San Lucas 3

Tzamgopu'ŋoyu Juan Bautista

(Mt. 3.1-12; Mr. 1.1-8; Jn. 1.19-28)

1Yʌjta'y ame'a nʌ myʌja'ŋaŋgui'moyu'c Tiberio César, te' Poncio Pilato gobernadorte' inʌc Judea-najsojmo, y te' Herodes gobernadorte' inʌc Galilea-najsojmo. Y Herodejsis pyotzo Felipe nʌ inʌc 'yaŋgui'moyu Iturea y Traconite-najsojmo, y Lisanias nʌ inʌc 'yaŋgui'moyu Abilinia-najsojmo. 2Y te' Anas y Caifás mʌja'ŋ sacerdoteta'mde' inʌc. Pijche'cta'm 'yoto'ŋʌyu Diojsis te' Juan, Zacariajsis 'yune, ja'itʌnʌmʌmʌy. 3Y te' Juan maŋu mumu te'ta'mbʌ najsoyj tome quienbamʌy te' Jordaŋ-nʌ'is. Y nʌ inʌc chamgopuŋu wa'y quipswitu'yaju te' pʌnda'm, y wa'y ñʌ'yʌyaju, te'šej wa'y yajcotocoyjayaju Diojsis te' ñe'ta'm quiowa. 4Yʌ' Juaŋde' chamupʌ te' tza'maŋwa'opyapʌ Isaiajsis jya'yʌyu'c:

Wejqui'mu'c nʌmu tumʌ te' pʌn ja'itʌnʌmʌmʌy:

Nimejcʌytyamʌ ndzocoy tʌ Ngomicotoya jujcha' pʌ'nista'm ñimejcʌyajpa tuŋ.

Wʌtzʌcjaytyamʌ te' wyiyuŋ-duŋ te' maŋba minumʌy.

5Maŋba jyo'ʌyaju mumu jojpac y tyajwanaquiaju mumu cotzʌc y pu'mna.

Maŋba yajwiyu'ŋajyaju te' to'wita'mbʌ tuŋ y maŋba tyajʌ'ŋdzʌquiaju te' mʌšcumyʌy.

6Y maŋba quieñaju mumu pʌ'nis que te' Dios yajcotzojcopya.

7Quiʌ'miñajpa inʌc Juan te' pʌ'nista'm wa'y ñe'cʌ's yajnʌ'yʌyaju, y ñe'cʌ nʌmba inʌc: Njyoco'istotzanšejta'm mij. ¿Iwʌ'sayʌ' ñchamjaytyamu wa'mis mboyjaytyamu te' co'aŋgʌquiuy Diojsismij maŋba nyajnʌco'aŋgʌytyamupʌ? 8Yajquejtamʌ jeque te' mista'm ndzʌquipit que nʌmij ŋguipswitu'tamu. Uy nʌcʌpo'tame wa'mij ñʌmdamu ndzoco'yojmo: Abrahaŋde' tʌs ndataj, porque ʌsmij ndzamjaytyamba que Diojsis muspa yajqueju uneta'm Abrahaŋgotoya ñempe yʌ' tza'pitta'm. 9Y te'ya ijtu mejwinbujtupʌ hacha. Jujche'ŋ cuy ja'n chʌquipʌ's oyepʌ tyʌm, tyʌŋyajpa y quiojtyajpa jucʌtʌjcojmo.

10Y quiʌ'aŋwa'quiajpa inʌc te' pʌ'nista'm: ¿Tiya'ndʌs jeque ndzʌcpa? 11Y 'yaŋdzoŋyaju Jua'ŋis: Iwʌ's ijtu metza yamwingʌšoj, yajtzi'ʌ tumʌc ja'ndipʌ'sñe', y iwʌ's ijtu quiu'tcuy, yajnʌwe'ngue'ta ja'ndipʌ'sñe'. 12Y quiʌ'miñajque'tu Juan te' tze'coyajpapʌ's wa'y yajnʌ'yʌyatʌju y ñʌjayaju: Maestro, ¿tiya'ndʌs ndzʌcpa? 13Y Jua'ŋis 'yaŋdzoŋyaju: Jujche'ŋmij 'yaŋgui'mʌtʌjtamu, te'še'ŋ wa'ctamʌ, uy wa'cniqui'mdame. 14Y quiʌ'aŋwa'quiajque'tu soldado'sta'm y nʌmyaju: Y tʌs, ¿tiya'ndʌs ndzʌcpa? Y ñe'cʌ's 'yaŋdzoŋyaju: Uy nijuptame ya'iwʌ ni uy nisujtzʌ'oytyame, y tzocopyactamʌ ŋguioyowatʌjtambaše'ŋmij.

15Y mumu pʌ'nis tey inʌc nʌ quiengʌpʌquiaju te' Juan y myuma'ŋgʌ'y inʌc quipšajpa choco'yojmo juca jowi'cšej te'wʌte' te' Cristo. 16Jua'ŋis 'yaŋdzoŋyaju mumu te' ijtyajuše'ŋ tey: Wiyuŋšej nʌ'ʌsmij nyajnʌ'yʌytyamu nʌ'pit. Pero nʌ minu más mʌja'ŋbʌ que ja'n ʌj, y myasa'najcupyit ja'n pyʌqui ni wa'yʌs mbu'pʌ'jayu wyacasnaca tzay. Ñe'cʌ'smij maŋba nyajnʌ'yʌytyamu Espíritu Santopit wa'y pya'jayu mista'm ndzocoy. 17Y quiʌ'ojmo ñʌ'ijtu te' trigo-cosu'oquiuy yajcowajpapʌpit ñe' yojsaŋ. Maŋba yajtu'mʌyu te' trigo ñe' troja'ojmo y maŋba pyoŋbʌ'jayu te' šo'c ja'n tyu'ipʌ jucʌtʌjcojmo.

18Y sone eyata'mbʌ tiyʌcʌsi pyʌmitzi'yaju chamepit te' Jua'ŋis, y te'šej yajmujšaju te' evangelio. 19Y 'yotoŋjayu Jua'ŋis te' Herodes, te' aŋgui'mopyapʌ, porque ñʌ'itjayu inʌc te' pyotzo Felipe's yomo, te' ñʌjayajpapʌ Herodías, y chʌjcu'ŋmʌjcʌ soneta'mbʌ yacha'cuy. 20Y 'ya'ŋʌyu te' yacha'cuy Herodejsis y šomu te' Juan preso'mo.

Nʌ'yʌyu Jesús

(Mt. 3.13-17; Mr. 1.9-11)

21Pero wina nʌ'c inʌc yajnʌ'yʌyaju Jua'ŋis mumu te' pʌnda'm, nʌ'yʌquie'tu Jesús. Y nʌ'cše'ŋoyj 'yoto'ŋʌyu Dios, aŋwaju te' tzap. 22Y quenequene'c wanajcu Espíritu Santo ñe'cʌcʌsi wiyuŋšejpʌ palomašej. Y pujtu tzajpojmocpʌ otowe, nʌmupʌ: Mijte' ʌs Une sunbapʌ'ʌs. Mijpi'tʌj tzocopyacpa.

Jesucristo's 'ya'ŋucu-neŋeta'm

(Mt. 1.1-17)

23Y ñitzʌjcu Jesujsis te' ñe' yoscuy ips-co-mac ameše'ŋoyj nʌ ñʌtu'ŋaju'c. Y Jesús, Jose'iste' inʌc 'yune, quiomʌ'yajpašej inʌc, y José, Eli'iste' inʌc 'yune, 24y Elí, Matajtiste' inʌc 'yune, y Matat, Levi'iste' inʌc 'yune, y Leví, Melqui'iste' inʌc 'yune, y Melqui, Jana'ste' inʌc 'yune, y Jana, Jose'iste' inʌc 'yune, 25y José, Matatiajsiste' inʌc 'yune, y Matatías, Amojsiste' inʌc 'yune, y Amós, Nahu'miste' inʌc 'yune, y Nahum, Esli'iste' inʌc 'yune, y Esli, Nagai'iste' inʌc 'yune, 26y Nagai, Maajtiste' inʌc 'yune, y Maat, Matatiajsiste' inʌc 'yune, y Matatías, Semei'iste' inʌc 'yune, y Semei, Jose'iste' inʌc 'yune, y José, Juda'ste' inʌc 'yune, 27y Judá, Joana'ste' inʌc 'yune, y Joana, Resa'ste' inʌc 'yune, y Resa, Zorobabe'liste' inʌc 'yune, y Zorobabel, Salatie'liste' inʌc 'yune, y Salatiel, Neri'iste' inʌc 'yune, 28y Neri, Melqui'iste' inʌc 'yune, y Melqui, Adi'iste' inʌc 'yune, y Adi, Cosa'miste' inʌc 'yune, y Cosam, Elmoda'miste' inʌc 'yune, y Elmodam, E'riste' inʌc 'yune, 29y Er, Josue'iste' inʌc 'yune, y Josué, Elieze'riste' inʌc 'yune, y Eliezer, Jori'miste' inʌc 'yune, y Jorim, Matajtiste' inʌc 'yune, 30y Matat, Levi'iste' inʌc 'yune, y Leví, Simeo'ŋiste' inʌc 'yune, y Simeón, Juda'ste' inʌc 'yune, y Judá, Jose'iste' inʌc 'yune, y José, Jona'ŋiste' inʌc 'yune, y Jonán, Eliaqui'miste' inʌc 'yune, 31y Eliaquim, Melea'ste' inʌc 'yune, y Melea, Maina'ŋiste' inʌc 'yune, y Mainán, Matata'ste' inʌc 'yune, y Matata, Nata'ŋiste' inʌc 'yune, 32y Natán, Davijtiste' inʌc 'yune, y David, Isai'iste' inʌc 'yune, y Isaí, Obejtiste' inʌc 'yune, y Obed, Boojsiste' inʌc 'yune, y Booz, Salmo'ŋiste' inʌc 'yune, y Salmón, Naaso'ŋiste' inʌc 'yune, 33y Naasón, Aminadajpiste' inʌc 'yune, y Aminadab, Ara'miste' inʌc 'yune, y Aram, Esro'miste' inʌc 'yune, y Esrom, Fare'iste' inʌc 'yune, y Fares, Juda'ste' inʌc 'yune, 34y Judá, Jacojpiste' inʌc 'yune, y Jacob, Isaajquiste' inʌc 'yune, y Isaac, Abraha'ŋiste' inʌc 'yune, y Abrahán, Tare'iste' inʌc 'yune, y Taré, Naco'riste' inʌc 'yune, 35y Nacor, Serujquiste' inʌc 'yune, y Serug, Ragau'ste' inʌc 'yune, y Ragau, Pelejquiste' inʌc 'yune, y Peleg, Hebe'riste' inʌc 'yune, y Heber, Sala'ste' inʌc 'yune, 36y Sala, Caina'ŋiste' inʌc 'yune, y Cainán, Arfaxajtiste' inʌc 'yune, y Arfaxad, Se'miste' inʌc 'yune, y Sem, Noe'iste' inʌc 'yune, y Noé, Lamejquiste' inʌc 'yune, 37y Lamec, Matusale'ŋiste' inʌc 'yune, y Matusalén, Enojquiste' inʌc 'yune, y Enoc, Jarejtiste' inʌc 'yune, y Jared, Mahalalee'liste' inʌc 'yune, y Mahalaleel, Caina'ŋiste' inʌc 'yune, 38y Cainán, Enojsiste' inʌc 'yune, y Enós, Sejtiste' inʌc 'yune, y Set, Ada'ŋiste' inʌc 'yune, y Adán, Diojsiste' inʌc 'yune.

Currently Selected:

San Lucas 3: ZCNT

Highlight

Copy