cēnisis 31

1ki pētam māka ē itwēyit lēpān okosisiyiwa omisi ē itwēyit, cēkap ki otinam kahkiyaw kēkway kotāwinaw kā ki ayāt; mina kahkiyaw kēkway kotāwinaw kā ki ayāt ēkota ki ohtinan o kistēyitākosiwin. 2cēkap māka ki pisiskāpamēw lēpāna ē isi kanawāpamikot, poti māka namawiya tāpiskoc kayahtē kā ki isi kanawāpamikot. 3kā tipēyihcikēt māka ki itēw cēkapa, kiwē ēkwa kotāwiyak ot asikiwāhk, mina ita ē ayācik ki wākomākanak; ki ka wicēwitin māka.

4cēkap māka ki natomēw rēcila mina liā ohpimē ita ē ayāyit awakāna; 5omisi māka ē ki itāt, ni wāpahtēn ēkā ē isi kanawāpamit kotāwiwāw tāpiskoc kayahtē; māka o kisēmanitoma notāwi ni ki wicēwik. 6ki kiskēyitēnāwāw māka ē isi kaskitāyān ē ki atoskawak kotāwiwāw. 7mina kotāwiwāw ē ki wayēsiit, mina mitāhtwāw ē ki ātastāt ni tipahamākowin; māka kisēmanitowa namawiya iyinamāk kita kitimahit. 8kispin omisi ētwēci, ē masināsocik ki ka ohci tipahamāson, ēkosi kahkiyaw awakānak ki nihtāwikiēwak ē masināsoyit; māka kispin ētwēci, kā pēpēsisicik ki ka ohci tipahamāson, kahkiyaw awakānak ki nihtāwikiēwak pē pēpēsisiyit. 9ēkosi māka kisēmanito kā isi maskamāt ot awakāniyiwa kotāwiwāwa ē ki miyit māka niya. 10ki ayikin māka ita anima kā ati ahcēsocik awakānak, ni ki itāpin, ēkosi ē ki wāpahtamān pawāmiwinihk, poti māka aniki yāpēwak kā nociitocik ki pēpēsisiwak mina ki masināsowak mina ki cikinākowēwak. 11okisikoma māka kisēmanito ni ki kitotik pawāmiwinihk, ē isit, cēkap, ni ki itwān māka, ota nit ayān. 12ni ki itik māka, itāpi, wāpamik māka kahkiyaw aniki yāpēwak kā nociitocik pēpēsasināsowak mina masināsowak mina cikinākowēwak; cikēmā ni ki wāpahtēn kahkiyaw anima lēpān kā ihtotāsk. 13#cēnisis 28:18-22niya kisēmanito pēhtilihk kā ki kitotitān, ita kā ki tominaman kā ki cimatāyan, mina ita kā ki kihci asotamawiyan, ēkwa māka pasiko, nakata oma aski, kiwē māka ot askiwāhk ki wākomākanak. 14rēcil māka mina liā ki naskwēwasimēwak, omisi ē ki itācik, ihtakwan ci kēyāpic tipiyawēwisiwin ahpo tipēyicikan kē ayāyāhk notāwinān wikihk? 15nama ci tāpiskoc ē mānitēwiyāhk nit isi kanawāpamikonān, cikēmā ni ki atāwākātikonān, mina mitoni ē ki kitamwāt ni soniyāmināna: 16cikēmā kahkiyaw wēyotisiwin kisēmanito kā ki maskamāt notāwināna, kiyānaw kotayāninānaw mina kit awāsimisinawak, ēkwa māka ihtota piko kēkway kisēmanito ka itiskwē.

17cēkap māka ki pasiko ē ki tēhtapiāt okosisa mina wiwa piskwāwikana. 18ki sipwētaēw māka kahkiyaw ot awakāna mina kahkiyaw ot ayāwina kā ki kaskitāt, mina awakāna iyikohk kā ki kāhcitināt, anihi kā ki kaskiāt anita pātanērāmihk, ē wi nātāt otāwiya āisaka kēnan askihk. 19lēpān māka ki natawi paskoswēw o māyatihkoma, ēkosi rēcil ki kimotiw otāwiya o naspisicikaniyiwa. 20cēkap māka kimoc ki sipwētēw ēkā ē kiskēyimikot lēpāna, ēkā ē wihtamawāt ē wi tapasit. 21ēkosi māka ki kiki tapasiw kahkiyaw kā isi ayāt, ki pasiko māka ē ki asowaahk sipi, kiliyat wacihk māka ki ati itotēw.

22ki wihtamawāw māka lēpān ē ati nisto kisikāyik, cēkap ē ki tapasit. 23ki wicēwēw māka ociwāma ē ki pimitisawāt tēpokop kisikāw pimipiciwin iyikohk; ki atiminēwēwak māka anita kiliyat wacihk. 24kisēmanito māka ki otihtēw lēpāna anihi siriyana pawāmiwinihk ē mēkwā tipiskāyik, omisi ē ki itāt, mēyākwām ēkā nāntaw kita itat cēkap, kā miywāsik ahpo kā māyātahk.

25lēpān māka ki atiminēwēw cēkapa. cēkap māka ki kapēsiw anita wacihk; lēpān māka mina ociwāma ki kapēsiwak anita kiliyat wacihk. 26lēpān māka ki itēw cēkapa, kēkway kā ki totaman, kimoc kā ki sipwētēyan ēkā ē kiskēyitamān, ēkosi ē ki sipwētaacik nitānisak tāpiskoc mostinākanak isawēsk ē ohci otinihcik. 27tānēhki kimoc kā ki tapasiyan mina kā ki nakasiyan; ēkā māka ē ki wihtamawiyan, kita ki sipwētisaotān miyawātamowinihk, nikamowinihk, matwēyāpikēikēwinihk, mina kitohcikēwinihk? 28ēkā māka ē ki iyinamawiyan kita ocēmakik nikosisak mina nitānisak? ēkwa ki ki kakēpacitotēn ēkosi kā ki totaman. 29nit ayān wiya kaskihēwisiwin nicihcihk nāntaw kita ihtotātān; māka o kisēmanitoma kotāwi ni ki ayamiik awasitipiskohk omisi ē isit, mēyākwām ēkā kita itat cēkap ihtawān kā miywāsik ahpo kā māyātahk. 30anohc māka ātawiya ayiwāk ē nohtē sipwētēyan cikēmā ē pikiskātaman kotāwi wiki, ēyiwēhk tānēhki kā ki kimotiyan ni manitomak? 31cēkap māka ki naskwēwasimēw omisi ē ki itāt lēpāna, ni ki astāsin; cikēmā ni ki itwān, māskoc ni ka maskamik otānisa. 32awiyak kē miskawāwatē ē ayāwāt ki mānitoma, kiyām ēkāwiya kita pimātisiw, ē wāpahtahkik kiciwāminawak nanātawi nisitawina anima kiya kā ot ayāniyan, otinamāso māka. cikēmā cēkap namawiya kiskēyitam rēcila ē ki kimotēyit.

33lēpān māka ki pihtokēw cēkap o mikiwāpihk, mina liā o mikiwāpihk, mina anihi niso atoskēyākaniskwēwa o mikiwāpiyihk, māka namawāc ki miskawēw. ki wayawiw māka liā o mikiwāpihk ohci ē ki pihtokēt rēcil o mikiwāpihk. 34rēcil māka ki otinēw anihi naspisicikana, ē ki ayat anita piskwāwikanēwi aspapiwinihk, ē ki pātakoskawāt māka. lēpān māka misiwē mikiwāpihk ki nanātonikēw, māka namawāc ki miskawēw. 35omisi māka ki itēw otāwiya, kiyām ēkāwiya kita nayētāwēyitam nit okimām ēkā ē ki pasikostātān, cikēmā kā isi ayācik iskwēwak nit isi āyan. ēkosi ki nanātonikēw māka namawāc ki miskawēw naspisicikana.

36cēkap māka ki kisiwāsiw ēkosi ē ki kisikitotāt lēpāna; cēkap māka ki naskwēwasimēw omisi ē ki itāt lēpāna, kēkway kā wanitotamān kā ki ohci kisiskā nawaswāsiyan? 37āta misiwē ē ki nanātonikēyan kā tahtiki nit ayāwina, kēkway kā miskaman ēkota kikihk ē ki ohci otinikātēt, ayastā ota kita wāpahtahkik niciwāmak mina kiya kiciwāmāk, kita onasowātikoyakok kā isi nisiyahk. 38ēwako oma nisitanaw tahto pipon ē kē wiciayāmitān; ki nosēmāyatikomak mina ki nosiwāpatikomak namawiya ki wēpinosēwak, mina yapēmāyatikwak ki māyatihkomak namawiya noh mowāwak. 39aniki kā pikopitikocik pisiskiwa namawiya ki pētamātin, niya ni ki wanicikān, nicihcihk ki ki natawēyitamawin kispin ē ki kimotināniwahk ē mēkwa kisikāk ahpo ē ki kimotināniwahk ē mēkwā tipiskāk. 40ēkosi oma kā isi ayāyān; ē kisikāk ni ki nipahāpākwan, mina tēpiskāki ni ki kawacin, mina ēkā ē ki nipāyān. 41ēkosi oma kā isi ayāyān nisitanaw tahto pipon kikihk; mitātaht nēosāp tahto pipon ki ki atoskēstātin ē nisicik kitānisak ohci, mina nikotwāsik, kit awakānak ohci; mina mitāhtwāw ki ki ātastān ni tipahamākowin. 42kispin ēkā o kisēmanitoma notāwi, o kisēmanitoma ēprēām mina o kostākana āisak ki wicēwit, kēhcinā anohc pisisik ki ka ki sipwētisahon. kisēmanito ki wāpahtam ni kotakitāwin, mina nit atoskēwin nicihcihk, kā ki ohci kitahamāsk awasitipiskohk.

43lēpān māka ki naskwēwasimēw omisi ē ki itāt cēkapa, oki otānisimāwak niya nitānisak, mina oki awāsisak niya nit awāsimisak, mina oki awakānak niya nit awakānak, mina tahto kēkway kā wāpahtaman niya nit ayān; kēkway māka kē ki totawakik oki nitānisak anohc kā kisikāk, ahpo anihi ot awāsimisiwāwa kā ki nihtāwikihācik? 44ēkwa māka kiyām wicihisicikēmitotāk, niya mina kiya; kiyām māka ēwako ki ka ācimikonānaw niya mina kiya.

45cēkap māka ki otinēw asiniya ēkosi ē ki cimayāt. 46ēkosi cēkap ki itēw ociwāma, mosakinikok asiniyak; ki otinēwak māka asiniya ē ki piskwayācik, tahkoc māka ēkota piskwasinihk ki micisowak. 47lēpān māka cikarsēātohta ki isiyihkātam; māka cēkap kālit ki isiyihkātam. 48lēpān māka ki itwēw, oma piskwasinikān ki ka ācimikonānaw ēsi nisiyahk anohc kā kisikāk; ēwako māka ohci kālit kā ki isiyihkātēk. 49mina mispa, cikēmā ki itwēw, kā tipēyihcikēt ki ka nākatawāpamikonaw kā isi nisiyahk, ispi ēkā wāpahtoyako. 50kispin kotakiatwāwi nitānisak, mina kispin kotakak wiwiyani ē āta wiwiyan nitānisak, namawiya awiyak ki wicēkonaw, wāpahta, kisēmanito ki ka ācimikonaw kā isi nisiyahk. 51lēpān māka ki itēw cēkapa, wāpahta oma kā piskwastēk mina wāpahta oma kā cimatēk, kā ki pakitinamān kiyānaw ē isi nisiyahk ohci. 52oma piskwasinikān kita ācimomakan, mina oma kā cimatēk kita ācimomakan, ēkā kita mayāskamān oma kā ispastēk kita pē nātitān, mina kiya ēkā kita mayāskaman oma kā ispastēk ahpo oma kā cimatēk kita pē nāsiyan, wanitotātowin ohci. 53o kisēmanitoma ēprēām, o kisēmanitoma nēhor. o kisēmanitomiyiwa otāwiwāwa ki ka oyasowātikonaw kā isi nisiyahk, cēkap māka ki aspi kihciitwēw o kostākaniyiwa otāwiya āisak.

54cēkap māka ki pakitināso ēkota wacihk, ēkosi ē ki natomāt ociwāma kita mowāyit pahkwēsikana; ki mowēwak māka pahkwēsikana, mina kāpētipisk ē ki ayācik wacihk. 55wipac māka ē ati kēkisēpāyāk lēpān ki waniskāw, ē ki ocēmāt okosisa mina otānisa, mina ē ki sasawēyimāt; lēpān māka ki sipwētēw, ot askihk ē ki isi kiwēt.

Currently Selected:

cēnisis 31: KKMR

Highlight

Copy