Math 9

Yecu Atɔ Raan cï Du

(Mak 4:35-41; Luk 8:22-25)

1Na wën, ke lɔ ë abëlic, go wɛ̈ɛ̈r teem, ku jɔ bɛ̈n pänydɛndït guöp. 2Na wën, ke ke bïï raan të nu yen, raan cï duany, adhɔt piny ë agen nɔm, go Yecu gämden tïŋ, ku yöök raan cï duany an, “Pälë yïpiɔ̈u piny, mɛnhdï, karɛcku acï ke päl yïn.”

3Na wën, ke kɔc töktöök ë kɔc ë löŋ gɔ̈ɔ̈r yiic, ke luelkï ë keyäc an, “Raanë alat Nhialic!”

4Go Yecu ka luekï ë kepiɔ̈ɔ̈th guɔ ŋic, ago lueel an, “Eeŋö tak wek kërac ë wepiɔ̈ɔ̈th?” 5Ee kënou piɔl ë keek, të luɛɛl ɛn en, an, Karɛcku acï ke päl yïn, ku të luɛɛl ɛn en, an, Jɔt rɔt, cathë? 6Ku nɔɔnë, luɔi bä wek e ŋic nɔn ciɛthë Wën ë Raan ke riɛl ë piny nɔm riɛl bï en karɛc pɔ̈l, ago raan cï duany yɔ̈ɔ̈k an, “Jɔt rɔt, jɔt agendu, lɔ baaidu.”

7Go rɔt jɔt, ku jël le ɣönde. 8Na wën, acï kuut ke kɔc e tïŋ, ke ke gäi, ku leckï Nhialic, Raan cï riɛl cït ee kënë gam kɔc.

Yecu Acɔl Mathayo

(Mak 2:13-17; Luk 5:27-32)

9Na wën, acï Yecu jäl ëtɛ̈ɛ̈n, ke tïŋ raan cɔl Mathayo, arɛ̈ɛ̈r ë maktap de athölbö yic, ago Yecu yɔ̈ɔ̈k an, “Kuany a cök.”

Go rɔt jɔt, ku kuɛny cök.

10 # Luk 15:1,2. Na wën, të rëërë Yecu ɣööt ke cäm, ke kɔc ë athölbö tɔ kut ë ke jɔ bɛ̈n, ku kɔc ë kërac looi, bïk ku nyuckï piny në yen ëtök, yen kekë kɔckɛn ë piööcë. 11Na wën, acï Parithai e tïŋ, ke ke thiëc kɔckɛn ë piööcë, an, “Eeŋö ciëmë Bɛ̈nyduön ë wëët kekë kɔc ë athölbö tɔ kut ku kɔc rac?”

12Na wën, acï Yecu e piŋ, ke ke yöök an, “Kɔc piɔl gup acïkï akïïm ee kɔɔr, ee kɔc tök gup tei. 13#Math 12:7; Ɣodh 6:6. Lakï tei, kaarkï cöökë thar abäk yök, Yɛn kɔɔr kokdepiɔ̈u, acie kë bïï nɔ̈k en kaar, yɛn ë cïï bɔ̈ bä kɔc piɛth piɔ̈ɔ̈th bɛ̈n cɔɔl, bïk kepiɔ̈ɔ̈th puk, ee kɔc ë kërac looi kek aa bä bɛ̈n cɔɔl.”

Thiëc në Biäk de Reec de Këcam

(Mak 2:18-22; Luk 5:33-39)

14Na wën, ke kɔcpiööcë Jɔn ke ke bɔ̈ të nu yen, bïk ku luelkï an, “Eeŋö ye wok cool ë reec cäm, wok wokë Parithai, ku kɔckuön ë piööcë acïkï cäm ee rɛɛc?”

15Go Yecu ke yɔ̈ɔ̈k an, “Duëër wɛ̈ɛ̈t riëëc ë monythiëk aa dhiau, të ŋootë monythiëk ke tɔ̈u ke keek? Akööl abïk bɛ̈n, akööl bï monythiëk jɔt ë keyiic, yen abï kek cäm rɛɛc.

16“Acïn raan ee lupɔ cï piac ɣɔɔc kaac ë lupɔ thɛɛr kɔ̈u, na loi yen aya, kë cï piac ɣɔɔc abï lupɔ thɛɛr tɔ rɛɛt, ago të cï rɛɛt go dït awär man wään. 17Ayï mɔ̈n cï piac dhiim acie tääu ë athep thɛɛr yiic, na loi yen aya, ke atheep abïk yiic rɛɛt, ago mɔ̈u lɔ wei, ku riääk atheep, mɔ̈u cï piac dhiim aye tääu ë atheep cï piac looi yiic, agokï tɔ̈u apiɛth kedhie.”

Nyan de Bɛ̈ny de Alathkëër ku Tiiŋ Wään Jak Lupɔ de Yecu

(Mak 5:21-43; Luk 8:40-56)

18Na wën, aguïïr keek ee kakë, ke bɛ̈ny tök bɔ̈, ku gut enɔm piny ë yenɔm, ku lueel an, “Nyandï acï thou ënɔnthiin wënë, ku bä tei, thanyë yïcin ë yeguöp, ku abï bɛ ɣɔ̈ɔ̈r.

19Go Yecu rɔt jɔt, ku kuɛny cök, ayï kɔckɛn ëpiööcë aya.

20Na wën, ke tik bɔ̈, tiiŋ ë riɛm cool ee kuëër ë yeguöp ë run kathiëër ku rou, go bɛ̈n ë yekɔ̈u ciëën, bï ku jiɛk lupɔde thok, 21aye lueel ë yepiɔ̈u an, “Të jak ɛn lupɔde tei, ke yɛn bï dem.”

22Go Yecu rɔt puk, na wën, aacï e tïŋ, ke lueel an, “Rom yïpiɔ̈u, nyanë, gämdu acï yï tɔ piɔl.” Go tiiŋë dem ë thaar manë guöp.

23Na wën, acï Yecu bɛ̈n ɣön ë bɛ̈ny awën, ke tïŋ kɔc ë kɛŋ kooth ku kut ë kɔc awou, 24go ke yɔ̈ɔ̈k an, “Nyaikï, nyanthiinë akën thou, anin tei.” Agokï dɔl guöp. 25Na wën, aacï kut ë kɔc ciɛɛc biic, ke lɔ ɣöt, le ku dɔm ciin, go nyanthiinë rɔt jɔt. 26Go jamë tɛɛi ë pinyë nɔm ëbɛ̈n.

Yecu Atɔ Cöör Kaarou Waar

27Na wën, acï Yecu jäl ëtɛ̈ɛ̈n, ke cöör kaarou ke ke biɔth ecök, ke ke cöt, luelkï an, “Wën ë Debid, tɔ yïpiɔ̈u kok wekë wook.”

28Na wën, acï bɛ̈n ɣöt, ke cöör ë ke bɔ̈ të nu yen, go Yecu ke thiëëc an, “Gamkï nɔn duɛ̈ɛ̈r ɛn ee kënë lëu ë luɔi?”

Gokï lueel an, “Ɣɛɛ, Bɛ̈nydït.”

29Go ke jak nyïïn, ku lueel an, “Acït man ë gämduön cä wek gam, ë tɔ̈u tëde week.” 30Go ke liep nyïïn. Na wën, ke ke lom Yecu thook arëët an, “Duökï lëk raan däŋ mäthdhiëën.”

31Ku keek, të cï kek jäl, ke ke tɔ rinke tɛɛi ë pinyë nɔm ëbɛ̈n.

Yecu Atɔ Raan cïï Jam Lëu Waar

32Na wën, ajëlkï, ke ke bïï raan të nu yen raan cïn ethok tën ee jam, ku ade guöp jɔŋ rac. 33Ku të cï jɔŋ rac ciëëc bei ë yeguöp, ke jam en raan wën cïn ethok tën ee jam: go kuut ke kɔc gäi, luelkï an, “Akënë kɔn tïŋ en kë cït ee kënë paan ë Yithriɛl.”

34 # Math 10:25; 12:24; Mak 3:22; Luk 11:15. Acï Parithai lueel tei an, “Aye jɔɔk rac ciëëc bei në riɛl ë bɛ̈nydït ë jɔɔk rac.”

Yecu Akok Piɔ̈u kekë Kɔc

35 # Math 4:23; Mak 1:39; Luk 4:44. Go Yecu pɛ̈ɛ̈nydït lɔ caath yiic kedhie ayï bɛ̈i kedhie, aye kɔc wɛ̈ɛ̈t ë ɣöötkɛn ke Nhialic yiic, ku ye wëlpiɛth ke ciɛɛŋ guiir, ku ye juäi tɔ dem ë kɔc yiic ëbɛ̈n, ayï jɔɔk nu ë kɔc gup ëbɛ̈n. 36#Kuɛ̈n 27:17; 1 Mel 22:17; 2 Lëk 18:16; Edh 34:5; Mak 6:34. Na wën, acï kuut ke kɔc tïŋ, ke jɔ piɔ̈u kok kekë keek, luɔi cï kek dak, ku luɔi cï kek thiäi cït man ë thök cïn raan ee ke tiit. 37#Luk 10:2. Go kɔckɛn ëpiööcë yɔ̈ɔ̈k an, “Rɛɛp cï luɔk ajuëckï, ku kɔc ë luui alikï. 38Yen läŋ wek Bɛ̈nydït ë rɛɛp cï luɔk an, bï kɔc ee luui tuɔɔc ë rap yiic rɛɛpkɛn cï luɔk.”

Currently Selected:

Math 9: dip-JPB

Highlight

Copy