Zacarías 5
5
Ma yajwinkëma'ayën ja noky axaatsy
1Ojtsës jatëkok nwinkumaakojnëpë, yë'ëjës nwin'ijx tu'uk yë noky axaatsy, pojëtijtp. 2Ënät ja tsajpjotmëtë kukäjpxy xyajtëëyës: ¿Tii m'ijxyp? Ets n'ëtsooyës: Noky axaatsyës n'ijxyp, pojëtitp; i'px kë'ënux yenyëty ets majk kë'ënux myëjwiinëty. 3Ënät xy'ënëmaayës: Yë'ë mäjtsk it miimp kuja'ay yë pojkën. Tu'kpa'a tnikäjpxy ko ka'ap jëtu'unyë nyinaxa'any nyëë pyoky mëti'ipë nëkoo je'eyë Tios tyukajpxpejtypyën ets tu'kpa'a tnikäjpxy ko yajtëytyuna'any mëti'ipë toonp mä'tspën. 4Yë Wintsën mëti'ipë maaytyääyëpën winë jëtu'un y'ënä'äny: Jamës ya'atë pojkën nyajkëta'aka'any mëti'ipë miinpën kuja'ay ma ja'ayën mëti'ipë toonp mä'tspën ets mëti'ipë nëkoo je'eyë wyäämpyën yë nxëëwës ëëwpäjn kajpxpäjn. Ets ya'atë pojkën ënätnëm jyëwa'aka'any ko ënäty tëë kyëjxta'ay mya'ta'ay ja tëjkwitsë ets ja tsaa.
Ma yajwinkëma'ayën ja kijpxën ets ja to'oxytyëjk
5Ënät jatëkok pyëtsiimy ja tsajpjotmëtë kukäjpxy mëti'ipës mëët nmëtyä'äkyën etsës xy'ënëmaay: Yajxon xy'ixëty mëti'ipë tyam pëtsëmaanpën. 6Etsës nyajtëëy: ¿Tii yë'ë? Tääts të xy'ëtsoyës: Kijpxën yë'ë. Yë'ë yajtukijpxaanp yë nyëë pyokyëty yë ja'ayëty mëti'ipë kajpnjoty tsënaaytyëpën. 7Ja kijpxën yë'ë mëët nyijupyëty yë yu'unk pujxn. Ënät yajyujktëëy ja ajup, e jap apëjkënjoty yë'ë jap ënyääpy tu'uk yë to'oxytyëjk. 8Ënät xy'ënëmaayës ja tsajpjotmëtë kukäjpxy: tääpë to'oxytyëjk yaj'ixyën, ëxëëkajtën yë'ë. Ënät jatëkok jap tkutijëy ma ja apëjkënën ets tyaj'ëtujky. 9Ix jatëkok ets të n'ijxyës mäjtsk ja to'oxytyëjk. Aaktam yë kyäknëty, jëtu'unyë pyojëtitë. Jëtu'un kyäkn yaj'ixtë wojnykyäknën ets tam twijts'itë ja kijpxën pojjoty. 10Ënät nyajtëëyës ja tsajpjotmëtë kukäjpxy, mëti'ipës ënäty mëët nmëtyä'äkyën: ¿Maaxën tääpë kijpxën tmënëjkxtë? 11Ets xy'ëtsooyës: Jam Babilonyë nyëjkxtë ets jam tkojanëtë tu'uk yë nyitsajp tëjk. Ko ënäty ja nyitsajp tëjk tkoj'apaatëtë, tääts jap tpëjkta'aka'antë ma ënäty të yajnipotsën.
Currently Selected:
Zacarías 5: QUETZMIXE
Highlight
Share
Copy
Want to have your highlights saved across all your devices? Sign up or sign in
Biblia en Mixe de Quetzaltepec, Oaxaca, México © Sociedad Bíblica de México, A.C., 2013. Active Translation in Process
