HECHOS 2

Te tutꞌil a tal te Chꞌul Espiritue

1Te kꞌalal kꞌot skꞌaalel te kꞌin Pentecostese, spisil te hermanoetike stsoboj sbaik ta jun nax luwar a. 2Ben te ora a ay tuti kꞌopoj tal ta chꞌulchan jich tutꞌil te ben tulan xpuminaj te ikꞌe, xpumumet ta swolol te na te ba ayike. 3Y chiknaj ta sjolik jich tutꞌil chꞌin kꞌajk te xlaplunete, la spujkij sba y kꞌot ta skuentaik ta juju-tul. 4Ta spisilik a noj ta yoꞌtanik te Chꞌul Espiritue, y lijk kꞌopojikuk ta yanetik kꞌop chikan te tutꞌil a akꞌot kꞌopojuk yuꞌun te Espiritue.

5Ben te ora a ay juriyoetik talemik ta Jerusalen te ben jun yoꞌtanik xchꞌuunejik te Diose te talemik ta yanetik luware. 6Te genteetike la stsob sbaik tal ta yaꞌiyel te tut xpumumete, y ma snaꞌik tut ya spasik yuꞌun. Porke juju-tul ya yaꞌibe sba sluwar skꞌopik te tutꞌil ya xkꞌopojik te jnopojeletike. 7Lom cham a yaꞌiyik yuꞌun y bayal a aꞌbiyan yoꞌtanik. Lijk yalbe sbaik:

—¿Me ma wan jgalileaetikuk spisil te machꞌatik yipalik ta kꞌope? 8¿Tutꞌil ay a te ya kaꞌibe jba jkꞌoptik te jchꞌiibaltik xkꞌopojotike? 9Yuꞌun ay talemotik ta Partia, sok ta Media, sok ta Elam, sok ta Mesopotamia, sok ta Judea, sok ta Capadocia, sok ta Ponto, y sok ta estado Asia, 10sok ta Frigia, sok ta Panfilia, sok ta Egipto, y ta estadoetik yuꞌun Libia te nopol ay sok te jtejklum Cirenee, y ay machꞌa talemik ta jtejklum Roma. 11Ay stsꞌumbalotik te juriyoetike, y ay yanlumetik te sujtemix ta juriyoil euk. Sok ay talemotik ta Creta y sok ta Arabia. Y jpisiltik ya kaꞌibe jbajtik te jkꞌoptik te tutꞌil yanetik ya xkꞌopojotik te yakꞌojbotik te Diose —xchiik. 12Spisilik lom cham a yaꞌiyik y ma snaꞌik tut ya spasik yuꞌun. Y la sjojkꞌobe sbaik:

—¿Tut xyal spisil tsꞌin to? —xchiik.

13Pero ay te yane lijk yikꞌtinik, y la yalik:

—Yuꞌun xlaj yakubik —xchiik.

Te tuti altalanbot yuꞌun te jPedroe

14Jich te jPedroe la stejkꞌan sba jajchel sok te bulucheb apostoletike y tulan a lijk yal:

—Jaꞌex juriyoetik, y apisilik euk te ayex ta Jerusalene, aꞌibeya awaꞌiyik sluwaril te tut ya kalbeyexe, y kꞌotuk me ta awoꞌtanik tutꞌil ay. 15Makꞌ xlaj yakub te tutꞌil akuyojike, yuꞌun las noeve pajtajel to nax. 16Jal to jaꞌ ya xkꞌotix ta pasel te tut yaloj te jꞌalwanej Joel te kꞌalal jich a yale:

17“Jich ya yal te skꞌop Diose: Ta nopol slajibal kꞌaal ya me jpuk te Espíritu ta stojol spisil te gentee. Te akeremik y te awachꞌixik ay me tut ya yalik ta jkuenta. Te solteroetike ay me tut ya xꞌaꞌbot yilik ta stekꞌlejal yilel, y te machꞌa mamalikixe ay me tut ya xwayuchinik. 18Jich me ya jpukbey euk te Espíritu kuꞌun ta stojol te kaj-aꞌtel chikan me winik o ants, y ya me xkꞌopojik ta jkuentae. 19Ta chꞌulchan ya me kakꞌ ta ilel te tut lom yanike, y ta balmilal ay me señaetik: ay me chꞌichꞌ sok kꞌajkꞌ sok pimil chꞌail. 20Te kꞌajkꞌale ya me sujt ta ijkꞌal kꞌinal, y te ue jich me ya xkꞌot tut chꞌichꞌ. Jich me ya xkꞌot ta pasel te kꞌalal nopolix skꞌaalel a te Kajwaltike, te lom tulan aalel y lom tsaꞌam. 21Pero spisilik te machꞌatik xwokoletik ta stojol te Kajwaltike ya me sta skolelik”, xchi me.

22“Aꞌiyaik me cheꞌe, israeletik, te tut ya xlijk kalbeyexe: Yuꞌun te jaꞌexe anaꞌojik lek te Jesus ta Nazarete ben tsaꞌam slekil a ilot yuꞌun te Diose. Yuꞌun jaꞌ ta skuenta stukel te Diose te la spas mukꞌul señaetik, y milagroetik, sok te tut ben yan ta ilele. 23Pero te kꞌalal akꞌot entregal ta akꞌabik te Jesuse, te tutꞌil jich snopoj ta primero te Diose, te jaꞌexe la atsakik y la amilik, yuꞌun la awaꞌbey ta skꞌabik te machꞌatik ma snaꞌbeyik sba te Diose te la sjojkꞌanik ta krus. 24Pero Dios la xchaꞌkuses tal, la skolta tal lokꞌel te ba ay spoder te lajele. Porke te lajele ma juꞌ yuꞌun te jmel nax a yuꞌunine. 25Te rey Davide jich a yalbe skꞌoplal euk:

“Te joꞌone sil tiempo a kil te Kajwaltik te ay ta jtojole, tekꞌel ta sbatsꞌil jkꞌab yuꞌun maꞌyuk tut ya xjuꞌ ya xtꞌuxanon. 26Jaꞌ yuꞌun te ben jun koꞌtane sok ben lek a kalbe skꞌoplal ta jtiꞌe. Ta spisil jkuxlejal maꞌyuk wokol ya kaꞌi, 27porke ma teyuk ya ajilesbon te ba ay te jchꞌenale. Sok ma xꞌawakꞌ kꞌaꞌuk jtiꞌbalul joꞌon te achꞌul awaj-aꞌtelone. 28La awaꞌbon kil te sbeelel kuxlejale, y ben jun koꞌtan yuꞌun te tutꞌil ajoyinejone”, xchi me.

29Kermanotak, ya kalbeyex ta jamal te antibo jtatik Davide cham y mukbot te stiꞌbalule, y te xchꞌenale chikan to ta jtojoltik te ora to. 30Pero te jDavide jꞌalwanej yuꞌun te Diose. Jich snaꞌoj te tut yaloj Dios ta skuenta te jaꞌ ta stsꞌumbal te ya xchiknaj yuꞌun Dios te Cristoe, te jaꞌ sjelol ya xkꞌot ta reyile. 31Te jDavide yipal ya yilel ta sit kꞌoem, jich a yalbe skꞌoplal te tutꞌil ya xchaꞌkux tal te Cristoe. Sok la yal te ma teyuk ya xjil a te xchꞌulel te baꞌ xchꞌenale, sok te ma teyuk ya xkꞌaꞌ a te stiꞌbalule. 32Yuꞌun jaꞌix te Jesuse te Dios a chaꞌkusesot tal yuꞌune. Y te joꞌotike testigootik yuꞌun te jich a pasbote. 33Y ikꞌotix bael yuꞌun ba naklukix ta sbatsꞌil skꞌab te Diose, y aꞌbot ta skuenta te Chꞌul Espíritu te tut albil yuꞌun te Tatile. Jaꞌ yuꞌun te tut yipalex ta yilele sok te yipalex ta yaꞌiyele, jaꞌ a yakꞌix kꞌotuk ta pasel te Jesuse. 34Porke ma jaꞌuk te jꞌDavid te mo bael ta chꞌulchane. Yuꞌun mismo te jDavide la yal:

“Te Kajwaltik Diose la yalbe te Kajwale: ‘Naklan ta sbatsꞌil jkꞌab 35jaꞌto teme la kaꞌbeyat apuchꞌ ta tekꞌel te akontrae’”, xchi me.

36Naꞌaik me te jaꞌexe jtejklum israel te tut batsꞌi jiche, te jaꞌ mismo ya kalbeyex skꞌoplal te Jesuse te la ajojkꞌanik ta kruse. Te Diose la yakꞌix ta ilel te jaꞌ te Cristoe sok te jaꞌ Kajwaltik stukele —xchi te jPedroe.

37Te kꞌalal la yaꞌiyik te machꞌatik te tsobolik ae, lom kꞌux a yaꞌiyik kꞌot kꞌalal ta yoꞌtanik, y la sjojkꞌobeyik te jPedroe y sok te yanetik xan apostoletike:

—Kermanotak, ¿tut lek ya skꞌan jpastik? —xchiik.

38Te jPedroe la sjakꞌtalanbe:

—Sujtesa awoꞌtanik ta stojol Dios y akꞌa abaik ta ichꞌjaꞌ juju-tul ta skuenta te Jesucristo. Yuꞌun jich me ya spasbeyex perdon yuꞌun amulik te Diose, sok amajtanik ya yaꞌbelex te Chꞌul Espiritue. 39Porke yalojix te Diose te ya yaꞌbeyex te Chꞌul Espiritue, sok euk te awuntikilike, y jich euk spisil te machꞌatik jakal ayike, chikan te jayeb machꞌa ya xꞌikꞌot yuꞌun te Kajwaltik Diose —xchi.

40Te jPedroe la to xan yalbe lek te skꞌop Diose y la stsits te jaꞌ lek te yauk xchꞌuunike. Y la yaltalanbe:

—Pita abaik tal lokꞌel te ba genteetik te ma tsaꞌamuk yoꞌtanike —xchi. 41Jich te machꞌatik la yakꞌik ta jkuenta te skꞌop Dios te la yal te jPedroe, akꞌtalanbot yichꞌjaꞌ. Te kꞌaal abi ay wan tres mil ta jtul a pꞌolik te hermanoetike.

42Spisilik aꞌ yoꞌtaninik snopel te tut ya snojpesot yuꞌun te apostoletike, y ben jun yoꞌtan a yaꞌi sbaik ta spisilik, y la stsob sbaik ta weꞌel sok ta skꞌoponel Dios.

Tutꞌil ay te xkuxlejal te primero hermanotike

43Spisilik lom yan a yilik te tutꞌil ay bayal milagroetik y señaetik te la yichꞌ pasel ta skuenta te apostoletike.

44Yan te machꞌatik xchꞌuunejikix te Jesuse ben jun yoꞌtan stsoboj sbaik, y komon a tuun yuꞌunik te stutik yuꞌunike. 45La xchonik te slumike y spisil te tut ay yuꞌunike, y la spukbe sbaik te takꞌin, chikan te tut nesesidad yuꞌun te juju-tule. 46Jujun kꞌaal ya stsobilan sbaik ta templo y la sjoyin sbaik ta weꞌel ta skuenta Dios te ba snaike. Ben jun yoꞌtanik a weꞌik, y ben kontentoik. 47La skꞌayojinbeyik slekil te Diose, y ben lek skꞌoplalik yuꞌun spisil te jtejklume. Jujun kꞌaal te Kajwaltike la spꞌoles te hermanoetike, chikan te machꞌatik ya sta skolelike.

Currently Selected:

HECHOS 2: AMANNT

Highlight

Copy