cēnisis 16

1sēray māka ēprām wiwa namawiya ki ayāwēw awāsisa; ki ot atoskēyākaniskwēmiw māka icipt iskwēwa hēkār ē isiyihkāsoyit. 2sēray māka omisi ki itēw ēprāma, mātikā, kā tipēyihcikēt ni kipiciik kita nihtāwikināwasoyān; ki pakosēyimitin pitokaw nit atoskēyākaniskwēm māskoc ēkota ohci ni ka ki ot awāsimisin. ēprām māka ki natohtawēw wiwa sēraywa. 3sēray māka ēprām wiwa ki otinēw hēkāra ot atoskēyākaniskwēma icipt iskwēwa, sāsay ēprām mitātaht piponwa ē ki ayāt kēnan askihk, ēkosi ē ki miyāt o nāpēma ēprāma kita wiwiyit.

4ki pitakawēw māka hēkāra ki ayāwēyiwa māka awāsisa; ispi māka wiyāpahtahk ē ayāāt awāsisa ki piwēyimēw ot okimaskwēma. 5sēray māka omisi ki itēw ēprāma, ni māyitotākowin kiya ki ka wi otihtikon; ki ki miyitin nit atoskēyākaniskwēm kita wiwiyan; ispi māka wiyāpahtahk ē ayāwāt awāsisa ni ki piwēyimik; kā tipēyihcikēt ēsi nisiyahk ki ka oyasowātikonaw. 6māka ēprām ki itēw sēraywa, mātika ki tipēyimāw kit atoskēyākaniskwēm; ē isi miywēyitaman ihtotaw. sēray māka namawiya ki manāciēw ēkosi ki tapasihik.

7kā tipēyihcikēt māka okisikoma ki miskāk ciki mohkiciwanipēkohk pikwataskihk, ciki anima mohkiciwanipēk ē ati itohtēhk anitē sar. 8ki itik māka, hēkār, sēray ot atoskēyākaniskwēma, tānitē kā pē ohtotēyan? mina tānitē wā itohtēyan? ki itwēw māka, ni tapasiāw nit okimāskwēm sēray. 9okisikoma māka kā tipēyihcikēt ki itik, kāwi mina natawāpam kit okimāskwēm, mina nanaihtaw. 10kā tipēyihcikēt okisikoma mina ki itik, mistahi ni ka mihcētoāwak kit awāsimisak iyikohk ēkā kita ki akimihcik kē isi mihcēticik. 11kā tipēyihcikēt okisikoma mina ki itik, mātika, ki kikiskāwāw awāsis, mina ki ka nihtāwikihāw kē okosisiyan, ismēil māka ki ka isiyihkātāw, cikēmā kā tipēyihcikēt ki pēhtam ki kotākitāwihk. 12tāpiskoc māka pikwatastim kita isi kanawāpamik ayisiyiniwa; kita asowēw kahkiyaw awiya, mina kahkiyaw awiya kita asook; mina kita ot askiw ē otiskawiskawāt kahkiyaw ociwāma. 13ki isiyihkātam māka o wiyowiniyiw kā tipēyihcikēyit kā ki ayamihēkot, kiya kisēmanito ki wāpamin; cikēmā ki itwēw, nista ci ni ki asawāpamāw kā wāpamit? 14ēwako māka ohci anima monaipan ki isiyihkātēw piarlahāirāy: cist, tastawic anita kētis mina pirēt ayāw.

15 # kalēsiyana 4:22 hēkār māka ki nihtāwikitamawēw ēprāma okosisiyiwa; ēprām māka ki wiyēw okosisa, hēkāra kā ki nihtāwikitamākot, ismēil. 16ēprām māka ayinānēmitanaw nikotwāsosāp ki tahto piponwēw, ispi hēkār kā nihtāwikitamwawāt ismēil anihi ēprāma.

Currently Selected:

cēnisis 16: KKMR

Highlight

Copy