San Juan 2

Cana-cumgu'yojmopʌ co'tʌjcajcuy

1Y tuca'y jamacʌsi quiosʌ'ŋajyaju co'tʌjcajcuy Galilea'ojmopʌ Cana-cumgu'yojmo. Y tey inʌc ijtu Jesujsis ñanaj. 2'Yaŋbʌquiajque'tu Jesús, tʌj te' quiʌ'aŋmayeji'ŋda'm te' co'tʌjcajcu'yojmo. 3Y yaju'cande' vino, Jesujsis ñana's ñʌjayu te' 'Yune Jesús: Ja'ndiyʌta'ma vino. 4Jesujsis 'yaŋdzoŋu: ¿Tiya' sunba ʌji'ŋ, nanay? Jañucʌmaj ʌs aŋsʌŋ. 5Te' ñana's ñʌjayu te' cotzo'ŋoyeta'm: Tzʌctamʌ tiyʌta'm mij ñchamjaytyamba ñe'cʌ's. 6Tey inʌc ijtyaju tujta'y tza'ta'mbʌ tinaja nʌ'-cotcuquiotoya wa'y che'cowajyaju judio'sta'm quiʌ' pyʌcpašej inʌc ñe' quiʌna'tzʌ'oquiu'yis. 7Ñʌjayaju Jesujsis te' cotzo'ŋoyeta'm: Yajtastamʌ nʌ'pit yʌ' tinajata'm. Y yajtastajšaju. 8Y ñʌjayaju Jesujsis: Yʌtij cʌtzpʌctamʌ y nʌmaŋjaytyamʌ te' jatacomi. Y ñʌmaŋjayaju. 9Tyo'ŋisu te' vino nʌ'pit tujcupʌ te' jatacomi's, y ja'n inʌc myusi jutʌpʌte'. Pero myujšajpa inʌc te' cotzo'ŋoye'sta'm. Wyeju te' jatacomi's te' nʌ quio'tʌjcajupʌ pʌn, 10y ñʌjayu: Mumu pʌ'nis wyinasajpa oyepʌ vino, y tyo'ŋyaju'ca wʌwʌ, pijche'cmaj šajpa te' me'šapʌ. Pero mis ŋgoquenumis te' oyepʌ vino hasta jasa'cacotoya.

11Yʌ'wʌte' te' winbʌ isaŋwʌ'ajcuy chʌjcupʌ Jesujsis Galilea'ojmopʌ Cana-cumgu'yojmo. Tey yajqueju myʌja'ŋajcʌ', y wyʌ'aŋjamyaju ñe'cʌ quiʌ'aŋmaye'sta'm.

12Jʌsa'ca wanaquiaju Capernaum-gumgu'yojmo ñe'cʌ, te' ñanaj, pyotzota'm y tʌj te' quiʌ'aŋmayeta'm. Y tzʌ'yutʌj tey metza tuca'y jama.

Yajwindujcu Jesujsis uy mya'ajyaju templo'ojmo

(Mt. 21.12-13; Mr. 11.15-18; Lc. 19.45-46)

13Nʌte' inʌc tyo'mʌyu te' pascua-sʌŋ, te' judio'sta'mñe', y qui'mu Jesús Jerusale'ŋojmo. 14Y quienu templo'ojmo mya'ʌyajpapʌ's cabrestu y ñchowambe y palomata'm. Y quiengue'tu tey pocšajupʌ quiacpʌ'yajpapʌ's tumin. 15Y chʌjcu tzapyʌ nacsoquiuy y myacputpʌ'yaju mumu te' templo'ojmoc. Y myacputpʌ'u jujche'ŋ mya'ʌyajpapʌ's inʌc ñchowambe y cabrestu te' templo'ojmo. Y 'yumbʌ'pʌ'wʌyjayaju te' tyumin cacpʌ'oyajpapʌ'sñe', y myucswitu'pʌ'jayaju te' myesata'm. 16Y ñʌjayaju Jesujsis te' mya'ʌyajpapʌ's palomata'm: Yajʌcʌ'tamʌ yʌ' ma'aj. Uy ma'ajcuy tʌcšej tzʌcjaytyame ʌs Ndata Diojsis tyʌc. 17Pijche'ctʌs, te' quiʌ'aŋmaye'sta'm, njamwʌtzʌjcutʌs que yʌ'šejte' ja'yʌyu: Jucʌtʌc po'pa ʌs ndzocoy, y ndʌŋga'pa'ʌs nwin wa'ytyij ijtu masa'najcuy mis ndʌjcojmo. 18Y 'yaŋdzoŋyaju judio'sta'm y nʌmyaju: ¿Tiyʌpi'tandʌj nyajquenba que ijtumis aŋgui'mʌtʌjcuy wa'mis yʌšej ndzʌjcu? 19'Yaŋdzoŋyaju Jesujsis y nʌmu: Yajtamʌ yʌ' templo, y tuca'y jamacʌsi nyajtzu'cumwʌtzʌcpa'ʌs. 20Pijche'ca nʌmyaju judiota'm: Wʌstʌjqui's-co-tujta'y amepityʌ' yajtuquiaju yʌ' templo, ¿y mis, tuca'y jamapitmis nyajtzu'cumwʌtzʌcpa? 21Pero te' templo, ñe'te' cuerpo inʌc nʌ chamu. 22Te'cotoya, winsa'u'c ca'yajupʌ'ojmoc, tʌs te' quiʌ'aŋmaye's njamwʌtzʌjcutʌs que te'šej chamu. Y nwʌ'aŋjamutʌs te' Totojaye y te' Jesujsis chamušej.

Jesujsis ispʌcpa mumu pʌn

23Jerusale'ŋojmo ijtu'c Jesús pascua-sʌ'ŋoyj wyʌ'aŋjamyaju wʌwʌta'mbʌ's que ñe'cʌte' te' Mesías, quienjayaju'ca isaŋwʌ'ajcuy nʌ inʌc chʌjcupʌ. 24Pero Jesujsis ja'n inʌc quiojtyay pyaqui anecʌsi, porque mumu pʌn inʌc ispʌquiajpa ñe'cʌ's. 25Ja'ndiyʌ inʌc pyena iwʌ's wa'y chamjayu tiyʌ quipspa pʌ'nis, porque ñe'cʌ's myuspʌ'pa tiyʌ ijtu pʌ'nis choco'yojmo.

Currently Selected:

San Juan 2: ZCNT

Highlight

Copy