San Mateo 5
5
Jesús i-ajque's̈p en tu'c copac
1Igui-is̈ ayé jayaujuc, Jesús cu't en tu'c copac mit initsʉ̱ndá̱jcʉj, iguicutomigau ipʉctampajyat. 2Mit Jesús chu̱chiu igui-ajque's̈cʉs̈a, inʉm:
Pʉjnat tsʉ̱ngáj oy
3—Jeme ijawigapay ni'c inesita̱tcap Dios, tsʉ̱ngáj oy ni'c Dios iguimanda̱tcap.
4’Tsʉ̱ngáj oy jeme jʉygapay ni'c itunas̈cap, ni'c Dios iguiconsola̱tcáj.
5’Tsʉ̱ngáj oy jeme canimʉjninʉmgʉjʉpay ni'c je'jat ipʉctsougáj ayé na̱s̈ jeme Dios iguimoygámpay.
6’Tsʉ̱ngáj oy jeme iwano'jcapay iguiwatcawa'n lo que iyacs̈ta'cway ni'c je'jat Dios iguimajyigáj pa iguiwatcawa'n we'n.
7’Tsʉ̱ngáj oy jeme ayo̱wis̈capay ni'c je'jat igui-ayo̱wis̈cámpey Dios.
8’Tsʉ̱ngáj oy jeme limpiuway ijo̱jtat, ni'c je'jat i-e'pcáj Dios.
9’Tsʉ̱ngáj oy jeme acnicowangʉjʉpay maga-it tsuguin, ni'c je'jat Dios iguiwayjatcáj.
10’Tsʉ̱ngáj oy jeme jinap i-actunas̈capay ni'c iwatcap lo que iyacs̈ta'cway, po je'jat tsʉ̱ngap oy ni'c Dios iguimanda̱tcap.
11’Mitsʉ̱ngáj oy cuandu jayajwat is̈tucotscap, is̈po'ctangap mit is̈malninʉmgap mit puru we̱t ni'c ʉ̱ is̈cupʉjcap. 12Ma ji'jca injo̱jtat may ni'c impʉctsougáj tu'c premiu mʉjway tsajpni'c, ni'c wename-ey ampay jayajwat iguipo'ctángaj ayé profetajat jeme mijnʉ'jcaway.
Cupʉcpajyat as̈am ca̱n
13’Mijchat as̈am ca̱n pa jayajwat en ayʉ̱́j mundu, po te ayé ca̱n cajapa'c, nat i-o'mwa'natu as̈am ca̱n. Caja-oy pa neti, solo oy pa nas̈cucachiwa'n, pa jayajwat ma tute'ní̱jca na̱s̈ni'c. We'ney mijchat, te ingawatcap oy, migaservia̱tcámpey pa neti.
Mijchat as̈am luz
14’Mijchat as̈am luz en ayʉ̱́j mundu. Tu'c nʉ'jcopac tsʉ̱napay copacyucuinm ca-oyap itsʉ̱na cuyu'tsic. 15Ne nagano'ctso̱p tu'c ta'cs̈an pa nas̈yacwa'n ca'cpa'tcʉm, nayacp ta'cs̈anyagani'c mit ayé ta'cs̈an iyacp luz pa nu'pʉjʉn tsʉ̱ngapay en ayé tʉjc. 16Wename-ey lo que inwatcapay, ayé as̈am tu'c luz pa ma e'pca jayajwat. Jemni'c ma e'pca je'jat ni'c inwatcap oy, pa we'n i-oyninʉmgáj Dios Nate̱jat jeme tsʉ̱napay tsajpni'c.
Jesús mit ayé ley
17’Campensa̱tca ni'c tʉmín pa tʉs̈actogojyawa'n Moisés iley mit lo que ija'ygaway profetajat. Tʉgaminu pa tʉs̈actogoywa'n, tʉmín pa tʉ-actujawigʉs̈wa'n iyacs̈ta'cway ti inʉmo'jcʉpay. 18Iyacs̈ta'cway tʉnʉmgʉs̈ap ni'c cʉs̈cáj na̱s̈ mit tsajp po ayé ley catogoyáj nes̈ʉ̱n, ne tu'c parte más menusway igachi'tcajáj, nu'pʉjʉn itp ti icumplia̱twa'n. 19Pʉmba'tu igawatámpay cuenta tu'c mandamientu más menusway mit te i-ajque's̈cʉs̈ap jayajwat ma watca ni-as̈amu, ayé jayau tanáj mas menus mam imanda̱t Dios. Po jeme ijayaumaypay ayé mandamientujat mit i-ajque's̈p ni-as̈amu, ayé jayau tanáj más mʉjninʉmic mam imanda̱t Dios. 20Ʉ̱ tʉnʉmgʉs̈ap ni'c mijchat pi watca más yacs̈ic nu'pʉjʉn, caje' as̈am ayé i-ajque's̈capay ley mit ayé fariseujat. Te ingawatcap más yacs̈ic que je'jat, nunca ca-oyáj Dios is̈manda̱tcap.
Jayajwat awa'nigapay
21’Inmaraugaway ni'c inʉmgajau ampay jayajwat: “Miga-ago'gáj, mit pʉn ago'gámpay, Dios iguijuzga̱táj,” 22po ʉ̱ tʉnʉmgʉs̈ap ni'c pʉn imu-awa'niyámpay imupro̱wije̱way, Dios iguijuzga̱táj, mit pʉn itucotsámpay imupro̱wije̱way, juezat iguijuzga̱tcáj, mit pʉn inʉjmámpay tambʉn ni'c je' tu'c tonto, oyáj itʉgʉy jʉngʉtʉm.
23’Jemni'c te inyajcáj inofrendajat en ayé lugar mam nas̈yac ofrenda pa Dios, mit te inyijawigap ni'c inmu-awa'nigau inmupro̱wije̱way, 24yajcʉ'jca jem inofrendajat mit nʉ́s̈ca, yo'jtʉ'jcaja paz inmupro̱wije̱way, mit cʉs̈wa'n mimingapama is̈yajca inofrendajat.
25’Amigujajtʉ'jca jeme is̈acusa̱tcapay mientras minʉs̈cap mit je' yos̈tujugum. Te inga-amigujajtʉ'jcap inmutsuguijnat, is̈yajcáj icʉ'jugum juezna', mit juezna' is̈yajcáj icʉ'jugum ayé comandante, mit je' is̈comgáj cuytujugum. 26Iyacs̈ta'cway tʉnʉmgʉs̈ap ni'c migapichingáj hasta te ingatso̱jcap pʉjʉnu is̈yo'tcajáj.
Jeme chajyo'ygámpay
27’Inmaraugawey ni'c inʉmgajau ampay jayajwat: “Migachajyo'yáj.” 28Po ʉ̱ tʉnʉmgʉs̈ap ni'c pʉmba'tu i-e'pámpay tu'c to's̈ay mit inijatp, ayé jayau as̈am ichajyjátway je' ni'c we'n iguipensa̱jt ijo̱tni'c.
29’Jemni'c te in-oyimay wijn is̈actuwatp mal, camja-e'p ayé mal as̈am inchi'tpay inwijn, ni'c más oy pi actogoy tu'c parte incuerpu mit caje' itʉgʉywa'n nu'pʉjʉn incuerpu jʉngʉtʉm. 30Mit te in-oyimay cʉ' is̈actuwatp mal, mejor camjatutsʉc ayé mal as̈am impus̈tucpay incʉ', ni'c más oy pi actogoy tu'c parte incuerpu mit caje' itʉgʉywa'n nu'pʉjʉn incuerpu jʉngʉtʉm.
Icuyaguiyámpay ito's̈ay
31’Inʉmpey ayé ley ni'c pʉn icuyaguiyámpay ito's̈ay, ma wat tu'c noc yos̈tʉcm pa iguicuyaguiwa'n, 32po ʉ̱ tʉnʉmgʉs̈ap ni'c pʉn icuyaguiyámpay ito's̈ay mit te iguigachajyo'jyap, ayé to's̈ay chajyo'yáj por ayé jayau ni'c ipʉgáj jatu'c. Mit pʉn imunicʉ'pa̱jtʉ́mpay tu'c to's̈ay cuyáguiyicway as̈amay ayé, ayé jayau chajyo'yp.
Jeme tʉ'tsjura̱tcapay
33’Inmaraugawey ni'c inʉmgajau ampay jayajwat: “Migatʉ'tsjura̱támpu, po incumplia̱táj mit el Señor lo que injura̱tway.” 34Po ʉ̱ tʉnʉmgʉs̈ap: Camjura̱tca nes̈ʉ̱n. Camjura̱tca por tsajp ni'c jem imanda̱t Dios, 35ne camjura̱tca por na̱s̈ ni'c ayé Dios i-actamp, ne camjura̱tca por Jerusalén ni'c ayé inʉ'jcopac Dios jeme más manda̱tpay. 36Ne camjura̱tca por incopajcat ni'c ca-oyap is̈actígatsca ne tu'c incuaypʉjc pa ijatwa'n po'p o yʉgʉc. 37Te inyʉmgáj jo̱, nʉmga ni'c jo̱. Mit te inyʉmgáj ca̱j, nʉmga ni'c ca̱j. Ni'c te inyʉmgap más, ayé is̈actunʉmgap ma̱lwayna'.
Jeme nas̈watcajapay mal
38’Inmaraugawey ni'c inʉmgajau ampay jayajwat: “Te tambʉn is̈watcajap mal, mijchat wátcaja-ey ni-as̈amu.” 39Po ʉ̱ tʉnʉmgʉs̈ap: Camwatcaja neti jeme is̈watcajámpay mal. Jeme is̈moyta̱jcapay in-a̱jcopacni'c, actu-e'pca jatu'c in-a̱jcopac pi is̈moygaguey jem. 40Mit te tambʉn is̈cotsnas̈cap pa iguipʉcwa'n inchec, moyga-ey ma pʉc inma'nchec. 41Mit te tambʉn is̈-obliga̱tcap pi munʉs̈caja itsʉm pa tu'c kilómetro, munʉ́s̈caja hasta mechc kilómetro. 42Moyga jeme is̈yo'tcajámpay tanti, mit camnega̱tcaja jeme is̈presta̱tcajámpay.
Nawánga namutsuguijnat
43’Inmaraugawey ni'c inʉmgajau ampay jayajwat: “Inwa'náj in-amigu mit in-anáj inmutsuguin.” 44Po ʉ̱ tʉnʉmgʉs̈ap: Wanga inmutsuguijnat mit oyninʉ́mga jeme is̈malninʉmgapay. Wátcaja oy jeme is̈-angapay mit orá̱tcaja jeme is̈apes̈capay mit jeme is̈watcajapay mal. 45Pa we'n is̈wayjatcáj Dios jeme tsʉ̱napay tsajpni'c, ni'c je' iyacp s̈ʉjw pa maljayajwat mit pa oyjayajwat, mit i-acmimp tu̱ pa jeme iwatcapay oy mit pa jeme iwatcapay mal. 46Mit te inwangap solo jeme is̈wangapay, ¿ti premiu Dios is̈moygáj? Ni'c wename-ey iniwangʉjʉ jeme ique'chumgapay impuestu. 47Mit te inje̱wajyatu insaluda̱tcap, ¿is̈jawiga más inwatcap oy que japu̱jtat? ni'c wename-ey iguiwatca ayé jayajwat iga-is̈capcapay Dios. 48Watca yacs̈ic nu'pʉjʉn ni'c Dios Nate̱jat tsajpni'cway iwatp yacs̈ic nu'pʉjʉn.
Currently Selected:
San Mateo 5: PSNT
Highlight
Share
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
