Math 8

Yecu Atɔ Raan Waar

(Mak 1:40-45; Luk 5:12-16)

1Na wën, acï bɛ̈n piny ë kuur nɔm, ke kuut dït ke kɔc ke ke biɔth yecök. 2Na wën, ke raan cïï wɛth dɔm ke bɔ̈, bïï ku gut enɔm piny ë yenɔm, ku lueel an, “Bɛ̈nydït, të de yïn piɔ̈u luɔi tɔ yïn a waar, ke yïn duëër ɛn tɔ waar.”

3Go Yecu yecin riɛny tueŋ, jiɛk, ku lueel an, “Anu ë yapiɔ̈u, waar guöp.” Go wɛnhde waar ënɔnthiinë. 4#Leb 14:1-32. Go Yecu lom thok an, “Du lëk raan däŋ mäthdhiëën, jël tei, lɔ nyuöthë rɔt bɛ̈ny ë ka ke Nhialic, ku gam ke cï Mothe luel, an, bï aa gam an bï aa ŋïny bï kek e ŋic.”

Yecu Atɔ Lïm de Bɛ̈ny Alathkëër tɔ Waar

(Luk 7:1-10)

5Na wën, acï Yecu lɔ Kapernaum, ke bɛ̈ny de cök alathkëër kabɔt bɔ̈ tëde yen, bï ku lɛ̈ŋ, 6an, “Bɛ̈nydït, lïm ee ya luööi adhɔt piny ɣööt, ke cï duany, acï cuil guöp arëët.”

7Go lueel an, “Yɛn bï lɔ bä lɔ tɔ dem.”

8Go bɛ̈ny alathkëër bɛ̈ɛ̈r an, “Bɛ̈nydït, yɛn cie raan röŋ wokë luɔi bï yïn lɔ ɣöndï, lueel tei ë yïthok, ke lïmdï bï dem. 9Ku yɛn ee raan nu ë bɛ̈ny cök aya, ku dɛ alathkëër ë yacök, aguɔ ŋɛk yɔ̈ɔ̈k an, ‘Lɔɔr’, ke lɔ, ku yɔ̈ɔ̈k däŋ an, ‘Bäär,’ ke bɔ̈, ku yɔ̈ɔ̈k lïmdï an, ‘Loi kënë,’ ago looi.”

10Na wën, acï Yecu e piŋ, ke gäi, ago kɔc kuany ecök yɔ̈ɔ̈k an, “Wek yɔ̈ɔ̈k ëyic, an, “Acakaa Yithriɛl nɔm ëbɛ̈n, yɛn kën gäm dïït cït ee kënë kɔn yök. 11#Luk 13:29. Ku alɛ̈k week an, “Kɔc juëc abïk bɛ̈n të lɔ aköl amiäk, ku të lɔ aköl athɛ̈i, bïk ku nyuckï piny në Abraɣam ëtök, ku Yithaak, ku Jakop, ë ciɛɛŋ de paannhialic. 12#Math 22:13; 25:30; Luk 13:28. Ku wɛ̈ɛ̈t ke ciɛɛŋ abïï ke cuat tëcool nu biic ya, tɛ̈ɛ̈n abï dɛ dhiëëu ku ŋëny de lec.” 13Go Yecu bɛ̈ny alathkëër yɔ̈ɔ̈k an, “Lɔ, cït man cï yïn ë gam, ë tɔ̈u aya tëde yïn.”

Ago lïmde dem ë thaarë guöp.

Yecu Atɔ Kɔc Juëc Waar

(Mak 1:29-34; Luk 4:38-41)

14Na wën, acï Yecu bɛ̈n ɣön ë Petero, ke tïŋ dhiɔm de Petero adhɔt piny ke juäi. 15Na wën, ke jiɛk cin, go juäi päl piny, go rɔt jɔt, le keek luöi këcam.

16Na ɣɔn thëën, acï akɔ̈l lɔ piny, ke ke bïï kɔc juëc tëde yen, kɔc de gup jɔɔk rac, go jɔɔk cieec ë kɔc gup në jam de yenthok, ku tɔ kɔc tök dem kedhie, 17#Yith 53:4. ago jam aa yic jam ɣɔn cï lueel ë tiët Yithaya an, “Yen guöp acï tëtöökuɔ nööm, ku acï juɛ̈ikuɔ jɔt.”

Kɔc bïï Aa Kɔc Kuany Yecu Cök

(Luk 9:57-62)

18Na wën, cï Yecu kuut dït ke kɔc tïŋ ë yeŋeŋ, ke yöök kɔc an, Jëlku lok lɔŋtui. 19Na wën, ke raan tök bɔ̈, raan ë löŋ gɔ̈ɔ̈r, bï ku yöök an, “Bɛ̈ny ë wëët, yïn bä kuany cök, të de yen të le yïn thïn.”

Kɔc bïï Aa Kɔc Kuany Yecu Cök

(Luk 9:57-62)

20Go Yecu yɔ̈ɔ̈k an, “Awɛn adekï ɣöötkɛn cï wec piny, ku diɛt nhial adekï ɣööt, ku Wën ë Raan acïn të kɛn en enɔm.”

21Ku yöök ë raan däŋ ë kɔckɛn ë piööcë yiic an, “Bɛ̈nydït, päl ɛn ë ya kɔn lɔ la waar tɔ̈ɔ̈u.”

22Go Yecu yöök an, “kuany a cök, päl kɔc cï thou ë ke thiäk kɔckɛn cï thou.”

Yecu Atɔ Apiöök lɔ Dïu

(Mak 4:35-41; Luk 8:22-25)

23Na wën, acï lɔ ë abëlic, ke kuany cök ë kɔckɛn ë piööcë. 24Na wën, ke gök dïït ë amaŋ jɔt rɔt wiir, arëk abï abël kum ë apiöök, ku anin. 25Go kɔckɛn ë piööcë bɛ̈n tëde yen, bïk ku päckï, lueelkï an, “Bɛ̈nydït, kony wook, wok thou.”

26Go keek yɔ̈ɔ̈k an, “Eeŋö riääc wek, wek kɔc dɛk ë gam?” Na wën, ke jɔt rɔt, go yom dït jɔ̈ɔ̈ny ku jiëëny wɛɛr, gokï lɔ dui arëët.

27Go kɔc gäi, luelkï an, “Ee raan cït ŋö ee kënë, acakaa yom ayï wɛ̈ɛ̈r ke ke piŋ löŋde?”

Yecu Atɔ Röör Kaarou Waar Röör de Gup Jɔɔk rac

(Mak 5:1-20; Luk 8:26-39)

28Na wën, acï ɣet lɔŋtui, të nu piny de kɔc ke Gadaren, ke räm kekë kɔc kaarou kɔc de gup jɔɔk rac, abïkï bei ë rɛ̈ŋ yiic, ee kɔc gäi piɔ̈ɔ̈th arëët, an a cïn en raan duëër tëëk ë kueerë. 29Na wën, ke ke cöt an, “Eeŋöda në yïn, yïn Yecu, Wën ë Nhialic? Cï bɛ̈n eenë ke akööl ë ke ŋoot, bä wo bɛ̈n leeŋ piɔ̈ɔ̈th?”

30Ku de luny dïït ë kudhuur ëtɛ̈ɛ̈n, amec ke keek ëmääth, ke ke nyuäth. 31Go jɔɔk rac lɔŋ an, Të cieec yïn wook biic, päl wook, buk jäl ke wo lɔ ë luny ë kudhuuric.”

32Ago keek yɔ̈ɔ̈k an, “Lakï. Na wën, acïk bɛ̈n bei, ke ke lɔ ë luny ë kudhuuric, ku jɔ luny ë kudhuur ëbɛ̈n riŋ ërïpïp ke ke lɔ piny agör yɔu, lek röt dɛɛny wiir, agokï thou ë pïïu yiic.

33Go kɔc wën ë keek tiit gokï kat jëlkï lek pänydït, lek käŋ guiir kedhie, ku guiirkï ka ke kɔc de gup jɔɔk. 34Na wën, ke pänydït ëbɛ̈n ke ke lɔ biic bïk bɛ̈n rɔ̈m në Yecu, na wën, acïk tïŋ, ke läŋkï an, bï jäl pinyden.

Currently Selected:

Math 8: dip-JPB

Highlight

Copy