HECHOS 1
1
Jesus a yal te ya xtal te Chꞌul Espiritue
1Jaꞌat Teófilo, te ben lek awoꞌtane, te primero jun te la jpasbeyate la jtsꞌibaj teꞌa spisil te tuti spas te Jesuse y tuti nojpeswan kꞌalal ta slijkibal 2jaꞌ to te kꞌalal ikꞌot moel ta chꞌulchane. Te kꞌalal ma to xbajt ta chꞌulchan ae, la stꞌuj te apostoletike. Ta skuenta te Chꞌul Espiritue la spas jilel ta mantal te tut ya skꞌan spasike.
3Y ta patil, te kꞌaxix tal yuꞌun a te milele, la yakꞌ sba ta ilel ta stekꞌlejal. Klaro a yakꞌtalan ta ilel te tutꞌil kuxulixe. Kuarenta kꞌaal a yakꞌ sba ta ilel ta stojolik. Y la yaltalanbe sluwar te tutꞌil ay ta ajwalinel te Diose.
4Te kꞌalal sjoyinej to a te apostoletike, te Jesuse la yaltalanbe te ma to xlokꞌik bael te ba Jerusalene. La yaltalanbe:
—Maliyaik te tut yaloj te Jtat te tut ya yaꞌbeyexe, jich te tuti kalbeyexe. 5Jich te Juane la yaꞌbe yichꞌ jaꞌ te gente ta jaꞌ nax. Pero ma jalukix kꞌaal te jaꞌexe te ya yaꞌbelex awichꞌik te Chꞌul Espiritue —xchi te Jesuse.
Te Jesuse mo bael ta chꞌulchan
6Ta machꞌatik stsoboj sbaik sok te Jesuse la sjojkꞌobeyik:
—Kajwal, ¿me yorailix te ya awakꞌ mantalejukotik liꞌ ba jlumaltik israele? —xyutik.
7Te Jesuse la sjakꞌtalanbe:
—Te jaꞌexe maꞌyuk ta akuentaik te tut ora sok te tut kꞌaalile. Jaꞌ ay ta skuenta stukel te Tatile te tut ya yakꞌ ta pasele. 8Pero te kꞌalal ya xtal te Chꞌul Espíritu te ya xjul ta akuentaike ya me awichꞌik apoderik. Jich me testigo ya xkꞌoex kuꞌun ta Jerusalen, sok spisil ta estado yuꞌun Judea, sok ta estado yuꞌun Samaria, y sok ta spisil te balmilale —xchi.
9Te kꞌalal laj yoꞌtan ta yalel to, yipalik to ta yilel a, te Jesuse mo bael ta chꞌulchan. Pixot bael ta tokal y maꞌ yilbeyikix sit a. 10Yipalik to ta skꞌeluyel tutꞌil a mo bael ta chꞌulchan a te Jesuse, chiknaj ta stsꞌeelik cheb winketik. Ben sak te skꞌuꞌ-spakꞌike.
11Altalanbot yuꞌun:
—Galileo winketik, ¿tuꞌun te sigue ya akꞌeluyik moel te chꞌulchane? Jaꞌ mismo te Jesus te anin ta awolilike te ikꞌotix moel ta chꞌulchane, jich me ya xchaꞌtal xan te tutꞌil la awilik a bajt ta chꞌulchane —xchiik te winketike.
Tꞌujot te jMatias yuꞌun jaꞌ sjelol te Judase
12Jich a sjilesik te Wits Olivailtik sbiile, sujtik bael ta Jerusalen te apostoletike. Te nopol nax ay soke, jich snajtꞌil a beenik bael te tutꞌil ya spas xbeenik ta skꞌaalel kuxo-oꞌtane. 13Te kꞌalal laj kꞌot te ba jtejklume, moik bael ta xchaꞌkajal na te baꞌ olanemike. Jaꞌ te jPedro, sok te Juane, te Jacoboe, te jꞌAndrese, sok te Filipee, te jTomase, te jBartolomee, te jMateoe, sok te Jacobo te jaꞌ xnichꞌan Alfeoe, sok te Simon te ay ta skuenta te jkananistae, sok te Judas te yijtsꞌin Jacoboe. 14Spisilik ya stsobilan sbaik ta skꞌoponel Dios sok te yijtsꞌinab te Jesuse, sok te xMaria te smeꞌe, y sok te yan xan antstike. 15Jaꞌ skꞌaalel a te la stsob sbaik te hermanoetik te ay wan siento beinte ta jtul. Te jPedroe tejkꞌaj y la yaltalanbe:
16—Kermanotak, puersa me ya xkꞌot ta pasel te tut tsꞌibabil jilel ta skuenta te Chꞌul Espíritu te tut la yal te jDavide. Jaꞌ te la yalbe skꞌoplal te Judas te la yikꞌ tal te machꞌatik a xchuk bael te Jesuse. 17Te Judase, te la joyin jbajtik soke sok te pajal a kichꞌ kaꞌteltik soke, 18tojot yuꞌun te tut ma tsaꞌamuk a spase. Te takꞌin a aꞌbote, manot lum a. Teꞌ tꞌuxaj ta koel a, tsapal a jul ta lum te sjole, tꞌom te xchꞌujte, y chepkꞌoj lokꞌel spisil te sbikile. 19Te kꞌalal la yaꞌiyik te machꞌatik ayik ta Jerusalene, la yaꞌbeyik sbiilin te luware: Acéldama sbiil a kꞌot. “Stenlej Chꞌich” xchi kꞌoem te sbiile. 20Porke ta Sjun Salmoetik ya yal:
“Te snae ya me xkajtaj jilel ta jojchol luwar, ma me ayuk machꞌa ya xꞌanin teꞌa”, xchi me.
Sok ya yal xan:
“Yan me machꞌa ya yichꞌbe jilel te yaꞌtele”, xchi me.
21Ay winketik te la joyin bajtik sok sil tiempo te kꞌalal joy bajtik sok a te Kajwaltik Jesuse 22jaꞌ to te kꞌalal aꞌbot yichꞌ jaꞌ yuꞌun te Juane asta jaꞌ to te mo bael ta chꞌulchane. Ja yuꞌun puersa ya skꞌan ya yichꞌ tꞌujel jtuluk te machꞌa joy bajtik soke, yuꞌun jun nax me ya kaltik te tutꞌil a chaꞌkux te Jesuse —xchi te jPedroe.
23Jich chaꞌtul a sbiiltesik: jaꞌ te Jose te Barsabas xꞌalbote sok Justo ya xꞌalbot xan, y sok euk te jMatiase.
24Jich a skꞌoponik Dios yuꞌun:
—Kajwal, te jaꞌate awilojlanojbe yoꞌtanik spisil te genteetike. Aꞌbotik kiltik machꞌa a te ta xchebalik te atꞌujoje, 25yuꞌun jaꞌ ya yichꞌ yaꞌtel ta apostolil. Yuꞌun te Judase chꞌay yuꞌun te smule, te kꞌalal bajt te ba luwar te ba la skꞌan a bajte —xchiik ta skꞌoponel te Diose.
26Jich a yilik te machꞌa suerte te ya xkꞌote y jaꞌa kꞌot ta skuenta te jMatiase. Mismo tiempo a la sjoyin sba sok te buluchtul apostoletike.
Currently Selected:
HECHOS 1: AMANNT
Highlight
Share
Copy
Want to have your highlights saved across all your devices? Sign up or sign in
Nuevo Testamento Tzeltal de Amatenango © Sociedad Bíblica de México, 2006.
