Luka 20

Eram ono Elohittok Yesu

(Mat 21:23-27; Mar 11:27-33)

1To obo oloŋ ninyia ittiyeniere Yesu buo fe ittittoyo aati Asayyo Ayijok itua Haji emojit enne ittokon, ofuonni nyia ehumak elettaha iko ettiyanak ifahita buo lahou, 2ette jiaran jihonyi, “Ike iramak hohoi, ta anani elohittok ihanio iyye erre hunia? Ŋai isio jihoi elohittok ania?” 3Itarraŋ nyia Yesu isi ojio, “Iko buo fe efiyo ni itai, iramana ani, 4ottu nyia elohittok ono Yoane tai itifuociere batisimo, tedou kuyya jio aati?”

5Ette isi itarisa isi hama jio, “Elle ejio jio, ‘Ottu teduo’ itarraŋ adi inyi jio, ‘Nyio nyiati ibiaŋata itai iruhoto erre Yoane?’ 6Ati elle ejio jio, ‘Ottu jio aati,’ iruoŋi adi hohoi aati 'daŋ ta amoruoi, nyio, iruhi nyia isi 'daŋ jio ara nyia Yoane ahekianani Hollum.” 7Tania, itarraŋi isi jiojio, “Ebeŋ hohoi emijak ottu elohittok honyi tai.”

8Itarraŋ nyia buo fe Yesu jihosi jio, “Abeŋ adi buo fe ni eramak jihatai ta anani elohittok enne ehaniere ni erre huna.”

Etarriamai ono Aromok hutto Mana Fino

(Mat 21:33-46; Mar 12:1-12)

9Attati Yesu iramana etarriamai ana jio aati: “Idulak nyia obo atulo amana honyi ono afino, ette isiarana inyi jio ajurak, buo inyi ette leten jio afau anna alama, ette itoŋo diya fur. 10Ninyia adiai afino, ette inyi ifahina apit jio ajurak hia oŋida obuanyani inyi hunonyi. Ati abahi nyia ajurak hia apit lia, ette itacahara ahas ahania. 11Tania, ifak nyia inyi apit etarrihi, buo ajurak hia ette buo fe ibak inyi, ette ihanio jihonyi erre hunne iyaŋunie ariri, buo ette itacahara inyi ahas ahania. 12Ette inyi ifahina apit etahunihi, buo ajurak hulia ette iriafuna lia, ette ipuasara inyi allet. 13Attati lamonye mana jiaran ‘Ehan adi ni anyio? Efak adi ni lonyi hoŋ ollo obuor ataji hoŋ bebe; kuyya abaŋi adi isi inyi!’ 14Ninyia igonyuni ajurak hia inyi, ette ikiana isi hama jiojio, ‘Arutani honyi tibuo olo, hattohoro inyi oŋida erutaa honyi arai ahunohoi!’ 15Ette isi ipuasara inyi addi totua mana, ette ittohoro inyi.

“Ihan adi lamonye mana fino anyio jio ajurak hulia? 16Ottu adi inyi ittohoro ajurak hulia, ette isiarana amana ania jio omuk ajurak hama.”

Ninyia itaniŋuni aati eram ana, ette isi jiaran “Hèlaha ara ihuo nyia!”

17Ati omijio nyia Yesu jihosi, ette jiaran, “Anyioti enne ikianai egierita hutto buk Hollum huna?

‘Amoruo ninyia ihari aduhok jiojio ara ariŋ asai,

inyiak tibuo inyi igalihina 'daŋ ta ayiji.’

18Alla akuahino obo atulo jio amoruo ania, owurok adi inyi ahuan honyi tuny tuny; buo alla akuahino amoruo ania jio obo atulo, oroyok adi atulo lia arari attuduha.”

Eram ono Aduma Musuru

(Mat 22:15-22; Mar 12:13-17)

19Teya teya, awahi nyia ettiyanak ifahita iko ehumak elettaha inefuna Yesu, nyio, omijani nyia isi jio, ikiana nyia etarriamai enne iramak inyi tesi; ati abaŋi nyia isi aati. 20Tania, ihumi nyia isi irriria Yesu, ette buo fe idum omuk asiri oŋida ofuoi itihanio ahuattek ihuo ayijok, ette ifahina isi héfuahi ififiyo Yesu italohuniere inyi oŋida isi enefu inyi ette isiarana ihas mondir olo gala Roma. 21Attati asiri hulia ifiyo Yesu jiojio, “Hettiyanani, emijak hohoi jio ikiana iyye buo fe ittiyenio onno obis. Ibeŋ iyye igigia aati, ittiyenio iyye efahita huno Hollum hode. 22Ike iramak hohoi, aŋatani soho efahita hohoi, idumari amusuru jio hobu Roma elle ittokon kuyya obeŋ?”

23Ati omijak nyia Yesu enyobita hosi, ette inyi jiaran jihosi, 24“Itahutana jihoŋ arobiya. Anaŋai arrijiori iko afure enne igioroni ihide honyi?”

Itarraŋi nyia isi jiojio, “Huno hobu elle ittokon.”

25Ania, ette Yesu jiaran jihosi, “Isiatta hobu elettok erre hobu, buo jio Hollum erre Hollum.”

26Diya ihosiere waati 'daŋ, ittallihi nyia isi ilohuna inyi to obo ariŋ enne ikiana inyi, ette isi dua ollokuai, buo illillihai te etarraŋi honyi.

Eram ono Ebuhuna Toye

(Mat 22:23-33; Mar 12:18-27)

27 # Ehanita 23:8 Attati lomuk hulo Sadusei ifuanna jio Yesu. Isi aati hullo ojiori 'to jio obeŋ ebuhuna toye; ette isi ifiyo inyi jiojio, 28“Hettiyanani, igiorok nyia Mose jihohoi efahi onno ojio 'to jio, ‘Alla aye illa obo atulo idiaharu ŋoruoi obeŋ hito, ijiara illanyi ojuŋori aŋotte ania isihiniere aduri a huno layaani.’ 29Owoni nyia ellarak hattarik; oyemu nyia oleŋeu aŋotte ette iye obeŋ hito. 30Attati etarrihi ijuŋori aŋotte ania, 31ette buo fe etahunihi; attati isi 'daŋ hattarik iye obeŋ obo isiu hito. 32Ihalu hosi 'daŋ, aye buo fe aŋotte ania. 33Ihuania, ottu adi inyi irahan aŋoruoi ŋai iholoŋ ono ebuhuna hayaak? Nyio, awattarik nyia isi 'daŋ hattarik inyi.”

34Itarraŋ nyia Yesu isi jiojio, “Ayamanie aliawa iko aŋoruo huno ahana, 35ati aliawa iko aŋoruo, hunno osiru ebuhuna toye ette imanya moi, obeŋi adi isi ayamai, 36nyio, arai adi isi ihuo ajilohien, ittallihi adi isi iye. Arai isi aduri Hollum, te ebuhuna hosi toye. 37Ihum tibuo Mose itahutana jio ibuhuni adi layaak toye. Jio aŋati egierita honyi hunne ikianai 'to te eram ono agurrumari, onno ojiari inyi jio, ‘Ara Lamonye, Hollum olo Abramo, Hollum olo Yakobo.’ 38Ihuania, obeŋ inyi ara a Hollum olo ayaak, ati ara inyi aholo esuok, nyio, jihonyi, isui aati 'daŋ.”

39Attati omuk hulo ettiyanak ifahita itarraŋ inyi jiojio, “Hettiyanani, itarraŋ iyye onno oyyu.” 40Nyio, abaŋi nyia isi enyiak ifiyo inyi.

Eram ono Olonyimoto

(Mat 22:41-46; Mar 12:35-37)

41Attati Yesu ifiyo isi jiojio, “Aŋai ati ojiori isi jio ara adi Olonyimoto to woyo Dafide? 42Nyio, ojio nyia Dafide ta ahuan honyi ibuk ono Afureta jio,

‘Ojio Lamonye jio Lamonye hoŋ:

Itoŋoi tene totto ŋati hani iŋet hoŋ,

43many ehananiere ni amiorok hoi ariŋ enne irriehiniere iyye eejek hoi.’

44Iloŋo nyia Dafide inyi ‘Lamonye’; aŋai ati inyiak Olonyimoto irahan to woyo honyi?”

Asario Yesu jio Ihumata Mijio Ettiyanak Ifahita

(Mat 23:1-36; Mar 12:38-40)

45Itayirie nyia aati 'daŋ jio Yesu, attati inyi jiaran jio lejifak honyi jiojio, 46“Ihumata imijio ettiyanak ifahita! Omunoi isi eŋalata ta aboŋojin hunno ohodori, buo fe omunoi elle ifuanyai aati isi ta abaŋi itua suk. Onyimoi isi asegeri lettaha hutto tua hasik Imojiti iko amasik lettaha hutto hafulat. 47Imumunie isi ehidahi buo fe ohoruttai ahaŋitek hosi, buo ette itahanio ahuattek te emojiti hunno ohodori 'to! Obolo adi ettigemio hosi agalik 'daŋ!”

Currently Selected:

Luka 20: EA2003

Highlight

Copy