KUZOYA 28

1Niko Isaaka ukammbanga Jakobo, ukamrasimia na kumlaghira ukighamba, “Kusakelowua mwai ungi wa Kikanaani. 2Wuka kughende Padan-aramu, nyumbenyi kwa wawayo Bethueli, kupate muka kufuma kwa umu wa wai wa awuyo Labani. 3Mlungu Uwadie-Ndighi-Rose ndekurasimie, kuve kuchurikie na kukaia mbari nyingi. 4Mlungu ndekurasimie oho na kivalwa chako seji oremrasimieghe Abrahamu, kupate kujiwusa isanga kwawuyajikaia kiwughenyi sa iji koni oremnekieghe Abrahamu.”#Kuz. 17.4-8 5Huwo Isaaka ukamduma Jakobo, nao ukaghenda Padan-aramu kwa Labani mwana wa Bethueli Muarami, mruna Rebeka, mae Jakobo na Esau.

Esau kulowua muka umu

6Esau orewonieghe seji Isaaka wamrasimia Jakobo, na kumduma cha Padan-aramu, upate muka kufuma aho na seji oremlaghirieghe usakelowua waka wa Kikanaani. 7Wokoni ukawona seji Jakobo wawisikira ndee na mae na kughenda cha Padan-aramu. 8Esau ukamanya angu waka wa Kikanaani ndewim'boie ndee Isaaka. 9Aho Esau ukaghenda kwa Ishmaeli mwana wa Abrahamu, ukammbusa muka umu kufuma aja, mwai wa Ishmaeli uwangwaghwa Mahalathi, nao ni mruna Nebaiothi, kuchuria waja waka orewilowueghe.

Ndodo ya Jakobo aja Betheli

10Nao Jakobo ukafuma Beer-sheba ukaghenda cha Harani. 11Uendavika andu kumu, iruwa janeng'ena, ukalala aho. Ukashoa igho jimu upate kurarisha chongo chake, ukalala aja kio chija. 12Nao ukaloda ndodo, ukawona ngazi yadungwa andoenyi, na mudo ghwaro ghwavika mlungunyi; na weke malaika wa Mlungu werekoghe wikijoka na kusea kwa iyo ngazi.#Joh. 1.51 13Na BWANA ukakaia kimusi naighu yaro ukaghamba, “Ini ne BWANA, Mlungu wa ndeyo Abrahamu, na Mlungu wa Isaaka. Nichakuneka oho na kivalwa chako isanga iji kwawuyalala idana;#Kuz. 13.14-15 14na kivalwa chako chichakaia kingi sa teri ya ndoenyi, na oho kuchaera cha magharibi, mashariki, kaskazinyi na kusinyi. Na kwako oho na kivalwa chako, mbari rose ra ndoenyi richanilomba irasimio.#Kuz. 12.3; 22.18 15Ola neko andwamweri na oho kukuwika na kukulindia andu kose kuchaaghenda, nani nichakuwunja isanga iji; angu sichaakusigha hata nameria kujikatisha ijo nakulaghira.” 16Nao Jakobo ukawuka kufuma dilonyi kwake ukaghamba, “Loli BWANA oko aha na ini seremanyireghe anduangi!” 17Ukaobua ukaghamba, “Aha ni andu koobosha loli-loli! Kwa loli aha niko nyumba ya Mlungu iko, sena aha ni mbenge ya mlungunyi.”

18Nao Jakobo ukawuka kokesho kio, ukawada jija igho orejirarishireghe chongo chake, ukajidunga kimusi sa nguro, ukajiwika wakfu kwa kujidunga mavuda aighu yaro. 19Ukakuwanga andu aja, Betheli, ela koimbiri muzi ugho ghorewangwaghwa Luzu. 20Jakobo ukabonya ighemi ukighamba, “Mlungu ukakaia andwamweri nani na kunilindia chienyi, unineke mkate ghoja na nguwo rerwa, 21hata niwuye kwa sere nyumbenyi kwa aba, niko BWANA uchakaia Mlungu wapo. 22Na igho iji najidunga sa nguro, jichakaia nyumba emtasira Mlungu, nani nichafunya ifungu ja ikumi ja ivo vose uchaanineka.”

Currently Selected:

KUZOYA 28: TAITA

Highlight

Copy