San Juan 3

Jesús Nicodemoji'ŋ

1Ijtu inʌc tumʌ fariseo-pʌn ñʌjayajpapʌ Nicodemo. Yʌ'wʌ judio-cowi'nate' inʌc. 2Yʌ'wʌ's minu 'yoto'ŋʌyu Jesús tzu'cʌsi, y ñʌjayu: Maestro, muspatʌs que Diojsismijyʌ' ŋguiʌ'weju wa'mij 'yaŋma'yoyu, porque ya'iwʌ's ja'n musi chʌjcu isaŋwʌ'ajcuy mis ndzʌcpašej juca ja'n quiotzowe Diojsis. 3Y ñʌjayu Jesujsis: Wiyuŋše'ʌsmij nwiyuŋdzamjapya, iwʌ ja'n pyʌ'najwʌtzʌqui ja'n musi quie'nʌyu jutz aŋgui'mba Dios. 4Quiʌ'aŋwa'cu Nicodemo's: ¿Jutza' muspa pyʌ'najwʌtzʌjcu te' pʌn, tzamupʌ'nʌ'ca? ¿Muspasʌ'ŋ tyʌjcʌwyʌtzʌjcu ñana's chejcojmo wa'y pyʌ'najwʌtzʌjcu? 5Aŋdzoŋu Jesús: Wiyuŋše'ʌsmij nwiyuŋdzamjapya, iwʌ ja'n pyʌ'nay nʌ'pit y Espiritupit ja'n musi tyʌjcʌyu wa'y 'yaŋgui'mu Diojsis. 6Sispit pʌ'najupʌ, siste'. Y Espiritupit pʌ'najupʌ, espiritute'. 7Uy nʌmaya'e nʌjayu'ŋmʌjcʌ'ʌsmij, ijtupʌte' pyena wa'mij mbyʌ'najwʌtzʌctamu. 8Te' sawa yʌmʌc teymʌc popya, y matoŋjapyamis jyu'ucʌ, pero ja'nmis musi jutʌcte' minba ni jutʌ maŋba. Te'šejte' mumu jujche'ŋ pʌ'najupʌ Espíritu Santopit.

9Quiʌ'aŋwa'cu Nicodemo's: ¿Jutza'sʌ'ŋde' muspa tyujcu te'šej? 10Jesujsis 'yaŋdzoŋu: Mis aŋmayajpamis Israel-pʌn, ¿y ja'nmaj musi yʌ'šejta'mbʌ tiyʌ? 11Wiyuŋše'ʌsmij nwiyuŋdzamjapya, tiyʌ tʌs muspa te'wʌ tʌs ndzamba. Y tiyʌ tʌs ŋguenu te'wʌ tʌs ŋgotestigosajpa. Y ja'nmis mbʌjcʌchoŋjaytyame tʌs ŋgotestigosajpapʌ tiyʌ. 12Ndzamjaytyamu'ʌsmij najsacopajcʌsita'mbʌ tiyʌ y ja'nmis nwʌ'aŋjamdame. ¿Jutzamis maŋba nwʌ'aŋjamdamu juca ndzamjaytyamba'ʌsmij tzajpojmo ijtyajupʌ tiyʌ?

13Ya'iwʌpʌ pʌnmaj jatyijtʌ'ʌ tzajpojmo wa'y myujsu jutzpʌte' ʌmʌ. Na' ʌstij muspa porque teymʌjcʌ'ʌjyʌ' wanajcu. Ʌjte' te' Pʌ'nis 'Yune, y ʌs itcuy tzajpojmote'. 14Jujcha' Moisejsis yajqui'mu te' tzandzʌqui cuquiʌsi ja'itʌnʌmʌmʌy, te'šejte' pyʌcpa ʌj, te' Pʌ'nis 'Yune, wa'yʌj yajqui'myaju cruzcʌsi, 15wa'y iwʌ'sta'misʌj wʌ'aŋjamyajpa ʌj, uy tyocoyaju sino que wa'y pya'tyaju ja'n yayepʌ quenguy.

Jene šunu Diojsis te' najsacopajcʌsita'mbʌ

16Como jene šunu Diojsis te' najsacopajcʌsita'mbʌ, tzi'oquia'u'ʌj, ʌj te' tyʌŋdumʌpʌ 'Yune. Y mumu iwʌ'sʌj wʌ'aŋjamba ʌj, ja'n maŋu tyocoyu, sino que maŋba pya'tu ja'n yayepʌ quenguy. 17Porque ʌjte' te' Diojsis 'Yune, y ñe'cʌ'sʌj cʌ'weju najsacopajcʌsi ja'n wa'yʌs nyajco'aŋgʌyaju quiowa najsacopajcʌsita'mbʌ sino que wa'y quiotzoquiaju ʌjpit.

18Iwʌ'sʌj wʌ'aŋjamba ʌj ja'n yajtiyʌ quio'aŋgʌy. Pero iwʌ'sʌj ja'n wʌ'aŋjame maŋba quio'aŋgʌyu, porque jawyʌ'aŋjamʌ ʌj te' Diojsis 'Yune. 19Minu'ʌj najsacopajcʌsi, y ʌjte' te' sʌ'ŋgʌ', pero más šuñaju pi'tza'ŋajcʌ' te' pʌ'nista'm que ja'nde' ʌj te' sʌ'ŋgʌ'. Te'šej šuñaju porque yacha'cuy inʌc chʌquiajpa. Te'wʌ maŋba yajco'aŋgʌyaju Diojsis. 20Porque iwʌ's chʌcpa ja'n 'yoyeta'mbʌ tiyʌ, ja'n šuni te' sʌ'ŋgʌ' ni ja'n quia'ŋdʌjcʌy sʌ'ŋgʌ'ojmo uy quiʌme'tzjayu chʌqui sʌ'ŋgʌ's. 21Pero iwʌ's chʌcpa wiyuŋda'mbʌ tiyʌ ca'ŋdʌjcʌpya sʌ'ŋgʌ'ojmo wa'y myusjayaju chʌqui pʌ'nista'm que Diojsiste' nʌ quiotzoŋu.

Chamwʌtzʌjque'tu Jesús te' Juan Bautista's

22Cʌtʌjcu'ca yʌ'šejta'mbʌ tiyʌ, minutʌj Jesusji'ŋ Judea-najsojmo tʌs ŋgʌ'aŋmaye-tʌwʌji'ŋda'm. Teytyʌj tzʌ'yu ñe'cʌji'ŋ y nʌ inʌc yajnʌ'yʌ'oyu. 23Y yajnʌ'yʌ'oquie'tpa inʌc Juan Eno'ŋojmo tome quienbamʌy te' Salim-gumguy, porque jene ijtu inʌc nʌ' tey. Y mi'naŋgʌtʌquiaju wa'y ñʌ'yʌyaju tey, 24porque jašomya'cmajte' te' Juan.

25Te' Diojsis wyi'naŋdʌjquipʌ cowajcuquiotoya quipotoŋgʌ'yaju judiota'm Jua'ŋis quiʌ'aŋmayeji'ŋda'm. 26Miñaju Jua'ŋaŋi ñe' quiʌ'aŋmaye. Ñʌjayaju: Maestro, te' miji'ŋ inʌc ijtupʌ Jordan-ocwinduc, te' nʌmis inʌc ndzamupʌ, yʌtij nʌ yajnʌ'yʌ'oyu y wʌwʌ pʌ'nis nʌ quiʌ'maŋu ñe'cʌ. 27'Yaŋdzoŋyaju Jua'ŋis: Ni'iwʌ pʌ'nis ja'n musi ijtu 'yaŋgui'mʌtʌjcuy juca ja'n chi'i Diojsis. 28Muspamisʌj ŋgotestigosajtamu que nʌmu'ʌj: Ja'nde' ʌj te' Cristo, sino que cʌ'weju'ʌj Diojsis wa'yʌs nwi'najayu ñe'cʌ. 29Te' co'tʌjcajupʌ pʌ'nis pyʌjcʌchoŋba te' yomo. Y te' co'tʌc-pʌ'nis ijtu šunbapʌ tyʌwʌ ñe' che'ŋna'oyj tenayupʌ, y quiʌmato'ŋʌpya. Y myatoŋjapya'c chame te' co'tʌc-pʌ'nisñe' jene ñʌ'omba. Te'še'ʌs nʌ'omba ʌs matoŋba'cʌs nʌ quiʌ'maŋyaju Jesús. 30Pyʌcpa wa'y myujšaju mumu pʌ'nis que ñe'cʌte' te' mʌja'ŋbʌ y que ʌjte' te' cʌmaŋbʌ.

Tzajpojmoc minbapʌ

31Te' wanajcupʌ tzajpojmoc maste' mʌja'ŋbʌ que ja'n ni'iwʌ pʌn. Te' najsacopac-pʌ'nis najsacopajcʌsipʌ tiyʌ chamba. Te' wanajcupʌ tzajpojmoc más mʌja'ŋ que ja'n ni'iwʌ. 32Y tiyʌ quienu y myatoŋu te'wʌ chamba, y ya'iwʌ's ja'n suni wyʌ'aŋjamjayaju tiyʌta'm chamba. 33Pero iwʌ's wyʌ'aŋjamba tiyʌta'm chamba, yʌ'wʌ's chamgopuŋba que Dios wiyuŋdzamba. 34Iwʌ pʌn Diojsis quiʌ'weju, Diojsis chame chamjapya. Diojsis ja'n quiotzu'tzajay ñe'cʌ te' Espíritu Santo, sino que chi'pa jana yaye. 35Jene šunu Diojsis te' 'Yune. Te'cotoya quiojtu mumutiyʌ ñe' quiʌ'ojmo. 36Iwʌ's wyʌ'aŋjamjapya te' 'Yune pya'twa'a ja'n yayepʌ quenguy. Pero iwʌ's ja'n myato'ŋoyjay te' 'Yune, ja'n pya'te te' ja'n yayepʌ quenguy, sino que ñe'cʌ's ijtu quiowa mumu jamacotoya, porque chʌjqui'šca'u Dios.

Currently Selected:

San Juan 3: ZCNT

Highlight

Copy