Marcos 9
9
1Näyjyëtu'un ja Jesús y'ënëmaayëtë:
Tëy miits n'ënëëmëtë ko tää yaa wyë'ëmtë mëti'ipë ka'ap y'ooka'antën koonëm t'ixtëty ko ja Tios ja kyutujkën ënäty myiny mëët ja mëk'ajtën.
Ko Jesús tyëkatsy
2Komtëtujk xëëw ja Jesús mëët ja Pedro, Santiagë ets ja Juan pya'tëjkëtë ma tu'uk ja kopkën mëti'ipë këjxmën. Jamts ja Jesús ojts tyëkatsy ja wyiin jyëjp. 3Yajxon ojts ja wyit y'atë'kxnë janty poop yaj'ixy, ni pën ja'ay jëtu'un ja wyit kyapoopëty oy jënu'un të tjapujy. 4Ënät ja y'ijxpëjkpëtëjk t'ijxtë ja Elías mëët ja Moisés tmëëtmëtya'aktë ja Jesús. 5Tääts ja Pedro t'ënëmaay ja Jesús:
Wintsën, oy koos yaa nyajpaatë. Minës n'ëk'oytyuntë tëkëëk yë aaytyëjk, tu'uk mijts yë mjä'ä, tu'uk yë Moisés yë jyä'ä ets tu'uk yë Elías yë jyä'ä.
6Paaty ja Pedro ojts jëtu'un y'ënä'äny jä'ä ko tëë ënäty tsyë'ëkëtë, ka'ap y'ëkwinma'anypyatnëtë wi'ix t'ënëëmëtëty ja Jesús. 7Ënät ja yoots ojts myiny ma ënäty jamëtyën ets ojts ja yoots yajnitëkoyëtë; jap yootsjoty yajmëtooy tu'uk ja ayuk mëti'ipën ënanën:
Ëjts ya'atë n'u'unk, mëti'ipës ntsojkpy nja'apën, mëtoow'itë ets mëmëtowtë wi'ix y'ënä'änyën.
8Ko ënätyë y'ijx'ëwëtijtë, ni pën ojts maa tka'ëk'ijxnëtë mëët ja Jesús, yi'iyë ja Jesús näty'uknë.
9Ko kyëtaknëtë, tsyo'onëtë jam kopkëjxm, ënät ja Jesús y'ënëmaayëtë ets ka'ap pën tuk'ëwaanëtëty mëti'ipë të t'ixtën, koonëm jyuukpyëkëty jatëkok. 10Paaty ja y'ijxpëjkpëtëjk kyuyu'tsëtë, je'eyë aak ayi'iyë nyäyajtëëwëtë tii jëtu'un jyatijäämpy ko jyuukpyëka'any jatëkok.
11Tääts tyajtëëwtë ja Jesús:
¿Tii ko yë tsajptëkotyëtë yaj'ijxpëjkpëtëjk y'ëna'antë ko ja Elías jëwyiin minaanp?
12Ënät ja Jesús y'ëtsooy:
Mëtëy yë'ë, jëwyiin yë Elías myina'any ets tu'kë'ëyë tyaj'o'oyëtya'aja'any winë. ¿E tii ko ja Tios ja y'ayuk y'ënä'äny koos ëjts n'ëyo'onpaata'any ets ko ka'apës nyajkupëka'any? 13E jëtu'un miits n'ënëëmëtë ko ja Elías tëë ja myiny, ets ja ja'ayëty ëxëëk ojts tuntë ijxtëm ja jyot wyinma'anyëtyën, jëtu'un ijxtëm ja Tios ja y'aaw y'ayuk y'ënä'änyën wi'ix ënäty jyata'anyën.
Ko Jesús tyajtso'oky ja yä'äy ëna'k mëti'ipë myëët'ajtypyën ja ku'oypyë
14Ko wyimpijtë ma ënäty jam ja ijxpëjkpëtëjkëtyën ënät t'ijxtë ko ja mayjyä'äy ënäty të nyapikëtë ets ja tsajptëkotyëtë yaj'ijxpëjkpë jä'ä ënäty jam mëët nyätyij nyäkyotëtë aawkëjxm ayukkëjxm. 15Ko t'ijxtë ja Jesús, ni'ëmukë ja ja'ay nyëjkxtaaytyë pëyi'ikyë ets ojts tkajpxpo'kxtë mëët ja xoontakën. 16Tääts ja Jesús yajtëëwëtë:
¿Ti myajkäjpxykyojtëp mëët yë n'ijxpëjkpëtëjkës?
17Ënät tu'uk ja ja'ay y'ëtsooy:
Wintsën, tyaajës tu'uk yë nmaank ku'oypyë myëët'ajtypyën mëti'ipë ka'ap yajkäjpxyën. 18Ko yë ku'oypyë myätsyë ënätyë yajkëtayë ets o'pky jyänty pyëtsimy ma y'aawën, tä ënät yë tyëts tjanty y'akä'pmuky ets jëtu'unyë wyi'imy tu'k'ityë. Tëës yë m'ijxpëjkpëtëjk njanëëmë ets jeexyë tyajpëtsëmtë ja ku'oypyë ma yë'ëjën e yë'ëjëty ka'ap të myäyëtë.
19Tääts ja Jesús y'ëtsooy:
Miits ka'ap mmëpëktë. ¿Wi'ix ko miitsëty ka'ap tii xytyuntë, jä'ä xytyimtsoktë aak'ëjts winë ntunëty? Yajmintë yaa ya'atë yujkyeeky ëna'k.
20Tääts ja Jesús ojts tukninëjkxtë ja yä'äy ëna'k. Ko ja Jesús ja ku'oypyë y'ijxpatë, ënätyë ja yä'äy ëna'k ojts jyëpijpkëtä'äky ets tyëjkëy yäjtspë pojpë tyam ja o'pky jyänty pyëtsimy ma y'aawën. 21Ënät ja Jesús tyajtëëy ja u'unkteety:
¿Jëna'a jëtu'unpë pa'am pyäätyë?
Tääts ja u'unkteety y'ënäny:
Mutsknëm. 22Kanaak ok ja ku'oypyë jëënjoty ets nëëjoty të yajkukëtawëty ets yaj'ooka'anyë. Pën mëpaat xyajtso'oky, pa'ëyoowtëkës ets putëjkëtëkës.
23Tääts ja Jesús y'ënäny:
¿Tii ko jëtu'un m'ëna'any pën mëpaat xyajtso'oky? Aak oy yë ja'ay pyëtsë'ëmxëtë winë mëti'ipë Tios mëpëjktëpën.
24Ënät ja yä'äy ëna'k ja tyeety mëk y'ënäny:
Nmëpëjkpyës; putëjkëtëkës ets njaaktimmyëpëkëtyës.
25Ko ja Jesús t'ijxy ja mayjyä'äy ko pyëyë'kmuktë, ënät mëk twinkukajpxëy ja ku'oypyë:
Ku'oypyë, uumpë natpë, tyam n'ëne'emy ets xy'ëxmatsëty tyaapë yä'äy ëna'k ets ka'ap nëkoo xy'ëkmëwanëty.
26Tääts ja ku'oypyë mëk y'ayaxtuty ets ja yä'äy ëna'k ojts tjaakyajmooty. Ënät ja ku'oypyë ojts pyëtsimy, jëtu'un yaj'ixy tëë yowë tyaj'ooky ja yä'äy ëna'k. Jëtu'un may ja ja'ay y'ënantë ko tëë y'ooky. 27Tääts ja Jesús ojts twijtsë'ëky ets ja yä'äy ëna'k pyëti'ky.
28Ok ja Jesús wyimpijty ets jyä'äjty ma tu'uk yë tëjkën, Tä ja y'ijxpëjkpëtëjk yajtëëwëtë ma ënäty jap aakyë'ë yajpaatën:
¿Tii koos ja ku'oypyë ka'ap të xymyäytyë etsës n'ixkäxtëty?
29Tääts ja Jesús y'ënäny:
Ya'atë jëtu'unpë ku'oypyë ënät yë pyëtsimy ko Tios yajpëjktsoy mëk'ajtën.
Ko ja Jesús nimëtyä'äky mëmäjtsk ok ja y'o'kën
30Ko ojts tsyo'onëtë, tääts nyajxtë jam Galilea ets ja Jesús ka'ap pën tjatuknijawëjany ko ënäty jam yajpaaty, 31jä'ä ko aak ayi'iyë ënäty ja y'ijxpëjkpëtëjk jam tyaj'ijxpëky, ets t'ënëmaay:
Yajkë'ëyakaanpës ma naaxwiinyëtë ja'ayëtyën ets xyaj'ooka'antës, je'eyëp ko kom tëkëëk xëëw jatëkok njuukpyëka'anyës.
32Ka'ap ja y'ijxpëjkpëtëjk tja'akyujkëtyë ko jëtu'un yaj'ënëëmëtë ets tsë'këtëp ko tyajtëwtëty.
Pën ni'ik mëj'äämpy
33Tääts ja Jesús mëët ja y'ijxpëjkpëtëjk jyajtë jam Capernaúm. Ko tyëjkëtyë tëkoty, japts ja Jesús tyajtëëy ja y'ijxpëjkpëtëjk:
¿Tii të xynyimëtya'aktë ko të ntu'uye'eyëmë?
34Tääts ja y'ijxpëjkpëtëjk amonyë wyë'ëmtaaytyë, ka'ap wi'ix y'ënantë, jä'ä ko yë'ë ënäty të tnimëtya'aktë pën ni'ik mëj'äämpy. 35Ënät ja Jesús nyaaxwe'tsy ets ja nimajkmäjtskpë ja y'ijxpëjkpëtëjk tyaxëy ets t'ënëmaay:
Pën tsyojkën'ajtyp ets mëj'äämpy y'ita'any, naxym mëpaat nyäpyëjktä'äkyë ets wyinkë'ë kyujkkë'ëjëty ma ja ja'ayëtyën ni'ëmukë.
36Ënät ja Jesús tsä'änë'ky tu'uk ja pi'k ëna'k ets tpëjktäky itkujky. Tam jëtu'un tpatseeny ko y'ënäny:
37Pën kyupëjkpy yë pi'k ëna'k jëtu'un tä ëjtsën, nän xykyupëjkpës ënäty ëjts; ets pën xykyupëjkpës, ka'ap y'ëjtsëty nätyu'uk xykyupëky, nän kyupëjkpy ja mëti'ipës xykyäjxpën.
Pën ka'ap xymyëtsip'ajtëm, xy'apupäjtëm ënäty
38Ënät ja Juan t'ënëmaay ja Jesús:
Wintsën, tëëjës n'ixtë tu'uk ja ja'ay mëti'ipë mijts ja mmëkajtën yajtuumpyën ets ja ku'oypyë t'ixkexy. Tëës n'akajpxtuktë jä'ä ko ka'ap ëëtsajtëm xypyajëtijtëm.
39Tääts ja Jesús y'ënäny:
Ka'ap xy'akajpxtuktëty. Pën mëj'ajtën tyuunpy ëjts nxëëwkyëjxmës, ka'ap pyokyëty tuny ets ka'ap tjëkyepy tëkatsy xynyimëtya'akëtyës. 40Pën ka'ap xymyëtsip'ajtëmë, ëëts mëët nyajpatëmë. 41Tëyës n'ëna'any, ko pën mmo'ojëtëty ja tëtsyk nyëë tu'ktsim jä'ä ko ënäty nja'ay'atë, yajmo'ojëp ja kuma'ayën.
Wi'ix kyutsë'ëkëty ko ja'ay nyajpokykya'amëty
42Pën yajpokytyuunpy yë u'unk ëna'k mutskjatypë mëti'ipës xymyëpëjktëpën, nikë oy ko jeexyë ja paantaak yajtukyo'ktsumë ets mejyjoty yajkujëpipëty. 43-44Pën myajpokytyuunëp yë mkë'ë, katspux. Nikë oy ko kë'ëtuk xypyaatëty ja xëmëkyëjxmëpë ja juukyajtën ets këtii ko mkë'ë mëët kä'pxy myajpëjkta'akëty ëyoowtaknjoty, ma ja tënë'k nijëna'a kya'ookyën ets ja jëën nijëna'a kyapi'itsyën. 45-46Pën myajpokytyuunëp yë mteky, katspux. Nikë oy ko xypyaatëty ja xëmëkyëjxmëpë ja juukyajtën tekytyu'uk ets këtii ko mteky mëët kä'pxy myajpëjkta'akëty ëyoowtaknjoty, ma ja tënë'k nijëna'a kya'ooky ets ma ja jëën nijëna'a kyapi'itsyën. 47Ets pën yë mwiin myajpokytyuunëp, juut. Nikë oy ko wiintu'uk mtëkëty ma ja Tios ja kyutujkënën ets këtii ko mwiin mëët kä'pxy myajpëjkta'akëty ëyoowtaknjoty, 48ma
ja tënë'k nijëna'a kya'ookyën
ets ma ja jëën nijëna'a kyapi'itsyën.
49Tu'ktonyë nëjkx wyatsta'ay yaa naaxwiiny mëët ja kaan ets ja jëën. 50Yë kaan oy yë'ë, ko ja tsya'amtsajtën tyëkoyëty tii mëët winë yajtukta'amtsëty. Itë ijxtëm ja oypyë kaanën ets juuky'atë akujk jotkujk nixim niyam.
Currently Selected:
Marcos 9: QUETZMIXE
Highlight
Share
Copy
Want to have your highlights saved across all your devices? Sign up or sign in
Biblia en Mixe de Quetzaltepec, Oaxaca, México © Sociedad Bíblica de México, A.C., 2013. Active Translation in Process
