Zacarías 11
11
1Yaj'ëwa'ats yë mtëjk'aaw mijts Líbano ets jëën tyajtooytya'ajëty yë m'ajë kepy. 2Mijts tsiin kepy, jë'ë ya'ax, jä'ä ko tëë kyutëkooytyä'äy ja oyëtypë ja aay kepy. Ëjtë miitsëty xoj kepyëty, mëti'ipë jam Basán yajpatëpën, jä'ä ko ja yukjot tëë mya'ta'ay. 3Mëk jyë'ëtë ya'axtë yë kupixyny këwent'ajtpëty, jä'ä ko tëë kyutëkoy ja oyëtypë ja mëëykyam ujtskam. Yë kaa je'eyë jyaak yä'äxy jyaak joky, jä'ä ko tëë y'atëkoy ja ujtsjot kepyjyot mëti'ipë jamën Jordán.
Ja nimäjtskpë ja kupixyny këwent'ajtpë
4Jëtu'unës yë Wintsën të xy'ënëëmë: Kwent'at yë kupixyny mëti'ipë të yajtuknipëjktaakën ets y'ookëty. 5Yë ajuupyëtëjkëty ko tyaj'ooktë ja kupixyny nitiipa'ëyo'owën tkamëët'atë ets mëti'ipë ato'ktëpën jëtu'un y'ëna'antë: Yajkukajpxëp yë Wintsën ko xyajkumeenytyä'äkyës. Yë'ëpaat yë mëti'ipë kupixyny këwent'ajtëpën ninu'un tkapa'ëyowtë yë kyupixynyëty. 6Näyjyëtu'unës ëjts ka'apës mpa'ëyowa'antë yë ja'ayëty mëti'ipë yaa tsënaaytyëpën ma ya'atë naax kajpnën, ni'ikyës nkë'ëyajkta'aja'antë ma jyiiky myëku'ukëtyën ets ma kyutujkpëtëjkëtyën. Ets yë'ëjëty tyajkutëkoya'antë yë naax kajpn ets ni pën nkayajtso'oka'anyës ma kyë'ë y'aawëtyën. Ëjts Wintsën, ëjts yam ënaanp. 7Ënätës ojts mëk nkëwent'aty ja kupixyny mëti'ipë ënäty të yajtuknipëjktaakëtën y'ookëty. Yë'ëkyëjxmës jëtu'un të ntuny jä'ä ko ajuupyëtëjkëty ka'ap ënäty t'ëkpa'ëyoownëtë ja kupixyny. Ënätës të n'ixta'ay mäjtsk yë tajk: Tu'uk nxëëwmooyës Oypyë Juukyajtën, ets tu'uk nxëëwmooyës Tu'ukmukyëajtën. 8Tu'kpo'o je'eyë të nyäxy nitëkëëk jää të n'ëxwopyës yë kupixyny këwent'ajtpë mëti'ipë ënäty yë nmä'kxtujkënës të tyajkëxyën ets mëti'ipë xy'ëxëëk'ijxpënës. 9Ets të n'ënëëmëtës ja kupixynyëty: Ëjts ka'apës miitsëty n'ëkëwent'atanëtë. Pën nitu'uk miits m'ooka'antë, oy m'ooktëty. Pën myaj'o'këtëp, wä'än myaj'ookëtë. E mëti'ipë juuky jaakwë'ëmtëpën, nixim niyam mjaak nätsyu'utsëtëty. 10Ënätës nkajpë'ky ja ntajk mëti'ipë xyëëwajtypyën Oypyë Juukyajtën etsës ntuktëjëy ets yaj'ixëty ko ma'tp ja käjpxytyu'unën mëti'ipë ënäty ja Tios mëët ja naax kajpn të tjatunyën. 11Jä'ä xëëw ojts tyëkoy ja käjpxytyu'unën ets ja ajuupyëtëjkëty mëti'ipës ënäty jam xy'ijxtëpën, ojts tja'akyukëtë, ko ja Wintsën jä'ä jyanikäjpxyp mëti'ipë tyunäämpyën maas ënäty jam winë ntunyën nkäjpxyën. 12Täätsës n'ënëmaaytyë: Pën oy xyjyä'äkyukëtë, mëjuuytyëkës; e pën kajts, ja'atyëkoytyë. Ënätës xymyëjuuytyës, i'px majk xymyooytyës yë poop pujxn meeny. 13Tä yë Wintsën xy'ënëmaayës: Mënëjkx tääpë meeny, i'px majkpë poop pujxn jam ma tsajptëjkën ets xy'apëkëty ma meeny nyipetyën. Ënätës ja meeny ojts nmënëjkxy jam ma tsajptëjkën ets jap n'apëjkëyës ma ja meeny nyipetyën. 14Ënät ja mëmäjtskpë ja tajk ojts ntuktëjës, mëti'ipë xyëëwajtypyën Tu'ukmukyëajtën, jëtu'un ojts y'atëkoy ja näyjiiky'at näymyëku'uk'atë ma ja Israel ja'ayëtyën mëët ja Judá ja'ayëtyën. 15Tä ja Wintsën xy'ënëmaayës: E mijts jëtu'un tyam näpyëjkta'akët tä tu'uk yë kupixyny këwent'ajtpën mëti'ipë ka'ap oytyunyën. 16Jä'ä ko npëjkta'akäämpyës tu'uk yë kupixyny këwent'ajtpë mëti'ipë nëjkx tyaj'aye'ewya'kxta'ayën yë kupixyny, ka'ap nëjkx oykyëwent'aty. Mëti'ipë ënäty tëkoopyën ka'ap t'ixta'aja'any ets mëti'ipë ënäty të tsyëtyutyën ka'ap tyajtsooypyäta'any, ets ka'ap tyajë'kxa'any mëti'ipë ënäty ja yuu'o'këpën, ni'ikyë nëjkx tyaj'ooky ja ni'kxatypë ets nëjkx tsyu'utsy kyäy, yë'ëpaat nëjkx ja kupixyny ja tyekyxyooky tsu'tsënë. 17Janty mon janty tuk yajpaaty yë kupixyny këwent'ajtpë mëti'ipë nyikekpyën yë kyupixyny. Wä'än jam tka'ay yë tëypyujxn ma y'a'oykyë'ëjën ets ma a'oypyë wyiinën.
Currently Selected:
Zacarías 11: QUETZMIXE
Highlight
Share
Copy
Want to have your highlights saved across all your devices? Sign up or sign in
Biblia en Mixe de Quetzaltepec, Oaxaca, México © Sociedad Bíblica de México, A.C., 2013. Active Translation in Process
