LUCAS 8

Antstik te la yakꞌ sbaik ta abatinel ta stojol te Jesuse

1Ta patil te Jesuse been ta jtejklumetik sok ta kolonyaetik. Bayuk nax la yal kꞌael te lek achꞌ kꞌop yuꞌun te ya xlijkix ta mantal te Kajwaltik Diose. Sjoyinej ta beel te lajchaytul apostoletike. 2Sok ay antstik te la slokꞌesbeyix pukuj ta yoꞌtanike sok te la slekutesbeyik xchamelik te sjoyinejik ta beel euk te Jesuse. Jaꞌ te xMaria te xMagdalena sbiile te lokꞌem jukeb pukuj ta yoꞌtane. 3Sok te xJuanae te jaꞌ smamlal te jChuzae te jaꞌ yaj-kanan te jHerodese, sok te Susanae, sok ay to xan yan bayal antstik. Te tutik ay yuꞌun te antstike la yaꞌbeyik te Jesuse sok te apostoletike.

Seña-kꞌop te machꞌa xꞌawaleje

4Bayal machꞌatik a laj lokꞌ tal te ba jtejklumetike yuꞌun tal yilik te Jesuse. Te kꞌalal la stsob sbaik te bayal genteetike, jicha lijk yalbe ta seña-kꞌop te Jesuse:

5—Ay jtul winik lokꞌ bael ta yawel te stsꞌunube. Te kꞌalal lijk ta yawele, ay pꞌekajtik kꞌoel ta be te stsꞌunube. Kꞌax tekꞌulanek y kꞌa weꞌek ta teꞌtikil mut. 6Sok aya kꞌot ta ba tontikil. Kꞌalal chꞌij tal te tsꞌunubile, ora takej yuꞌun takin te slumile. 7Sok aya kꞌot ta chꞌixtikil te tsꞌunubile. Pajal a chꞌij tal sok te chꞌixe y tenot yuꞌun. 8Pero aya kꞌot ta lekil lum te tsꞌunubile. Chij tal, ben lek a yakꞌ yijkꞌats. Ay a yakꞌ sien ta jpꞌej te juju-pꞌej tsꞌunubile —xchi te Jesuse.

Jich yipal ta yalel te Jesuse, y ben tulan a lijk yal xan:

—Te machꞌa ay xchikin ta yaꞌiyel sluware, aꞌ me yaꞌibe lek sluwaril —xchi.

Te tut sluwaril te seña-kꞌopetike

9Te jnopojeletike lijk sjojkꞌobeyik te Jesuse te tut sluwaril te seña-kꞌop te la yale. 10Altalanbot yuꞌun te Jesuse:

—Te jaꞌexe Dios ya yaꞌbeyex anaꞌbeyik sluwaril te tutꞌil ay ta ajwalinel te ma xnaꞌbot sluwaril ta primeroe. Yan te yanetike, ya jkꞌopon ta seña-kꞌop, yuꞌun jayebuk ya yilik ta sitik ma snaꞌbeyik sluwaril, sok jayebuk buelta te ya xꞌaltalanbote, ma xkꞌot ta yoꞌtanik.

Te Jesuse la yalbe sluwaril te seña-kꞌop te machꞌa xꞌawaleje

11Jich ay sluwaril te seña-kꞌop te la kalbeyexe: Te tsꞌunubile jaꞌ te skꞌop Diose. 12Te tsꞌunubil te kꞌot ta bee jaꞌ skꞌoplal te machꞌatik ya yaꞌibe sluwar te skꞌop Diose, pero ya xtal te pukuje, ya slokꞌeslambe ta yoꞌtanik. Jich ma xchꞌuunik sok ma xkolik. 13Te tsꞌunubil te kꞌot ta ba tontikile jaꞌ skꞌoplal te machꞌatik ben jun yoꞌtanik ya xchꞌuunik te skꞌop Diose, pero ma sꞌismaj ta yoꞌtanik. Yal cheꞌoxeꞌ kaal ya xchꞌuunik, te kꞌalal ya xtal ta stojolik te prewae, ora ya xchebaj yoꞌtanik yuꞌun. 14Te tsꞌunubil te kꞌot ta chꞌixtikile jaꞌ skꞌoplal te machꞌatik ya yaꞌibe sluwar te skꞌop Diose, pero ma xjuꞌ yuꞌunik te tutik ya xbajt ta yoꞌtanik spasele. Ya xtenot yuꞌun te yaꞌtelik ta balmilale sok te skꞌulejalike, sok spisil te tutik ya skꞌupin spasele. Jich ma sitin ta yoꞌtanik te skꞌop Diose. 15Yan te tsꞌunubil te kꞌot ta lekil lume, jaꞌ skꞌoplal te machꞌatik ben jun yoꞌtanik ta xchꞌuunel te skꞌop Diose, sok ya yaꞌtelin spasel te tut ya yaꞌiye, y ben jun yoꞌtanik. Ya me sitin ta lek ta yoꞌtanik te skꞌop Diose.

Seña-kꞌop te lamparae

16“Maꞌyuk machꞌa ya stsun slampara te ay tut ya smuk aye, niuk yuꞌun ya yakꞌ ta yanil wayibal. Ya yakꞌ ta xtuchtajib, yuꞌun jich ya yil kꞌinal a te machꞌatik ya xꞌochik ta snae. 17Porke maꞌyuk tut nakbil te max chiknaje sok maꞌyuk mukul-kꞌop te makꞌ xchiknaj ta stojol te genteetike, y puersa ya xchiknaj ta sakil kꞌinal. 18Jaꞌ yuꞌun ya me awakꞌ ta awoꞌtanik a te tut ya awaꞌibeyik sluware. Porke te machꞌa ay tut yichꞌoje, ya me xꞌaꞌbot xan sjoy. Yan te machꞌa maꞌyuk tut ay yuꞌune ya xpojbot te tut yichꞌoj chꞌinuke —xchi te Jesuse.

Te smeꞌ te Jesuse sok te yijtsꞌinabe

19Te smeꞌ te Jesuse sok te yijtsꞌinabe laj kꞌot te ba aye. Ma spas a och te ba ay te Jesuse yuꞌun ben bayal te genteetike. 20Ay machꞌa ba yalbe te Jesuse:

—Te ameꞌe sok te awijtsꞌinabe lum ayik ba juerae, yuꞌun laj ya skꞌan skꞌoponat —xchi.

21Te Jesuse la sjakꞌ:

—Jaꞌ jmeꞌ sok jaꞌ kijtsꞌinab kꞌoem te machꞌatik ya yaꞌibeyik sluwar te skꞌop Diose sok te ya spasik te tut ya yale —xchi.

Te Jesuse la skom te ikꞌe sok te spuersa jaꞌe

22Ay jun kꞌaal och ta barko te Jesuse sok te jnopojeletik yuꞌune. Jich a yaltalanbe:

—Konik, kꞌaxukotik bael ta jejch mar —xchi.

Jicha laj bajt. 23Te kꞌalal yipalik bael ta kꞌaxel te ba mare, och swayel te Jesuse. Tal ben tulan ikꞌ te ba sba te mare, y kꞌan nojuk ta jaꞌ te barkoe. Lijk bayal swokolik yuꞌun y kꞌan mulek koel. 24Jicha ba stijik jajchel te Jesuse, y la yalbeyik:

—¡Maestro, Maestro! ¡Ya skꞌan smulotik jaꞌ! —xyutik. Te Jesus jajch, y la skom te ikꞌe sok te spuersa jaꞌe. Jicha kom spisil y ben lek senel a laj jil. 25Patil la yaltalanbe te jnopojeletike:

—¿Tut la apasik sok te xchꞌuunel awoꞌtanike? —xyutalan.

Toj cham a yaꞌiyik yuꞌun, sok lijk yajtal yoꞌtanik yuꞌun. Jicha lijk sjojkꞌobe sbaik:

—¿Machꞌa wan a to te juꞌ yuꞌun spasel ta mantal te ikꞌe sok te jaꞌe y ya xchꞌuumbot smantal yuꞌun? —xchiik.

Gadara-winik te ay pukuj ta yoꞌtan

26Jicha laj lokꞌ kꞌoel ta slum Gadara te ay ta jejch mar te jun nax yiloj sba sok te Galileae. 27Te kꞌalal kojtal ta barko te Jesuse, tijilaj tal te ba ay Jesus te jtul winik yuꞌun te jtejklume. Ayix bayal kꞌaal a te ay pukuj ta yoꞌtane. Makꞌ ya slapix skꞌuꞌ-spakꞌ, sok maꞌyukix ta sna. Jaꞌ snainejix te kampusanoe. 28Te kꞌalal la yil te Jesuse la skejan sba ta sit, y lijk awunuk:

—Jesus, ¿tuꞌun te tal awochintayone? Jaꞌat te Xnichꞌanat te Chꞌul Dios te ay ta chꞌulchane. Awokoluk ma me xꞌawilbajinon —xchi ta aw.

29Jich a yal te winike, yuꞌun pasotix ta mantal yuꞌun Jesus te pukuje te ya xlokꞌ ta yoꞌtan te winike. Bayalix buelta te aꞌbot yip yuꞌun te pukuje. Ay achukbotix ta kadena te yok-skꞌab yuꞌun te genteetike yuꞌun jich chukul ya skanantayik, pero ya xtuchꞌ yuꞌun te kadenae. Sok ya sitꞌesot lokꞌel yuꞌun pukuj te winike, ya xbajt te ba jochol te luware. 30Te Jesuse la sjojkꞌobe te winike:

—¿Tuti biil? —xyut.

Te winike la sjakꞌ:

—Te jbiil te joꞌone Bayalon —xchi. Jich a yal yuꞌun bayal te pukujetik te ochem ta yoꞌtane. 31Te pukujetike la skꞌambeyik pawor te Jesuse te manchuk ya xchꞌojot ochel ta chꞌen yuꞌune. 32Pero ay ben bayal chitametik yipalik ta weꞌel ta wits, jaꞌ yuꞌun te pukujetike la skambeyik pawor te Jesuse te yauk xꞌakꞌot ochel ta yoꞌtan te chitametike. Jich a yakꞌ permiso te Jesuse. 33Jich te pukujetike lokꞌ ta yoꞌtan te winike, ba ochuk ta yoꞌtan te chitametike. Spisil te chitametike xyalajan koel te ba koele, kꞌot kꞌalal ta yut jaꞌ. Teꞌ kꞌo sjikꞌtalan jaꞌ a.

34Te jkanan-chitametike la yilik te tuti kꞌot ta pasele. Laj lokꞌ bael ta anel yuꞌun xiꞌel. Ba yalatalanik te ba jtejklume sok te ba stenlejaltike. 35Jich te genteetike tal yilik te tuti kꞌot ta pasele. Kꞌalal kꞌoik te ba ay te Jesuse, nakal a kꞌo staik te winik te lokꞌemix pukujetik ta yoꞌtane. Teꞌ nakal a te ba xujk yok te Jesuse. Slapojix skꞌuꞌ-spakꞌ a, sok ya snaꞌix kꞌinal a. Te genteetike la xiꞌyuꞌun. 36Te machꞌatik la yilik te tuti kꞌot ta pasele lijk yalbeyik te tutꞌil lekutesotix te winik te ay pukuj ta yoꞌtane. 37Spisil te genteetik te ayik ta slum Gadarae lijk skꞌambeyik pawor te Jesuse te yauk xlokꞌ bael te ba slumike, yuꞌun ben xlaj xiꞌ yuꞌun. Jicha och xan ta barko te Jesuse, sujt bael teꞌa te ba lijk tale.

38Te winik te lokꞌemix pukujetik ta yoꞌtane la skꞌambe pawor te ya sjoyin bael te Jesuse. Pero te Jesuse la yalbe te ma xjuꞌ ya xbajt soke. Jich a yalbe:

39—Sujtan bael ta ana. Ban albeya te machꞌatik ay awuꞌune te tuti spasbeyatix te Diose —xyut. Jicha bajt te winike. Lijk yalbe spisil te jtejklum te tuti pasbot yuꞌun te Jesuse.

Te yantsil-nichꞌan Jairo, sok jtul ants te la spikbe xkamix te Jesuse

40Te kꞌalal sujt tal te Jesus te xkꞌotuk ta jejch mare, ben sniꞌ xyaꞌi te genteetike, porke spisil yipalik ta smaliyel te Jesuse. 41Jicha kꞌot jtul winik ta stojol te Jesuse, Jairo sbiil, te yichꞌoj yaꞌtel ta statalil te ba sinagogae. Te winik to la skejan sba ta yok te Jesuse y la skꞌambe pawor te yauk xbajt ta snae, 42yuꞌun ya xchamix te úniko yantsil-nichꞌane te ayix wan lajchayeb jaꞌbil yaꞌbilale. Te kꞌalal yipal kꞌael ta beel a te Jesuse, stenten sbaik kꞌael ta spat te genteetike.

43Te ba yolil te genteetike ay jtul ants te ayix lajchayeb jaꞌbil te ma xbajt te xchamel te ya yile. Spisil a slajinix stutik yuꞌun ta stojel te jpoxtawanejetike, pero ni ma lekub yuꞌun a. 44Te antse tijilaj bael ta spat te Jesuse. La spikbey stiꞌil te xkamixe. Mismo tiempo a majk te xchamele.

45Jich te Jesuse la sjojkꞌoy:

—¿Machꞌa a te la spikone? —xchi. Spisilik a yalik te maꞌyuk machꞌa pikot yuꞌune. La yal te Pedroe:

—Maestro, jaꞌ te genteetik te ya stenten sbaik te ba ayate —xchi.

46Te Jesuse la yal xan:

—Ay machꞌa la spikon, chikan a kaꞌi te aya lokꞌ bael te jpodere —xchi.

47Te antse la yil te ma spas te mukul naxe. Xmetmuntal ta sik tal skejan sba ta yok te Jesuse, sok la yal ta jamal ta stojol spisil te genteetike te tut sluwaril te la spikbey te xkamix te Jesuse, sok te tutꞌil a lekub ta orae. 48Te Jesuse la yalbe te antse:

—Kantsil, te tutꞌil jich la achꞌuun ta awoꞌtane, jich kolatix. Junuk awoꞌtan xbaat —xchi.

49Yipal to ta kꞌop a te Jesuse, ay machꞌa tal albek yuꞌun. Jich a yalbe te machꞌa ay yaꞌtel ta statal yuꞌun te sinagogae:

—Te awantsil-nichꞌane chamix. Ma xꞌawulilanix te Maestroe —xchi.

50Te Jesuse la yaꞌibe sluwar y jich a yalbe:

—Ma me xiꞌan. A me xchꞌuun awoꞌtan. Jich ya xkol te awantsil-nichꞌane —xyut.

51Te kꞌalal kꞌot ta na te Jesuse, maꞌyuk machꞌa yikꞌ ochel, jaꞌ nax te jPedroe, sok te Jacoboe, sok te Juane, sok te smeꞌ-stat te achꞌixe. 52Spisil yipalik ta okꞌel, sok xꞌuylajan ta yokꞌetayel te achꞌixe. Te Jesuse la yaltalanbe:

—Ma okꞌanik. Te achꞌixe ma chamenuk. Wayal nax —xchi.

53La stseꞌlayik te Jesuse, yuꞌun snaꞌojik te chamenix te achꞌixe. 54Jich te Jesuse la xchechbe skꞌab y tulan a kꞌopoj:

—Achꞌix, jajchan tal —xyut.

55Jicha sujt xan tal te xchꞌulel te achꞌixe, tsꞌin xtekꞌlo jajchel. Te Jesuse la yakꞌ mantal te ya xba yaꞌbeyik sweꞌele. 56Te smeꞌ-state toj cham a yaꞌiyik. Te Jesuse la yalbe mantal te ma me ayuk machꞌa ya yalbeyik te tuti kꞌotix ta pasele.

Currently Selected:

LUCAS 8: AMANNT

Highlight

Copy