San Juan 16

1Yʌ'šejta'mbʌ tiyʌ'ʌsmij ndzamjaytyamu wa'y jana myocha'u mista'm nwʌ'aŋja'moquiuy te' na'tzipit. 2Maŋbamij myacputʌtʌjtamu judio'sta'm wyindʌjcojmoc. Y maŋba minu aŋsʌŋ maŋba quiomʌ'yaju'c que nʌ quiʌna'tzʌyaju Dios iwʌ'smij yajca'ʌtʌjtamba. 3Y yʌ'šejta'mbʌ tiyʌ maŋba chʌquiaju porque ja'nʌj ispʌquiay ʌj ni ʌs Ndata Dios. 4Pero ndzamjaytyamu'ʌsmij yʌ'šej wa'mis njamwʌtzʌctamu minba'cande' hora, que ndzamjaytyamutya'mʌsmij.

Espíritu Santo's yoscuy

Pero tzo'tzcu'yojmo jañchamjaytyamʌ'ʌsmij yʌ'šejta'mbʌ tiyʌ porque yʌ'yʌj inʌc ijtu miji'ŋda'm. 5Pero yʌtij maŋba'ʌj ijtumʌy te' cʌ'wejupʌ'sʌj. Y mista'm nijutiwʌ's ja'n quiʌ'aŋwa'que: ¿Juta'nde' myaŋba? 6Y jene triste'aju mista'm ndzocoy porque ndzamjaytyamu'ʌsmij yʌ'šejta'mbʌ tiyʌ. 7Pero ndzamjaytyamu'ʌsmij wiyuŋbʌ tiyʌ. Mijcotoyata'm pyʌcpa wa'yʌj maŋu. Juca ja'nʌj mawe ʌj, te' Cotzo'ŋopyawʌ's ja'nmij ŋguiʌ'mindame. Pero juca maŋba ʌj, maŋba'ʌsmij ŋgʌ'wejaytyamu. 8Y minba'ca ñe'cʌ, maŋba yajmujsu najsacopajcʌsita'mbʌ tiyʌcʌsita'm cowapa'tyajpa, y jutzte' te' justo'ajcuy, y jutzte' maŋba quiʌme'tzoyu Dios. 9Maŋba yajmujšaju que cowapa'tyaju porque ja'nʌj wʌ'aŋjamyay ʌj. 10Maŋba yajmujšaju que justo'ajcu'yojmo'ʌj tiju ijtu porque maŋba'ʌj Ndata'ŋʌ, y ja'na misʌj ŋguendaŋgue'te. 11Maŋba yajmujšaju que Diojsis maŋba quiʌme'chaju porque Satanás, te' najsacopac-cowi'na, jyajcʌyjayajwa'a jutz maŋba quio'aŋgʌyu.

12Ijtumaj sone tiyʌta'm wa'yʌsmij ndzamjaytyamu, pero ja'nmis maŋu mbʌ'mgopajcʌytyamu yʌtij. 13Pero minba'ca te' wiyuŋdzambapʌ Espíritu, ñe'cʌ'smij maŋba yajnʌctʌ'ytyamu mumu te' wiyuŋbʌ tiyʌ. Ja'n maŋu chamu te' ñe' quio'quips, sino que maŋba chamu jujche'ŋ tiyʌta'm yajmuspa Diojsis, y maŋbamij cha'maŋwajaytyamu maŋbamaj tyuquiajupʌ tiyʌ. 14Ñe'cʌ's maŋba yajqueju que mʌja'ŋbʌ pʌ'nʌj, porque te' ʌs ndzamyajupʌ tiyʌ, te'wʌ maŋba chamu ñe'cʌ's wa'mij nyajmustamu. 15Tyiyʌta'm ijtu ʌs Ndata'sñe', ʌstijte'que'ne'. Te'cotoya'ʌjte' nʌmu que Espíritu Santo's maŋba chamu ʌs ndzamyajupʌ tiyʌ, y maŋbamij nyajamwʌtzʌctamu.

Maŋba 'yomawitu'u mista'm ndoyapʌjcuy

16Uša'ŋ horacʌsi ja'namisʌj ŋguendame, y uša'ŋ horacʌsi maŋbamisʌj ŋguenwʌtzʌctaŋgue'tu. Ʌj maŋba'ʌj Ndata Diosaŋʌ. 17Pijche'cande' metza tuca'y te' quiʌ'aŋmayeta'm nañʌmjayatʌju ñe'co'mo: ¿Tiya'sʌ'ŋdʌyʌ' tzamjapya yʌ'šej: Uša'ŋ horacʌsi ja'namisʌj ŋguendame, y uša'ŋ horacʌsi maŋbamisʌj ŋguenwʌtzʌctaŋgue'tu? Y: ¿Ʌj maŋba'ʌj Ndata Diosaŋʌ? 18Nʌmyajpa jeque inʌc: ¿Tiya'sʌ'ŋyʌ' chamba yʌ'šej: Uša'ŋ horacʌsi? Ja'ndʌs nʌctʌ'i tiyʌyʌ' nʌ chamu.

19Ñʌctʌ'yu Jesujsis que sunba inʌc quiʌ'aŋwa'quiaju ñe'cʌ's, y ñʌjayaju: ¿Nʌja naquiʌ'aŋwa'cʌtʌjtamu tiyʌ'ʌste' ndzamu, nʌmu'cʌj: Uša'ŋ horacʌsi ja'namisʌj ŋguendame, y uša'ŋ horacʌsi maŋbamisʌj ŋguenwʌtzʌctaŋgue'tu? 20Wiyuŋše'ʌsmij nwiyuŋdzamjaytyamba que maŋbamij njyʌytyamu y ñdyoyapʌctamu. Pero te' ja'nʌj wʌ'aŋjamyapyʌ's maŋba ñʌ'omyaju. Pero ñempe mij jʌyu'c ñchʌ'ytyamʌ, jʌsa'ca maŋbamis njambʌ'tamu te' triste'ajcuy, maŋba 'yomawitu'u. 21Maŋba'c pyʌ'naju une quienba toya te' yomo's, porque nu'cwa'nde' pyoyaj. Pero yajpʌ'naju'ca te' une ja'na jyamwʌtzʌqui te' tyoya omapit, porque yajpʌ'naju jaya-une najsacopajcʌsi. 22Te'šejtijque' mista'm yʌtij, wiyuŋšej ndriste'ajtamumij. Pero minba'ʌsmij ŋguenwʌtzʌctamu, y maŋbamis nʌ'omdamu ndzoco'yojmo. Ya'iwʌ'smij ja'n maŋu yajwindujcu umis nʌ'omdamu. 23Ʌ' jamo'oyj yajtiya'misʌj ja'n maŋu ŋgʌ'aŋwa'ctamu. Wiyuŋše'ʌsmij nwiyuŋdzamjaytyamba que tiyʌta'm mis nwa'cjaytyamba ʌs Ndata Dios ʌs nʌquiʌsi, ñe'cʌ'smij maŋba ñchi'tamu. 24Yʌti'cše'ŋoyj yajtiyʌmajmis janwya'cjaytyamʌ ʌs Ndataj ʌs nʌquiʌsi. Wa'ctamʌ y maŋbamis mbʌjcʌchoŋdamu wa'mij 'yomdzocopyactamu.

Wyʌwya'a Jesucristo's najsacopajcʌsipʌ yacha'cuy

25Yʌ'šejta'mbʌ tiyʌ'ʌsmij ndzamjaytyamu comparacioŋbit. Maŋba minu aŋsʌŋ ja'na'ʌsmij oto'ŋʌytyame'c comparacioŋbit, pero quejuqueju'cʌsmij maŋba nʌtzamdamu tyiyʌta'm ʌs Ndata'sñe'. 26Ʌ'ta'mbʌ jamo'oyj ja'namisʌj maŋu ŋgʌjamʌ'ʌytyamu wa'yʌj nwa'coyu mijcotoyata'm. Ne'cʌmis maŋba nwa'cjaytyamu Dios ñempetiyʌ ʌs nʌquiʌsi. 27Ja'nʌs ojquita'e porque šundambamij ʌs Ndata's, porque mista'm sundamumisʌj ʌj, y nwʌ'aŋjamdamumis que Diosaŋʌcʌjyʌ' tzu'cumu. 28Tzu'cumu'ʌj Ndata'ŋʌc y minu'ʌj najsacopajcʌsi. Pero maŋbati'ʌs ndzajque'tu yʌ' najsacopac y maŋba'ʌj Ndataŋʌ. 29Tʌs, te' quiʌ'aŋmaye's, nʌjayutʌs Jesús: Yʌtij jʌ'ʌ, quejuqueju'c mis ndzamba, y nijutzpʌ comparación mis ja'n ndzame. 30Yʌtij nʌctʌ'pyatʌs que muspʌ'pamis mumutiyʌ, y ja'ndiyʌ pyena wa'mij ŋguiʌ'aŋwa'cu ya'iwʌ's. Yʌ'wʌcʌsi nwʌ'aŋjambatʌs que Diosaŋʌcmijyʌ' ñchu'cumu.

31'Yaŋdzoŋyaju Jesujsis: ¿Nʌwa'sʌ'ŋmis nwʌ'aŋjamdamu? 32Yʌtij jeque nʌ ñu'cu te' hora, y ta'nwa'nde' aŋsʌŋ wa'mij ñdyitpejpʌ'tamu. Y maŋba pyʌjcu tumduma'ŋbʌ'nis ñe' tyuŋ, y maŋbamisʌj ndzactamu naytyumʌ. Pero ja'nʌjyʌ' naytyumʌpʌ, porque ʌji'ŋ ijtu ʌs Ndataj. 33Yʌ'šejta'mbʌ tiyʌ'ʌsmij ndzamjaytyamu wa'mij sʌ'mnayu'c ittamu ʌs nʌ ndzamyajupʌ tiyʌpit. Maŋbamis ŋguendamu toya najsacopajcʌsi, pero paquitzoco'yajtamʌ, nwʌwya'mʌs najsacopajcʌsi quiʌñʌñajpapʌ tiyʌ.

Currently Selected:

San Juan 16: ZCNT

Highlight

Copy