San Juan 17

Wa'coyu Jesús quiʌ'aŋmayecotoyata'm

1Yʌ'šejta'mbʌ tiyʌ chamu Jesujsis, y quengui'mu'c tzajpojmo, nʌmu: Tatay, nu'cwa'nde' hora, yajqueña te' pʌnda'm ʌs mʌja'ŋajcuy, porque misʌjyʌ' Une. Te'še'ʌs wa'y ʌs nyajqueñajque'tu pʌnda'm mis mʌja'ŋajcuy. 2Ndzi'umisʌj aŋgui'mʌtʌjcuy wa'yʌs aŋgui'myaju mumu pʌn. Y te'šejtijque' wa'yʌs ndzi'yaju ja'n yayepʌ quenguy mumu jujche'ŋ misʌj ndzi'yajupʌ. 3Iwʌ'smij ispʌcpa que mijte' te' tumʌpʌ y wiyuŋšejpʌ Dios, y ispʌcpa'ʌj que ʌjte' te' Jesucristo, y que misʌjyʌ' ŋgʌ'weju, te'wʌ's pya'twa'a ja'n yayepʌ quenguy.

4Ʌs nyajqueñajwa'mʌs najsacopajcʌsita'mbʌ pʌn mis mʌja'ŋajcuy. Nyajta'nwa'mʌs te' yoscuy aŋgui'mušejmisʌj wa'yʌs ndzʌjcu. 5Yʌtij jeque, Tatay, yajqueña pʌnda'm tʌ mejtzji'ŋgʌ'pyʌ mʌja'ŋajcuy. Te' mʌja'ŋajcuy nʌ'ijtupʌ'ʌs inʌc miji'ŋ tzajpojmo, maŋba'cmaj tyujcu yʌ' najsacopac.

6Nyajnʌctʌ'yajwa'mʌs yʌ' pʌnda'm ndzi'yajupʌmisʌj najsacopajcʌsi que mʌja'ŋbʌte' mis nʌy. Misyʌ' inʌc ne'ta'm, y ndzi'yajumisʌj, y quiojamjayaju mis ndzame. 7Yʌtij ñʌctʌ'yajwa'a que mumutiyʌta'm ʌs muspa, misti'ʌjte' nyajmusque'tupʌ. 8Te' misʌj ndzamjayajupʌ tiyʌ, nʌtzamyajwa'mʌs ñe'cʌta'm. Y pyʌjcʌchoŋyaju, y wiyuŋšej wyʌ'aŋjamyajpa que miji'ŋʌj inʌc ijtu. Wyʌ'aŋjamyajpa que misʌjyʌ' ŋgʌ'weju.

9Ʌj nʌ'ʌj nwa'coyu ñe'cʌcotoyata'm. Ja'ʌs nwa'coyjayay te' ja'nʌj wʌ'aŋjamyapyʌcotoya, sino que nʌ'ʌj nwa'coyu te' misʌj ndzi'yajupʌcotoya porque miste'ne'ta'm. 10Y mumu jujche'ŋ ʌsne' miste'ne', y mumu jujche'ŋ misne' ʌste'ne'. Y ñe'cʌ'sta'm yajquejayajpa ʌs mʌja'ŋajcuy.

11Ja'namʌj ndzʌ'quie'temaj najsacopajcʌsi, pero yʌ'ta'mbʌ tzʌ'yajpamaj najsacopajcʌsi, pero ʌj minba'ʌj mi'aŋʌ tey tzajpojmo. Ʌs masanbʌ Ndataj mis copʌquia' cotu'ša' mis mbʌmipit yʌ' ndzi'yajupʌmisʌj, wa'y tumo'oyj quipsoyaju jujcha' ʌsne' miji'ŋ tumo'oyj ʌs ŋguipsoquiuy. 12Yʌmya'ʌj ijtu'cše'ŋoyj ñe'cʌji'ŋda'm najsacopajcʌsi ŋgopʌquiajpa'ʌs ŋgotu'šajpa'ʌs inʌc mis mbʌmipit, te' ndzi'yajupʌmisʌj. Ngopʌquiaju'ʌs ŋgotu'šaju'ʌs y nijutipʌ jatyocoya, na' tumʌ te' tocoquiuquiotoya pʌ'najupʌ pʌn. Te'šej tujcu chambašej Totojaye's.

13Pero yʌtij minba'ʌj mi'aŋʌ. Ndzamba'ʌs yʌ'šejta'mbʌ tiyʌ najsacopajcʌsi wa'y 'yomdzocopyaquiaju choco'yojmo omdzocopyacpaše'ʌj ʌj. 14Te' misʌj ndzamjayajupʌ tiyʌ nʌtzamyajwa'mʌs, y te' jana wʌ'aŋja'moye's qui'nišatʌju porque nwyʌ'aŋjamyajpamij jujcha' ʌsmij nwʌ'aŋjamba. 15Ja'ʌsmij nwa'cjay wa'mis nyajʌcʌ'yaju najsacopajcʌsi, sino que wa'mis ŋgomaquiaju yatziwʌpit. 16Nwyʌ'aŋjamyajpamij jeque ñe'cʌ'sta'm, jujcha' ʌsmij nwʌ'aŋjamba. 17Yajmasa'najojcʌtʌquia mis nwiyuŋbʌ tiyʌpit. Te' wiyuŋbʌ tiyʌ, miste'ne' ndzame. 18Ngʌ'wejušejmisʌj wa'yʌj minu ndzamgopu'ŋoyu najsacopajcʌsi, te'še'ʌs ŋgʌ'wejyajque'tu wa'y maŋu chamgopu'ŋoyaju naswindumʌ. 19Y ʌs nʌtu'ŋajpa'ʌs te' masa'najcuy, wa'y ñe'cʌ'sta'm ñʌtu'ŋajojcʌtʌquiaju te' masa'najcuy te' wiyuŋbʌ tiyʌpit.

20Pero ja'nʌj nwa'coy na' yʌ'ta'mbʌcotoya, sino que nwa'que'tpa'ʌs te' maŋbapʌ'sma'ʌj wʌ'aŋjamyajupʌcotoya yʌ'ta'mbʌ's 'yaŋma'yoquiupyit. 21Yʌ'še'ʌs nwa'cpa wa'y tumo'oyj quipsoyaju myuma'ŋgʌ'y, jujcha' ʌsne', Tatay, miji'ŋ tumo'oyjtyʌ ŋguipsoquiuy. Te'šejtijque' ñe'cʌta'm wa'y tumo'oyj quipsoyaju jujcha' tʌ mejtzji'ŋ, wa'y wyʌ'aŋjamyaju jana wʌ'aŋja'moye's que misʌjyʌ' ŋgʌ'weju. 22Jujcha' misʌj nyajmʌja'ŋaju, te'še'ʌs nyajmʌja'ŋajyajque'tu ñe'cʌta'm wa'y tumo'oyj quipsoyaju jujcha' tʌ tumo'oyjtyʌ quipsoytyamba mejtzji'ŋ. 23Ʌj tʌjcʌwya'mʌj ñe'ta'm choco'yojmo, y mij, ñdyʌjcʌyumij ʌs ndzoco'yojmo, wa'y tumo'oyj quipsoyaju choco'yojmo myuma'ŋgʌ'y. Y como tumʌpʌ quipsoquiuytyʌ nʌtu'ŋajpa, te'wʌcʌsi maŋba myujšaju jana wʌ'aŋja'moye's que misʌjyʌ' ŋgʌ'weju, y ʌj misʌj sunbašej, te'šejmis sunjayajpa ʌs nwʌ'aŋja'moye.

24Tatay, sunba'ʌs wa'y maŋu ijtyajque'tu ʌji'ŋ maŋbamʌ'yʌj ijtu, yʌ' misʌj ndzi'yajupʌ pʌn, wa'y quieñaju jutz misʌj nyajmʌja'ŋaju, porque sunumisʌj. 25Tatay, njyustopʌmijte'. Jana wʌ'aŋja'moye's ja'nmij ispʌquiay pero ʌs ispʌcpa'ʌsmij. Y yʌ' ʌs ŋgʌ'aŋmaye'sta'm myujšajpa que misʌjyʌ' ŋgʌ'weju najsacopajcʌsi. 26Y ʌs nyajmujšajwa'mʌs iwʌmijte', y maŋbama'ʌs nyajmujsa'ŋʌyaju. Te'šej maŋba ijtu ñe'ta'm choco'yojmo misne' su'noquiuy, wa'y šu'noyaju jujcha' misʌj ʌj sunba. Y ʌj maŋba'ʌj ijtu ñe'ta'm choco'yojmo.

Currently Selected:

San Juan 17: ZCNT

Highlight

Copy