Zacarías 12
12
Ma ja Jerusalén y'ëwaatsëmyën
1Ya'atë aaw ayuk yë'ë yë Wintsën tyuknikäjx yë Israel kajpn. Yë Wintsën mëti'ipë të twijtstëyën yë tsajp ets të tpëjktä'äky ma naaxwiinyëtë kyëxwäätsëtyën ets tjuukyajtënmo'oy yë ja'ay, yë'ë ënaanp: 2Ëjts jëtu'unës yë Jerusalén kajpn nyaj'awinpita'any tä tu'uk yë a'ukënën mëti'ipë ujtsën mëët yë nëë mëti'ipë mukpën ets t'a'ukëtya'aja'any yë naax kajpn jënu'un mëët tyu'ktsëpa'anëtyën. Ko ënäty yë'ëjëty tyajnatuktë yë Jerusalén kajpn näjyëtu'un yë Judá kajpn nëjkx nyätujkta'atë. 3Ënät yë Jerusalén kajpn nyaj'awinpita'anyës tä tu'uk yë juuntsaajën ma ja naax kajpnëtyën. Yajtsëtyutäämpy ja ja'ay mëti'ipë ënäty ja këëyë'ëkanëpën. Nëjkxëp tu'kë'ëyë ja naax kajpn nyäkyäjpxyë ets nëjkx tyajnatuktë ja Jerusalén kajpn, 4je'eyëp koos nëjkx n'ëtsë'këtyä'äyës ja kwaay ets tsuu poj nyajjajta'aja'anyës ja ja'ayëty mëti'ipë ënäty ja kwaay tyuk'u'unyääytyëpën. Nkëwent'atäämpyës yë Judá y'u'unk y'ok ets nyajwiintsëtya'ajäämpyës yë kwaay ma ja naax kajpnëtyën. 5Ko ënäty jëtu'un t'ixtë, ënät ja wintsëntëjkëty jampë Judá yajpaatën nëjkx y'ëna'antë: Yë Wintsën mëti'ipë maaytyääyëpën winë, yë'ë jam Jerusalén Tios'ajtp ets yë'ë të tjotmëkmo'oy. 6Jä'ä xëëw, jëtu'un tä jëënpajkën nyaj'awinpijta'aja'anyës yë wintsëntëjkëty mëti'ipë jam Judá yajpatëpën, ëkë jëtu'un tä jëënyä'änkën mëti'ipë akëxë'këpën ajktsjoty. Anajny aka'any nëjkx tyajtooytyëkoytyë yë naax kajpn mëti'ipë mëët tyu'kmëtsëpa'an'atën, e yë Jerusalén ja'ayëty jotkujk nëjkx jam kyajpnjotm jyuuky'ajtëpë. 7Je'eyëp ko ëjts Wintsën, jëyëjpës yë Judá y'u'unk y'ëna'k nyajtso'okanë, këtiipë yë David yë y'u'unk y'ok nyämyëjawëtëty ets këtiipë yë Jerusalén ja'ayëty mëj këjxm nyäyajnaxëtëty ma ja myëku'uktëjkën mëti'ipë Judá ja'ayëtyën. 8Ëjts Wintsën, nkuwa'anäämpyës yë Jerusalén ja'ayëty. Mëti'ipë ëmaay paki'ix yajpatëpën mëk nëjkx y'itë tä Davidjën ets David yë y'u'unk y'ok jëtu'un nëjkx yajpaatë Tiosën, jëtu'un tä yë Wintsën yë tsyajpjotmëtë kukäjpxyën mëti'ipë tu'uwinye'eyëtëpën. 9Jä'ä xëëw nyaj'atëkoyäämpyës yë naax kajpn mëti'ipë ënäty nëkoo myëma'ayëpën yë Jerusalén kajpn. 10Nëjkxëp nmo'oyës yë yu'unk aaw yu'unkjot yë David yë y'u'unk y'ok ets Jerusalén ja'ayëty. Ënät nëjkx t'ijxpaatë ja mëti'ipë ënäty të tukuumnaxtën ets të tyaj'ooktën ets nëjkx tnijë'ë tniya'axtë jëtu'un tä jeexyë kyä'äxkopk ëkë tu'uk u'unk të y'ookyën. 11Mëj këjää nëjkx yajnimony yajnituky mëti'ipë ënäty të y'ookyën, jëtu'un tä mëj këjää yajnimony yajnitukyën yë tios Hadad-rimón, jampë Meguido joyjotm yajpaatyën. 12Nitu'ukjaty nëjkx yë ja'ay tnimony tnituky yë jyiiky myëku'uk ma ja naax kajpnën: Yë David yë y'u'unk y'ok ets tyo'oxytyëjktëjk yë y'u'unk y'okëty; yë Natán yë y'u'unk y'ok ets tyo'oxytyëjktëjkëty; 13yë Leví yë y'u'unk y'ok ets tyo'oxytyëjktëjkëty; yë Simi yë y'u'unk y'ok ets tyo'oxytyëjktëjkëty; 14ets aakjëtu'un yë ja'ayëty këëkjä'ä nëjkx tnimon tnituktë yë y'o'kpëtëjkëty ets tyo'oxytyëjktëjkëty näjyëtu'un nëjkx y'u'unk y'ok tnimon tnituktë.
Currently Selected:
Zacarías 12: QUETZMIXE
Highlight
Share
Copy
Want to have your highlights saved across all your devices? Sign up or sign in
Biblia en Mixe de Quetzaltepec, Oaxaca, México © Sociedad Bíblica de México, A.C., 2013. Active Translation in Process
