Lucas 4
4
I yilʌbentel i pusic'al Jesús
(Mt 4.1-11; Mc 1.12-13)
1Jesús, but'ul ti jiñi Ch'ujul bʌ Espíritu, tsi' cʌyʌ Jordán ja'. Jiñi Espíritu tsi' pʌyʌ majlel c'ʌlʌl ti' jochol bʌ lum. 2Cha'c'al q'uiñ ya'añ. Tsa' ilʌbenti i pusic'al cha'añ xi'ba,#Heb 2.18; 4.15 ma'añic chuqui tsi' wis c'uxu,#Ex 34.28; Dt 9.9,18; 1 R 19.8 che' ñumeñix, añix i wi'ñal.
3Jiñi xi'ba tsi' su'be Jesús:
—Mi i Yalobilet Dios, su'ben ili xajlel cha'añ mi' pʌntʌyel ti waj, —che'en.
4Jesús tsi' jac'be, tsi' su'be:
—Ts'ijbubil: “Mach ti wajic jach cuxulob wiñicob x'ixicob, [cojach ti pejtelel t'añ ch'oyol bʌ ti Dios”.]#Dt 8.3#4.4 Ti yan tac bʌ Biblia ma'añic mi lac taj ili t'añ: Cojach ti pejtelel t'añ ch'oyol bʌ ti Dios. —Che'en.
5Jiñi xi'ba tsi' pʌyʌ majlel ti chañ bʌ wits. Ti orajach tsi' laj pʌsbe Jesús i yumʌntel tac jiñi yumʌlob ti pañimil. 6Jiñi xi'ba tsi' su'be Jesús:
—Mi caj cʌq'ueñet pejtelel iliyi yic'ot i p'ʌtʌlel yic'ot i ñuclel, come laj aq'uebilon tic wenta.#Sal 2.7-9; Lc 22.53; Jn 12.31; 14.30; 16.11; Hch 26.18; 2 Cor 4.4; Ap 13.1-9 Mi cʌq'uen majqui com. 7Muq'uic a ñocchocon a bʌ a ch'ujutesañon, laj a cha'añʌch mi' majlel ti pejtelel, che'en jiñi xi'ba.
8Jesús tsi' jac'be:
—Cucu ti loq'uel wʌ' ba'añon, Satanás, come ts'ijbubil: “Yom ma' ch'ujutesan a Yum Dios. Cojach jiñi yom ma' yuman”,#Dt 6.13 —che'en.
9Jiñi xi'ba tsi' pʌyʌ majlel Jesús ya' ti Jerusalén. Ya' tsi' pʌyʌ majlel ti wa'tʌl ti' pam i jol Templo. Tsi' su'be:#Sal 91.11-12
—Mi i Yalobilet Dios, choco ju'bel a bʌ. 10Come ts'ijbubil: “Mi caj i su'beñob i yángelob cha'añ mi' cʌntañet. 11Yic'ot mi caj i chuquet ti' c'ʌb, ame a jats' a woc ti xajlel”,#Sal 91.11-12 che'en xi'ba.
12Jesús tsi' su'be:
—Albilix jiñi t'añ: “Mach yomic ma' wilʌben i pusic'al a Yum Dios”,#Dt 6.16 —che'en.
13Che' bʌ tsa' ujti i yilʌben i pusic'al Jesús, jiñi xi'ba tsi' poj tʌts'ʌ i bʌ jumuc' ti' tojlel.#4.13 Q'uele Heb 4.15. Tsi' poj tʌts'ʌ i bʌ jumuc': Añ yam bʌ che' bajche' yom mi la cʌl ti lac t'añ: C'ʌlʌl jinto tsa' cha' c'oti i yorajlel. Mi' cha' tajtʌl ti t'añ Satanás jinto ti Lc 22.3.
3. I YE'TEL JESÚS TI GALILEA
(4.14—9.50)
I tejchibal i ye'tel Jesús
(Mt 4.12-17; Mc 1.14-15)
14Jesús tsa' cha' majli ti Galilea, añ i p'ʌtʌlel jiñi Espíritu yic'ot. Tsa' pujqui t'añ ti pejtelel lum ti' joytʌlel Galilea cha'añ ñuc bʌ i melbal Jesús. 15Jesús tsi' cha'le cʌntesa ti sinagoga tac i cha'añ judíojob. Pejtelel wiñicob x'ixicob tsi' tsictesayob i ñuclel Jesús.
Jesús ya' ti Nazaret
(Mt 13.53-58; Mc 6.1-6)
16Tsa' majli Jesús ya' ti Nazaret ba' tsa' coli. Tsa' ochi ti sinagoga ti' q'uiñilel c'aj-o che' bajche' i tilel. Tsa' wa'le cha'añ mi' pejcan juñ.#4.16 Jiñi Sinagoga: Jiñʌch jump'ejl otot ba' mi' tempañob i bʌ jiñi judíojob cha'añ mi' ch'ujutesañob Dios. Come jiñi judíojob mi' tempañob i bʌ che' ti sábado, jiñi woli bʌ i tech culto mi' mejlel i su'ben juntiquil wiñic ñoxix bʌ, judío bʌ, cha'añ mi' pejcan ti tsiquil bʌ t'añ i Ts'ijbujel Dios yic'ot añ ti' wenta cha'añ mi' tsictesan isujmlel. 17Tsa' aq'uenti i juñ jiñi x'alt'añ Isaías. Che' bʌ tsi' jamʌ jiñi bʌlbil bʌ juñ tsi' taja ba' ts'ijbubil ili t'añ:#4.17 Che' ti tejchibal i ye'tel Jesús, tsi' c'ʌmbe i t'añ jiñi x'alt'añ Isaías cha'añ mi' tsictesan cha'añ tsa' tili i su'b wen t'añ yic'ot tsa' tili i mel i ye'tel ti' tojlel jiñi p'ump'uño' bʌ yic'ot ti' tojlelob jiñi tic'lʌbilo' bʌ (18) yic'ot cha'añ mi' coltañ ti pejtelel i wocol wiñicob x'ixicob. Q'uele 2.8.
18“Añ i yEspíritu lac Yum tic pusic'al.
Tsi' yajcayon cha'añ mic su'beñob wen t'añ jiñi p'ump'uño' bʌ.
[Tsi' chocoyon tilel cha'añ mic lajmesʌbeñob i ch'ijiyemlel jiñi ch'ijiyemo' bʌ i pusic'al,]#4.18 Ma'añic mi lac taj ti yan tac bʌ Biblia ili t'añ: Tsi' chocoyon tilel cha'añ mic lajmesʌbeñob i ch'ijiyemlel jiñi ch'ijiyemo' bʌ i pusic'al.
cha'añ mic su'beñob loq'uel jiñi ñup'ulo' bʌ,#Is 58.6
cha'añ mij cambeñob i wut jiñi xpots'ob,
cha'añ mi cʌc'ob ti colel jiñi tic'lʌbilo' bʌ,
19yic'ot cha'añ mi caj c su'b i ja'bilel i yutslel i pusic'al lac Yum”.#4.19 Ja'bilel i yutslel i pusic'al lac Yum: (Lv 25.8-17,23-55) mi' ña'tʌntel i q'uiñilel tijicñʌyel, mi' melob ti lujump'ejl i yuxc'al tac ja'b, ti ili q'uiñijel mi' ñusʌbentelob i bet, jiñi lum tsa' bʌ chojñi mi cha' ch'ʌm jiñi ñaxan bʌ i yum o mi yalobil yic'ot ja'el jiñi xmajtan e'tel mi' yʌjq'uelob ti colel.
20Jesús tsi' cha' bʌlʌ jiñi juñ, tsi' cha' aq'ue jiñi am bʌ i ye'tel ti sinagoga, tsa' buchle.#4.20 Tsa' buchle: Mi' Wa'tʌl jiñi mu' bʌ i pejcan i Ts'ijbujel Dios ya' ti sinagoga (v. 16), pero mi' Buchtʌl che' mi caj i su'b isujmlel. Pejtelel año' bʌ ti sinagoga tsi' ch'ujch'uj q'ueleyob Jesús. 21Jiñi cha'añ Jesús tsa' caji i su'beñob:
—Wʌle#4.21 Wʌle: Woli i taj ti t'añ i coltʌntel wiñicob x'ixicob tsa' bʌ i ch'ʌmʌ tilel Jesús ti ili ora. Q'uele Heb 3.7—4.13. tsa'ix ts'ʌctiyi ili ts'ijbujel Dios tsa' bʌ la' wu'bi,#4.21 Ti Lucas yic'ot ti Hechos wen tsiquil mi' su'b cha'añ tsa' ts'ʌctiyi i Ts'ijbujel Dios ti Jesús. Q'uele Lc 24.44. —che'en.
22Ti pejtelelob tsi' yʌlʌyob cha'añ uts'at Jesús, tsa' toj sajtiyob i pusic'al cha'añ uts'at i t'añ. Tsi' yʌlʌyob:
—¿Mach ba jiñic i yalobil José?
23Jesús tsi' su'beyob:
—Isujm mi caj la' su'beñon jiñi t'añ mu' bʌ i c'ʌñob ti lajiya: “Xts'ʌcaya, ts'ʌcan a bʌ”. Mi caj la' su'beñon c mel wʌ' tic lumal chuqui tsa' c mele ya' ti Capernaúm che' bajche' tsa'ix la' wu'bi, —che'en.
24Jesús tsi' yʌlʌ ja'el:
—Isujm mic su'beñetla, ma'añic x'alt'añ mu' bʌ i q'uejlel ti ñuc ti' lumal.#Mt 13.57; Mc 6.4; Jn 4.44 25Isujm mic su'beñetla añ ca'bʌl me'ba' x'ixicob ti Israel ti' yorajlel Elías che' wen jamʌl pañimil ojlil i chʌmp'ejl ja'b, che' bʌ tsa' tili ca'bʌl wi'ñal ti pejtelel lum. 26Pero ma'añic tsa' chojqui majlel Elías ba'añob. Tsa' jach chojqui majlel ti Sarepta ya' ti Sidón#1 R 17.1,8-16; Stg 5.17 ba'añ juntiquil me'ba' x'ixic. 27Añ ja'el ca'bʌl israelob año' bʌ leco bʌ i tsoy che' ti' yorajlel jiñi x'alt'añ Eliseo. Ma'añic majqui tsa' c'oq'uesʌnti, jiñi jach Naamán, ch'oyol bʌ ti Siria.#Lv 13—14; 2 R 5.1-14
28Che' bʌ tsi' yu'biyob ili t'añ, tsa' laj cajiyob ti mich'ajel ya' ti sinagoga. 29Tsa' wa'leyob, tsi' pʌyʌyob loq'uel Jesús ti ti' tejclum wa'chocobil bʌ ti wits. Tsi' pʌyʌyob majlel ba' jʌmʌl wits cha'añ mi' xit chocob ju'bel,#Lc 20.15; 23.13-25; Heb 13.11-12 30pero Jesús tsa' ñumi ti yojlil ya' ba'añob, che' jiñi tsa' majli.
Wiñic am bʌ i xi'bʌjlel
(Mc 1.21-28)
31Tsa' ju'bi majlel Jesús ti Capernaúm, jump'ejl tejclum am bʌ ti' wenta Galilea. Tsi' cʌntesayob ti' q'uiñilel tac c'aj-o. 32Tsa' toj sajtiyob i pusic'al cha'añ i cʌntesa Jesús come añ i p'ʌtʌlel i t'añ.
33Ya' ti sinagoga ya'añ juntiquil wiñic am bʌ i xi'bʌjlel, c'am tsi' cha'le t'añ, 34tsi' yʌlʌ:
—Cʌyʌyon lojon. ¿Chuqui i ye'tel tsa' tiliyet ba'añon lojon, Jesús ch'oyolet bʌ ti Nazaret? ¿Tsa' ba tiliyet cha'añ ma' jisañon lojon? Cujil majquiyet. Jatet jiñi Ch'ujulet Bʌ ch'oyol bʌ ti Dios.
35Jesús tsi' tiq'ui, tsi' su'be:
—Ch'abix, loq'uen ti' pusic'al.
Jiñi xi'ba tsi' choco jiñi wiñic ti lum ti' yojlilob; tsa' loq'ui jiñi xi'ba. Ma'añic tsi' wis lowo jiñi wiñic. 36Tsa' toj sajtiyob i pusic'al ti pejtelelob, tsa' caji i pejcañob i bʌ, tsi' yʌlʌyob:
—¿Baqui tilem i t'añ? Come ti' p'ʌtʌlel yic'ot i ye'tel mi' choc loq'uel i xi'bʌjlel wiñic.
37Tsa' pujqui t'añ ti pejtelel jiñi lum yic'ot ti yan tac bʌ lum ti' joytʌlel cha'añ ñuc bʌ i melbal Jesús.
Jesús tsi' c'oq'uesa x'ixic bʌ i ñij-al Pedro
(Mt 8.14-15; Mc 1.29-31)
38Che' jiñi tsa' wa'le Jesús. Tsa' loq'ui ti sinagoga, tsa' ochi ti' yotot Simón,#4.38 Jiñʌch ti yotot Simón Pedro, ti Capernaúm. ya'añ x'ixic bʌ i ñij-al woli' wen u'bin c'ajc. Tsi' c'ajtibeyob Jesús ti wocol t'añ cha'añ mi' c'oq'uesan. 39Tsi' ñuc choco i bʌ Jesús ti' t'ejl jiñi x'ixic, tsi' tiq'ui jiñi c'ajc, jiñi x'ixic tsa' lajmi, tsa' ch'ojyi ti ora, tsa' caji i chajpan i bʌl ñʌc'ʌl cha'añ mi' we'san Jesús.
Jesús tsi' c'oq'uesa ca'bʌl xc'am-ʌjelob
(Mt 8.16-17; Mc 1.32-34)
40Che' woli ti bʌjlel q'uiñ, tsi' pʌyʌyob majlel ba'añ Jesús pejtelel año' bʌ i c'am-ʌjel ti' chajp ti' chajp, Jesús tsi' yʌc'ʌ i c'ʌb ti jujuntiquilob, tsi' c'oq'uesayob. 41Tsa' loq'uiyob xi'bajob ti' pusic'al cabʌlob, tsi' cha'leyob c'am bʌ t'añ, tsi' yʌlʌyob:
—Jatet i Yalobilet Dios.
Jesús tsi' tiq'uiyob, ma'añic tsi' yʌq'ueyob i cha'len t'añ, come cʌñʌl i cha'añob cha'añ jiñʌch jiñi Cristo.#Mc 1.24,34; 5.7; Mc 1.34
Jesús tsi' cha'le subt'añ ti joytʌlel Galilea
(Mc 1.35-39)
42Che' bʌ tsa' sʌc'a pañimil tsa' loq'ui majlel Jesús, tsa' majli ti jochol bʌ lum. Jiñi wiñicob x'ixicob tsi' sʌclayob, tsa' majliyob ba'añ. Tsi' ñopo i jalitesañob Jesús cha'añ ya' jach mi' cʌytʌl yic'otob. 43Pero Jesús tsi' su'beyob:
—Wersa mic su'b jiñi wen t'añ cha'añ i yumʌntel Dios ti yam bʌ tejclum tac ja'el, come jiñʌch cha'añ tsa' chojquiyon tilel, —che'en.
44Tsi' cha'le subt'añ ti sinagoga tac ya' ti Galilea.
Currently Selected:
Lucas 4: NTCH
Highlight
Share
Copy
Want to have your highlights saved across all your devices? Sign up or sign in
Biblia de Estudio en Ch´ol de Tumbalá, Chiapas, México © Sociedad Bíblica de México A.C.
