Mateo 5

Ja aaw ayuk mëti'ipë ja Jesús kyajpxën jam kopkkëjxm

1Ko ja Jesús t'ijxy ja mayjyä'äy, ënät pya'tëjkëy jam kopkkëjxm ets ojts nyaaxweetsy. Jamts ja y'ijxpëjkpëtëjk myëwinkoonë. 2Ënät yaj'ijxpëjktso'ony ets y'ënäny:

Mëti'ipë tsoowpatpën ma Tiosën

Lc 6:20-23

3Jotkujk yë ja'ay yajpaatë mëti'ipë jyot wyinma'any jëtu'un yajmaay yajtajtëpën tä ëyoopëja'ayëtyën, jä'ä ko yë'ë jyä'ä'atantëp ja tsajpjotmëpë kutujkën.

4Jotkujk yë ja'ay yajpaatë mëti'ipë jëëytyëp yaxtëpën, jä'ä ko yë'ë Tios yajjotkujk'atanëtëp.

5Jotkujk yë ja'ay yajpaatë mëti'ipë yu'unk naxymëtyën, jä'ä ko yë'ë naaxwiinyëtë kyuma'ayën'atantëp mëti'ipë të yajtukwinwanëtën.

6Jotkujk yë ja'ay yajpaatë mëti'ipë tsyojkën'ajtëp ja tëypyë nipaye'eyën, jä'ä ko ku'uxyë y'ita'antë mëët ja jëtu'unpë.

7Jotkujk yë ja'ay yajpaatë mëti'ipë pa'ëyoowtëpën, jä'ä ko Tios näjyëtu'un pya'ëyowa'anëtë.

8Jotkujk yë ja'ay yajpaatë mëti'ipë wa'ats yë y'aaw jyot myëët'ajtëpën, jä'ä ko yë'ë y'ixantëp yë Tios.

9Jotkujk yë ja'ay yajpaatë mëti'ipë tsyojktëp ets jyää'atëty ja jotkujk'ajtën, jä'ä ko yë'ë Tios u'unkniwa'ananëtëp.

10Jotkujk yë ja'ay yajpaatë mëti'ipë yaj'ixjëtijtp yajpaajëtijtëpën mëët ko mëtëy tii tnipaye'eytyë, jä'ä ko yë'ë nëjkx tjä'ä'atë tsajpjotmëpë kutujkën. 11Jotkujk miitsëty myajpaatëty ko ja'ay m'ojëtëty mya'axëtëty ets m'ixjëtit mpajëtitëtëty ets mnipëtë'ëkëtëty ets mni'antaakëtëty mëët ëjtskyëjxm. 12Xi'iktë xontë ets jotkujk yajpaatë, jä'ä ko mëj ja Tios mkumaya'anëtë; jä'ä ko näjyëtu'un ojts t'ixjëtit tpajëtitë ja Tios kyäjpxynyajxpëtëjk mëti'ipë tëëyëp juuky'ajtëpën ma ënäty miitsëty ka'ap mjuuky'atënëm.

Kaan ets të'kxën jajën

13Kaanën miitsëty yaa naaxwiiny myajpaatë. Ko ja kaan ja tya'amtsajtën tyëkoy, ka'ap y'ëk'o'oyënë ets jatëkok y'awinpitëty ta'amts. Ka'ap y'ëktuunnë, yaj'ixko'op tu'ujoty ets ja ja'ay y'ateeny tyukteenyë.

14Kutë'kxpë kujajpë miitsëty yaa naaxwiiny myajpaatë. Ko tu'uk ja kajpn tunkëjxm, wa'ats kyëxë'ëky, ka'ap yu'utsy y'ity. 15Ko ja'ay jëën tyajtooypyiky, ka'ap jap tpëjktä'äky kajjoonpa'tkë'p, këjxm yajpëjktä'äky ets tkutë'kxëty mëti'ipë jap tëkotyën. 16Näyjyëtu'un miitsëty, tuk'ixtë ja ja'ay ja m'oyjä'äy'ajtënëty. Jä'äts ja ja'ay y'ixtëp ets tmëjjawëtëty tjaantyjawëtëty ja Tios Teety mëti'ipë tsajpjotmën.

Wi'ix ja Moisés ja y'ënä'ämën tyunyën

17Ka'ap miits mmaytyëty mtajtëty koos yë'ë të niminy ets ja Moisés ja y'ënä'ämën nyaj'atëkoyanë ëkë ets ja käjpxynyajxpëtëjk ja tyuunk mpëjkëja'anyës; ëjts yë'ëjës të niminy etsës nyajtsoowpaata'any ni'ik. 18Jä'ä ko jëtu'unës yam n'ëna'any, maanëm jyää'atyën yë tsajp ets naaxwiinyëtë, ka'ap nitu'uk yajjëpëkëty yë letrë, yë puntë komë, mëti'ipë japën ënä'ämënjoty, koonëm yajkuuytyuunta'ajëty. 19Pën yë ënä'ämën ka'ap tpatuny yiinpë wäänpë ets ka'ap pën tuk'ëwaanë wi'ix tpatunëtyën, mutsk nëjkx nyäxy ma ja tsajpjotmëpë kutujkënën; pën yë ënä'ämën pyatuumpy ets ja ja'ay tukni''ixë ets tpatuntëty, yë'ë mëj naxaanp ma ja tsajpjotmëpë kutujkënën. 20Tëy miits nëëmëtë, pën ka'ap wäänëni'ik ja Tios xymyëmëtowtë këtiinëm ja tsajptëkotyëtë yaj'ijxpëjkpë ets ja fariseë ja'ayëty, nijëna'a miits mkatëkëtëty ma ja tsajpjotmëpë kutujkënën.

Ma Jesús tnimëtyä'äkyën ja joot'an

21Tëë miits xymyëtoy'atë ko ja m'aptëjk yajnëmaaytyë: ka'ap myajja'ay'ookëty. Pën yaja'ay'o'kp, nëjkxëp nyitukë. 22E ëjts jëtu'un yam miits nëëmëtë, pën ja myëku'uk tyukjoot'anpëjkpyën nëjkxëp nyitukë. Pën ja myëku'uk y'ojpyën, yë'ë paye'eyëtëp ja tsajptëkotyëtë yajuntë'ajtpë. Pën ja myëku'uk tyijpyën kutsuu, jap nëjkx yajnajtskäxë ëyoowtaknjoty.

23Paaty ko m'ayajk m'ako'onën xymyënëjkxëty wintsë'kën wintum ets jam xyjyä'ämyätsëty ko ënäty ja mmëku'uk mëët mnämyëtsip'atyë, 24jam xy'ëxmatsëty ja m'ayajk m'ako'onën ma ja wintsë'këntyaknën ets nëjkx jëwyiin ja mmëku'uk mëët xykyajpx'oyë. Ënätnëm mwinpitëty ma ja wintsë'këntyaknën ets xypyëjkta'akëty ja m'ayajk m'ako'onën.

25Pën jää pën mni'ëënëty ets myajnëjkxa'anyë kutuunk wintum, nikë timkajpx'oyë mëët nimäjtsk naamtamnëm tu'ujotm myajpaatë ets këtiipë myajnëjkxëtëty ma ja kutuunkën. Pën ka'ap, mkë'ëyakëtëp ja kutuunk ma ja tajk mayuutën ets myajtsumëty. 26Tëyës n'ëna'any ko jäänëm mpëtsëmëty ko xykyëpäjta'ajëty ja mnu'kxy.

Ko ja'ay tyajtëkoy ja pëjkën ukën nyiwintsë'kën

27Tëë miits xymyëtoy'atë ko ja m'aptëjkëty yaj'ënëmaaytyë: ka'ap xyajtëkoytyëty ja nyiwintsë'kën ja pëjkën ukën. 28E ëjts jëtu'un miits nëëmëtë, pën ja to'oxytyëjk y'ixk'ajtyp, tëë ënäty tyajtëkoy ja wintsë'kën ma ja pëjkën ukën jyootjoty wyinma'anyjoty.

29Pën myajpokytyuunëp ja m'aka'anywyiin, juut ets xy'ixka'atsëty. Ni'ikyë oy tu'kpëky mtëkoy'ajtxëtëty mëti'ipë jamën ma mni'kx mkopkën ets këtii ko tu'kë'ëyë mni'kx mkopk yajpëjkta'akëty ëyoowtaknjoty. 30Ets näjyëtu'un, pën myajpokytyuunëp ja m'aka'anykyë'ë, katspux ets xy'ixjëpipëty tu'uk. Nikë oy ko tu'kpëky mtëkoy'ajtxëtëty mëti'ipë jamën ma mni'kx mkopk ets këtii ko yajpëjktakta'ajëty ëyoowtaknjoty.

Ko pëkpyë ja'ay nye'ëxmatsëtë

31Näy ojts tëëyëp yajnikäjpxy: Pën ja tyo'oxytyëjk y'ëxmatsäämpyën, jëwyiin tmo'ojëty ja noky ma y'ënä'änyën ko ka'ap t'ëkto'oxytyëjk'atanë. 32Temë jëtu'un miits nëëmëtë: ko pën ja tyo'oxytyëjk t'ëxmatsy ets ka'ap yë'ëkyëjxmëty ko ja to'oxytyëjk mëët wiink ye'etyëjk y'ity, jotmayjoty ja tyo'oxytyëjk tpëjktä'äky, jä'ä ko tsojk ja tyo'oxytyëjk mëët wiink ye'etyëjk nyäwyin'ëënëtëty ets pyokytyuntëty, näjyëtu'un ënät ja ye'etyëjk mëti'ipë jëtu'unpë ja to'oxytyëjk pyuwa'këpën mëti'ipë tëë yaj'ëxmatsyën nän pokytyuunp ënäty.

Ko ja'ay Tios tyajkäjpxy

33Näy tëë xymyëtoy'atë ko ja aptëjk yaj'ënëmaaytyë: Pën tëë tii xywaantä'äky mëët ja Tios, mkuuytyunëp. 34Temë jëtu'un miits n'ënëëmëtë, ko tii xywyaanta'akëty, ka'ap Tios xyajkajpxëty. Ni tsajpjotmëpë xykyayajkajpxëty, jä'ä ko yë'ë Tios kyutujkën'ajtyp; 35ets këtii naax xykyakajpxpaatëty, jä'ä ko jää Tios wya'kpo'kxy; ni Jerusalén, jä'ä ko yë'ë yajkutujkpë kyajpn'ajtyp. 36Ni mjuukyajtën xykyakajpxpaatëty, jä'ä ko ka'ap myiits'atë xynyiwintsen'atë ja juukyajtën. 37Tëy winë xykyajpxëty: Oy'atëp ëkë ka'ap y'oy'atëty; jä'ä ko ka'ap y'oyëty ko pën tëkatsy tii tuny.

Ma Jesús yaj'ijxpëkyën ko ka'ap mëpaat ja'ay tii ëxëëk tuunwinpity

38Tëë miits xymyëtoy'atë ko ja m'aptëjkëty yaj'ënëmaaytyë: Ko pën ja mwiin tyajtsëtyutëty yajtsëtyut näjyëtu'un ja wyiin, ko pën ja mtëts tkatskoxëty katskox näjyëtu'un ja tyëts. 39Temë jëtu'un miits n'ënëëmëtë ko ka'ap xytyuunwinpitëty ko pën wi'ix mtunëtëty. Ko pën m'apojtsë'ëkëtëty ni'ikyë tuk'akë'ë wiinkpë m'apënuuky. 40Ko pën mni'ëënëtëty ets ja mnëxuy mpëjkëtëty, jaakmo'o mnimu'ux. 41Ko pën atsip mtukpatsëmëtëty tsëmy kë'ëy ets xymyëye'eyëty wëxtujk mëko'px xajpk, ni'ikyë jä'ä xymyëye'eyëty tu'uk mil ja mëkoxk mëko'px xajpk. 42Pën tii m'amëtoowëp, mo'o; ets pën tii tsyojkpy ënu'kxy, tuk'ënu'kx.

Wi'ix ja mëtsip yajtsokëty

43Tëë miits xymyëtoy'atë ko ja m'aptëjk yajnëmaaytyë: Tsok ja mmëku'uk ets ëxëëk xy'ixëty ja mmëtsip. 44E ëjts jëtu'un miits n'ënëëmëtë, tsoktë ja mmëtsipëty ets tuknija'amyätsëtë Tios pën m'ixjëtijt mpajëtijtëtëp. 45Jëtu'un xyajnikëxë'ëktëty ko Tios tsajpjotmëpë m'u'unk'atëtë; jä'ä ko xëëw tyajpëtsëmy tyuknijajtääpy oyjyä'äy ka'oyjyä'äy, ets ko tyajtu'uy yajnituutääpy wä'än twa'atsja'ayëty ëkë t'ëxëëkja'ayëty. 46Pën yi'iyë miits mtsojktëp mëti'ipë mtsojkëtëpën, ¿tii kuma'ayën mpëktëp mpaatëp? Yë yajkukëpäjtpëtëjkëty mëti'ipë Roma myëtuuntëpën yë'ë jëtu'un ëtëtstëp. 47Ets pën yi'iyë miits mkajpxpo'kxtëp ja mmëkä'äxëty ¿Tii oyajtën tääpë xyajnätyijëtë? Yë ja'ay ka'apë Tios tmëpëkyën yë'ë jëtu'un ëtëtstëp. 48Wa'ats nnäyaj'itëtë, ijxtëm yë Tios tsajpjotmëpë wa'ats nyäyaj'ityën.

Currently Selected:

Mateo 5: QUETZMIXE

Highlight

Copy