Marcos I TEJCHIBAL
I TEJCHIBAL
¿Chucoch tsa' ts'ijbunti Marcos?
Ili wen t'añ jiñʌch i cha'p'ejlel bʌ libro am bʌ ti tsiji' bʌ wen t'añ, añ ca'bʌl t'añ lajal bʌ bajche' añ ti Mateo yic'ot Lucas. Cojach añ jo'chajp mach bʌ ts'ijbubilic ti' yam bʌ wen t'añ (3.7-12; 4.26-29; 7.32-37; 8.22-26; 14.51-52). Jiñi cha'añ ti ñaxan ma'añic tsi' wen q'ueleyob ti ñuc.
Che' ti ja'bil 1900 che' tilemix Cristo, woli ña'tʌntel tilel cha'añ ili cha'p'ejl wen t'añ (Marcos) tsa' c'ʌjñibʌyi cha'añ mi ts'ijbuntel Mateo yic'ot Lucas, jiñʌch jump'ejl juñ wen oñiyix bʌ baqui mi tsictesan i cuxtʌlel yic'ot i ye'tel Jesús.
Tsa' bʌ i ts'ijba ili wen t'añ
Ñumen cʌmbil ti pejtelel cha'añ Juan Marcos jiñʌch tsi' ts'ijbu ili juñ, i yumijel Bernabé (Col 4.10) yalobil María, tsa' chumleyob ti Jerusalén, ti jump'ejl otot baqui añ yam bʌ junlajm i mal otot ti chañ ba' woli jijlelob jiñi xsubt'añob (Hch 1.13; 12.2). I yaj e'tel Pablo (Hch 12.25; 13.5,13; 15.37,39; 2 Tm 4.11; Flm 24), yic'ot xcʌnt'añ añ i cha'añ Pedro, ya' ti ñaxan bʌ i juñ mi tsictesan cha'añ Marcos i yalobilʌch (1 P 5.13).
Marcos jiñʌch juntiquil mu' bʌ i su'b che' bajche' tsi' yu'bi. Mi ts'ijbun ti Griego, ma'añic mi wen mejlel i ts'ijbun lajal che' bajche' mach i t'añic yilal, pero wen i t'ojol jach mi su'b. Mi' cha' c'ajtesan pejtelel tsa' bʌ yu'bi.
Chuqui yom mi yʌq'ueñonla la cʌn jiñi wen t'añ
Marcos ma'añic mi ca'bʌl su'b chuqui tac tsa' ujti. Ma' añic mi lac taj che' bajche' Jesús tsi' yila pañimil, che' alob toj, pero Mateo yic'ot Lucas mi su'b.
Yom bʌ mi yʌc' ti cʌjñel jiñi xsubt'añ jiñʌch majqui Jesús, jiñi ñaxan bʌ xñopt'añob tsi' yʌlʌyob ti xuc'tʌlel i pusic'al, Jesús i Yalobil Dios. Marcos ja'el tsi' yʌlʌ, ti tejchibal i subt'añ. Jiñʌch i cajibal jiñi wen t'añ mu' bʌ i yʌc' ti cʌjñel Jesucristo i Yalobil Dios (1.1; 1.11; 3.11; 5.7; 9.7; 14.61; 15.39).
Bajche' mi yʌc' ti cʌjñel Cristo jiñi Marcos
Ili wen t'añ mi su'b ti jujunq'uejl i ts'ijbujel cha'añ Jesús jiñʌch ch'oyol bʌ ti Dios, Yalobil am bʌ ti wajali tsa' chumle ti' tojlel wiñicob x'ixicob. Jesús, jiñʌch wen bʌ xcʌntesa loq'uem bʌ ti Galilea (1.9), jiñʌch Cristo, jiñi yajcʌbil bʌ, woli bʌ i pijtan jiñi Israel ti wajali (8.29; 9.41; 14.61-62). Jiñi xsubt'añ woli tsictesan mi caj ti julel Jesús ti pañimil jiñʌch tsiquil bʌ yejtal woli pʌs cha'añ tsa'ix juli yumʌntel Dios (1.14-15; 4.1-34).
Che' mi laj q'uel, jiñi judíojob ma'añic tsi' wen cʌñʌyob i cuxtʌlel Jesús, ma'añic tsi' mele Jesús che' bajche' juntiquil x'e'tel i cha'añ yumʌl, tsi' pʌsʌ ca'bʌl i pec'lel i pusic'al ti ye'tel yic'ot ti cʌntesa mach lajalic che' bajche' juntiquil yumʌl ti pañimil.
Jesús ch'oyol bʌ ti Nazaret, jiñʌch Yalobil Dios, yic'ot jiñʌch ja'el I Yalobil Wiñic. Tsi' yu'bi i c'unlel i bʌc'tal che' bajche' wiñic, tsi' yu'bi wocol yic'ot tsa' chʌmi (8.3). Ma' añic tsi' bʌc' ac'ʌ ti cʌjñel i ye'tel aq'uebil bʌ ti Dios (1.43-44; 5.43; 8.29-30; 9.9,30-31).
Marcos mi ñumen ac' ti cʌjñel bajche' tsi' mele ye'tel Jesús. Cojach mi lac taj i lajiya ya' ti 4.1-34 yic'ot i su'bal bajche' mi caj ti ujtel ti jilibal pañimil 13.3-37. Pejtelel yan tac bʌ jiñʌch cʌntesa yic'ot lac xic'bentel. Jiñi xsubt'añ mi ñumen tsictesan ti uts'at chuqui tsa' bʌ ujti, ñumen to che' bajche' Mateo yic'ot Lucas, añ lajal tac bʌ isujmlel mi lac taj (5.21-43; Mt 9.18-26; Lc 8.40-56; 6.14-29; 14.1-12; Mt 14.13-21; Lc 9.10-17).
Che' mi lac pejcan majlel ili wen t'añ, uts'atax yu'bil, lajal che' bajche' woli lac letsel majlel, c'ʌlʌl jinto mi laj c'otel ya' baqui ts'ijbubil i wocol Jesús yic'ot che' bajche' tsa' cha' ch'ojyi ti mucoñibʌl. Lac Yum uxyajl tsi' tsictesa mu' bʌ caj ti ujtel ti' tojlel xcʌnt'añob i cha'añ. I Yalobil Wiñic mi caj i yʌjq'uel ti' c'ʌb ñuc bʌ motomajob yic'ot xts'ijbayajob mu' bʌ i caj i yʌc'ob ti chʌmel. Mi caj i yʌc'ob ti' c'ʌb gentilob, mi caj i tsʌnsañob. Ti yuxp'ejlel q'uiñ mi caj i cha' ch'ojyel (10.33-34, q'uele 8.31; 9.31. Mt 16.21; 17.22-23; 20.18-19 yic'ot Lc 9.22; 9.44; 18.32-33). Jiñi xcʌnt'añob ti ñaxan ma'añic tsi' ch'ʌmbeyob isujm cha'añ lac coltʌntel añʌch ti pusic'al Dios aq'uebil ti' wenta Jesús cha'añ mi ts'ʌctesan, 8.32-38; 16.19-20.
Tsa' bʌ i pejcayob ili juñ, ja'bilel yic'ot baqui tsa' ts'ijbunti
Mi lac ña'tan baqui tsa' ts'ijbunti Marcos tic'ʌl tsa' ts'ijbunti ti Roma, o ti Antioquía ti Siria, che' maxto c'otemic ja'b 70 che' tilemix Cristo, che' ti yorajlel tsa' jisʌnti Jerusalén. Mach mejlic lac wen ña'tan toj bʌ ja'bilel, añ mi yʌlob yaño' bʌ tsa' ts'ijbunti ti ja'b 65 yic'ot ti 70 che' tilemix Cristo, yom mi yʌl ti ja'b che' bʌ tsa' ts'a'lenti jiñi xñopt'añob ti ja'b 64 che' tilemix Cristo, ti t'añ emperador Nerón, yam bʌ ti ja'b 63 yam bʌ ti ja'b 50, che' tilemix Cristo.
Jiñi ñaxan bʌ x'e'telob i cha'añ lac Yum tsi' tajayob ila ti wen t'añ i cʌntesa jiñi xsubt'añ Pedro, jiñi Marcos jiñʌch i ya' cʌntesa jiñi Pedro. Ti ñaxan tsa' ts'ijbunti cha'añ mi pejcañob jiñi gentilob, mach bʌ ya'ic chumulob ti Palestina.
Che' bajche' t'oxbil ili wen t'añ
Añ ca'bʌl che' bajche' mi mejlel lac t'ox ili wen t'añ tsa' bʌ i ts'ijbu jiñi Marcos Mi lac tech lac tsol majlel ti tejchibal, Jesús tsi' yʌc'ʌ i bʌ ti cʌjñel: Yam bʌ ja'el, che' bajche' yilal (1.7-8,10-11; 4.41; 8.27-29; 9.7), i p'ʌtʌlel ti' tojlel am bʌ ti pañimil, wocol yic'ot chʌmel (1.30-31,40-42; 2.3-12; 4.37-39; 5.22-42; 6.45-51) yic'ot ja'el i ts'a'lentel jiñi p'ʌtʌlel jontolil (1.24-27; 3.11; 5.15,19; 9.25-27); che' ja'el isujmlel i ye'tel, ñaxan che' bajche' xcʌntesa yic'ot x'alt'añ (1.37-39; 2.18-28; 3.13-19,23-29; 4.1-34; 9.2—10.31; 13.3-37; 14.61-62), ti yujtibal che' bajche' Yumʌl yic'ot xColtaya (16.15-18).
Che' bajche' t'oxbil ili Marcos:
I tejchibal (1.1-15)
I su'bal jiñi Juan Bautista (1.1-8)
Tejchibal i ye'tel Jesús (1.9-15)
1. Jesús, jiñi yajcʌbil bʌ (1.16—8.30)
a. Ye'tel yic'ot i cʌntesa Jesús (1.16—3.12)
b. Tsictesʌntel i yumʌntel Dios (3.13—6.6)
c. Jesús tsi' yʌc'ʌ i bʌ ti cʌjñel (6.7—8.30)
2. Jesús, i Yalobil wiñic (8.31—16.20)
a. Jesús tsi' su'bu mi caj ti chʌmel (8.31—11.11)
b. Ye'tel Jesús tsa' bʌ i mele ti Jerusalén (11.12—13.37)
c. I wocol, tsa' tsʌnsʌnti yic'ot tsa' ch'ojyi ti mucoñibʌl (14.1—16.20)
Currently Selected:
Marcos I TEJCHIBAL: NTCH
Highlight
Share
Copy
Want to have your highlights saved across all your devices? Sign up or sign in
Biblia de Estudio en Ch´ol de Tumbalá, Chiapas, México © Sociedad Bíblica de México A.C.