Nikamowina 90
90
kisē-manitow ēkwa ayisiyiniwak
otayamihāwin Moses
1kā‑tipēyihcikēyan, kiya kikī-tipinawāskawinān
ay‑āniskē kayās ohci.
2pāmwayēs ē‑kī-osīhtāyan ispatināwa
ahpō pāmwayēs askiy ē‑kī-osīhtāyan,
kākikē kikī-kisē-manitōwin,
mīna kākikē kika-kisē-manitōwin.
3kiwīhtamawāw ayisiyiniw kita-kīwētotahk asiskiy,
nistam kā‑kī-ohci-osīhiht.
4kihci-mitātahtomitanaw askiy tāpiskōc pēyak kīsikāw kiya ohci;
tāpiskōc otākosihk āsay ē‑kisipipayik,
tāpiskōc pēyak tipahipīsimwān pēyak tipiskāw.
5kitōtinēn nipimātisiwinināna tāpiskōc sisikoc kā‑iskipēk;
namwāc kinwēs kā‑pimātisihk, tāpiskōc ē‑pawātamihk.
niyanān tāpiskōc macikonāsa kā‑ohpikihki ē‑kīkisēpāyāk,
6ē‑ohpikihki mīna ē‑ati-wāpikwaniyiki,
ēkwa ati-pāstēwa mīna ē‑nipīmakahki kā‑otākosik.
7nimisiwanātisinān kikisiwāsiwin ohci
ēkwa mitoni nisēkihikonān kisaskiyawēsiwin.
8kikanawāpahtēn niwanitōtamowinināna,
ahpō piko kīmōc kā‑kī-wanitōtamāhk kiwāpahtēn.
9kikisiwāsiwin ohci namōya kinwēs nipimātisinān,
tāpiskōc tēpiyāhk yēhēwin.
10nipimātisinān tēpakohpomitanaw askiy --
kīspin ē‑sōhkisiyāhk ayinānēwomitanaw askiy isko.
nayēstaw piko macipayiwin mīna mihtātamowin nipē-nakiskēnān;
wīpac ninakataskēnān ēkosi nipōni-pimātisinān.
11awīna kā‑mōsihtāt ē‑isi-sōhkahk kikisiwāsiwin?
awīna kā‑kiskēyihtahk iyikohk ka‑kī-sēskēyihtākwahk kikisiwāsiwin?
12kiskinohamawinān namōya kākikē nika-kī-pimātisinān,
ēkosi nika-ati-iyinīsinān.
13tāniyikohk ka‑pimi-kisiwāsiyan?
kitimākinawik kitatoskēyākanak, kā‑tipēyihcikēyan!
14tahto ē‑kīkisēpāyāk sākaskinēskawinān kisākihiwēwin ohci ēkāya wīhkāc kā‑kīsipipayik,
ēkosi nika-nikamonān mīna nika-miywēyihtēnān isko pimātisiyāhko.
15miyinān ēkwa mistahi miywēyihtamowin
pēyakwan iyikohk kā‑kī-isi-miyiyāhk pīkiskātamowin;
misakāmē ōma ē‑kakwātakihtāyāhk.
16hāw, mahti niyanān kitatoskēyākanak nika-wāpahtēnān kimamāhtāwi-tōtamowina;
nitāniskotāpāninānak kita-wāpahtahkik kisōhkisiwin kā‑kistēyihtākwahk.
17kā‑tipēyihcikēyan nikisē-manitōminān, kisawēyimikowisiwina nika-wī-wīcēwikonān.
miyinān miyopayiwin kā‑atoskātamāhk.
Currently Selected:
Nikamowina 90: PCSBR
Highlight
Share
Copy
Want to have your highlights saved across all your devices? Sign up or sign in
Plains Cree Ruth © 2004 Canadian Bible Society
Plains Cree Psalms (collection) © 2013 Canadian Bible Society
Plains Cree James © 2014 Canadian Bible Society
Plains Cree Gospels and Acts © 2018 Canadian Bible Society
