Zacarías 6
6
Ja taxkpë ja pujxnwintëkäämpë
1Ojtsës jatëkok nwinkumaakojnëpë: Täxkës nwin'ixy pyëtsëmtë yë pujxnwintëkäämpë mëti'ipë ja'ay myëtsiptuuntëpën, jam ma tu'uk yë mëj kopkën aak tsuxkpujxnëmpë yaj'ixyën. 2Tu'uk ja pujxnwintëkäämpë yë'ë pajëtujtëp yë tsapts kwaay; ja mëmäjtskpë yë'ë pajëtujtëp yë yëk kwaay; 3ja mëtëkëëkpë yë'ë pajëtujtëp yë poop kwaay; e ja mëmajktaxkpë yë'ë pajëtujtëp yë kwaay mëti'ipë poopkatsën. 4Ënätës nyajtëëy ja tsajpjotmëtë kukäjpxy mëti'ipës mëët nmëtyä'äkyën: Wintsën, ¿tiitën ya'atë jyatijäämpy? 5Ënät ja tsajpjotmëtë kukäjpxy xy'ëtsooyës: Tyaapë yë'ë mëti'ipë taxkpëky tsoonaanpën Wintsën wyintum ets t'aye'eya'antë yë naaxwiinyëtë. 6Yë pujxnwintëkäämpë mëti'ipë yëk kwaay pajëtujtëpën, jamtsow anëkëxmtsow nyijkxy; yë pujxnwintëkäämpë mëti'ipë poop kwaay pajëtujtëpën, jam nyijkxy xëëwkëtä'äkytsyow; e ja pujxnwintëkäämpë mëti'ipë pajëtujtëpën ja kwaay mëti'ipë poopkatsën, jamtsow nyijkxy ëpa'tkë'ëmtsow. 7Ënät tsyo'ontë ja këwaayëty mëti'ipë moxkeetsyëtyën, yë'ë tyukjëtitëjantëp ja naaxwiinyëtë. Tääts ja tsajpjotmëtë kukäjpxy y'ënëmaayëtë: Nëjkx aye'eytya'atë yë naaxwiinyëtë. Jëtu'un tuuntë. 8Ok ja tsajpjotmëtë kukäjpxy ojts xymyëkäjpxyës ets mëk xy'ënëmaayës: Ix ja mëti'ipë të nyëjkxtën ma ja naax kajpnën anëkëjxytsyowpë yajpaatën tëë ja Wintsën ja jyoot'an tyajxä'ämëtë. 9Ojts ja Wintsën ja ayuk xytyuknikexyës ets xy'ënëmaayës: 10Mijts yajmuk yë ayajk ako'onën ma ja'ayëtyën mëti'ipë të tsyoontën jam Babilonyë ma ënäty tsumy matsy yajpaatën: Yë'ë yaj'antijtëp yë Heldai, Tobías ets Jedaías. Näy jä'ä xëëw jam mnëjkxëty ma Josías yë tyëjkën, yë Sofonías yë myaank. 11Myajkojëp tu'uk yë kujän, yë'ë myajtunëp ja pu'ts pujxn ets ja poop pujxn mëti'ipë ënäty të xyajmukyën ets nëjkx xytyukkujeny ja teety Josué, yë Josadac yë myaank. 12Ets xy'ënëëmëty: Jëtu'un yë Wintsën y'ënä'äny mëti'ipë maaytyääyëpën winë: Ko ja ja'ay mëti'ipë txëëwajtpën Kepyji'tsk, jam myuxa'any ma tyiktsën ets tkoja'any ja Wintsën ja Tsyajp tëjk. 13Y'akojëjäämpy ja Wintsën ja Tsyajp tëjk ets nëjkx ja kuma'ayën t'ëxajë jëtu'un tä tu'uk yë yajkutujkpë yajkumayën. Ets nëjkx nyaaxweetsy ma kyutujktaknën, e jam pë'am jam nëjkx nyaaxweetsy ja teety ets oy nëjkx nyeyaj'itëtë ets ka'ap tiitsip tmëët'ata'antë. 14Ja kujän ijxpäjtën nëjkx wyi'imy jap tsajptëkoty, mëti'ipë nëjkx yajtukja'amyätstën yë Hedai, Tobías, Jedaías ets Josías, yë Sofonías yë y'ëna'k. 15Nëjkxëp yë ja'ay muum jëkäm tsyoontë mëti'ipë nëjkx tyuntën ma ënäty ja Wintsën ja tyëjk yajkoj'oyën; jëtu'un xynyijawëtëty ko yë Wintsën mëti'ipë maaytyääyëpën winë yë'ëjës të xykyexy. Ya'atë tunan jatanëp ko ënäty miitsëty xymyëtowtë ets xypyatuntë ja Wintsën ijxtëm të y'ënä'änyën.
Currently Selected:
Zacarías 6: QUETZMIXE
Highlight
Share
Copy
Want to have your highlights saved across all your devices? Sign up or sign in
Biblia en Mixe de Quetzaltepec, Oaxaca, México © Sociedad Bíblica de México, A.C., 2013. Active Translation in Process
