LUCAS 7
7
Te Jesuse la slekutesbe te yaj-aꞌtel te jtul statal soltaro yuꞌun Romae
1Te kꞌalal laj yoꞌtan ta skꞌoponel te genteetike, bajt ta jtejklum Capernaum te Jesuse. 2Ay jtul statal soltaro yuꞌun Roma teꞌa te ay yaj-aꞌtel te ben kꞌux ta yoꞌtane. Ay ta chamel, y ya xchamix. 3Te kꞌalal la yaꞌibe skꞌoplal te Jesus te statal soltaroe, jich a stikon bael cheꞌoxeb moletik yuꞌun te juriyoetik ba skambeyik pawor te Jesuse te yauk xtal slekutesbe xchamel te yaj-aꞌtele. 4Jich xwokoletik kꞌoel te ba ay te Jesuse. Jich ya yalik:
—Yauk akoltabotik te statal soltaroe yuꞌun ben lek yoꞌtan, 5yuꞌun ben kꞌux ta yoꞌtan te jlumaltike, sok jaꞌ mismo a stejkꞌambotik te sinagoga kuꞌuntike —xchiik.
6Jich te Jesuse la soyinlan bael. Te kꞌalal nopol xkꞌotikix a te ba snae, te statal soltaroe la stikon tal chaꞌoxtul yamigotak, tal yalbeyik te Jesuse:
—Kajwal, jich a yal tal te statal soltaroe: ma laj me xꞌawakꞌ awokol. Ma la spas te ya xbaat ta snae, porke kꞌax chꞌin laj ya yaꞌi sba ta atojol stukel. 7Jaꞌ yuꞌun ma la skan stoy sba te tal sleat stukele. Pero tey laj a teme ya awal mantal te ya xkol te yaj-aꞌtele. 8Porke te statal soltaroe jaꞌ nax ay ta xchꞌuunel mantal ta stojol te machꞌa statal yuꞌune, sok ay laj ta skuenta spasel ta mantal te soltaroetike. Te kꞌalal jich ya yalbe te jtule: “Baan”, teme ya yute, tsꞌin ya xbajt. Teme “Laꞌ” ya yut te yane, ya xtal. Y te kꞌalal ya stikon ta mantal te yaj-aꞌtele, teme ay tut ya xba yaꞌbe spase, ya spas. Jich a stikonotik tal ta kaltik ta atojol —xchiik.
9Te kꞌalal la yaꞌi te Jesuse, aꞌabiyan yoꞌtan yuꞌun. La skꞌelube sit te machꞌatik tsꞌaklibil yuꞌune, jich a yal:
—Jamal ya kalbeyex, ni jtuluk jtaoj ta Israel te jich xchꞌuunej yoꞌtan te spisil ya xjuꞌ ta pasel kuꞌune, jich tutꞌil te winik to —xchi te Jesuse.
10Jicha sujtik bael ta na te machꞌatik tikonbilik tale. Lekix a kꞌo staik a te yaj-aꞌtele.
Te Jesuse la xchaꞌkusesbe yal jtul meꞌbaꞌ ants
11Ta patil te Jesuse bajt ta jun jtejklum Nain sbiil. Sjoyinej kꞌael te jnopojeletik yuꞌune sok bayal genteetik. 12Nopol xlaj kꞌotix a, te ba tiꞌ jtejklume la yil choybil kꞌael jtul anima yuꞌun xbajt ta mukel. Te smeꞌe meꞌbaꞌ ants. Jip a te jtul yale. Joyinbil kꞌael yuꞌun bayal genteetik yuꞌun te jtejklume. 13La yil te Kajwaltike sok la snaꞌbe yoꞌolil sba te meꞌba antse. Jich a yalbe:
—Ma okꞌan —xyut.
14Jicha tijilaj bael te Jesuse. La spikbey te skajonil te animae. Te machꞌatik xchoyojik kꞌale kꞌo stejkꞌan sbaik. Te Jesuse la yalbe te animae:
—Kere, ya kalbeyat, jajchan —xyut.
15Jich te animae la snajkan sba, y lijk ta kꞌop. Te Jesuse la yaꞌbe entregal te smeꞌe. 16Te kꞌalal la yilik te genteetike, spisilik a xiꞌik yuꞌun, y lijk yalbeyik kola yal Dios yuꞌun. La yalik:
—Batsꞌi mukꞌ jꞌalwanej te chikanix ta koliltike —xchiik.
Sok la yalik:
—Dios a tal skoltayix te jtejklum yuꞌune —xchiik. 17Pujk skꞌoplal te sjoylejal estado Judea sok ta bayuk nax te tuti spas te Jesuse.
Te machꞌatik tikonlanbil tal yuꞌun te Juan Akꞌ-ichꞌjaꞌe
18Te Juane albot yuꞌun te jnopojeletik yuꞌune te tut yipal ta spasel te Jesuse. Jich a yikꞌ tal cheb te jnopojeletik yuꞌune. 19La stikon bael ta jojkꞌoyel ta stojol te Jesuse me batsꞌi jaꞌix te Cristo te ya xtale o ay to xan yan ya xtal. 20Te machꞌatik la stikon bael te Juane, la jtijilaj bael te ba ay te Jesuse. Jich a yalbeyik:
—Te Juan Akꞌichꞌjaꞌe la stikonotik tal ta sjojkꞌoyel ta atojol me jaꞌat te Cristoat te ya xtale, o teme ay to yan te ya jmalitike —xchiik kꞌoel.
21Te kꞌalal teꞌ ayik ae la yilik te tutꞌil yipal ta slekutesel bayal genteetik te ayik ta chamele sok te ayik ta wokole. Sok yipal ta slokꞌesel pukuj ta yoꞌtanik te machꞌatik ay pukuj ta yoꞌtanike. Sok ya sjambe sit te bayal choketike. 22Te Jesuse la yaltalanbe:
—Baanik, ban albeyaik te Juane spisil te tut la awilike sok te tut la awaꞌibeyik sluware. Kꞌo albeyaik te yipal ta jamel sit te choketike, sok yipal ta lekubel te koxoetike, sok yipal ta lekubel stibalulik te machꞌatik ayik ta kꞌaꞌel-chamele, sok yipal ta jamel xchikin te machꞌatik ma xyaꞌiyik kꞌope, sok yipal ta chaꞌkuxel te animaetike, sok yipalix ta alel ta stojol meꞌbaetik te tutꞌil ayix te skolelike. 23Ben tsaꞌam slekil te machꞌa ma xchebaj yoꞌtan kuꞌune —xyut bael te Jesuse.
24Kalal sujtikix bael a te machꞌatik stikonej tal te Juane, te Jesuse lijk yaltalanbe te machꞌatik stsobo sbaike te tutꞌil ay te Juane. Jich a yal:
—¿Tut a te kꞌo awilik tal ta ba jojchol kꞌinale? ¿Me jaꞌ xkꞌo awilik tal te jalal te xmeylajan yuꞌun te ikꞌe? 25Teme ma jaꞌuke, ¿tut a te xkꞌo awilik teꞌae? ¿O jaꞌ xkꞌo awilik te jtul winik te ben tsaꞌam te skꞌuꞌ-spakꞌ slapoje? Anaꞌojik te machꞌatik ben tsaꞌam skꞌuꞌ-spakꞌ ya slape sok te ben lek uts ya xweꞌe, ay ta sna reyetik stukel. 26¿Tut a te xkꞌo awilik tale? ¿Mꞌen jaꞌ wan xkꞌo awilik jtul jꞌalwanej yuꞌun Dios? Jicha nix a. Sok ya kalbeyex te mas tulan yaꞌtel te tutꞌil jꞌalwanej yuꞌun te Diose. 27Yuꞌun jaꞌa nix a te Juan te jich tsꞌibubil jilel skꞌoplal ta Sjun te Diose:
“Ya me jnalates bael ta atojol jtul jꞌalwanej kuꞌun, yuꞌun ya xba xchapbeyat abe”, xchi me.
28Ya kalbeyex te maꞌyuk jtuluk jꞌalwanej chiknajem ta yolil genteetik te pajal yaꞌtel sok te Juan Akꞌichꞌjaꞌe. Pero te machꞌa chꞌin ay te ba ay ta ajwalil te Jtatik Diose, jaꞌ me mukꞌ ay yuꞌun te Juane —xchi te Jesuse.
29Spisil te genteetike te la yaꞌibeyik skꞌop te Juane, sok te jkꞌan-tojemaletik yuꞌun te Roma te akꞌtalanbot yichꞌik jaꞌ yuꞌun te Juane, la yalik te tutꞌil lek yaꞌtel stukel te Diose. 30Yan te fariseoetike sok te maestroetik yuꞌun te mantaliletike te ma akꞌtalanbot ichꞌjaꞌ yuꞌun te Juane la spꞌajik te tutꞌil kꞌan yichꞌik kꞌuxutayel yuꞌun te Diose. 31La yal te Kajwaltike:
—¿Tut ya jpajtik a te genteetik te kuxulik ta ora to? Ya kalbeyex te machꞌa pajal soke: 32Jaꞌ pajalik sok te untik te ya snajkan sbaik ta tajmal ta parke. Jich ya yawuntay te sjoꞌtake: La kokꞌesintik kamaytik, ma ajkꞌotajex yuꞌun. La jkꞌayojintik ben triste kꞌayojetik, pero te jaꞌexe ma okꞌex yuꞌun —te xchie. 33Porke te kꞌalal tal te Juan Akꞌichꞌjaꞌe, ma weꞌ ta lek sok maꞌyuk a yuchꞌ bino. Y te jaꞌexe la awalik te ay pukuj ta yoꞌtane. 34Patil a tal te Nichꞌanile te ya xweꞌ-xꞌuchꞌae. Jich ya awalik te toj ip xweꞌ-xꞌuchꞌae, sok te ya sjoyin jmulawiletik sok jkꞌan-tojemaletik. 35Pero te tutꞌil ay spꞌijil te Diose jaꞌ ya xchiknaj ta skuenta te tut yilel te alnichꞌanetik yuꞌune —xchi te Jesuse.
Te Jesuse ba yuluꞌtay ta sna te Simon te fariseoe
36Ay tul fariseo la yikꞌ ta weꞌel te Jesuse. Jicha bajt ta sna, sok la snajkan sbaik ta mexa. 37Ay jtul jmulawil-ants te ba jtejklume te la yaꞌibe sluwar te ikꞌot ta weꞌel te Jesus te ba sna te fariseoe. Jicha bajt teꞌa te antse. Yichꞌoj bael jun limeta te pasbil ta alabastro-ton te nojel ta perfumee. 38Tijilaj tal te ba yok te Jesuse. La yokꞌetay sba te antse. Tꞌulaj koel yaꞌlel sit ta yok te Jesuse, sok la skusbe ta stsotsil sjol. La yujtsꞌibe te yoke y la smalbe ta perfume. 39Te fariseoe te ikꞌawan ta weꞌele la yil te tuti spas te antse. Jich a yal ta yoꞌtan: “Te jaꞌuk jꞌalwanej yuꞌun Dios te winik to, ya snaꞌ te jichuke te tutꞌil jmulawil-ants te tal pikbek yok yuꞌune”, xchi ta yoꞌtan.
40Jich te Jesuse la yalbe te fariseoe:
—Simon, ay tut ya kalbeyat awaꞌi —xchi.
41La sjakꞌ te fariseoe:
—Albon tal, Maestro —xchi.
Jich lijk yalbe te Jesuse:
—Ay cheb winketik te la sbetanbeyik stakꞌin te machꞌa ay stakꞌine. Te jtule la sbetan kiniento denario takꞌin, te yane la sbetan sinkuenta. Y ma juꞌ yuꞌunik stojel. Jich te yajwal takꞌine xchebal la spasbe perdon, ma yaꞌbe stoj te sbete. 42Albon kaꞌitik: ¿Machꞌa ta xchebalik te ben kꞌux ya yaꞌi ta yoꞌtane? —xchi te Jesuse.
43La sjakꞌ te Simone:
—Te ya kale jaꞌ te winik te bayal takꞌin a sbetane —xchi.
Te Jesuse la yal:
—Jich te tutꞌil ya awale —xchi.
44Jich te Jesuse la skꞌeluy te antse, sok la yalbe te Simone:
—¿Me la awil te ants to? Te kꞌalal julon ta anae ma la awaꞌbon jaꞌ jpok a te koke. Yan te ants to la spokbon kok ta yaꞌlel sit, sok la skusbon ta stsotsil sjol. 45Te jaꞌate ma la awujtsꞌiyon. Yan te antse jaꞌ nax a te ochon tal ta anae, maꞌyuk a skom sba ta yujtsꞌiyel te koke. 46Ma la amalbon aseite ta jol te jaꞌate. Yan te ants to la smalbonix perfume ta kok stukel. 47Jaꞌ yuꞌun ya kalbeyat awaꞌi: Jaꞌ bayal kꞌuxon ta yoꞌtan yuꞌun te tutꞌil bayal smul a chꞌaybotixe. Yan te machꞌa chꞌin nax smul ya xchꞌaybote, chꞌin nax ay xkꞌuxul yoꞌtan yuꞌun —xchi.
48Y te Jesuse la yalbe te antse:
—Perdonadoix te amule —xchi.
49Spisil te machꞌatik ay ta mexa te ikꞌbilik ta weꞌel sok te Jesuse lijk yalbe sbaik:
—¿Machꞌa me a to te ya xjuꞌ ya xchꞌay mulil te ya yale? —xchiik. 50Te Jesuse la yalbe xan te antse:
—Kolematix porke xchꞌuunej awoꞌtan te ya xchꞌay mulil ta jkuentae. Junuk awoꞌtan xbaat —xchi te Jesuse.
Currently Selected:
LUCAS 7: AMANNT
Highlight
Share
Copy
Want to have your highlights saved across all your devices? Sign up or sign in
Nuevo Testamento Tzeltal de Amatenango © Sociedad Bíblica de México, 2006.
