukuri adi isi 'daŋ.”

Arrohojita iko Ettigemita

(Mat 24:3-14; Mar 13:3-13)

7Attati isi ifiyo Yesu jiojio, “Hettiyanani, iduoŋi adi erre hunia baya? Anyio itamijani adi enne itahutak 'to jio alum asaa enne iduoŋorik isi?” 8Buo Yesu ette jiaran, “Ihumata irriria, hèlaha itisiabari itai! Nyio, ofuonni adi aati arriai hulle ikianai ihuo alla arai isi ani. Ojiori adi, ‘Ani inyi!’ buo fe ‘Alum asaa.’ Ati hèjifattiete isi. 9Buo elle itaniŋuna itai jio owon afere buo fe etaŋalafayo gala, hèbaŋata; nyio iduoŋi adi erre hunia do ahosiere, ati obeŋi isi itahutani jio iliaha esidi hirre.”

10Attati inyi jiaran jihosi, “Orriomonie adi afau iko afau, buo obuore iko obuore. 11Iboŋi adi erre hunno orrohoji 'to huna amasik 'daŋ; olokitihi, ahure buo eŋuati. Ofuonni adi erre hunno oyeyeri 'to iko etamijanita hunno obolori 'to tedou. 12Ati hobeŋi erre hunia 'daŋ iduoŋi, inefuni adi itai ette ittigemio. Itawojie adi itai ihasik Imojiti, ette ifitana itai ibabus. Iyarai adi itai ihosiere hobuok iko amondiri te eram hoŋ. 13Inyi adi ania asaa enne ifuati itai ikianari te eram hoŋ ihiji waati: 14#Luk 12:11-12Hèhumata igigilo obojiai hobeŋ asaa nyia. Hèhawwati jio ifuatta adi itai itarraŋ aŋai. 15Nyio, esio adi ni jihatai ekenita iko olofioro hunne ittallihi adi amiorok hatai ihara kuyya itarisa. 16Ara duadi bu esiok hatai, illarak hatai, aati hutta haŋitek hatai, iko mottiarak hatai, itinefuni adi isi itai ette itattohoro omuk hulatai. 17Iyyalari adi aati 'daŋ itai te eram hoŋ. 18Ati obeŋ adi obo ariŋ ottir itai, ara duadi bu ofitti abotie to hosi hatai. 19Odihuna, tania, italuahuna adi itai ahuattek hatai.

Ikiana Yesu ta Atturo ono Yerusalem.

(Mat 24:15-21; Mar 13:14-19)

20“Elle igonyuna itai oseŋer ikoloni Yerusalem, omijana jio iliaha atturo honyi. 21Tania, ijiaran hullo owoni 'to Yudea, hotofuhohi attua doŋiok; ijiara buo fe hullo owoni 'to itua miji héfuahi addi. Ijiara buo fe hullo owoni 'to itua matta, hotobiaŋahi ojiŋani attua miji. 22Nyio, oŋitek adi hunia ‘Huno ettigemio’ jio oŋida itasiruni erre 'daŋ hunyia igioroni ibuk ono Hollum. 23Orroho adi bebe to oŋitek hua jio aŋoruo ayedurok iko etadasak! Nyio, owon adi ejiriŋa onno obolo jio afau ana iko ettigemio onno obolo jio aati hulo. 24Ottohori adi omuk ta ademio erremiti, buo ette inyaru omuk ofuoi ifita jio amisihi hutta fau 'daŋ. Irririei adi Alufajak Yerusalem many ottubarik oŋitek hosi.

Attuna ono Lonyi Tulo

(Mat 24:29-31; Mar 13:24-27)

25 # Eta 6:12-13 “Oleye adi etamijanita iholoŋ iko iyafa buo ileliefi. Owon adi ejiriŋa iko abaŋi imisihi hutta fau nyio, te epupuaŋa iko te egutta hari enne ittok. 26Okuahatie adi aati mugur mugur ta abaŋi buo isi itilai arrohojita hunno ofuonni 'to adi ifau; nyio, ittanniŋai adi erre huttedou. 27Igonyuni adi isi Lonyi Tulo ottu tedohuo ta aduaran iko ta akuatan onno obolo. 28Elle itterie erre huna eduoŋ, owotiati, ibonnoto ahide, nyio, iliaha etalahuno hatai.”

Ettiyenuna jio Ayyani Ŋaboli

(Mat 24:32-35; Mar 13:28-31)

29Attati Yesu iramana jihosi etarriamai ana: “Imijata aŋaboli iko ayyanio hunnomuk 'daŋ. 30Elle igonyuna itai abene hosi itterie ayisuna, imijana itai ta ahuattek hatai hama jio iliaha atahas. 31Ihuo nyia buo fe elle igonyuna itai erre huna iduoŋi omijana jio, iliaha Olobie Hollum attuna.

32“Hode hode, eramak ni itai, obeŋi adi aati hulo ahana oye many iduoŋorik erre huna 'daŋ. 33Olitohini adi edou iko afau muluyaŋ, ati obeŋi adi ekenita hoŋ olitohini.

Ihumata Imijio

34“Ati ihumata imijio! Hèlaha atajia hatai iminyiarai elobia ta aŋiyo iko amata buo ehawwata huno afau ana. Elle ihanata itai ihuo nyia, oburak adi oloŋ ania itai, 35ihuo elohit. Nyio, ottu adi inyi jio aati 'daŋ hutta fau. 36Tania, ihumata imijio buo fe omojoti motie motie jio oŋida iwatta iko agolon jio erre 'daŋ hunno ofuonni 'to, iko iwotiari ihosiere Lonyi Tulo.”

37 # Luk 19:47 Otuhok nyia Yesu oŋitek hua 'daŋ ittiyenio Ihaji emojit enne ittokon buo ta akekai olo ijoto idoŋe Olifet. 38Buo ta amotie hanyik, iwanyutai nyia aati jihonyi Ihaji emojit enne ittokon itayiriere jihonyi.

Currently Selected:

Luka 21: EA2003

Highlight

Copy