JOHANE 13

Jesu kuwioghosha wanughi wake maghu

1Nao imbiri ya Ndima ya Pasaka, Jesu ukimanya angu ngelo yake yavika esigha ughu wurumwengu, uwuye kwa Aba, na seji orekoghe ukiwikunda wandu wake wiko wurumwengunyi, ukawikunda wandu hata kutua.

2Ngelo ya vindo va nakenyi, uja Mmbiwi orekoghe wameria kumngira Juda mwana wa Simoni Iskarioti ngolo emfunya Jesu. 3Jesu moni ukimanya angu uja Aba wamnekie vilambo vose mikonunyi kwake, na angu orefumieghe kwa Mlungu, sena uaghenda kwa Mlungu; 4ukawuka ngelo ya vindo, ukainja nguwo rake na kukufunga na taulu. 5Nao ukadungiria machi beseninyi, ukazoya kuwioghosha wanughi wake maghu, na kuwiaghia kwa ija taulu orekufungieghe nayo. 6Nao ukavika kwa Simoni Petro. Petro ukamzera, “Bwana kuanioghosha maghu?”

7Jesu ukamzera, “Agho nighibonyagha ndekughimanyagha idana kungi, ela kuchaghimanya konyuma.” 8Petro ukamzera, “Na jingi ndekuchaanioghosha maghu ghapo anduangi.” Jesu ukamzera, “Ngera nisekuoghoshagha maghu-lee, ndekuna wungara ghungi na ini anduangi.” 9Simoni Petro ukamzera, “Bwana nioghoshe; si maghu ghiekeri, ela hata mikonu na chongo wori.” 10Jesu ukamzera, “Uo wameria kukuoghosha ndewuyaakunda kukuoghosha sena, ela maghu gheni; angu wameria kuela. Nenyo mwaelie, ela si inyo mmbose anduangi.” 11Jesu oremmanyireghe uo uchaamfunya, niko oreghorieghe, “Inyo mwaela, ela si inyo mmbose anduangi.”

12Umeria kuwioghosha maghu ghawo, ukarwa nguwo rake, na kusea kidombo wulalonyi kwake. Ukawikotia, “Mwatambukilwa ni agho nam'bonyera idakoni?#Lk. 22.27 13Inyo mwadaniwanga Mwalimu na Bwana, nenyo mwabonya nicha; angu niko koni niko. 14Ikakaia ini Bwana na Mwalimu onyu namuoghosha maghu ghenyu, yamfwana na inyo wori kuoghoshana maghu mmbeni na mmbeni. 15Angu ini nammbikia fwana, eri inyo m'bonyeghe wokoni seji nam'bonyera. 16Namghoria loli, mdumiki ndekaiagha m'baa kuchumba bwana wake, hata mdumi ndekaiagha m'baa kuchumba uo umdumie anduangi.#Mat. 10.24; Lk. 6.40; Joh. 15.20 17Ngera mwaghimanya agha, mwarasimilwa mkaghibonya.

18“Siwueghora huwu kwa inyo mmbose anduangi, angu nawiichi awa niwisaghue, ela ni suti Maandiko ghikatie, agho ghighambagha, ‘Uo dijanye vindo vapo, waghalukie ulo nani.’#Zab. 41.9 19Nani namghoria agha imbiri ghisebonyekie, eri ghikabonyeka, mpate kurumiria angu Ini Nuo Moni. 20Namghoria loli, Uo ummbusagha mndungi nimdumagha, uaniwusa ini, na uo uniwusagha ini, uammbusa uo orenidumieghe wori.”#Mat. 10.40; Mk. 9.37; Lk. 9.48; 10.16

Jesu kughora kiimbiri angu uchafunywa

(Mat. 26.20-25; Mk. 14.17-21; Lk. 22.21-23)

21Jesu umeria kughora agho, ukasirimika ngolonyi kwake ukaghamba worinyi, “Namghoria loli, umu onyu uchanifunya!” 22Nao wanughi wake wikazighanana wisemmanyagha uo umghoragha anduangi. 23Umu wa wanughi, uo Jesu oremkundieghe, orekoghe wasea kidombo kaavui na Jesu. 24Nao Petro ukamkunyiria umkotie Bwana ngera uo umghoragha nani. 25Na uo mnughi ukikaia kaavui na Jesu ukamkotia, “Bwana nani?”

26Jesu ukatumbulia, “Ni uo nichaamshingia kibelele cha mkate na kumneka.” Nao uendashingia kibelele cha mkate, ukamneka Juda mwana wa Simoni Iskarioti. 27Na Juda umeria kuchiwusa icho kibelele cha mkate, Shetani ukamngia. Jesu ukamzera, “Ijo kukunde kubonya jibonye shwa-shwa.” 28Hata ndekorekoghe na ungi wa awo werekoghe mezenyi oremanyireghe kwaki oremzeragha huwo anduangi. 29Wamu wikaghesha wei angu Juda orekoghe ukidwa mfuko ghwa pesa, Jesu odemzera ughuo ivo vindo vikundikagha kwa ndima, angu kewada uneke wakiwa kindo chimu. 30Nao Juda uendachiwusa icho kibelele cha mkate, ukafuma shighadi shwa. Nako korekoghe kio.

Momu mmbishi

31Nao iji Juda wameria kufuma shighadi, Jesu ukaghamba, “Idana Mwana wa Mdamu wameria kukaswa, na Mlungu wameria kukaswa andenyi kwake. 32Ngera Mlungu wakaswa andenyi kwake, huwo koni Mlungu uchamkasa Mwana andenyi kwake uo moni; nao uchamkasa shwa wori.

33“Wanake, ngelo ekanya nenyo yasighwa ndinieri. Mchanilola, nani namghoria sa iji koni nereghorieghe vilongozi va Wayahudi, ‘Andu nighendagha, inyo ndemdimagha kucha anduangi.’#Joh. 7.34 34Momu mmbishi namneka inyo: Kundanenyi mmbeni na mmbeni; sa iji koni neremkundieghe, nenyo mkundane woruwo.#Joh. 15.12,17; 1 Joh. 3.23; 2 Joh. 5 35Mkakundana, wandu wose wichamanya angu inyo moko wanughi wapo.”

Jesu kughora kiimbiri angu Petro uchamkana

(Mat. 26.31-35; Mk. 14.27-31; Lk. 22.31-34)

36Na Simoni Petro ukamkotia, “Bwana kughenda hao?” Jesu ukatumbulia, “Andu cnighendagha ini, ndekudimagha kuninugha idana anduangi, ela kuchaninugha konyuma.” 37Petro ukamzera, “Bwana, kwaki nisedimagha kukunugha idana? Ini neko tayari kufwa kwa wundu ghwako.” 38Jesu ukatumbulia, “Loli kwadima kufwa kwa wundu ghwapo? Nakughoria loli, njogholo ndeichadeda hata kwameria kunikana kadadu.”

Currently Selected:

JOHANE 13: TAITA

Highlight

Copy