ᓭᐣᐟ ᓬᐅᐠ 18

1ᐁᑯᓯ ᒥᓇ ᑭ ᐋᐁᐧᒋᑫᐤ ᐅᒪ ᐅᐦᒋ ᐊᔨᓯᔨᓂᐊᐧᐠ ᒧᓴᐠ ᑭᑕ ᐊᔭᒥᐦᐋᒋᐠ, ᐁᑳ ᒫᑲ ᑭᑕ ᓄᑌ ᐃᐦᑫᔨᑕᐦᑭᐠ; 2ᐁ ᐃᑌᐧᐟ, ᑭ ᐃᐦᑖᐤ ᐅᑌᓈᕽ ᐅᔭᓱᐁᐧᐃᐧᔨᓂᐤ, ᐁᑳ ᐁ ᑯᓯᑫᐧᔨᒫᐟ ᑭᓭᒪᓂᑐᐊᐧ, ᒥᓇ ᐁᑳ ᐁ ᓈᑲᑕᐁᐧᔨᒫᐟ ᐊᔨᓯᔨᓂᐊᐧ; 3ᑭ ᐃᐦᑖᐤ ᒫᑲ ᓯᑳᐃᐧᐢᑫᐧᐤ ᐁᑯᑕ ᐅᑌᓈᕽ; ᐁᑯᓯ ᒥᐦᒉᑖᐧᐤ ᑭ ᐯ ᐅᑎᐦᑎᐠ, ᐁ ᐃᑌᐧᔨᐟ ᓈᑕᒪᐃᐧᐣ ᐊᓇ ᐅᐦᒋ ᑳ ᒫᔨᑐᑕᐃᐧᐟ. 4ᒫᑲ ᑭᓀᐧᓯᐢ ᓇᒪᐃᐧᔭ ᑭ ᐃᐧ ᓇᑐᑕᐁᐧᐤ, ᒫᑲ ᒣᐧᐢᑕᐢ ᑭ ᐃᑌᔨᑕᒼ, ᐋᑕ ᐁᑳ ᐁ ᑯᓯᑫᐧᔨᒪᐠ ᑭᓭᒪᓂᑐ, ᒥᓇ ᐁᑳ ᐁ ᓈᑲᑕᐁᐧᔨᒪᐠ ᐊᔨᓯᔨᓂᐤ; 5ᐁᔨᐁᐧᕽ ᒋᑫᒫ ᐊᐊᐧ ᓯᑲᐃᐧᐢᑫᐧᐤ ᐁ ᒥᑯᐢᑳᒋᒥᐟ, ᓂ ᑲ ᓈᑕᒪᐋᐧᐤ, ᐅᓴᒼ ᒫᐢᑯᐨ ᓂ ᑲ ᓯᑲᑌᔨᑕᒥᐃᐠ ᑕᐦᑭ ᐯ ᐃᑐᐦᑌᒋ. 6ᐁᑯᓯ ᑳ ᑎᐯᔨᐦᒋᑫᐟ ᑭ ᐃᑌᐧᐤ, ᓇᑐᑕᒧᐠ ᑖᓂᓯ ᐁᑌᐧᐟ ᐁᑳ ᑲᐧᔭᐢᐠ ᑳ ᐃᑖᑎᓯᐟ ᐅᔭᓱᐁᐧᐃᐧᔨᓂᐤ. 7ᓇᒪ ᒋ ᒫᑲ ᑭᓭᒪᓂᑐ ᑭᑕ ᓈᑕᒪᐁᐧᐤ ᐅ ᓇᐊᐧᓱᓈᑲᓇ, ᑳ ᒪᐃᐧᒧᐢᑖᑯᐟ ᐁ ᑭᓯᑳᔨᐠ ᒥᓇ ᐁ ᑎᐱᐢᑳᔨᐠ, ᐊᑖ ᐁ ᓴᓯᐯᔨᑕᒪᐋᐧᐟ? 8ᑭᐟ ᐃᑎᓈᐋᐧᐤ, ᐃᐧᐸᐨ ᓇᐢᐱᐨ ᑭᑕ ᓈᑕᒪᐁᐧᐤ. ᐁᔨᐁᐧᕽ ᒫᑲ ᐃᐢᐱ ᐯ ᐃᑐᐦᑌᒋ ᐃᔨᓂᐃᐧᑯᓯᓵᐣ, ᑭᑕ ᒥᐢᑲᒼ ᒋ ᑖᐯᐧᐊᐧᑫᔨᑕᒧᐃᐧᐣ ᐊᐢᑭᕽ?

9ᐁᑯᓯ ᒥᓇ ᑭ ᑕᓯᑕᒪᐁᐧᐤ ᐅᒪ ᐋᐁᐧᒋᑲᐣ ᐊᓂᐦᐃ ᑳ ᑲᐧᔭᐢᑳᐧᑎᓯᐊᐧᑫᔨᒥᓱᔨᐟ, ᑯᑕᑲ ᒫᑲ ᐁ ᐋᑕᐁᐧᔨᒫᔨᐟ: 10ᓂᓱ ᐊᔨᓯᔨᓂᐊᐧᐠ ᑭᐦᒋ ᐊᔭᒥᐦᐁᐃᐧᑲᒥᑯᕽ ᑭ ᐃᑐᐦᑌᐊᐧᐠ ᑭᑕ ᐊᔭᒥᐦᐋᒋᐠ; ᐯᔭᐠ ᐸᕒᐊᓯ ᐁᑯᓯ ᑯᑕᐠ ᐸᑊᓬᐃᑲᐣ 11ᐊᓇ ᐸᕒᐊᓯ ᑭ ᓂᐸᐃᐧᐤ ᒥᓇ ᐅᒥᓯ ᐁ ᑭ ᐃᓯ ᐊᔭᒥᐦᐋᐟ, ᑭᓭᒪᓂᑐ, ᑭ ᓇᓈᐢᑯᒥᑎᐣ, ᐁᑳ ᐁ ᐃᓯ ᐊᔮᔮᐣ ᑯᑕᑲᐠ ᐊᔨᓯᔨᓂᐊᐧᐠ ᑳ ᐃᓯ ᐊᔮᒋᐠ, ᐅᒪᐢᑲᑌᐧᐢᑲᐠ, ᓇᔦᑕᐊᐧᑎᓴᐠ, ᐱᓯᑲᐧᑎᓴᐠ. ᐊᐦᐳ ᑖᐱᐢᑯ ᐊᐊᐧ ᐸᑊᓬᐃᑲᐣ. 12ᓂᓵᐧᐤ ᓂ ᐃᔨᐊᐧᓂᓯᐃᓱᐣ ᑕᐦᑖᐧᐤ ᐁ ᐃᐢᐸᔨᐠ; ᐯᔭᐠ ᒥᑖᑕᐟ ᐅᐦᒋ ᓂ ᒣᑭᐣ ᑲᐦᑭᔭᐤ ᐊᓂᒪ ᑳ ᐃᓯ ᑎᐯᔨᑕᒫᐣ. 13ᒫᑲ ᐃᐧᔭ ᐊᓇ ᐸᑊᓬᐃᑲᐣ ᐊᐧᔭᐤ ᐁ ᓂᐸᐃᐧᐟ, ᓇᒪᐃᐧᔭ ᐊᐦᐳ ᑭᓯᑯᕽ ᑭ ᐃᐧ ᐃᓯ ᑕᐢᑕᓵᐱᐤ, ᒫᑲ ᐸᑲᒫᐢᑭᑲᓀᐅᓱ, ᐁ ᐃᑌᐧᐟ, ᑭᓭᒪᓂᑐ, ᑭᑎᒫᑭᓇᐃᐧᐣ ᓂᔭ ᑳ ᒪᒑᔨᐃᐧᔮᐣ. 14#ᒫᐟᔪ 23:12; ᓬᐅᐠ 14:11ᑭ ᐃᐧᐦᑕᒫᑎᓈᐋᐧᐤ, ᐊᐊᐧ ᓈᐯᐤ ᐃᐧᑭᕽ ᑭ ᐃᓯ ᑭᐁᐧᐤ ᓇᐊᐧᐨ ᐁ ᑲᐧᔭᐢᑭᑖᑎᓯᐊᐧᑭᒥᐦᐟ ᐃᐢᐱᐨ ᐊᓇ ᑯᑕᐠ; ᒋᑫᒫ ᑲᐦᑭᔭᐤ ᐊᐃᐧᔭᐠ ᑳ ᑭᐢᑌᔨᒥᓱᐟ ᑭᑕ ᑕᐸᑎᓈᐤ; ᒫᑲ ᐊᓇ ᑳ ᑕᐸᑌᔨᒥᓱᐟ ᑭᑕ ᐃᐢᐯᔨᑖᑯᐋᐤ.

15ᑭ ᐯᑕᒪᐁᐧᐊᐧᐠ ᒫᑲ ᐅᐟ ᐊᐋᐧᓯᒥᓯᐋᐧᐊᐧ, ᑭᑕ ᓵᒥᓈᐟ, ᒫᑲ ᐃᐢᐱ ᐅ ᑭᐢᑭᓄᐦᐊᒪᐋᐧᑲᓇ ᐃᐧᔮᐸᐦᑕᒥᔨᐟ, ᑭ ᑭᑕᐦᐊᒪᐁᐧᐊᐧᐠ. 16ᒋᓴᐢ ᒫᑲ ᑭ ᓇᑐᒣᐤ ᐁ ᐃᑌᐧᐟ, ᐃᔨᓇᒫᑯᐠ ᐊᐱᐢᑕᐋᐧᓯᓴᐠ ᑭᑕ ᐯ ᓈᓯᒋᐠ, ᒥᓇ ᐁᑳᐃᐧᔭ ᑭᑕᐊᒫᑯᐠ; ᒋᑫᒫ ᐁᑯᑐᐃᐧ ᑳ ᐊᔮᒋᐠ ᑭᓭᒪᓂᑐ ᐅᐟ ᐅᑌᓇᐃᐧᐃᐧᓂᕽ. 17ᑖᐯᐧ ᑭᐟ ᐃᑎᓈᐋᐧᐤ, ᐊᐃᐧᔭᐠ ᐁᑳ ᑫ ᐅᑎᓇᒧᑫᐧ ᐅᐟ ᐅᑌᓇᐃᐧᐃᐧᓂᔨᐤ ᑭᓭᒪᓂᑐᐊᐧ ᑖᐱᐢᑯᐨ ᐊᐱᐢᑕᐋᐧᓯᐢ, ᓇᒪᐃᐧᔭ ᓈᐣᑕᐤ ᐃᓯ ᑭᑕ ᐱᐦᑐᑫᐤ ᐁᑯᑕ.

18ᐯᔭᐠ ᐅᑭᒫᐊᐧ ᒫᑲ ᑭ ᑲᑫᐧᒋᒥᐠ, ᐁ ᐃᑎᑯᐟ, ᑳ ᒥᔮᐧᑎᓯᔭᐣ, ᐅᑭᐢᑭᓄᐦᐊᒫᑫᐤ, ᑖᓂᓯ ᑫ ᑐᑕᒫᐣ ᑭᑕ ᐊᔮᔮᐣ ᑲᑭᑫ ᐱᒫᑎᓯᐃᐧᐣ? 19ᐁᑯᓯ ᒋᓴᐢ ᑭ ᐃᑌᐤ, ᑖᓀᑭ ᒥᔮᐧᑎᐢ ᑳ ᐃᓯᔭᐣ? ᓇᒪᐃᐧᔭ ᐊᐃᐧᔭᐠ ᒥᔮᐧᑎᓯᐤ, ᐱᑯ ᐯᔭᐠ ᐁᐊᐧᑯ ᑭᓭᒪᓂᑐ. 20#ᐁᐠᓴᑕᐢ 20:14; ᑎᔪᑕᕒᐊᓇᒥ 5:18; ᐁᐠᓴᑕᐢ 20:13; ᑎᔪᑕᕒᐊᓇᒥ 5:17; ᐁᐠᓴᑕᐢ 20:15; ᑎᔪᑕᕒᐊᓇᒥ 5:19; ᐁᐠᓴᑕᐢ 20:16; ᑎᔪᑕᕒᐊᓇᒥ 5:20; ᐁᐠᓴᑕᐢ 20:12; ᑎᔪᑕᕒᐊᓇᒥ 5:16ᑭ ᑭᐢᑫᔨᑌᐣ ᐅᔭᓱᐁᐧᐃᐧᓇ, ᐁᑳᐃᐧᔭ ᐱᓯᑳᐧᑎᓯ, ᐁᑳᐃᐧᔭ ᓂᐸᑖᑫ, ᐁᑳᐃᐧᔭ ᑭᒧᑎ, ᐁᑳᐃᐧᔭ ᑭᔭᐢᑭᐋᐧᒋᒧ, ᑭᐢᑌᔨᒼ ᑯᑖᐃᐧ ᒥᓇ ᑭᑳᐃᐧ. 21ᐁᑯᓯ ᑭ ᐃᑌᐧᐤ, ᑲᐦᑭᔭᐤ ᐅᐦᐃ ᓂ ᑭ ᐯ ᑲᓇᐁᐧᔨᑌᐣ ᐊᐢᐱᐣ ᑳ ᐅᐢᑭᓂᑭᓯᔮᐣ. 22ᐃᐢᐱ ᒫᑲ ᒋᓴᐢ ᑳ ᐯᐦᑕᕽ ᐅᒪ, ᑭ ᐃᑌᐧᐤ, ᐯᔭᐠ ᑫᑲᐧᐩ ᑫᔮᐱᐨ ᑭᐟ ᐃᓯ ᓄᑌᐸᔨᐣ ᐊᑖᐋᐧᑫ ᑲᐦᑭᔭᐤ ᑫᑲᐧᐩ ᑳ ᐊᔮᔭᐣ, ᐁᑯᓯ ᒪᑎᓇᒪᐃᐧᐠ ᐅᑭᑎᒫᑭᓯᐊᐧᐠ, ᑭ ᑲ ᐊᔮᐣ ᒫᑲ ᐁᐧᔪᑎᓯᐃᐧᐣ ᑭᐦᒋ ᑭᓯᑯᕽ: ᐁᑲᐧ, ᒫᑲ ᐯ ᐱᒥᑎᓴᐦᐅᐣ 23ᒫᑲ ᐃᐢᐱ ᐅᒪ ᐱᔦᐦᑕᕽ, ᓈᐢᐱᐨ ᑭ ᑭᓯᓈᑌᔨᑕᒼ; ᒋᑫᒫ ᓈᐢᐱᐨ ᐁ ᑭ ᐁᐧᔪᑎᓯᐟ, 24ᒋᓴᐢ ᒫᑲ ᐁ ᐋᐧᐸᒫᐟ ᑭ ᐃᑌᐧᐤ, ᑕᓂᔨᑯᕽ ᐃᐋᔨᒪᓂᔨᐠ ᐊᓂᑭ ᑳ ᐊᔮᒋᐠ ᐁᐧᔪᑎᓯᐃᐧᐣ ᑭᑕ ᐱᐦᑐᑫᒋᐠ ᑭᓭᒪᓂᑐ ᐅᐟ ᐅᑌᓇᐃᐧᐃᐧᓂᕽ: 25ᒋᑫᒫ ᓇᐊᐧᐨ ᐁᐧᑕᐣ ᐱᐢᑳᐧᐃᐧᑲᓀᐃᐧ ᐱᓯᐢᑭᐤ ᑭᑕ ᓴᐳᔭᑭᐟ ᐁ ᐸᑯᓀᔮᐱᐢᑳᔨᐠ ᓵᐳᓂᑲᐣ ᐃᐢᐱᐨ ᐁ ᐁᐧᔪᑎᓯᐟ ᐊᔨᓯᔨᓂᐤ ᑭᑕ ᐱᐦᑐᑫᐟ ᐅᐟ ᐅᑌᓇᐃᐧᐃᐧᓂᕽ ᑭᓭᒪᓂᑐ. 26ᐁᑯᓯ ᐊᓂᑭ ᑳ ᐯᐦᑕᐦᑭᐠ ᑭ ᐃᑌᐧᐊᐧᐠ, ᐊᐁᐧᓇ ᒫᑲ ᑫ ᑭ ᐱᒪᒋᐅᐟ? 27ᑭ ᐃᑌᐤ ᒫᑲ, ᐊᓂᐦᐃ ᑳ ᐸᐧᑕᐃᐧᑖᒋᐠ ᐊᔨᓯᔨᓂᐊᐧᐠ, ᑭᓭᒪᓂᑐ ᑲᐢᑭᑕᐤ.

28ᐁᑯᓯ ᐱᑕᕒ ᑭ ᐃᑌᐧᐤ, ᒫᑎᑲ, ᓂ ᑭ ᓇᑲᑌᓈᐣ, ᐊᓂᒪ ᑳ ᐃᓯ ᑎᐱᔭᐁᐧᐃᐧᓯᔭᕽ ᐁ ᐱᒥᑎᓴᐅᑖᕽ ᒫᑲ. 29ᑭ ᐃᑌᐤ ᒫᑲ, ᑖᐯᐧ ᑭᐟ ᐃᑎᓈᐋᐧᐤ, ᓇᒪᐃᐧᔭ ᐃᑖᐤ ᓈᐯᐤ ᐁ ᑭ ᓇᑲᑕᕽ ᐋᐧᐢᑳᐦᐃᑲᐣ, ᐊᐦᐳ ᐃᐧᐊᐧ, ᐊᐦᐳ ᐅᒋᐋᐧᒪ, ᐊᐦᐳ ᐅᓂᑭᐃᑲᐧ, ᐊᐦᐳ ᐅᐟ ᐊᐋᐧᓯᒥᓴ, ᑭᓭᒪᓂᑐ ᐅᐟ ᐅᑌᓇᐃᐧᐃᐧᓂᔨᐤ ᐅᐦᒋ, 30ᐁᑳ ᑫ ᒥᔨᐦᐟ ᒥᒉᑖᐧᐤ ᐊᐊᐧᓯᒣ ᐊᓄᐦᐨ ᒣᑳᐧᐨ, ᒥᓇ ᐊᓂᒪ ᐊᐢᑭ ᑫ ᐅᑎᐦᒋᐸᔨᐠ ᑳᑭᑫ ᐱᒫᑎᓯᐃᐧᐣ.

31ᐁᑯᓯ ᑭ ᐅᑎᓀᐤ ᐊᓂᐦᐃ ᒥᑖᑕᐟ ᓂᓱᓵᑊ, ᐁ ᑭ ᐃᑖᐟ ᒫᑲ, ᒋᐢᐟ, ᑭᐟ ᐃᑐᑖᓇᐤ ᒉᕒᐅᓴᓬᐊᒥᕽ, ᑲᐦᑭᔭᐤ ᒫᑲ ᐊᓂᐦᐃ ᐅᑭᐢᑭᐁᐧᐦᐃᑫᐊᐧᐠ ᑳ ᑭ ᐃᑕᓯᓇᐃᑫᒋᐠ ᐃᔨᓂᐃᐧᑯᓯᓵᐣ ᐅᐦᒋ ᑭᑕ ᑎᐱᐸᔨᐊᐧ. 32ᒋᑫᒫ ᑭᑕ ᐸᑭᑎᓇᒪᐋᐧᐊᐧᐠ ᒉᐣᑕᐃᓬᐊᐠ, ᐁᑯᓯ ᑭᑕ ᒣᑕᐋᐧᑳᑖᐤ, ᒥᓇ ᓀᐯᐋᐧᑲᐨ ᑭᑕ ᑐᑕᐋᐧᐤ, ᒥᓇ ᑭᑕ ᓯᑳᐧᑖᐤ: 33ᐁᑯᓯ ᑭᑕ ᐸᓴᐢᑎᐁᐧᐊᐧᐠ ᒥᓇ ᑭᑕ ᓂᐸᐁᐊᐧᐠ: ᑭ ᓂᐢᑐ ᑭᓯᑲᔨᑭ ᒫᑲ ᑭᑕ ᐊᐧᓂᐢᑳᐤ ᒥᓇ. 34ᒫᑲ ᓇᒪᐃᐧᔭ ᑫᑲᐧᐩ ᐅᒪ ᑭ ᓂᓯᑐᐦᑕᒪᐧᐠ; ᒥᓇ ᐅᒪ ᐃᑌᐧᐃᐧᐣ ᑭ ᑳᑕᒪᐋᐧᐊᐧᐠ, ᓇᒪᐃᐧᔭ ᒫᑲ ᑭ ᑭᐢᑫᔨᑕᒪᐧᐠ ᐊᓂᐦᐃ ᑳ ᑭ ᐃᑌᐧᐃᐧᐦᐟ.

35ᑭ ᐊᔨᑭᐣ ᒫᑲ, ᐁ ᐊᑎ ᐅᑎᑕᕽ ᒉᕒᐃᑯ, ᐯᔭᐠ ᓈᐯᐤ ᐁᑳ ᐁ ᐋᐧᐱᐟ ᒋᑭ ᒣᐢᑲᓇᕽ ᑭ ᐊᐱᐤ ᐁ ᐸᑯᓯᑕᐧᐟ: 36ᐁ ᐯᑕᐋᐧᐟ ᒫᑲ ᒥᐦᒉᐟ ᐊᔨᓯᔨᓂᐊᐧ ᐁ ᐱᒧᐦᑌᔨᐟ, ᑭ ᑲᑫᐧᒋᑫᒧ ᑖᓂᓯ ᐁ ᐃᑕᑲᒥᑲᓂᔨᐠ. 37ᐁᑯᓯ ᑭ ᐃᐧᐦᑕᒪᐋᐧᐤ ᒋᓴᓴ ᓇᓴᕒᐃᑎᕽ ᑳ ᐅᒋᔨᐟ, ᐁ ᐱᒧᐦᑌᔨᐟ, 38ᑭ ᑌᐯᐧᐤ ᒫᑲ, ᐁ ᐃᑌᐧᐟ, ᒋᓴᐢ, ᑌᐱᐟ ᐅᑯᓯᓴ, ᑭᑎᒫᑭᓇᐃᐧᐣ. 39ᐊᓂᑭ ᒫᑲ ᑳ ᓂᑲᓄᑌᒋᐠ, ᑭ ᑭᑕᐦᐊᒪᐁᐧᐊᐧᐠ, ᑭᑕ ᑭᔭᒪᐱᔨᐟ: ᒫᑲ ᒥᐢᑕᐦᐃ ᐊᐊᐧᓯᒣ ᑭ ᑌᐯᐧᐤ: ᑭᔭ ᑳ ᐅᑯᓯᓯᒥᐢᐠ ᑌᐱᐟ, ᑭᑎᒫᑭᓇᐃᐧᐣ. 40ᒋᓴᐢ ᒫᑲ ᑭ ᓂᐸᐃᐧᐤ, ᐁᑯᓯ ᐁ ᑭ ᓯᑭᑫᒧᐟ ᑭᑕ ᐯ ᐃᑐᑕᐃᒥᐦᐟ ᐃᑕ ᐁ ᐊᔮᐟ: ᐃᐢᐱ ᒫᑲ ᑭᓯᐊᐧᐠ ᐁ ᐯ ᐊᔭᔨᐟ, ᑭ ᑲᑫᐧᒋᒣᐤ, 41ᑫᑲᐧᐩ ᓀᑕᐁᐧᔨᑕᒪᐣ ᑭᑕ ᑐᑖᑖᐣ? ᐁᑯᓯ ᑭ ᐃᑌᐧᔨᐊᐧ, ᑌᐯᔨᐦᒋᑫᔭᐣ, ᑭᑕ ᐊᔮᔮᐣ ᓂ ᐋᐧᐱᐃᐧᐣ. 42ᒋᓴᐢ ᒫᑲ ᑭ ᐃᑌᐤ, ᐊᔭ ᑭ ᐊᐧᐱᐃᐧᐣ: ᑭ ᑖᐯᐧᐊᐧᑫᔨᑕᒧᐃᐧᐣ ᑭ ᑭ ᐱᒫᒋᐃᑯᐣ. 43ᐁᑯᓯ ᓭᒫᐠ ᑭ ᐊᐧᐱᐤ ᒥᓇ ᑭ ᐱᒥᑎᓴᐁᐧᐤ, ᐁ ᒪᒥᒋᒫᐟ ᑭᓭᒪᓂᑐᐊᐧ: ᑲᐦᑭᔭᐤ ᒫᑲ ᐊᔨᓯᔨᓂᐊᐧᐠ, ᐃᐢᐱ ᐃᐧᔮᐸᐦᑕᑭᐠ, ᑭ ᒪᒥᒋᒣᐊᐧᐠ ᑭᓭᒪᓂᑐᐊᐧ.

Currently Selected:

ᓭᐣᐟ ᓬᐅᐠ 18: KKMs

Highlight

Copy