JOHANE 14

Jesu, chia eghenda kwa Aba

1Niko Jesu ukawizera, “Msakeja wasi ngolonyi konyu; mrumirienyi Mlungu, nirumirienyi na ini wori. 2Nyumbenyi kwa Aba gheko malalo mengi ghekaia; ngera ghiserekoghe, kumangu namerie kumghoria. Ela idana niaghenda kum'boisira malalo. 3Nani ngaghenda na kum'boisira malalo, nichawuya sena nimdo cha kwapo, mpate kukaia andu nikaiagha. 4Nenyo mwaiichi chia ya andu nighendagha.”

5Tomasi ukamzera, “Bwana, andu kughendagha ndedikumanyire anduangi; dichaimanya wada chia?” 6Jesu ukamtumbulia, “Ini nuo Chia, na Loli, na Irangi; mndungi ndedimagha kucha kwa Aba useidirie kwapo. 7Ikakaia muniichi, wokoni na Aba mwamwichi. Kufuma idana mwammanya, sena mwameria kummbona.”

8Filipo ukamzera, “Bwana diwonyere Aba, nesi dichakatwa.” 9Jesu ukamzera, “Uluma lose dakanya ndekuniichi Filipo? Uo uniwonie ini, wamerie kummbona uja Aba. Kughora wada sena, ‘Kudiwonyere Aba?’ 10Welee, ndekurumirie angu ini neko andenyi kwa Aba, na Aba oko andenyi kwapo? Malagho ghose nawuyamghoria siwueghora kwa nguma yapo anduangi, ela uja Aba uko andenyi kwapo, nuo wawuyabonya kazi rake. 11Nirumirienyi iji namzera angu neko andenyi kwa Aba, na Aba oko andenyi kwapo. Iji mserumiriagha, rumirienyi kwa wundu ghwa rija kazi reni. 12Namghoria loli, uo unirumiriagha, uchabonya iro kazi niribonyagha; ee, nao uchabonya na zima mbaa kuchumba iri; angu niaghenda kwa Aba. 13Icho chose mchaalomba kwa irina japo, nicham'bonyera; Aba upate kukaswa andenyi ya Mwana. 14Mkanilomba kindo chingi kwa irina japo nicham'bonyera.

Ilaghiro ja Roho Mweli

15“Mkanikunda mchaiwadia memu yapo. 16Nani nichamlomba Aba, nao uchamneka Mtesia mzima, uchaakaianya na inyo kwa kala na kala. 17Uo ni Roho wa loli, wurumwengu ghusedimagha kummbusa, angu ghusedimagha kummbona; hata kummanya anduangi. Ela inyo mwamwichi, angu oko andwamweri nenyo, nao uchakaia andenyi konyu.

18“Sichaamsigha wakiwa anduangi, ela nichacha konyu. 19Kwa ngelo vui wurumwengu ndeghuchaaniwona sena, ela inyo mchaniwona, na kwa kukaia neko moyo, inyo wori mchakaia moyo. 20Ngelo iyo ikavika, mchamanya angu ini neko andenyi ya Aba, na inyo moko andenyi kwapo, na ini andenyi konyu. 21Uo uiwadagha memu yapo na kuikatisha, nuo unikundagha; na uo unikundagha, uchakundwa ni Aba, na ini nichamkunda na kukuwonyera ini moni kwake.”

22Juda (suo ungi Iskarioti) ukamzera, “Bwana, idimika wada oho kukuwonyera kodu kuseko na kukuwonyera kwa wurumwengu?” 23Jesu ukamtumbulia, “Mundu ukanikunda, uchajiwadia Ilagho japo, na Aba uchamkunda, nesi dichacha na kukaia andwamweri nao. 24Uo usenikunde, ndeghiwadagha malagho ghapo anduangi. Na ilagho mujisikiragha si japo jingi, ela ni ja Aba uo orenidumieghe.

25“Namghoria malagho agha ingelo niko andwamweri nenyo, 26ela uja Mtesia uja Roho Mweli, Uo Aba uchaamduma kwa irina japo, uchamfundisha kula ilagho, na kumkumbusa maza rose neremghorieghe.

27“Namsighia sere, sere yapo namneka, simnekagha seji wurumwengu ghubonyagha. Msakeja wasi ngolonyi konyu, hata msakeobua. 28Mwameria kusikira ngimzera, ‘Niaghenda sena nimmburie.’ Ngera modenikunda, kumangu mwaboilwa; kwa kukaia naawuyaghenda kwa Aba, angu Aba ni m'baa kunichumba ini. 29Na idana namghoria imbiri ghisebonyekie, eri iji ghabonyeka, mpate kurumiria. 30Sidimagha kughora nenyo luma, angu m'bonyi nguma wa wurumwengu ughu waawuyacha; nao ndewadie nguma ringi aighu yapo anduangi. 31Ela yafwane wurumwengu ghumanye angu namkunde Aba, niko nawuyabonya sa iji koni orenilaghirieghe. Wukenyi difume aha.

Currently Selected:

JOHANE 14: TAITA

Highlight

Copy