San Juan 21

Jesujsis yajqueñaju wyin cu'ya'ytya'mbʌ quiʌ'aŋmaye

1Como quiʌ'aŋmayetʌjyʌ', jʌsa'ca yajquenwʌtzʌjque'tutʌj wyin Jesujsis te' Tiberias-ma'raŋi. Y yʌ'šejtʌs ŋguenu: 2Tumʌ ijtutʌj inʌc Simón Pedro, te' Tomás ñʌjayajpapʌ Dídimo, y te' Cana'ojmopʌ Galilea's quiowindzʌmbapʌ Natanael, y Zebedeo'sta'm 'yune, y metza eyata'mbʌ Jesujsis quiʌ'aŋmaye. 3Y nʌjayutʌj Simón Pedro's: Maŋbapʌ'ʌjyʌ' suyu. Y nʌjayutʌs: Maŋgue'tpatʌj tʌj miji'ŋ. Tʌjcʌyutʌj barco'ojmo y te'šejtʌj maŋu. Y tumʌ tzu' tʌj suyu y jañucʌtʌs yajtiyʌ.

4Y nʌ'c tyaŋbʌ'nʌmu minu Jesús te' nʌ'-acapoyo'oyj. Pero ja'ndʌs inʌc musi juca Jesuste'. 5Y nʌjayutʌj: Tʌwʌy, ¿nʌ'ittamuja tiyʌ'iwʌpʌ cu'tcuy? Aŋdzoŋutʌs: Jañʌ'itʌtʌs. 6Y Jesujsistʌj nʌjayu: Cottamʌ mis suquiuy-ñuti te' barco's chʌ'na'ŋojmoc, y tey maŋbamis nuctamu wʌwʌ. Pijche'ca ŋgojtutʌs tey y nijutzandʌs inʌc ja'n musi ŋguŋbujtu porque aŋba'te tʌjcʌyu coquej. 7Ʌjte' te' Jesujsis quiʌ'aŋmaye jene šunbapʌ, y nʌjayu'ʌs te' Pedro: Tʌ ʌ' Ngomi. Ispʌjcu'ca Simón Pedro's que tʌste' Ngomi, ši'nʌyu pyama (porque wyojpʌ'upʌte' inʌc), y tyʌŋbʌ'u wyin ma'rojmo. 8Y miñaju te' eyata'mbʌ cʌ'aŋmaye te' barco'ojmo porque ja'nande' inʌc jene ya'ay te' ma'ra'acapoya, mojsi's metroše'ŋojmotya'nde' inʌc. Njopo'patʌs nʌnu'cu barcopit te' suquiuy-ñuti tajsupʌ coque's.

9Y wanajcu'ctijtʌj najsojmo ŋguenutʌs jajnayupʌ ju'uy tey y te' ju'uquiʌsi nʌ jya'supʌ coquej, y tu'maŋ ijtu inʌc pan. 10Nʌjayutʌj Jesujsis: Nʌmindamʌ tumʌ mecha'c te' coquej te' yʌmajmis nuctamupʌ. 11Tʌjcʌwyʌtzʌjcu Simón Pedro, y maŋu jyoponʌpujtu te' suquiuy-ñuti nascʌsi, nutzuta'mbʌ coquejpit tajsupʌ. Y ijtu inʌc te'wo'mo ciento cincuenta y trespʌ coquejta'm. Y ñempe aŋba'te inʌc jachitzʌ te' suquiuy-ñuti. 12Nʌjayutʌj Jesujsis: Mindamʌ, minʌ cu'ttamʌ. Y ñempetʌj quiʌ'aŋmaye japyaquitzoco'yatʌj wa'ytyʌs ŋgʌ'aŋwa'cu: ¿Mij, iwa'mijyʌ'? Porque ispʌjcutʌs que tʌste' Ngomi. 13Minu jeque Jesús te' ijtumʌy jucʌtʌc, pyʌjcu te' pan y te' coquejta'm y we'nbʌ'jayutʌj. 14Pijche'c ta'nu tuca'y ñacoyjtyʌj yajquenu wyin Jesujsis tʌj, te' quiʌ'aŋmayeta'm, desde que winsa'u ca'yajupʌ'ojmoc.

Jesujsis ñʌtzamdzamnayu Simón Pedro

15Y cu'tu'candʌ ñʌjayu Jesujsis te' Simón Pedro: Simón, Jonajsis 'yune, ¿sunbasʌ'ŋmisʌj más mis que ja'n yʌ'ta'mbʌ's? 'Yaŋdzoŋu Pedro's: Jʌ'ʌ, Señor, muspatijmis que sunba'ʌsmij. Ñʌjayu Jesujsis: Pʌ'nʌyjaya ʌs ñchowambe-uneta'm, porque ñchowambeše'ʌs ujchajpa te' wʌ'aŋjamyajpapʌ'sʌj. 16Chamwʌtzʌcjaquie'tu myetza naco'mo Jesujsis: Simón, Jonajsis 'yune, ¿sunbaja'ʌj? 'Yaŋdzoŋgue'tu Pedro's: Jʌ'ʌ, Señor, muspatijmis que sunba'ʌsmij. Ñʌjaquie'tu Jesujsis: Pʌ'nʌyjaya ʌs ñchowambeta'm, porque ñchowambeše'ʌs ujchajpa te' wʌ'aŋjamyajpapʌ'sʌj. 17Ñʌjaquie'tu Jesujsis tyuca'y ñaco'mo: Simón, Jonajsis 'yune, ¿sunbaja'ʌj? Tuyuquiʌñe'cu Pedro tyuca'y ñaco'ma' quiʌ'aŋwa'cu'ŋmʌjcʌ Jesujsis: ¿Sunbaja'ʌj? Aŋdzoŋgue'tu Pedro: Señor, bieŋdijmis muspa mumutiyʌ. Muspamis que sunba'ʌsmij. Ñʌjayu Jesujsis: Pʌ'nʌyjaya ʌs ñchowambeta'm ʌs ndzamepit.

18Wiyuŋše'ʌsmij nwiyuŋdzamjapya: 'Yunepʌ'nʌ'cmajmij ne'cʌ mis inʌc nyamba mbama, y myaŋbamij inʌc jutʌtijmis sunʌ. Pero ñchamupʌ'nʌ'camij maŋbamis nyajtʌyʌyu myejtzji'ŋ mis ŋgʌ', y eyapʌ'smij maŋba nyajyamu mbama. Y maŋbamij ñʌmaŋyaju ne'cʌmis ja'n sunimʌy. 19Y yʌ'šej chamjayu Jesujsis wa'ytye' ñʌctʌ'yu Pedro's jutz inʌc maŋba quia'u, wa'y yajquejayu Diojsis myʌja'ŋajcuy. Y yʌ'se'a nʌmu'c, ñʌjayu te' Pedro: Co'ŋa'ʌj.

Te' jene šunbapʌ cʌ'aŋmaye

20Y tzeŋewitu'u Pedro y quenu'ʌj, ʌj te' cʌ'aŋmaye jene šunbapʌ Jesujsis, que te'yʌj inʌc nʌ maŋu 'yucaŋgʌ'ytya'm. Ʌjtijte'que' inʌc te' ujcaŋbajcu'yojmo Jesujsis che'ŋna'oyj te'tzna pocsupʌ inʌc. Y ʌste' ŋgʌ'aŋwa'que'tu: Señor, jutiwʌ'sasʌ'ŋ mijte' maŋba ñchi'oquia'u? 21Quenu'cti'ʌj Pedro's que nʌ'ʌj maŋu 'yucaŋgʌ'y, ñʌjayu Jesús: ¿Y yʌ'wʌ's, tiya' maŋba chʌjcu? 22Y ñʌjayu Jesujsis: Juca sunba'ʌs wa'y chʌ'yu ñe'cʌ hasta que mingue'tpa'ʌj, ¿tiya' maya'cu'ya mbʌcpa? Co'ŋa'ʌj mis.

23Pijche'ca copuŋu atzi'ojmota'm que ʌj, te' cʌ'aŋmaye, ja'nʌj inʌc maŋu ŋga'u. Pero Jesujsis jañʌja: Ja'n maŋu quia'u, sino ñʌjayupʌte': Juca sunba'ʌs wa'y chʌ'yu ñe'cʌ hasta que mingue'tpa'ʌj, ¿tiyʌ maya'cu'ya mbʌcpa?

24Ʌjte' te' cʌ'aŋmaye quiotestigosajpapʌ's yʌ'šejta'mbʌ tiyʌ, y nja'yʌyu'ʌs yʌ'šejta'mbʌ tiyʌ. Y mustambatʌ que ʌs ŋgotestigosajpašej wiyuŋbʌ tiyʌte'.

25Y ijtyajque'tu sone eyata'mbʌ tiyʌ chʌjcupʌ Jesujsis. Juca inʌc tʌ nja'yʌpyʌ'pa tumdumʌpʌ tiyʌ chʌjcušej, ŋguipspa'ʌs que ja'n inʌc maŋu tyʌjcʌpyʌ'u najsacopajcʌsi jujche'ŋ libro wa'y inʌc jya'yʌpyʌ'u. Amén.

Currently Selected:

San Juan 21: ZCNT

Highlight

Copy