KUZOYA 29

Jakobo kuvika mzinyi kwa Labani

1Niko Jakobo ukaghenda imbiri na charo chake, ukavika isanga ja wandu wa mashariki. 2Nao ukizighana ukawona kiriwa chimu mlambenyi, na maranu adadu gha ng'ondi ghiko mbai-mbai yaro. Aho niko mfugho rose rinywagha machi, nacho cherefinikiroghe na igho ibaa momunyi kwaro. 3Iji ng'ondi rose racha, niko walisha wijibingilishagha ijo igho jifume momunyi kwa icho kiriwa, na kurinyosha ng'ondi machi. Hata ng'ondi rose rikameria kunywa niko wijiwunjagha ijo igho sena.

4Nao Jakobo ukawikotia awo walisha, “Wele wanidu, mwafuma hao?” Nawo wikamtumbulia, “Daafuma Harani.” 5Ukawikotia, “Mwamwichi Labani mwana wa Nahori?” Wikaghamba, “Damwichi.” 6Ukawikotia sena, “Oko mana?” Wikatumbulia, “Oko mana; hata na mwai wake Raheli hoja wawuyacha na ng'ondi rake.” 7Nao ukawizera, “Ndoe yaduagha dime, si ngelo ingi ya kudimisha mfugho, rinyoshenyi machi murilishe sena.” 8Nawo wikatumbulia, “Ndedidimagha; daawuyawesera ng'ondi rose rikwane chiaimweri, na igho jiinjo kufuma momunyi kwa kiriwa, ima dirinyoshe ng'ondi machi.”

9Nao iji orekoghe ukidedanya nawo, Raheli ukavika na ng'ondi ra ndee, angu nuo orekoghe ukirilisha. 10Nao iji Jakobo wammbona Raheli mwai wa Labani, na ng'ondi ra awuye wake Labani, ukawuka, ukaghenda na kujiinja jija igho kufuma momunyi ghwa chija kiriwa, ukarinyosha machi ng'ondi ra awuye wake Labani. 11Jakobo ukamsusugha Raheli, ukalila kwa kuboilwa. 12Ukamghoria Raheli angu uo ni kichuku cha ndee, nao ni mwana wa Rebeka. Raheli ukakimbia kwendamghoria ndee.

13Hata iji Labani wasikira wuvoro ghwa Jakobo mwana wa mruna, ukafuma na iseghe kummara; ukamshishidia na kumsughusa, ukamreda nyumbenyi kwake. Nao Jakobo ukamghoria Labani malagho ghose. 14Labani ukamzera, “Loli ko bagha yapo cheni.” Nao ukakaia kwake mori ghumweri.

Jakobo kudumika kwa wundu ghwa Raheli na Lea

15Nao Labani ukamzera Jakobo, “Welee, ni hachi kunidumikie duu wei angu ko kichuku chapo? Nighorie kuchakunda ifunguki kwa kunidumikia?” 16Labani orekoghe na wai wawi. Uo m'baa orewangwaghwa Lea, na uo mtini orewangwagha Raheli. 17Lea orekoghe na meso manyonge, ela Raheli orekoghe ufwano na ndighi. 18Nao Jakobo ukamkunda Raheli ukaghamba, “Nichakudumikia miaka mfungade kwa wundu ghwa mwai wako mtini Raheli.” 19Labani ukaghamba, “Ni baa kukuneka oho kuchumba kumneka mndungi mzima. Kaia kwapo kunidumikie.” 20Jakobo ukamdumikia Labani miaka mfungade kwa wundu ghwa Raheli, ela kwake iyo miaka ikawoneka sa matuku matinieri, angu oremkundieghe Raheli na ndighi.

21Niko Jakobo ukamzera Labani, “Ngelo derepataneghe yakata, nineke muka wapo nimmbuse.” 22Labani ukabonya karamu na kuwiwanga wandu wose wa aja. 23Ela ngelo ya nakio, wulalo ghwa Raheli, ukamghenja Lea kwa Jakobo; nao Jakobo ukammbusa. 24Labani ukamfunya mwai wake wa kazi Zilpa, ukamneka mwai wake Lea, umdumikieghe. 25Ela nakesho, Jakobo ukawona kila ni Lea, ukamzera Labani, “Kwanibonyere wada huwu? Welee, nechi ini nedekudumikia kwa wundu ghwa Raheli? Kwaki sena kwanikalia huwu?” 26Nao Labani ukaghamba, “Ndeghibonyekagha huwo mzedu wei mwai mtini umuidie mmbao m'baa. 27Meria njumwa ndazi ya mzango gholowua na uo, ima dikuneke Raheli, kwa kunidumikia miaka imu mfungade.” 28Jakobo ukabonya wokoni, ukameria njumwa nao, niko Labani ukamneka mwai wake Raheli ukaie mkake; 29sena ukamfunya mwai wake wa kazi Bilha ukamneka mwai wake Raheli umdumikieghe. 30Nao Jakobo ukammbusa Raheli wori, ela ukamkunda Raheli kuchumba Lea; ukamdumikia Labani miaka mizima mfungade.

Jakobo kuvailwa wana

31Nao iji BWANA wawona angu Lea ndekundo ukam'bonya upate wana, ela Raheli orekoghe kolowi. 32Lea ukapata kifu, ukava mwana wa womi, ukammbanga irina jake Reubeni; angu oreghambieghe, “Loli BWANA waghuzighana wasi ghwapo, idana mumi wapo uchanikunda.” 33Ukapata kifu sena, ukava mwana wa womi, nao ukaghamba, “Kwa kukaia BWANA wawona angu sikundo, niko wanineka uhu mwana wa womi sena.” Nao ukammbanga irina jake Simeoni. 34Ukapata kifu chimu sena, ukava mwana wa womi ukaghamba, “Idana mumi wapo uchawadana na ini, angu namvaia wana wa womi wadadu.” Kwa huwu irina jake orewangiloghe Lawi. 35Ukapata kifu sena, ukava mwana wa womi, nao ukaghamba, “Ngelo ihi nichamkasa BWANA.” Kwa huwu ukammbanga irina jake Juda; nao ukaleka kuva.

Currently Selected:

KUZOYA 29: TAITA

Highlight

Copy