San Lucas 12

Fariseujat ilevadurajat

1Mit ni-apʉcmujcʉjʉu tu'c jayaujuc mayway hasta nitsʉmadá̱jcʉjʉu, mit Jesús chu̱chiu primeru iguinʉmgʉ́s̈a ipʉctampajyat:

—Nicuidá̱tcʉjʉ mit ayé fariseujat ni'c niwatcʉjʉp oyjayajwat, po lo que i-ajque's̈capay ayé puru we̱t mit ijimp jayajwat. Ayé as̈am levadura igui-actimam harina-cʉ't. 2Ni'c ca-itp neti cuyu'tsicway ni'c cuque's̈áj nu'pʉjʉn, mit najawigáj nu'pʉjʉn itpay cuyu'tsic. 3Jemni'c nu'pʉjʉn inyʉmgaway intu'gujmatu, nu'pʉjʉn ijawigáj. Mit nu'pʉjʉn inyʉmgaway anu'mu intujugujmat, inʉmdacyo'ygáj mam iguimárauga nu'pʉjʉn jayajwat.

Pʉn ayé napʉ̱támpay

4’Amigujat, tʉnʉmgʉs̈ap: Campʉ̱tca jeme i-ago'jcámpay incuerpujat ni'c cʉs̈wa'n is̈cajawatcajap neti. 5Po tʉnʉmgʉs̈áj pʉn impʉ̱tcámpay. Pi pʉ̱tca ayé jeme oyapay is̈chi'tcajap imvidajat mit después oyámpey is̈comgáj jʉngʉtʉm. Ʉ̱ tʉnʉmgʉs̈ap pi pʉ̱tca ayé.

6’Oyap nas̈to'c cinco jonwájat por mechc centavu, po Dios icuida̱tcʉs̈pey jonwájat. 7Dios ijawip pʉjʉn cuajypʉjc is̈aguépca incopacni'jcat. Jemni'c campʉ̱tca ni'c mijchat más mivalia̱tcap que jonwájat.

Jeme inʉmpay ni'c tʉs̈-is̈cap

8’Tʉnʉmgʉs̈ap ni'c pʉmba'tu inʉmpay ni'c tʉs̈-is̈cap mam iguimárauga jayajwat, we'ney ʉ̱ jeme tʉjatway jayau tʉnyʉmáj ni'c tʉnis̈cap je' mam iguimárauga Dios i-ángejlat. 9Po jeme inʉmámpay ni'c tʉs̈ca-is̈cap mam iguimárauga jayajwat, ʉ̱ tʉnyʉmámpey ni'c tʉnga-is̈cap je' mam iguimárauga Dios i-ángejlat.

10’Mit jeme tʉs̈tucotsámpay ʉ̱ jeme tʉjatway jayau, ayé oyáj itsʉ̱na perdona̱tic. Po jeme itucotsámpay Espíritu Santu, ca-oyáj itsʉ̱na perdona̱tic.

11’Mit cuandu is̈munʉs̈cáj mam judíujat i-adora̱tca, mit mam juezat mit mam autoridajat, campensá̱tca nat impo'ngawa'n, ne ti inyʉmgámpay. 12Ni'c Espíritu Santu is̈actujawigáj ti inyʉmgámpay en ayé hora.

Tu'c ricu tontoway

13Mit tu'c jayau tsʉ̱naway jayau-awa'tsam inajau Jesús:

—Amayipay, nʉjma tʉnje̱way pa tʉmayapʉ́jca tʉnya̱s̈at jeme tʉs̈toca̱tcapay.

14Po Jesús ipo'n:

—Hombre, ¿pʉn ʉ̱ tʉs̈yac pa juez pa tʉpartia̱tcʉs̈awa'n inaguepcapay?

15Mit inʉmgʉs̈awey:

—Nicuidá̱tcʉjʉ mit nu'pʉjʉn cosa inwano'jcapay, ni'c tu'c jayau ivida caje' pa iguiwano'cwa'n nu'pʉjʉn lo que i-aguepay.

16Mit Jesús itumuquips̈cʉs̈au tu'c cuentu, inʉm:

—Tu'c jayau ricu ijtʉu ina̱s̈, mit iguiyaguí̱jcap may cosecha. 17Mit ayé ricu pensa̱t ijo̱tni'c, mit inʉm: “¿Ti tʉnwatáj? ni'c tʉnga-aguep mam tʉs̈apʉcmucwa'n tʉncosecha.” 18Mit inʉm: “Ayʉ̱́j tʉnwatáj. Tʉnactogoyda'gáj mam tʉs̈yac tʉncosecha, mit tʉnwatáj más majatway, mit jem tʉs̈comwa'n nu'pʉjʉn tʉncosecha mit nu'pʉjʉn lo que tʉnaguepay. 19Mit je' pensa̱t ijo̱tni'c mit inʉm: Tʉnaguep mayo'c cosajat apʉcmuguic pa may s̈iwit. Tʉpo'cs̈áj, tʉcayáj, tʉ-u'gáj, mit ji'gáj tʉnjo̱jt.” 20Po Dios iguinʉjmau: “Mitonto, ayʉ̱́j tsu' mi-o'gáj ¿mit pa pʉn itanwa'n lo que inaguepay?” 21Mit wename iguijatáj jeme jinap ijtʉpay may tumi̱n pa je'yu, mit je' pro̱wij mam igui-e'p Dios.

Nagapensa̱tí̱jca

22Mit Jesús inʉmgʉs̈au ipʉctampajyat:

—Ʉ̱ tʉnʉmgʉs̈ap campensa̱tí̱jca pa imvidajat ti incaygámpay, ne campensa̱tca pa jamuc ti incomgámpay. 23Como Dios nas̈moygap vida, ayé más valia̱tp, mit je' nas̈moygámpey nacaygámpay mit nacomgámpay. 24E'pca jonwájat ni'c cani̱pcap ne cachijcap, ne ca-itcʉjʉp mam iguiguarda̱tcawa'n cayan, po Dios i-ajcaygʉs̈p. Mijchat más mivalia̱tcap que jonwájat. 25Mit te pensa̱to'cp tu'c jayau, ¿is̈jawiga oyáj iye'c mediu metru más iyucmi? 26Te ca-oyap is̈wátca tu'c cosa te mipensa̱to'jcap, ¿tini'c impensa̱tí̱jca pa japu̱t cosajat is̈aguepcawa'n?

27’E'pca ayé liriupijicwájat nat iye'jca mit cayos̈watcap ne igapi'tcap jamuc, po tʉnʉmgʉs̈ap ni'c ne rey Salomón mit nu'pʉjʉn i-oymanagui ca-oyawu itsʉ̱na cutigatsic as̈am ayé pijicwájat. 28Mit te Dios icuida̱tp ma'tswájat cuyjugumay mit jatu'c s̈ʉjw nacomgapatu jʉngʉtʉm, ¿is̈jawiga Dios is̈cacuida̱tcáj más mijchat? Mijchat migacupʉjcap may. 29Jemni'c pi is̈catu'ngac ti incaygámpay ne ti in-u̱jcámpay, ne campensa̱tí̱jca. 30Ni'c jayajwat ayʉ̱́j mundujway iche'ngap nu'pʉjʉn ayé cosajat, po Dios Nate̱jat ijawip ni'c inyesita̱tcap nu'pʉjʉn ayé cosajat. 31Más oy pi che'nga pa is̈manda̱tcáj Dios, mit nu'pʉjʉn ayé cosajat inaguepcáj nu'tsic.

Riqueza tsajpni'cway

32’Mijchat as̈am tu'c titic borregujuc, po campʉ̱tcawit ni'c Dios Nate̱jat iwamp is̈manda̱tcáj. 33To'jca lo que inaguepcapay mit moyga jeme nesita̱tijcatway. Muyo'yga tumi̱ncomajnat jeme cajotcámpay, ayé inʉmo'jcʉp pi apʉcmújca riqueza yucm tsajpni'c jeme catogoyámpay, mam igatʉgʉywa'n nu'mpay, ne mam wech iguigacayáj. 34Jeme iwangapay may tumi̱n yam na̱s̈ni'c, ayé iguijo̱tju'pcap, mit jeme iwangapay itsʉ̱ngawa'n oy tsajpni'c, solo pensa̱tcáj pa tsajpni'c.

Tu'c mozo tsʉ̱napay prepara̱tic

35’Tsʉ̱́nga prepara̱tic mit ma tsʉ̱nga no'ctsowic inta'cs̈ajnat pa intsʉ̱ngawa'n prepara̱tic. 36Pi tsʉ̱nga as̈am mozojat jeme i-atsʉ̱ngapay ijaycat imi'nwa'n cʉ'pa'tni'c, pa we'n imi'nwa'n iguipas̈ tʉc-ajw, inawa̱tscajáj jaran. 37Tsʉ̱ngáj oy ayé mozojat te ijaycat iguipa̱tcap nijutujcat cuandu imi'nwa'n. Iyacs̈ta'cway tʉnʉmgʉs̈ap ni'c je' niprepara̱jtʉ̱́j mit inʉmgʉs̈áj ma tsʉ̱nga me̱s̈ani'c, mit je' iservia̱tcʉs̈áj. 38Tsʉ̱ngáj oy ayé mozojat te iguipa̱tcap nijutujcat pu̱jtsu'm o jopoytsu'mnaj. 39Pi jawiga ayʉ̱́j, ni'c tu'c jayau tʉ́jcajway ma jawiate ti hora imi'nwa'n tu'c nu'mpay, je' cuida̱tájate mit igamo'ájate laj ma iguitʉctʉgʉyac. 40Mijchat we'ney pi tsʉ̱nga prepara̱tic ni'c ʉ̱ jeme tʉjatway jayau tʉmi'náj de repente.

Tu'c mozo ma̱lway

41Mit Pedro iguinajau:

—Señor, ¿is̈tumuquips̈cap ayʉ̱́j cuentu pa ʉjtsatu o pa nu'pʉjʉn jayajwat?

42Mit el Señor inajau:

—Tʉ-actujawigʉs̈áj tu'c mozo cumplia̱tpay mit jeme i-is̈capay. Ijayc iguitumuyac ifamiliajat ayé mozo, mit je' imoygʉs̈ icayan en ayé hora itucaygámpay. 43Oyninʉmic ayé mozo te we'n iguiwat cuandu imi'nwa'n ijayc. 44Iyacs̈ta'cway tʉnʉmgʉs̈ap ni'c ayé tʉ́jcajway itumuyagáj ayé mozo nu'pʉjʉn ijtʉpay. 45Po te ayé mozo inʉmp ijo̱tni'c: Tʉnjayc jego'gámnaj pa imi'nwa'n. Je' chu̱chip iguimoyta̱jcʉs̈ imumozoje̱wajyat, mit cayp, u̱cp mit hasta u̱ctupʉcp. 46Te iwatp we'n ayé mozo, mi'náj ijayc en tu'c s̈ʉjw igatsʉ̱nawa'n prepara̱tic mit en tu'c hora iguigajawiwa'n, mit icastiga̱táj mʉgʉc mit i-actutso'gáj ayé mozo as̈am jeme cacumplia̱tcapay.

47’Te tu'c mozo ijawip ti iwampay ijayc po catsʉ̱nap prepara̱tic, ne cajayaumayp, iraunipʉ'ngáj mʉgʉc. 48Po ayé mozo igajawipay, te iwatp mal, itp ti iguiraugajawa'n, po caje' mʉgʉc. Ni'c jeme natumuyacpay may, nayo'jtigajtsáj may, mit jeme namoypay más may, nas̈moytigatsnúmpey más may.

Jesús caminu solo pa iguiyacwa'n paz

49’Tʉmín pa tʉs̈comwa'n jʉjn nu'pʉjʉn mundu, mit tʉnwampate ma tinin jaran. 50Itp ti tʉs̈tunas̈wa'n, mit jinap tu'no'cp tʉnjo̱jt hasta icumplia̱twa'n ayé s̈ʉjw cuandu tʉs̈tunas̈wa'n. 51Campensa̱tca ni'c tʉmín solo pa tʉs̈yacwa'n paz en ayʉ̱́j mundu. Po como tʉmín, itáj lucha ni'c catsʉ̱ngáj de acuerdu jeme tʉs̈cupʉjcapay mit jeme tʉs̈cacupʉjcapay. 52Jemni'c jinap pa jʉpm cinco jayajwat en tu'c familia ni-ago'jcʉjʉ̱́j, tres tsʉ̱ngáj contra dos, mit dos contra tres. 53Tu'c jayau imutsuguinwatáj iway, mit tu'c jayau imutsuguinwatáj ite̱t. Tu'c to's̈ay imutsuguinwatáj iwaymá̱m, mit tu'c to's̈ay imutsuguinwatáj ima̱m, mit tu'c to's̈ay imutsuguinwatáj ijays̈e'p, mit tu'c jays̈e'p imutsuguinwatáj is̈ac.

¿Tini'c is̈cajáwiga ayʉ̱́j tiempu?

54Jesús inʉmgʉs̈awey ayé jayajwat:

—Is̈-e'pcawa'n ni'c cu'tp wintuc mam itʉ́gʉynu s̈ʉjw, inyʉmgap jaran ni'c mi'náj tu̱, mit we'n ijat. 55Mit is̈ujwa'n jʉns̈e'm, inyʉmgap ni'c itáj powic, mit we'n ijat. 56Mijchatu miniwe̱tcʉjʉp ni'c oyap is̈ajcotstújca ti i-anuncia̱tpay tsajp mit na̱s̈, po ca-oyap is̈jawiga ti inʉmo'jcʉp lo que tʉnwatpay ʉ̱ jinapay tiempu.

Amiguját inmutsuguin

57’¿Mit tini'c ca-oyap is̈jawiga mijchatu ti ayé lo que iyacs̈ta'cway? 58Amigujátca jeme is̈cotsnas̈capay mientras minʉs̈cap mit je' yos̈tujugum. Te inga-amigujátcap inmutsuguijnat, is̈yajcáj icʉ'jugum juezna', mit juezna' is̈yajcáj icʉ'jugum ayé comandante, mit je' is̈comgáj cuytujugum. 59Tʉnʉmgʉs̈ap ni'c migapichingáj jem hasta te ingatso̱jcap pʉjʉnu is̈yo'tcajáj.

Currently Selected:

San Lucas 12: PSNT

Highlight

Copy