San Mateo 14

Yajca'yaju Juan Bautista

(Mr. 6.14-29; Lc. 9.7-9)

1Ʌ'ta'mbʌ tiempo'ojmo tepyʌ najsoyj inʌc aŋgui'mba Herodes. Y myujsu jutz inʌc wyʌcotzamyajpa te' Jesús. 2Y ñʌjayaju te' quioyospawʌ: Yʌ'wʌ Juan Bautistayʌ' winsa'u ca'yajupʌ'ojmoc, te'cotoyate' nʌ chʌjcu isaŋwʌ'ajcuy.

3Porque Herodejsis yajnucʌtʌju wina te' Juan y ši'ñaju cadenapit y quiojtyaju preso'mo. Herodejsiste' inʌc pyotzo te' Felipe, y yʌ' Felipe'ste' inʌc yomo te' Herodías. Yʌ' yomo'ste' te'šej wya'cu, 4porque ñʌjapya inʌc Herodes te' Jua'ŋis: Yajwinducpa te' aŋgui'mgu'yis wa'mis nʌ'itjayu mis mbotzo Felipe's yomo. 5Sunba inʌc yajca'u Herodejsis te' Juan, pero ña'tzpa inʌc te' wʌwʌta'mbʌ pʌn, porque mumu pʌ'nis wyʌ'aŋjamyaju que Diojsiste' cha'maŋwa'oye. 6Quiosʌ'ŋajayaju Herodejsis pyʌ'najcuy-jyama. Pijche'c Herodiajsis yomojpʌ 'yune maŋu 'yejtzu pʌ'nʌcucmʌ, y ñʌ'o'maŋgʌtʌjcu Herodejsis. 7Y chamdzi'u Diojsis ñʌquiʌsi que maŋba'n inʌc chi'u tiyʌtij wya'cja. 8Y 'yaŋgui'mu'ca ñana's te' papiñomo tiyʌ wa'y wya'cu, minu ñʌjayu te' Herodes: Tzi'ja'ʌj Juan Bautista's quiopac plato'mo. 9Pijche'cande' rey triste'aju. Pero quiojtu te' aŋgui'mguy wa'y chi'yaju, porque chamdzi'wa'a Diojsis ñʌquiʌsi, y myatoŋyajwa'a te' pocšajuwʌ's ñe'cʌji'ŋ mesa'ojmo. 10Te'cotoya jeque quiojtu te' aŋgui'mguy wa'y tyʌcspʌ'jayaju Jua'ŋis quiopac te' somumʌy. 11Y ñʌminjayaju te' quiopac te' plato'mo, y chi'yaju te' papiñomo. Y ñe'cʌ's ñʌmaŋjayu te' ñanaj. 12Pijche'ca nu'quiaju te' Jua'ŋis quiʌ'aŋmayeta'm. Ñʌtzu'cumjayaju te' Jua'ŋis cuerpo, y maŋu ñipjayaju. Y maŋu yajmujšaju Jesús.

Pyʌ'nʌyu Jesujsis mosa'y mil pʌn

(Mr. 6.30-44; Lc. 9.10-17; Jn. 6.1-14)

13Myujsu'ctij Jesujsis, tzu'cumu tey barco'ojmo, y maŋu emʌc ja'itʌnʌmʌmʌy. Y myujšaju'ctij cumgupyʌ'nis quiʌ'maŋyaju nasca'ŋu'c cumgu'yojmocta'mbʌ's. 14Y pujtu'ca Jesús te' barco'ojmoc quienu wʌwʌta'mbʌ pʌn, y tyo'ya'ŋʌyaju. Yajtzojcu jujche'ŋ ca'eta'mbʌ ñe'co'mota'm. 15Y tza'yanʌmu. Y ca'ŋnu'cutʌj ŋgʌ'aŋmaye-tʌwʌji'ŋda'm, y nʌjayutʌs: Ja'itʌnʌmʌpʌ lugaryʌ' y tza'apya'yʌ', yajmaŋyaytya'a yʌ' pʌnda'm wa'y maŋu jyuyaju quiu'tcuy chics cumgu'yojmota'm. 16Pero Jesujsis nʌjayutʌj: Ja'ndiyʌ pyena wa'y myaŋyaju. Pʌ'nʌytyamʌ mista'm. 17Y aŋdzoŋutʌj: Na' mosa'ytyʌs nʌ'ijtu pan y metza coquej. 18Y ñe'cʌ's nʌjayutʌj: Nʌmindamʌ yʌy. 19Y 'yaŋgui'myaju Jesujsis te' pʌnda'm wa'y pyocsquequiaju te' pe'chmu'cʌsi. Pyʌjcu'ca te' mosa'pyʌ pan y te' metzawʌ coquej, quengui'mu tzajpojmo y ñicomasa'nʌyu. Pijche'c wyenu te' pan, y tzi'utʌj, tʌj te' quiʌ'aŋmayeta'm. Tʌsa maŋutʌs sajne'ŋbʌ'u te' pʌ'nojmota'm. 20Y mumu cu'tyaju tyajša'ŋoyj. Y mbiŋdu'mʌyutʌs te' cʌchʌ'yaŋ, y njo'ʌquie'tumajtʌs macwʌstʌjca'y waca. 21Y te' cu'tyajuwʌ mosa'y mil pʌnše'ŋde' inʌc, y jañʌcma'yʌya yomota'm ni te' uneta'm.

Ca'ŋu Jesús ma'ranʌ'cʌsi

(Mr. 6.45-52; Jn. 6.16-21)

22Y tʌj, te' quiʌ'aŋmayeta'm, pijche'ctʌj nʌjayu Jesujsis wa'ytyʌj ndʌjcʌyu barco'ojmo. Te'šejtʌs wa'y nwi'najayu ñe'cʌ wa'ytyʌj maŋu nʌ'-ocwinduc, 'yoto'ŋʌchaquiajpa'cše'ŋoyj ñe'cʌ's te' pʌnda'm. 23Yajtzu'cumyaju'ctij te' wʌwʌta'mbʌ pʌn, qui'mu ñaytyumʌ te' pu'mnacʌsi. Maŋu 'yoto'ŋʌyu Dios. Tzu'yanʌmu'ca ñaytyumʌ tzʌ'yu tey. 24Y tʌs, te' cʌ'aŋmaye, ma'racucma'ndʌs nʌ'ijtu'c te' barco tepsnʌwitcʌ'yutʌj ma'ris, y sujwitu'utʌj sawa's. 25Y cucjama'ca marcʌsi ca'ŋu'c minu Jesús ijtumʌytyʌj. 26Y tʌs, te' cʌ'aŋmaye, ŋguenutʌs te'šej ca'ŋu'c nʌ minu marcʌsi, y jopi'tutʌj. Y nʌmutʌj: Animayʌ'. Y na'tziwejutʌj. 27Pijche'ctij Jesujsis oto'ŋʌyutʌj, y nʌmu: Uy tzocomyocha'tame. Ʌjyʌ', uy na'tztame.

28Pijche'ca 'yaŋdzoŋu Pedro's, y nʌmu: Señor, juca mijte', aŋgui'mʌ'ʌj wa'yʌj ca'ŋu'c minu marcʌsi ijtumʌmyij. 29Y ñe'cʌ's ñʌjayu: Minʌ. Y wanajcu te' Pedro barco'ojmoc, y ca'ŋba maŋu marcʌsi ijtumʌy Jesús. 30Pero 'yaŋjamu pʌmipʌ sawa nʌ šujwindujcupʌ's, y na'tzu. Nʌwa' inʌc wyʌŋgʌ'yu'c weju y nʌmu: Señor, yajcotzoca'ʌj. 31Pijche'ctij Jesujsis jyascʌtʌjcʌyu quiʌ'cʌsi, y ñʌjayu: Ay Pedro, jene mochimis nwʌ'aŋja'moquiuy. ¿Tiyajca'nde' myetzatzoco'yaju? 32Y tʌjcʌyaju'ca te' barco'ojmo po'yaŋjeju te' sawa. 33Pijche'c jujche'ŋdʌj barco'ojmo inʌc ijtuwʌ ŋgujnayjayutʌs. Y nʌjayutʌs: Wiyuŋšej mijte' te' Diojsis 'Yune.

Yajtzojcu Jesujsis ca'eta'mbʌ te' Genesarejtojmo

(Mr. 6.53-56)

34Jajcutʌj jeque te' ma'ra'ocwinduc, y nu'cutʌj Genesaret-najsojmo. 35Y como ispʌquiaju Jesús teytya'mbʌ pʌ'nis, quiʌ'wejyaju otowe mumu te' tometa'mbʌ luga'royj que nu'cu Jesús. Te'cotoya ñʌminjayaju tey mumu ca'eta'mbʌ, 36y ñʌjayaju: Señor, yajpi'quisʌtʌ yajtya' mis mbama-acapoya. Y jujche'ŋ pyi'quisjayajuwʌ's tzoquiaju.

Currently Selected:

San Mateo 14: ZCNT

Highlight

Copy