Mark 16

otāpisisiniwin Jesus

1ispīhk Jewa#16.1 sōtāwiyiniwa ē‑pōni-ayamihēwi-kīsikanisiyit, Mary Magdalene ēkwa Mary, okāwiya James, asici Salome kī‑atāwēwak kā‑wīhkimākwahki maskihkiya ē‑wī-tōminahkik Jesus owiyawiyiw. 2ē‑ayamihēwi-kīsikāk ēkwa mitoni wīpac kī‑waniskāwak ē‑pē-sākāstēyik kī‑itohtēwak sēkwātihkānikamikohk. 3ē‑ati-pimohtēcik ōmisi ēsa itwēwak, “awīna māka ohpimē ka‑isi-tihtipinēw anihi mistasiniya kā‑kipapiyit sēkwātihkānikamikohk?” 4mitoni ayisk ē‑kosikwatit. ēkosi ē‑ati-takohtēcik ēkota wāpamēwak anihi mistasiniya āsay ohpimē ē‑kī-isi-tihtipinimiht. 5ēkosi ati-pīhtikwēwak sēkwātihkānikamikohk, ēkota wāpamēwak ē‑wāpiskasākēyit oskinīkiwa ē‑apiyit kihciniskihk itēhkē. mitoni ēsa māmaskātamwak!

6ēkwa ōmisi ēsa itēw, “ēkāya māmaskātamok, nikiskēyihtēn ē‑natonawāyēk ana Jesus, Nazareth ohci, kā‑kī-cīstahāskwātiht. kī‑āpisisin ana, namōya ōta ayāw, wāpahtamok ita kā‑kī-pimisimiht. 7māka nitawi-wīhtamāhkok okiskinohamawākana, Peter wīsta. aspin Jesus nīkān ē‑sipwēhtēt Galileehk isi; ēkotē kika-wāpamāwāw ayisk ēkosi kikī-itikowāw.”

8ēkwa ēsa wayawīwak, ē‑sipwēpahtācik sēkwātihkānikamikohk ohci. ē‑sēkisicik ēkwa mīna ē‑moskātēyihtahkik. namwāc ēsa awiya wīhtamawēwak ayis ē‑sēkisicik.

kayās kī‑kīsipayin ōma miywācimowin#16.9-20 ōhi pīkiskwēwasinahikana (Mark 16.9-20) namōya ohci āpatanwa māna āskaw kayās kihci-masinahikēwinihk

Jesusa wāpamēw Mary Magdalene

9ispīhk ē‑kīkisēpāyāyik ayamihēwi-kīsikāw kī‑āpisisin Jesus. ēkwa mwēstas ēsa kī‑nōkohisōstawēw nīkān Mary Magdalena. ēwakoni ōhi ohci kā‑kī-wayawītisahwāt tēpakohp maci-ahcāhkwa.

10Mary Magdalene kī‑nitawi-wīhtamawēw anihi Jesus kā‑kī-wīcēkot, ē‑mēkwā-kakwātakēyimoyit ēkwa ē‑mawihkātāyit. 11māka ēsa Mary ē‑wīhtamawāt Jesusa ē‑pimātisiyit ēkwa wiya ē‑kī-wāpamāt, namōya tāpwēhtawēwak.

Jesus wāpamik nīso okiskinohamawākana

12mwēstas ēkwa pītos ē‑isinākosit kī‑isi-nōkohisōstawēw nīso okiskinohamawākana mēkwāc ē‑ati-sipwēhtēyit kihci-ōtēnāhk ohci. 13sēmāk wāyinīwak ē‑nitawi-wīhtamawācik anihi kotaka, māka namwāc ohci-tāpwēhtawāwak.

Jesus wāpamik pēyakosāp okiskinohamawākana

14mwēstas Jesus kī‑nitawi-nōkohisōstawēw ē‑mēkwā-mīcisoyit pēyakosāp okiskinohamawākana. kī‑kīhkāmēw ēkāya ē‑tāpwēhtawāyit anihi kā‑kī-wāpamikot kāwi ē‑pimātisit ē‑sasīpihtamiyit osām. 15ōmisi ēsa itēw, “itohtēk kita-nitawi-wīhtamawāyēkok kahkiyaw ayisiyiniwak misiwēskamik ōma miywācimowin. 16ana awiyak tāpwēhtahki ēkwa sīkahāhtāci kita-pimācihāw; māka awiyak ēkāya tāpwēhtahki kākikē kita-ānwēyimāw. 17aniki kā‑tāpwēhtahkik kita-miyāwak mamāhtāwisiwin, kita-wayawītisahwācik maci-ahcāhkwa niwīhowinihk ohci, kita-pīkiskwēwak oski-pīkiskwēwina. 18kīspin mosci-otinātwāwi kinēpikwa ahpō minihkwētwāwi piscipowin, namōya nānitaw kita-isi-māyi-tōtākwak; sāminātwāwi ayisiyiniwa kā‑āhkosiyit kita-miywāyāhēwak.”

Jesus ohpiskāw

19ē‑kī-kīsi-pīkiskwātāt okiskinohamawākana kā‑tipēyihcikēt Jesus, kī‑otinikowisiw kihci-kīsikohk isi, ēkwa ē‑nitawi-apit okihciniskēyihk kisē-manitowa. 20kiskinohamawākanak kī‑sipwēhtēwak ē‑nitawi-kakēskimācik ayisiyiniwa piko itē, ēkwa kī‑wīcihēw kā‑tipēyihcikēt ēkwa ē‑wāpahtihiwēt ē‑tāpwēyit kā‑isi-kaskihtāyit mamāhtāwi-kīkwaya.

ōma mīna kotak kayās kī‑kīsipayin miywācimowin#16.9-10 ōhi pīkiskwēwasinahikana (Mark 16.9-10) āpatanwa māna āskaw kayās kihci-masinahikēwinihk ē‑pimitisahamiht 16.8.

9iskwēwak kī‑nitawi-wāpamēwak Petera ēkwa owīcēwākana, ē‑ācimostawācik kahkiyaw kā‑kī-wīhtamāhcik. 10mwēstas ēsa Jesus wiya tipiyaw okiskinohamawākana kī‑sipwēhtisahwēw sākāstēnohk ohci isko pahkisimohtahk kita-ātotamiyit piko itē anima kihci-ācimowina kākikē kā‑manitowaniyiki mīna ēkota ē‑asotamihk kākikē-pimācihowin.

Currently Selected:

Mark 16: PCSBR

Highlight

Copy