JUAN 12

Jtul ants la smalbe perpume ta yok te Jesuse

1Wakeꞌ xan kꞌaal skꞌan a te kꞌin Pascuae, te Jesuse bajt ta Betania te ba ay te jLazaro te chaꞌkuxesot te ba animaetike. 2Teꞌ xchapik weꞌelil a yuꞌun ya sjoyin sbaik sok ta weꞌel te Jesuse. Te xMartae jaꞌa makꞌlinwan. Jich euk te jLazaroe la sjoyin ta weꞌel ta mexa te Jesuse sok te sjoꞌtake. 3Te xMariae la yichꞌ tal ol wan litro perpume te nardo sbiil te lom toyol stojole, y la smalbe ta yok te Jesuse. Te nax a la stakutesbe ta stsotsil sjol. Spisil te yut nae noj ta yikꞌ te perpumee.

4Jich te Judas Iscariotee, te jaꞌ jnopojel yuꞌun te Jesuse sok te jaꞌ xnichꞌan te Simone sok jaꞌ te machꞌa la yakꞌ entregal ta patil te Kajwaltike, la yal:

5—¿Tuꞌun te maꞌ chonilub te perpume to? Ya xlokꞌ tresientos denario takꞌin stojol te jichuke, yuꞌun ya yichꞌ koltayel a te meꞌbaꞌetike —xchi. 6Pero te Judase ma jichuk xyal yuꞌun yajtaluk yoꞌtan te meꞌbaꞌetike, yuꞌun jaꞌ ay ta yoꞌtan te elekꞌe. Stukel jtesorero, sok kꞌayem ta yelkꞌanel te takꞌin ya stsobike.

7Te Jesuse la yalbe:

—¿Tut yes awuꞌun? Yuꞌun skꞌejojbonix xpoxil jtiꞌbalul te tut ora ya kichꞌ mukele. 8Te meꞌbaꞌetike sil tiempo ajoyinejik stukel. Pero te joꞌone ma siluk tiempo te joyinejexe —xchi.

Chapbot skꞌoplal ta milel te jLazaroe

9Ay bayal juriyoetik la yaꞌiyik te ay ta Betania te Jesuse, jicha laj bajtik teꞌa. Ma jaꞌuk nax a ba yilik te Jesuse, jaꞌa ba yilik euk te jLazaroe te chaꞌkusesot yuꞌun te Jesuse. 10Jich te stataletik yuꞌun te saserdoteetike la xchapbeyik skꞌoplal ta milel euk te jLazaroe, 11porke stukel ta skaj te bayal juriyoetik ya spit sbaik lokꞌel te ba ayike yuꞌun xba xchꞌuunik te Jesuse.

Te Jesuse och bael ta Jerusalen

12Ta xchebal kꞌaal ay bayal genteetik te ya xlaj bajt ta Jerusalen yuꞌun te kꞌin Pascuae. La yaꞌibeyik sluwar te ya xtalix ta Jerusalen te Jesuse. 13Jich a sbojtalanik tal skꞌab palmera-teꞌ y lokꞌ staik te Jesuse. Xꞌawlajanik ta yalel:

—¡Ben tsaꞌam te machꞌa talemix ta stojol te Kajwaltike! ¡Ben tsaꞌam slekil! ¡Ben tsaꞌam slekil te Rey yuꞌun te Israele! —xchiik.

14Te Jesuse la sta jkojt chꞌin buru y mo a, jich tutꞌil ya yal te Sjun Diose:

15“Ma me xiꞌan, mukꞌul jtejklum Sion. Ila awil te Rey awuꞌunike, moem tal ta jkojt chꞌin buru”, xchi me.

16Te jnopojeletik yuꞌune ta slijkibal nax maꞌ snaꞌbeyik sluwar te tutiꞌ yilik xkꞌot ta pasele. Pero ta patil te kꞌalal akꞌotix ta ilel slekilal a te Jesuse, tal ta yoꞌtanik te spisil te tuti kꞌot ta pasele, jaꞌ te tut tsꞌibabil jilel ta stojole.

17Te genteetik te teꞌeyik sok a te Jesus te kꞌalal la yikꞌ tal lokꞌel te jLazaroe te ba mukꞌul y te la xchaꞌkuses tal te ba animaetike, jaꞌ a ba yalik te tutiꞌ yilike. 18Jaꞌ yuꞌun te genteetik lokꞌ staik te Jesuse, porke la yaꞌibeyik sluwar te seña smilagro te la spase. 19Pero te fariseoetike lijk yalbe sbaik:

—Ila awilik, ma xjuꞌix kuꞌuntik skomel. Yuꞌun spisil a bajtikix sok te Jesuse —xchiik.

Ay griegoetik ya sleik te Jesuse

20Ay griegoetik kapal sok te machꞌatik baemik ta Jerusalen ta skejanel sbaik yuꞌun te kꞌine. 21Te griegoetik to tijilajik tal te ba ay te jFelipee te talem ta Betsaida te jun jtejklum yuꞌun Galileae. Ba skꞌanbeyik pawor ta stojol:

—Mam bankil, ya jkꞌan kiltik euk te Jesuse —xchiik.

22Te Felipe ba yalbe te jꞌAndrese, y chebalik ba yalbeyik te Jesuse. 23Te Jesuse jich a yaltalanbe:

—Kꞌotix yorail te ya xꞌakꞌot ta ilel slekilal te Nichꞌanile. 24Jamal ya kalbeyex, teme ay pꞌejuk sbakꞌ triwu teme makꞌ xtꞌuxaj koel sok makꞌ xkꞌaꞌ ta lume, sigue yal jpꞌej. Pero teme kꞌaꞌe, bayal ya yakꞌ sit. 25Te machꞌa ya xkuxutay te xkuxlejale, ya me xchꞌay. Pero te machꞌa makꞌ xkuxutay xkuxlejal liꞌ ba balmilale, ya xkuxuyin sbajtel kꞌinal stukel. 26Teme ay machꞌa ya skꞌan yakꞌ sba ta tuuntesel kuꞌune, a me stsꞌakliyon te ba ya xboone. Y te ba ya xkꞌoone, te ya xkꞌot ekꞌa te machꞌa ya xtuun kuꞌune. Te machꞌa ya yakꞌ sba ta tuuntesel kuꞌune kꞌanbil me yuꞌun te jTate.

Te Jesuse ya yal te tutꞌil ya xchame

27“Te ora to bayal ayon ta ajtal-oꞌtan. ¿Y tut ya kal? ¿Me ya wan kal: “jTat, koltayaon yuꞌun te wokol to”, me xchon wan? Pero puersa jaꞌ talemon yuꞌun. 28JTat akꞌa ta ilel te slekilal abiile —xchi te Jesuse.

Jicha chiknaj jun kꞌop ta chꞌulchan. Jich a yal:

—La kakꞌix ta ilel slekil te jbiile, y ya me kakꞌ xan ta ilel —xchi.

29Te gente te teꞌelan ae la yaꞌiyik sok la skuyik te jaꞌ chauk te kꞌopoje. Pero ay yan la yalik:

—Chꞌul ángel wan a kꞌoponot yuꞌun —xchiik.

30Te Jesuse la yaltalanbe:

—Ma joꞌukon ta jkaj te kꞌopoj te jTate; jaꞌex ta akajik. 31Te ora to jaꞌix yorail te ya xꞌichꞌbot jkuenta smulik spisil te genteetike. Y te ora to yorailix te ya xchꞌojot lokꞌel te machꞌa ya spas mantal liꞌ ba balmilale. 32Pero te kꞌalal ya kichꞌ jachel moel liꞌ ba lume, joꞌon mismo ya kikꞌ tal ta jtojol spisil te genteetike —xchi.

33Jaꞌ to jaꞌ a yakꞌ ta naꞌbeyel sluwar te tutꞌ ya xchame.

34Te gentee la yalik:

—Kaꞌiyejtik te tut ya yal te mantaliletik te kuxul sbajtel qꞌuinal te Cristoe. ¿Tutꞌil kꞌoem yuꞌun te jich ya awal te puersa ya yichꞌ jojkꞌanele te Nichꞌanile? ¿Machꞌaa te Nichꞌanil ta akꞌope? —xchiik.

35Te Jesuse la yaltalanbe:

—Ay to me ta awolilik te machꞌa sakuben kꞌinal yuꞌune. Pero ma jaluk xan kꞌaal te ya ajoyinike. Benanik me yuꞌun liꞌ to xan me ay te sakil kꞌinal ta atojolike. Yuꞌun ma me xchꞌayemuk awoꞌtanik ya staex te ijkꞌal kꞌinale. Porke te machꞌa ya xbeen ta ijkꞌal kꞌinale ma snaꞌ ba ya xbajt. 36Chꞌuunaik me te sakil kꞌinale yuꞌun liꞌ to xan me ay awuꞌunik to, yuꞌun jich me yuꞌun ya xkꞌoex te sakil kꞌinale —xchi te Jesuse. Ta patil kꞌalal laj yoꞌtan te yalel to, bajt te Jesuse. Ma yilik ba bajt.

Te juriyoetike maꞌ xchꞌuunik te Jesuse

37Manchuk me bayal señaetik smilagro a akꞌtalanbot yilik, pero ma xchꞌuunik te Jesuse, 38yuꞌun jich me ya xkꞌot ta pasel te tut stsꞌibaye jilel te jꞌalwanej Isaiase:

“Kajwal, ¿me ay machꞌa xchꞌuunix te tut kalojbetik jile? ¿Me ay machꞌa aꞌbotix yil spoder te Kajwaltike?” xchi me.

39Jaꞌ yuꞌun maꞌ juꞌ yuꞌunik xchꞌuunel, yuꞌun jich stsꞌibayej jilel te jꞌIsaiase:

40“Dios a xchokutesbe sitik sok la stulantesbe yoꞌtanik, yuꞌun jich ma xyilik a, ni ma xyaꞌibe sluwar a te tut ya xꞌaltalanbote. Jich ma sujtes yoꞌtanik ta jtojol, y te joꞌone makꞌ jlekutes”, xchi me.

41Te jꞌIsaiase jich a yal to, porke yilojbe slekil te Jesuse, sok jaꞌ mismo te la yalbe skꞌoplale.

42Pero bayal juriyoetik la xchꞌuunik te Jesuse sok ay a xchꞌuunik euk te statal yuꞌunike. Pero ma xyal sbaik ta jamal yuꞌun ya xiꞌik te fariseoetik yuꞌun jich makꞌ xtenot lokꞌel a te ba sinagogae. 43Yuꞌun jaꞌ bayal skꞌoplal ta yoꞌtanik te jaꞌuk lek ya xꞌilot yuꞌun te genteetike, ma jaꞌuk tulan skꞌoplal ta yoꞌtanik teme lek ya xꞌilot yuꞌun te Diose.

Te skꞌop te Jesuse jaꞌ ya yakꞌ chiknajuk a te machꞌa ma tsaꞌamuke

44Te Jesuse tulan a kꞌopoj, jich a yal:

—Te machꞌa ya xchꞌuunone ma joꞌukon nax te ya xchꞌuunone; jaꞌ ya xchꞌuun euk te jTat te la stikonon tale. 45Te machꞌa ya yilonixe, jaꞌa yilix euk te Machꞌa la stikonon tale. 46Joꞌon te sakil kꞌinal te talemon ta balmilale. Te machꞌa ya xchꞌuuunone makꞌ xjilix ta ijkꞌal kꞌinal. 47Pero te machꞌa ya yaꞌibon sluwar te jkꞌope, teme ma xchꞌuune, ma joꞌukon ya kal te ya xꞌakꞌot ta chꞌayel yuꞌune. Porke ma jaꞌuk talemon yuꞌun te ya kakꞌ bael ta chꞌayel te genteetike. Jaꞌ talemon yuꞌun te ya jkoltay. 48Te machꞌa ya spꞌajone y teme ma xyakꞌ ta jkuenta te jkꞌope, ay me machꞌa te ya xꞌakꞌot bael ta chꞌayel yuꞌune: Te jkꞌop te la kalixe jaꞌ ya xꞌakꞌot bael ta chꞌayel yuꞌun ta slajibal kꞌaal. 49Porke ma joꞌukon jkꞌop te ya kale, ja skꞌop te jTat te la stikonon tale. Jaꞌ yalojbon mantal te tut ya kale sok te tut ya kakꞌ ta nopele. 50Y jnaꞌojbe sluwar te smantal te jTate, jaꞌ te kuxlejal sbajtel kꞌinale. Jaꞌ yuꞌun te tut ya kale, ya kal te tut yalojbon tal ta mantal te jTate —xchi te Jesuse.

Currently Selected:

JUAN 12: AMANNT

Highlight

Copy