Nikamowina 103
103
osākihiwēwin kisē-manitow
onikamon David
1mamihcim kā‑tipēyihcikēt, nitahcāhk!
ē‑isi-kaskihtāyān nika-mamihcimāw kā‑kanātaniyik owīhowinihk ohci!
2mamihcim kā‑tipēyihcikēt, nitahcāhk,
ēkwa ēkāya wanikiskisi iyikohk ē‑kisēwātisit.
3pōnēyihtam kahkiyaw nimaci-tōtamowina
mīna iyinihkihtāw kahkiyaw nitāhkosiwina.
4nipimācihik ēkāya kita-nipiwak
ēkwa ē‑sawēyimikowisiyān ē‑sākihit ēkwa ē‑kitimākēyimit.
5nimiyik miyo-kīkwaya isko kā‑pimātisiyān,
ēkosi kinwēs nika-oskāyiwin ēkwa nika-maskawisīwātisin tāpiskōc kihīwa.
6kā‑tipēyihcikēt ē‑wiyasiwātāt ayisiyiniwa,
manācihēw anihi ēkāya kā‑kī-nātamāsoyit.
7kī‑wāpahtihēw Mosesa tānisi ē‑wī-isīhcikēt
mīna kī‑wāpahtihēw Israelīwiyiniwa omamāhtāwi-tōtamowina.
8kā‑tipēyihcikēt kisēwātisiw ē‑sākihiwēt,
sīpiyawēsiw mīna kākikē sākihiwēw.
9namōya tāpitawi kīhkāwitam,
namōya kākikē kisiwāsiw.
10namōya kimākohikonaw āta ē‑kaskihtamāsoyahk,
ahpō namwāc kitipahikēhikonaw kimaci-tōtamowininawa ohci
mīna kimāyi-tōtamowininawa ohci.
11iyikohk ē‑ispāk kīsik askīhk ohci,
ēkosi isi kihcēyihtākwaniyiw osākihiwēwin
aniki ohci kā‑kistēyimācik.
12ē‑ispīhci-pīhcāk māmihk ohci isko natimihk,
ēkwa iyikohk īkatēnam kimāyi-tōtamowininawa.
13tāpiskōc ohtāwīmāw kā‑isi-kitimākēyimāt otawāsimisa,
pēyakwan ēkosi isi kitimākēyimēw kā‑tipēyihcikēt anihi kā‑kistēyimikot.
14ayisk kiskēyihtam tānisi ē‑kī-osīhikawiyahk;
kanokiskisiw asiskīhk ē‑ohcīyahk.
15niyanān wiya pēyakwan maskosiya.
kimiyo-ohpikinānaw tāpiskōc pakwaci-wāpikwaniy;
16ēkwa yōtiki, wēpāstan—
namōya kīhtwām awiyak wāpahtam.
17māka aniki kā‑kistēyimācik kā‑tipēyihcikēyit osākihiwēwin kākikē ayāyiw,
ēkwa omiywātisiwin kākikē ayāyiw ay‑āniskē kahkiyaw ē‑ihtasihk,
18aniki kā‑kanawēyihtahkik owīci-isīhcikēmiwēwin
mīna kā‑kanokiskisicik kita-kanawēyihtahkik owiyasiwēwina.
19kā‑tipēyihcikēt kī‑astāw otokimāwi-apiwin kihci-kīsikohk;
misiwē tipēyihtam ē‑kihci-okimāwit.
20mamihcimihk kā‑tipēyihcikēt,
kiyawāw okīsikowak kā‑sōhkisiyēk okihci-nātamākēwak,
kā‑nanahihtamēk otitasiwēwina,
kā‑natohtawāyēk ē‑itwēt.
21mamihcimihk kā‑tipēyihcikēt, kahkiyaw ē‑ihtasiyēk kihci-kīsikohk,
kiyawāw otatoskēyākana, otitēyihtamowin kā‑pimitisahamēk!
22mamihcimihk kā‑tipēyihcikēt,
kahkiyaw kā‑kī-osīhikoyēk piko itē otipēyihcikēwinihk.
mamihcim kā‑tipēyihcikēt, nitahcāhk!
Currently Selected:
Nikamowina 103: PCSBR
Highlight
Share
Copy
Want to have your highlights saved across all your devices? Sign up or sign in
Plains Cree Ruth © 2004 Canadian Bible Society
Plains Cree Psalms (collection) © 2013 Canadian Bible Society
Plains Cree James © 2014 Canadian Bible Society
Plains Cree Gospels and Acts © 2018 Canadian Bible Society
