San Juan 5

Te' wocšijpʌ Betesda tanque'aŋi

1Cʌtʌjcu'ca yʌ'šejta'mbʌ tiyʌ, ijtu inʌc sʌŋ judio'sta'mñe'. Y qui'mu Jesús Jerusale'ŋojmo. 2Y Jerusale'ŋojmo ijtu inʌc tanque tomemʌy ñchowambe'sta'm tyʌjcʌquiuy, judio-otowe'ojmo ñʌjayajpapʌ inʌc Betesda, quiʌne'ŋupʌ mosa'pyʌ setze's. 3Y yʌ' setzecʌsita'm yecnayaju inʌc sone ca'eta'mbʌ, to'tita'mbʌ, mʌ'ŋga'ŋyajpawʌ y tʌtzta'mbʌ. Nʌ inʌc jyo'quiaju mumu yʌ'ta'mbʌ's wa'y myi'csu te' nʌ'. 4Porque nu'cpa'c aŋsʌŋ wanacpa inʌc ángeles y yajmi'cspa inʌc te' nʌ' te' tanque'ojmo. Iwʌ wina tʌjcʌpya nʌ'c myi'csu te' nʌ', tzocpa inʌc wempe jutzpʌ ca'cuy. 5Y tey inʌc ijtu tumʌ pʌn ips-co-yʌt-co-tuca'y ame'a ca'epa'tupʌ. 6Quienu Jesujsis yʌ'wʌ ʌŋumʌy, y ñʌctʌ'yu que sone ame'ande' te'šej itpa, y ñʌjayu: ¿Sunba ñchojcu? 7'Yaŋdzoŋu te' ca'epʌ's: Señor, ja'ndiyʌ iwʌ'sʌj cuŋdʌjcʌpya yʌ' tanque'ojmo nʌ'c myi'csu yʌ' nʌ'. Nʌ'cše'ŋo'yʌj maŋu, wina tʌjcʌpya eyapʌ. 8Jesujsis ñʌjayu: Tzu'cumʌ, pʌcʌ mis ŋgape-ʌŋguy y tu'ŋa. 9Pijche'ctij tzojcu te' pʌn. Pyʌjcu te' quiape-ʌŋguy y maŋu. Pero sabado-jamate' inʌc.

10Te'cotoya ñʌjayaju te' tzojcupʌ pʌn te' judio'sta'm: Sabado-jamayʌ' išo'oyj y yajwinducpa aŋgui'mgu'yis wa'mis nʌmaŋu ŋgape-ʌŋguy. 11'Yaŋdzoŋyaju ñe'cʌ's: Pero nʌjayu'ʌj te' yajtzojcupʌ'sʌj: Pʌcʌ te' mis ŋgape-ʌŋguy, y tu'ŋa. 12Pijche'ca quiʌ'aŋwa'quiaju: ¿Iwa'nde' te' ñʌjayupʌ'smij: Pʌcʌ mis ŋgape-ʌŋguy, y tu'ŋa? 13Pero te' tzojcupʌ pʌ'nis ja'n inʌc myusi iwʌ'ste' yajtzojcu, porque te' Jesús tzu'cumu tey te' jene itʌnʌmʌmʌy. 14Jʌsa'ca pya'tu Jesujsis te' templo'ojmo, y ñʌjayu: Yʌtij ñchocwa'mij, u'ya cowapa'tque'temaj umis maŋu maŋgopa'tʌyu más jene jenepʌ ca'cuy. 15Maŋu te' pʌn. Maŋu chamjayaju judiota'm que te' pʌn yajtzojcupʌ's, Jesuste' inʌc.

16Yʌ'šejta'mbʌ tiyʌcotoya ñitzʌquiaju wa'y yacsnutzʌquiaju Jesús te' judio'sta'm. Šunba inʌc yajca'yaju porque chʌcpa inʌc yʌ'šejta'mbʌ tiyʌ sabado-jamo'oyj. 17'Yaŋdzoŋyaju Jesujsis: Ʌs Ndata Dios nʌtij yojsu, y yosque'tpa'ʌj ʌj. 18Te'wʌcotoya más chʌcme'chaju judio'sta'm wa'y yajca'yaju Jesús. Ja'n na' porque myaŋgocʌtʌjcu sábado, sino porque nʌmgue'tu inʌc que Dios te' ñe' Tyataj. Y nʌmyajpa inʌc judiota'm que Diosšej nʌ chʌjcu wyin.

Te' Diojsis 'Yune's 'yaŋgui'mʌtʌjcuy

19Pijche'ca 'yaŋdzoŋyaju Jesujsis y ñʌjayaju: Wiyuŋše'ʌsmij nwiyuŋdzamjaytyamba: Ʌjte' te' 'Yune y ja'ʌs musi ndzʌjcu yajtiyʌ ne' su'noquiupyit, sino que ŋguengʌspʌcpa'ʌs Ndatajcʌsi. Porque tiyʌ chʌcpa ʌs Ndata's, te'še'ʌs ndzʌjque'tpa ʌs. 20Porque ʌj, Tata Diojsisʌjyʌ' 'Yune, y ñe'cʌ's sunba'ʌj, y yajquenba'ʌj tiyʌta'm chʌcpa. Y maŋbama'ʌj yajquenu wa'yʌs ndzʌjcu más maya'aŋda'mbʌ isaŋwʌ'ajcuy, cosaque'cše'ŋoyj maŋbamij myaya'tamu. 21Jujcha'nde' ʌs Ndata's muspa yajwinsa'u ca'yajupʌ, y chi'yajpa quenguy, te'šejtijque' ʌs, te' 'Yune's, muspa'ʌs ndzi'u quenguy iwʌta'm ʌs sunba. 22Ʌs Ndata's ja'n quiʌme'tze ya'iwʌ. Pero como ʌjte' te' 'Yune, tzi'u'ʌj aŋgui'mʌtʌjcuy wa'yʌs ŋgʌme'tzpʌ'u mumu pʌn. 23Yʌ'šej chʌjcu wa'yʌj cʌna'tzʌyaju ʌj jujcha' quiʌna'tzʌyajpa ñe'cʌ ʌs Ndata Dios. Iwʌ'sʌj ja'n cʌna'tzʌy ʌj, te' 'Yune, ja'n quiʌna'tzʌyjay ʌs Ndataj cʌ'wejupʌ'sʌj.

24Wiyuŋše'ʌsmij nwiyuŋdzamjaytyamba: Iwʌ's quiʌmato'ŋʌpya ʌs ndzamyajupʌ tiyʌ, y wyʌ'aŋjamba te' cʌ'wejupʌ'sʌj, pya'twa'a ja'n yayepʌ iscuy-quenguy. Y te'wʌ's ja'n maŋu quio'aŋgʌyu quiowa. Ñempe ca'uwʌše'a inʌc quiowa'ojmo pya'twa'nde' iscuy-quenguy. 25Wiyuŋše'ʌsmij nwiyuŋdzamjaytyamba: Maŋba minu te' aŋsʌŋ, y tzo'tzuwa'nde' wa'y quiʌmato'ŋʌyjayaju ʌs otowe te' ca'uwʌšej ijtyajupʌ's quiowa'ojmo, porque ʌjte' te' Diojsis 'Yune. Y iwʌ'sʌj cʌmato'ŋʌyajpa ʌj, maŋba pya'tyaju iscuy-quenguy. 26Tʌ Ndata Diojsojmoc womba te' iscuy-quenguy, y te'še'ʌj tzi'que'tu ʌj, te' 'Yune, wa'y ʌ'ojmoc wyomu te' iscuy-quenguy.

27Ñe'cʌ'stijte' tzi'que'tu aŋgui'mʌtʌjcuy y mʌja'ŋajcuy wa'yʌj ŋgʌme'tzoyu, porque ʌjte' te' Pʌ'nis 'Yune. 28Uy nʌmaya'tame yʌ'šejta'mbʌ tiyʌ. Porque maŋba minu te' aŋsʌŋ maŋba'ca quiʌmato'ŋʌyjayaju ʌs otowe mumu tza'tʌjcojmo ijtyajupʌ ca'uwʌ's. 29Y maŋba pyujtyaju teymʌc. Y te' chʌquiajupʌ's oyeta'mbʌ tiyʌ maŋba wyinsa'yaju wa'y chi'yatʌju cota'nupʌ quenguy. Y te' chʌquiajupʌ's yatzita'mbʌ tiyʌ maŋba wyinsa'yaju wa'y quio'aŋgʌyaju quiowa.

Yajquejupʌpit Jesujsis 'yaŋgui'mʌtʌjcuy

30Ʌs ja'ʌs musi ndzʌjcu yajtiyʌ ne'cʌtij. Tzamjapyaše'ʌj Ndata's ŋgʌme'chajpa'ʌs pʌnda'm. Y ʌs, wiyuŋbʌ tiyʌpi'tʌs ŋgʌme'chajpa, porque ja'ʌs me'tze ne' su'noquiuy, sino que wa'yʌs ndzʌjcu šunbašej ʌs Ndata Diojsis, porque ñe'cʌ'sʌjyʌ' cʌ'weju.

31Juca ne'cʌ naytyumʌ'ʌs ŋgotestigosajpa nwin ja'nmis wiyuŋbʌ tiyʌšej ŋgomʌ'ytyame. 32Ijtu iwʌ'sʌj cotestigosajpa ʌj, y muspa'ʌs que ñe'cʌ'sʌj cotestigosajpašej wiyuŋbʌ tiyʌte'. 33Ngʌ'wejtamumis pʌnda'm wa'y maŋu quiʌ'aŋwa'quiaju Juan Bautista, y ñe'cʌ wyiyuŋdzamjayaju. 34Pero ja'ndiyʌ pyena wa'yʌj pʌ'nis cotestigosajyaju, sino que ndzamba'ʌs yʌ'šejta'mbʌ tiyʌ wa'mij ŋguiotzoctamu. 35Nembapʌ y sʌ'ŋbapʌ sʌ'ŋgʌšejpʌte' inʌc Juan. Y mista'm uša'ŋ horatijmis nʌ'omdamu wa'y šʌ'ŋgʌtzʌcjaytyamu mista'm ndzocoy. 36Pero wiyuŋšej muspamisʌj ispʌctamu te' ʌs ndzʌquiajpapʌ tzʌquicʌsi. Te'šejta'mbʌ tiyʌ'sʌj más cota'nu'c cotestigosajyajpa que ja'n Jua'ŋis. Ʌs Ndata'sʌj cʌ'weju wa'yʌj nyojsu. Y te' tzʌqui ʌs ndzʌquiajpapʌ, te'šejta'mbʌ tiyʌ'sʌj cotestigosajpa que ñe'cʌ'sʌj cʌ'weju. 37Tʌ Ndata Diojsisʌjte' cʌ'weju, y te'šejtijque' ñe'cʌ'sʌj cotestigosaju. Yajujche'cmajmis jamyatoŋjaytyamʌ 'yotowe, ni jaŋguiendamʌmajmis. 38Ni jañʌ'itjaytyamʌmis ñe' chame mista'm ndzoco'yojmo, porque ja'nmisʌj nwʌ'aŋjamdame ʌj, y ñe'cʌ'sʌjte' cʌ'weju. 39Ndacsoctu'ndambamis te' Totojayeta'm porque nwʌ'aŋjamdambamis que te'wʌcʌsi mba'ttambamis te' ja'n yayepʌ quenguy. Te'wʌ'sʌjte' cotestigosajyajpa ʌj, 40pero ja'nmisʌj suni nwʌ'aŋjamdamu ʌj wa'yʌsmij ndzi'tamu ja'n yayepʌ quenguy.

41Ja'ʌs njo'que wa'yʌj pʌ'nis wʌcotzamyaju. 42Ʌs ispʌctamba'ʌsmij, que ja'nmis sundame Dios mista'm ndzoco'yojmo. 43Ʌj minu'ʌj ʌs Ndata Diojsis ñʌquiʌsi y ja'nmisʌj mbʌjcʌchoŋdame. Juca minba pʌn ñe' wyin chambapʌ's, te'wʌ jʌ'ʌ, mbʌjcʌchoŋdambamis. 44¿Jutzamisʌj maŋba nwʌ'aŋjamdamu juca nʌ'omdambamis wa'mij yʌ'wʌ te'wʌ's myʌja'ŋgotzamdamu ne'cʌ? Y ja'nmis njo'ctame wa'mij myʌja'ŋgotzamdamu te' tumʌpʌ Diojsis. 45Uy quipstame que ʌsmij maŋba nicotza'mʌytyamu Ndata Diojsis wyi'naŋdʌjqui. Ijtu iwʌ'smij ñicotza'mʌytyamba. Nite'tzʌytyambamis Moisés, y ñe'cʌ'smijte' maŋba ñicotza'mʌytyamu. 46Juca inʌc mis nwʌ'aŋjamdamba Moisés, nwʌ'aŋjamdaŋgue'tpamisʌj inʌc ʌj, porque ʌjte' ja'yʌyu ñe'cʌ's. 47Pero como ja'nmis nwʌ'aŋjamdame tiyʌta'm jya'yʌyu ñe'cʌ's, ¿jutzamis maŋba nwʌ'aŋjamdamu tiyʌ'ʌsmij ndzamjaytyamba?

Currently Selected:

San Juan 5: ZCNT

Highlight

Copy