ހަރުބަސްތައް 30
30
އަޖޫރު ވިދާޅުވި ބަސްތައް
1މިއީ ޔާގަތުގެ ދަރި އަޖޫރުގެ ކިބައިން ވާރިދު ވެފައިވާ އިލާހީ ބަސްފުޅުތަކެކެވެ.
މިއަޅާ މިވަނީ ބަލިކަށިވެފައެވެ. މާތްކަލާނކޯއެވެ! މިއަޅާ މިވަނީ ބަލިކަށިވެ އަޖޫޒު ވެފައެވެ. އޭ މާތްކަލާނކޯއެވެ! 2މިއަޅާއަކީ އިންސާނެކޭ ކިޔާވަރަށް ވުރެން މާ ގަމާރު މީހެކެވެ. މިއަޅާގެ ހަމަބުއްދިއެއް ނެތެވެ. 3މިއަޅާ ކިބަޔަކު ޙިކުމަތެއް ބުއްދިއެއް ނެތެވެ. މިއަޅާއަކަށް މާތްވެގެންވާ ފަރާތެއް ވެސް ނޭނގެއެވެ.
4 މާތްރަސްކަލާނގެ ނޫން ފަރާތަކަށް އުޑަށް އަރާވޮޑިގަންނަވައި ބިމަށް ފައިބާ ވޮޑިއެއް ނުގަނެވޭނެއެވެ. ވައިރޯޅި އެފަރާތެއްގެ އަތްޕުޅު ތެރޭގައި ހިފަހައްޓަވަނީ ކޮންފަރާތަކުން ހެއްޔެވެ؟ ރަޖާގަނޑެއްހެން ކަނޑު އޮޅާލައްވަނީ ކޮންފަރާތަކުން ހެއްޔެވެ؟ މިއޮތް ފުޅާ ދުނިޔެ އުފެއްދެވީ ކޮން ފަރާތަކުން ހެއްޔެވެ؟ އެކަލާނގެ އާއި އެކަލާނގެ ދަރިކަލުންގެ ނަންފުޅު އެނގެންޏާ ނިކަން ބުނެބަލާށެވެ!
5މާތްކަލާނގެ އެންގެވި ހުރިހާ ބަސްފުޅުތަކެއް ވެސް ތެދެވެ. އެކަލާނގެ ކިބަފުޅުން ވާގިއެދިގެން އަންނަ މީހާއަށް އެކަލާނގެ ރައްކާތެރިކަން ދެއްވައެވެ. 6މާތްރަސްކަލާނގެ ބަސްފުޅުގެ ތެރެއަށް ބަސްތައް އިތުރު ނުކުރާށެވެ. އެހެންނޫނީ އެކަލާނގެ ކަލެއަށް ކޯފާވެވޮޑިގެން ދޮގުވެރިއެއްގެ ގޮތުގައި ކަލޭ ބޭޒާރު ކުރައްވާފާނެއެވެ. 7އޭ މާތްރަސްކަލާނކޯއެވެ! މިއަޅާ މަރުވުމުގެ ކުރީގައި ދެކަމަކަށް އެދެމެވެ. އެކަންތައް ފުއްދަވާ ދެއްވާފާނދޭވެ. 8ފުރަތަމަ ކަމަކީ ދޮގެއް ހެދުމަށް މިއަޅާއަށް މެދުވެރި ނުކުރައްވާފާނދޭވެ. ދެވަނަކަމަކީ މިއަޅާ ފަގީރު ނުކުރައްވާނދޭވެ! އަދި މުއްސަނދިވެސް ނުކުރައްވާނދޭވެ! މިއަޅާއަށް ކިރިޔާ ބޭނުންތައް ފުދޭވަރަށް ދެއްވާފާނދޭވެ! 9މިއަޅާ މުއްސަނދި ވެއްޖެނަމަ މިއަޅާ އިނބަރަސްކަލާނގެއަށް އިންކާރުކުރެވި މިހެން ބުނެވިދާނެއެވެ. ”މާތްރަސްކަލާނގެއަކީ ކާކުހެއްޔެވެ؟“ މިއަޅާ ފަގީރު ވެއްޖެނަމަ މިއަޅާއަށް ވައްކަން ކުރެވިދާނެއެވެ. އޭރުން އިނބަރަސްކަލާނގެ މާތް ނަންފުޅަށް ހުތުރު އެރުވުނީއެވެ.
10ނޯކަރެއްގެ ޝަކުވާ ވެރިމީހާގެ ގާތު ނުކުރާށެވެ. އެހެންނޫނީ އޭނާ ކަލެއަށް ލަޢުނަތް ލާނެއެވެ. އޭގެ އަގު ކަލޭ އަދާ ކުރަން ޖެހިދާނެއެވެ.
11ބަފާއަށް ލަޢުނަތްލައި އަމައަށް ޝުކުރުވެރި ނުވާމީހުން ވެސް އުޅެއެވެ. 12އެމީހުންނަށް އެމީހުން ފެންނަނީ ނިކަން ތާހިރު ބައެއްގެ ގޮތުގައެވެ. އެކަމަކު އެއީ ފެންނުވަރާ ނަޖިސް ބައެކެވެ. 13އެމީހުން ބޮޑާކަމާއެކު ވަށައިގެން ބަލައެވެ. ކިބުރުވެރިކަމާއެކު ކަޅިއުކައެވެ. 14އެމީހުންގެ ދަތްތައް ކަނޑިތަކެއް ފަދައެވެ. ފޭރާދަތްތައް ވަޅިތަކެއް ފަދައެވެ. އެމީހުން ބިންމަތީގައި ތިބި ފަޤީރުންނާއި އިންސާނުންގެ ތެރޭން ބޭނުން ޖެހިފައި ތިބި މީހުންތައް ކައި ހަފުސް ކޮށްލައެވެ.
15ދަހިވެތިކަން ލޭބޯ ފަންޏެއް ފަދައެވެ. އޭގައި ލޭބޯ ދެ އަނގަ ހުރެއެވެ. ކޮންމެ އަނގަޔަކުން ގޮވައެވެ. ”ގިނައިން ދޭށެވެ!“ ހިތްނުފުރޭނެ ތިނެއްޗެއް ވެއެވެ. ނޫން ހަތަރެއްޗެއް ވެއެވެ. 16މައްޔިތުން ގިނަވެ ކަށްވަޅުގެ ހިތެއް ނުފުރެއެވެ. ދަރިން ނުލިބޭ އަންހެނާގެ ރަހިމު ދަރިން ލިބި ހިތެއް ނުފުރޭނެވެ. ހަނަފަސް ސަހަރާއަށް ފެން ލިބި ހިތެއް ނުފުރެއެވެ. އަނދަމުން ދާ އަލިފާން ވެސް އެފަދަ އެވެ. މިއިން އެއްޗެއް ”ދެން ހެވޭ، ހޯހޯއޭ“ އެއް ނުބުނާނެއެވެ.
17ބަފާއަށް މަލާމާތް ކޮށް އަމާގެ ބަސްނާހާ މީހާ މިނިކާމާދޫނިތައް އައިސް ކާލާނެއެވެ. ގޮނޑުދޮށުގައި އުޅޭ ކާޅުތައް އައިސް މަލާމާތްކުރާ ލޯތަކަށް ކޮއްޖަހާނެއެވެ.
18އަހަރެން ހައިރާންވާ ތިން ކަމެއް އެބަވެއެވެ. ނޫން ހަތަރު ކަމެކެވެ.
19ބާޒުތައް އެހާ މަތީގައި އުދުހެނީ ކިހިނެއްހެއްޔެވެ؟
ހަރުފަތައް ގާގަލުގެ ތެރޭގައި ލޫދި ދެމެނީ ކިހިނެއް ހެއްޔެވެ؟
އޮޑިފަހަރު ކަނޑުގައި ދުއްވަނީ ކިހިނެއްހެއްޔެވެ؟
ފިރިހެނަކު އަންހެނަކު ދެކެ ލޯބިވަނީ ކިހިނެއްހެއްޔެވެ؟
20ޒިނޭކުރާ އަންހެނާ އޭނާ ގާތަށް އަންނަ ފިރިހެނާ ކާލައިގެން އަނގަ ފުހެލައެވެ. ދެން ފެންވަރާލައިގެން އައިސް އެއަންހެނާ ބުނެއެވެ. ”ދެން މިއީ އެވަރު ބޮޑު ކަމެއް ތަ؟“
21ތިން ކަމަކުން ބިންގަނޑު ތެޅިގަނެއެވެ. ނޫން ހަތަރު ކަމެއް އެބިމަކަށް ތަހައްމަލެއް ނުކުރެވެއެވެ.
22އެއީ އަޅަކު ރަސްކަމަށް އައުމެވެ.
މޮޔައަކު ކާނެ ވަރަކަށް ކާން ލިބުމެވެ.
23ލޯތްބެއް ނުލިބިފައި އިންނަ އަންހެނާއަށް ފިރިޔަކު ލިބުމެވެ.
ގެންގުޅޭ އަންހެން ކުއްޖާ އަނބިމީހާގެ މަޤާމަށް އައުމެވެ.
24ބިންމަތީގައި ކުޑަ އެކަމަކު ބުއްދި ހުރި ހަތަރު އެއްޗެއް ވެއެވެ.
25އެއީ ހިނިތަކެވެ. އެއީ ބަލިކަށި އެއްޗެކެވެ. އެކަމަކު އެސޮރުމެން ހޫނު މޫސުމުގައި ކާތަކެތި އެއްކުރެއެވެ.
26އެއީ ވިބާރު މީދާތަކެވެ.#30:26 އެއީ އިނގިރޭސި ބަހުން ބެޖަރސް ކިޔާ ބާވަތުގެ ޖަނަވާރެކެވެ. އެއީވެސް ބަލިކަށި އެއްޗެއްސެވެ. އެކަމަކު އެއެއްޗެހި ހިލަތަކުގެ ތެރޭގައި ގެދޮރު ހަދައެވެ.
27އެއީ ގޮއްފުޅަނތްގެވެ. އެތަކެތީގެ މައްޗަށް ރަސްކަލަކު ނުހުރެއެވެ. އެކަމަކު އެތަކެތި ނިކަން ތަރުތީބުކޮށް ކަންތައް ކުރެއެވެ.
28އެއީ ހޯނެވެ#30:28 ބައެއް ތަރުޖަމާގައި ވާ ގޮތުން އެއީ ފައިދިގުމަކުނެވެ.. އެއީ ހިފަން ފަސޭހަ އެއްޗެކެވެ. އެކަމަކު އޭތި ރަސްގެފާނުގެ ގަނޑުވަރަށް ވެސް ވަދެއެވެ.
29ހިނގާފައި ދާއިރު ބަލާހިތްވާ ކަހަލަ ތިނެއްޗެއް ވެއެވެ. ނޫން ހިނގުން ރީތި ހަތަރެއްޗެއްވެއެވެ.
30އެއީ ސިންގާއެވެ. ޖަނަވާރުތަކުގެ ރަސްގެފާނެވެ. އޭތި އެއްވެސް އެއްޗަކަށް މަގުދީ އެއްފަރާތަކަށް ނާރައެވެ.
31އެއީ ގިތެލާއި ގުންފައިޖަހާފައި ހިނގާ ހާލާއި ލަޝްކަރުގެ ކުރީގައި ހުރެ ހިންގަވާފައި ވަޑައިގަންނަވާ ރަސްގެފާނެވެ.
32ކަލެއަކީ ނުބައި ކަމެއް ރާވާފައި އެކަމާ ފަޚުރުވެރިވާ މޮޔައެއް ނަމަ ލަދުގަނެ އަނގަމަތީ އަތްއަޅާށެވެ!
33ގެރިކިރު ހިލުމުން ބަޓަރު އުފެދޭ ފަދައިން ނޯށްމަތީ ޖެހުމުން ލޭ އަންނަ ފަދައިން ރުޅިގަނޑެއް ހިލުވާލުމުން ތަޅާފޮޅުންގަނޑެއް އުފެދޭނެއެވެ.
Currently Selected:
ހަރުބަސްތައް 30: ކމ
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
