Math 10

Tuuc Kathiëër ku Rou

(Mak 3:13-19; Luk 6:12-16)

1Na wën, aacï kɔckɛn ë piööcë cɔɔl, kɔc kathiëër ku rou, ke ke gëm riɛl bï kek jɔɔk rac cieŋ, bïk ke ciëëc bei, ku gëm keek riɛl bï kek juäi tɔ dem ëbɛ̈n ayï jɔɔk nu ë kɔc gup. 2Rin ke tuuc kathiëër ku rou kï, mɛnh tueŋ, ee Thimon, acɔl Petero, ku Andereya mänhë, Jakop wën ë Dhebedayo, ku Jɔn mänhë, 3Ku Pilip, ku Bartholomayo, ku Thoma, ku Mathayo raan ë athölbö tɔ kut, ku Jakop wën ë Alapayo, ku Lebbia, rinkɛn ciëën acɔlke Thɔddayo, 4Ku Thimon raan ë Kanaan, ku Judath Yithkariɔt, raan ë nyiin en aya.

Luɔi de Kɔc Kathiëër ku Rou

(Mak 6:7-13; Luk 9:1-6)

5Kɔckë kathiëër ku rou acï Yecu ke tooc, ku yöök keek an, “Duökï röt yiɛl ë kueer ë Juöör, ayï pänydïït ë Thamaria ëbɛ̈n duökï lɔ thïn, 6dhiɛlkï lɔ të nu amɛ̈l cï määr, amɛ̈l ke baai de Yithriɛl. 7Ku të la wek, yak wël guiir an, ‘Ciɛɛŋ de paannhial acï guɔ thiɔ̈k.’ 8Takï kɔc tök dem, takï kɔc cïï wɛth dɔm takï ke waar gup, kɔc cï thou takï ke jɔt röt abïk pïïr, ciëëckï jɔɔk rac bei ë kɔc gup, we cï miɔɔc ë dhuëëŋ, yak miööc ë dhuëëŋ aya. 9Duökï adhääp ë muk ë atheepkun yiic, ayï atek, ayï ayöm, duökï keek ë muk, 10#1 Kor 9:14; 1 Tim 5:18. ayï anyɔŋɔ në këde kueer duökï ke muk, duökï aluluut muk kaarou, ayï war, ayï thieec, duökï ke muk, raan ë luui ee röŋ ke këdɛn ee cam.

11Ku pänydïït aa wek lɔ thïn ëbɛ̈n, ayï wut, yak kɔc luɔp, an, Raan piɛth akou? Ku jakï rëër në yen aɣet të bä wek jäl ëtɛ̈ɛ̈n. 12Ku të la wek ɣöt, ke thiëckï. 13Ku tën ee yen ɣön piɛth ëgɔk, ke we tɔ athiɛɛidun rɛ̈ɛ̈r kekë yen, ku të cïï en ee ɣön piɛth, ke we tɔ athiɛɛidun puk enɔm week. 14#Luɔi 13:51. Ku na de raan reec week tɔ ye kamaan, ku reec wëlkun piŋ, të jäl wek ë ɣönë ayï pänydïïtë, ke we jɔ abuui tɛŋ wei ë wecök. 15#Math 11:24; Cäk 19:24-28. #Luk 10:4-12. Wek yɔ̈ɔ̈k ëyic an, “Këtuc bï paan ë Thɔdom yök ku paan ë Gomoora ëkööl ë guiëërëlöŋ, acïï bï kit kekë këtuc bï pänydïïtë yök.

Yaaŋ bï Bɛ̈n

(Mak 13:9-13; Luk 21:12-17)

16 # Luk 10:3. Tiëŋkï, wek tuɔɔc abäk ciët man ë amɛ̈l cï lɔ ë aŋuööth yiic, yen aa wek pɛl cït man ë karɛc, ku yak gup ciën akɔ̈ɔ̈k cït man ë guk. 17#Mak 13:9-11; Luk 12:11,12; 21:12-15. Ku yak röt tiit ë kɔc, abïk week aa lɛɛr ë lööŋ nïïm, ku we bï aa dui ë wɛt ë ɣöötkɛn ke Nhialic yiic, 18yeka, ku we bï bɛ̈ɛ̈i ë bäny ke luök nïïm ayï meliik nïïm në biäkdï, aguɔkï aa cäätɔkɛn ë keek tɔ jäny, ku yek juöör tɔ jäny ayadäŋ. 19Ku të cï we yiɛ̈n kɔc, duökï ë diɛɛr në jam bä wek jam ku në wël bäk lueel, kë bäk lueel abï gäm week ë thaar manë guöp. 20Ku acie week ee jam, ee wëi ke Wuöördun kek ee jam ë wegup.

21 # Mak 13:12; Luk 21:16. Raan abï mänhë aa yiɛ̈n kɔc lek nɔ̈k abï thou, ku wun meth abï mɛnhde yiɛ̈n kɔc lek nɔ̈k abï thou, ku mïth abïk ater cak në wärken nïïm ayï märken nïïm, agokï ke tɔ näk. 22#Math 24:9; Mak 13:13; Luk 21:17; Math 24:13; Mak 13:13. Ku we bï maan ë kɔc kedhie në baŋ de rinkï, ku raan ë yepiɔ̈u ruut aɣet të bï käŋ thök, yen abï kony wëi. 23Ku të yɔŋ kek week ë pänydïïtë, jakï kat lak wun däŋ, wek yɔ̈ɔ̈k ëyic an, We cïï wuöt ke Yithriɛl bï thöl ë nɛ̈m, të ŋootë Wën ë Raan ke kën kɔn bɛ̈n.

24 # Luk 6:40; Jɔn 13:16; 15:20. Raan piööcë acïï raan wëët en ee wuöör, ayï lïm acïï bɛ̈nyde ee wuöör. 25#Math 9:34; 12:24; Mak 3:22; Luk 11:15. Ë loi tëde raanpiööcë të thoŋ en kekë raan ë wëët en, ku ë loi tëde lïm të thoŋ en kekë bɛ̈nyde. Të cï kek bɛ̈ny de dhiën lat tɔkï ye Beeldhebub, cïkï kɔc ke dhiënde bï aa lat arëët awär luɔi ee kek bɛ̈nyden lat?”

Raan Bïï Yïn Riɔ̈ɔ̈c

(Mak 3:13-19; Luk 6:12-16)

26 # Mak 4:22; Luk 8:17. Yen duö wek ee riɔ̈ɔ̈c ë keek, acïn kë cï kum, ke cïï bï liep nɔm, ku acïn kë cï moony, ke cïï bï ŋic. 27Kë ye lɛ̈k week tëcol, yak lueel, tëɣer, ku kë yak piŋ ë yïcic, yak guiir ë ɣööt nïïm. 28Ku duökï ë riɔ̈ɔ̈c ë kɔc näk raan guöp tei, ku cïkï wëi ke raan lëu ë näk, aŋuän luɔi bä wek aa riɔ̈ɔ̈c në Raan ë wëi ke raan lëu ë näk ayï raan guöp aya ë giɛna yic. 29Amɔ̈r kaarou, cïï ke duëërë ɣɔɔc në milim tök? Ku acïn amɔ̈ɔ̈r töŋ bï lööny piny ke kuc wuöördun. 30Acakaa nhïm ke wenïïm aye ke kueen kedhie. 31Yen duö wek ee riɔ̈ɔ̈c, wek wär amɔ̈r juëc ë piath.

Gäm ku Reec de Kërtho

(Luk 12:8-9)

32Yen tëde ka, raan ëbɛ̈n raan bï a gam ë kɔc nïïm, yen abä gam ayadäŋ ë wäär nɔm wäär nu paannhial. 33#2Tim 2:12. Ku raan ëbɛ̈n raan bï a jai ë kɔc nïïm, yen abä jai ayadäŋ ë wäär nɔm wäär nu paannhial.

Acie Mät ee Tɔŋ

(Luk 12:51-53; 14:26-27)

34Duökï ë lueel nɔn ë bä yɛn bä mät bɛ̈n tääu ë piny nɔm, yɛn ë cïï bɔ̈ bä mät tääu ë piny nɔm, ee tɔŋ en abä bɛ̈n tääu. 35#Mai 7:6. Yɛn aa bɔ̈ bä raan bɛ̈n yiëk piɔ̈u ater kekë wun, ku bä duet bɛ̈n yiëk piɔ̈u ater kekë man, ayï nyan cï thiaak kekë mamɔɔcde, 36Ku kɔc de ater në raan abïk aa kɔc ke dhiënde guöp.

37Raan nhiaar wun ayï man awär nhiëër nhiɛɛr en en, ka cïï rɔ̈ŋ kekë yɛn, ku raan nhiaar wënde ayï nyande awär nhiëër nhiɛɛr en ɛn, ka cïï rɔ̈ŋ kekë yɛn. 38#Math 16:24; Mak 8:34; Luk 9:23. Ku raan reec timde jɔt, tim cï rïïu nɔm, ku reec a biɔɔth cök, ka cïï rɔ̈ŋ kekë yɛn. 39#Math 16:25; Mak 8:35; Luk 9:24; 17:33; Jɔn 12:25. Raan yök wëike abï wëike mɔ̈ɔ̈r, ku raan mär wëike në biäkdï abï wëike yök.

Athiɛɛi

(Mak 9:41)

40 # Luk 10:16; Jɔn 13:20; Mak 9:37; Luk 9:48. “Raan dɔm week ke dɔm ɛn aya, ku raan dɔm ɛn, ke dɔm raan ë toc ɛn. 41Raan dɔm tiët ë luɔi ee yen tiët, ka bï ariöp de tiët yök, ku raan dɔm raan piɛthpiɔ̈u në luɔi ee yen raan piɛthpiɔ̈u, ka bï ariöp de raan piɛthpiɔ̈u yök. 42Ku raan bï mɛnh tök ë mïththiikë yiic miɔɔc ë bïny deyic pïïu lir tei dek ke, në luɔi ee yen raanpiööcë, wek yɔ̈ɔ̈k, ëyic an, Ariöpde acïï dak anande.”

Currently Selected:

Math 10: dip-JPB

Highlight

Copy