San Lucas 13

Cuyáguiga inma̱lway to̱jwat

1En ayé nije'yu tiempu tsʉ̱ngau jem una̱c jayajwat mit i-ampiugajau Jesús ni'c Pilato i-ac-ago'jcʉs̈ʉu una̱c Galileajway jayajwat, mit wejpu'n meru-ey iguisacrificá̱tca aníma̱jtat pa Dios. 2Mit Jesús inʉmgʉs̈au:

—¿Is̈jawiga ayé galileujat más iwatcau mal que japu̱t galileujat ni'c más itunas̈cau? 3Tʉnʉmgʉs̈ap ni'c ca̱j. Te mijchat ingacuyaguigapey inma̱lway to̱jwat, mitogoygámpey. 4O ¿is̈jawiga ayé dieciocho jayajwat jeme iguituca'ugaway ayé torre jeme tsʉ̱napay barrio Siloé mit igui-ago'jcau? ¿Is̈jawiga ni'c je'jat más culpa̱tijcat que nu'pʉjʉn jayajwat tsʉ̱ngapay Jerusalén? 5Tʉnʉmgʉs̈ap ni'c ca̱j. Te mijchat ingacuyaguigapey inma̱lway to̱jwat, mitogoygámpey.

Tu'c higueracujy igawatpay itʉjm

6Jesús itumuquips̈ey ayʉ̱́j cuentu:

—Tu'c jayau ijtʉu tu'c higueracujy ni'pic i-uvajugum, mit min igui-e'p te iwatnup itʉjm, po igapa̱jtawu neti. 7Mit inajau uvacuida̱tpayna': “E'pnaj, ijtʉnup tu̱gup s̈iwit tʉmimp tʉs̈-e'p te iwatnup itʉjm ayʉ̱́j higueracujy, mit tʉngapa̱jtap neti. Pus̈pichin mejor, ¿pa chan igui-ocupa̱t na̱s̈?” 8Mit iguipo'n: “Señor, tsac ma tan ayʉ̱́j s̈iwit hasta tʉs̈ataje̱cwa'n i-a̱m, mit tʉnyajcáj abono pa ma wat itʉjm. 9Mit na-e'pcáj te iwatáj itʉjm. Mit te igawatp, napus̈pichingáj.”

Jesús i-ac-oytamp tu'c to's̈ay mugus̈cówicway

10Mit Jesús i-ajque's̈ po'cs̈ans̈ʉuni'c mam judíujat i-adora̱tca. 11Mit jem itsʉ̱naj tu'c to's̈ay ijtʉpay tu'c mal-espíritu, mit igui-actsʉ̱nau tu'nij pa dieciocho s̈iwit, mit ayé to's̈ay yo'y mugus̈cówic mit nes̈ʉ̱n ca-oyawu ini-acniyacs̈ʉ. 12Jesús igui-is̈, imuya̱s̈ mit inajau:

—Hija, is̈libra̱táj Dios de ayé enfermedad.

13Mit iyajcau icʉ' iyucuinm, mit ayé to's̈ay ni-acniyacs̈ʉu jaran, mit i-oyninʉm Dios. 14Po jeme encarga̱ticway mam i-adora̱tca judíujat, igui-is̈ we'n, awa'niu ni'c Jesús i-ac-oytan ayé to's̈ay po'cs̈ans̈ʉuni'c. Mit inʉmgʉs̈au jayajwat:

—Seis s̈ʉjw itp ti nayos̈watcawa'n, mit en ayé s̈ʉjwat mínga pa pi is̈ac-oytangac, mit caje' po'cs̈ans̈ʉuni'c.

15Mit iguipo'n el Señor:

—Mijchatu miniwe̱tcʉjʉp. ¿Is̈jawiga ingaquejcap imbuejyat o imburrujat alambrajugum pa is̈acnʉ-u̱jcawa'n po'cs̈ans̈ʉuni'c? 16Mit ayʉ̱́j to's̈ay pichin Abraham ifamiliani'c, mit Awayagatsna' i-actu'nijtsʉ̱nap dieciocho s̈iwitanu. ¿Is̈jawiga ca-oy nas̈libra̱twa'n po'cs̈ans̈ʉuni'c?

17Iguinʉjm we'n, nu'pʉjʉn imutsuguijnat winchu̱cta̱jcau. Po nu'pʉjʉn nʉ'jcopac jayau ji'cta̱jcau ijo̱jtat ni'c Jesús iwat puru cosa majatway.

Mostaza-semilla icuentu

18Mit Jesús i-ampiugʉs̈au tu'c cuentu pa ma jawiga ni'c Dios ijayajwat mayigáj, inʉm:

—Tʉ-actujawigʉs̈áj nat imanda̱t Dios. 19Ayé as̈am tu'c mostaza-semilla, ni'c tu'c jayau imunʉcs̈ ayé semilla mit ini̱p ipe'tni'c, mit ye'c mit jat tu'c cujy mʉjway, mit jonwájat iwatcau ipe'jnat i-awecni'jcat.

Levadura icuentu

20Mit i-ampiugʉs̈au jatu'c cuentu, inʉm:

—Tʉ-actujawigʉs̈áj nat imanda̱t Dios. 21Ayé as̈am levadura, ni'c tu'c to's̈ay ipʉc ayé levadura mit iyac en tu̱gup medida de harina, mit iwat bien motic hasta itimajm mʉj.

Tu'c tʉc-ajw ca-awa'tsicway mʉj

22Mit Jesús nas̈ nʉ'jcopacni'jcat mit titic nʉ'jcopacwájat, mit i-ajque's̈tacyo'y, mit ipʉc to̱u pa Jerusalén. 23Mit tu'c jayau igui-ucyo't:

—Señor, ¿is̈jawi camayu nisalva̱tcʉjʉ́mpay?

Mit Jesús inʉmgʉs̈au:

24—Ni-obligá̱tcʉjʉ pa intʉgʉygawa'n en ayé tʉc-ajw ca-awa'tsicway mʉj. Ʉ̱ tʉnʉmgʉs̈ap ni'c mayo'c jayajwat ijawangáj itʉgʉygawa'n, po ca-oyáj. 25Ni'c tu'c jayau tʉ́jcajway ca's̈ʉ'gáj mit i-atugáj itʉc-ajw, mit mijchat mitangáj pe'ta̱m mit impas̈cajáj tʉc-ajw, mit inyʉmgajáj: “Señor, Señor, awá̱tscajac tʉc-ajw.” Mit je' is̈po'ngáj: “Tʉngajawip mijʉmajyat mijchat.” 26Mit mijchat inyʉmgajáj: “Mi̱ tʉmunipʉjcʉjʉu mit tʉmucaygau mit inajque's̈tacyo'y tʉnyʉ'jcopacni'jcat.” 27Po je' is̈nʉmgajáj: “Tʉnʉmgʉs̈ap ni'c tʉngajawip mijʉmajyat. Niju'pcʉjʉ mam ʉ̱ mijchat inwatcapay mal.” 28Jem injʉygawa'n mit itu'ngawa'n injo̱jtat cuandu is̈-e'pcawa'n Abraham, Isaac, Jacob mit nu'pʉjʉn profetajat mam imanda̱t Dios, mit mijchat mitangáj pe'ta̱m. 29Ni'c mingáj jayajwat mam ipichin s̈ʉjw mit mam itʉ́gʉynu, mit nortejatway mit surjatway, mit nitsʉ̱nda̱jcʉjʉ̱́j me̱s̈ani'c mam imanda̱t Dios. 30Márauga. Mayo'c nʉs̈capay jʉpm, tangáj mugus̈á̱m. Mit mingapay mugus̈á̱m, tangáj jʉpm.

Jesús inijʉyp Jerusalén

31En ayé nije'yu s̈ʉjw, mingau una̱c fariseujat, mit inʉmgajau Jesús:

—Po'c ni'c Herodes iwamp is̈ago'gáj.

32Mit Jesús inʉmgʉs̈au:

—Ayé Herodes ito'jcʉp maña, po nʉs̈ nʉmgaja yename: “Tʉnacpichimp demo̱nyujat mit tʉnac-oytangʉs̈p jayajwat. Tʉncʉs̈áj tʉnyos̈ hasta iguinʉmwa'n Dios.” 33Dios inʉm ni'c itp ti tʉs̈siguia̱jtawa'n ayé to̱u hasta tʉs̈cʉs̈wa'n tʉnyos̈ en ayé nʉ'jcopac Jerusalén. Nʉmic itsʉ̱na ni'c Jerusalén ayé mam igui-ago'jca profetajat.

34’Mijchat mitsʉ̱ngapay nʉ'jcopac Jerusalén inago'jcau profetajat, mit impojcajau mit tsa' jeme is̈ajyu'tcajaway Dios. May veces jatʉnwán tʉs̈cuida̱tcʉs̈wa'n injayajwat as̈am tu'c piyu iguicuida̱tcʉs̈ iwaywájat ique̱gampa'tcʉm, po mijchat ingawangawu. 35Jawiga ni'c inyʉ'jcopajcat tanáj cuyaguiyic. Tʉnʉmgʉs̈ap ni'c ʉ̱ is̈caja-e'pcáj hasta tʉmi'nwa'natu, mit wejpu'n inyʉmgáj: “Oyninʉmic ayé jeme mimpay, ni'c el Señor igui-ajyu't.”

Currently Selected:

San Lucas 13: PSNT

Highlight

Copy