Math 3
3
Wɛ̈ɛ̈t de Jɔn Baptith
(Mak 1:1-8; Luk 3:1-18; Jɔn 1:19-28)
1Na ɣɔn ë aköölkë ke Jɔn Baptith bɔ̈, ke guiir wël ë jɔ̈ɔ̈r ë Judaya yic, 2#Math 4:17; Mak 1:15. kë ye lueel an, “Pɔ̈kkï wepiɔ̈ɔ̈th, ciɛɛŋ de paannhial ë guɔ thiɔ̈k. 3#Yith 40:3 (LXX). Ku raanë ee raan wään lueel tiët Yithaya an:
“Röl ë raan cöt ë jɔ̈ɔ̈ric,
an, ‘Luɔikï kueer ë Bɛ̈nydït,
Takï kuɛɛrke lɔ cit!’”
4 #
2 Mel 1:8. Ku Jɔn guöp ee lupɔ cï cuëëc ë nhiëm ë thɔ̈rɔ̈l cieŋ, ku ye yeyic duut ë thiööth, ku kën ee cam ee kɔyɔm kekë kiëc nu roor. 5Go raan ëbɛ̈n lɔ biic të nu yen, Jeruthalem ayï Judaya ëbɛ̈n, ayï kɔc nu ë Jordan yɔu ëbɛ̈n, 6ago ke baptith në yen ë wɛ̈ɛ̈r cɔl Jordan, agamkï karɛc cïk wööc.
7 #
Math 12:34; 23:33. Na wën, acï kɔc juëc tïŋ, kɔc ke Parithai kekë Thadokai, ke ke bɔ̈ bïï ke bɛ̈n baptith në yen, ke ke jɔ yɔ̈ɔ̈k an, “Wek mïth ke karɛc, eeŋa ë yöök week an, bäk kat e agönh bï bɛ̈n? 8Yen aa wek luɔk në luɔi piɛth, luɔi bï röŋ në puŋëpiɔ̈u, 9#Jɔn 8:33. ku duökï ee lueel ë wepiɔ̈ɔ̈th an, wok de wäärda Abraɣam, Nhialic alëu bïï mïth ke Abraɣam cak në kɔikë. 10#Math 7:19. Ku ënɔɔnë yiëp ë guɔ tääu të nu mei ke tiim, tim ëbɛ̈n tim reec luɔk në mïth piɛth aye yiɛp piny, ku cuɛtë mɛɛc.
11Yɛn dï, wek a baptith ë pïïu tei në këde puŋëpiɔ̈u, ku raan bɔ̈ ë yacök ee raan ril ë yɛn, yɛn cïï röŋ luɔi bän wɛɛr ke yencök muk, yen abï we baptith në Wëidït ɣer ku në mac, 12amuk kën ee yen rap kɔ̈l ë yeciin, ku abï yiɛɛude nap abï lipëlip, ago agamɔde kuöt ë adhaanic, ku nyop ayiɛl ë many cie lëu në näk.”
Jool de Yecu
(Mak 1:9-11; Luk 3:21-22)
13Na ɣɔn, ke Yecu bɔ̈ bei ë Galili, bï Jordan të nu Jɔn, bï bɛ̈n baptith në yen. 14Go Jɔn an, jiɛi an, “Bä të nuö yɛn, ku yɛn adï cï baptith ë yïn?”
15Go Yecu puk nɔm an, “Päl ënɔɔnë, apiɛth alë, luɔi bï wok luɔi de piathëpiɔ̈u thöl ëbɛ̈n.” Go gam.
16Na wën, acï guɔ baptith, ke Yecu bɔ̈ bei ë pïïu yiic ënɔɔnthiinë, na wën, dï, ke tënhial liep eyic en, ago wëi ke Nhialic tïŋ ke ke lööny piny ke cït guöp guuk, bï ku nyuuc ë yenɔm, 17#Cäk 22:2; Diɛt 2:7; Yith 42:1; Math 12:18; 17:5; Mak 1:11; Luk 9:35. ku bɔ̈ röl paannhial, röl lueel en an, “Wëndiën nhiaar kï, ee kënë, wën miɛt ɛn piɔ̈u wo yen.”
Currently Selected:
Math 3: dip-JPB
Highlight
Share
Copy
Want to have your highlights saved across all your devices? Sign up or sign in
The Bible in Jieeng de Padang © The Bible Society in South Sudan, 2011.
