Матта 11
11
Штуан апӀру Ягьʼяйин илчйир
1Чан йицӀикьюр ученикдиз табшуругъар тувну ккудукӀиган, Иса, дилин удучӀвну, Галилей уьлкейин шагьрариз аьгъювалар улупуз гъягъюру.
2-3Дустагъдиъ айи Ягьʼяйи, Месигь Исайин ляхнарикан гъеебхьган, чан ученикарикан кьюр дугъаз гьамци пуз гьау: «Гъюз ккайи Месигь Уву вуна, даршиш жарариз ккилигуча?»
4Исайи дурариз жаваб туву:
– Учвуз рябкъюрайиб ва ебхьурайиб вари, душну, Ягьʼяйиз кидибтай: 5кур вуйидариз рябкъюра, ликудар лицура, хамран уьзур кайидарин хам марцц шула, кар вуйидариз ебхьура, гъачӀидар чӀиви шула ва касибариз Ужувлан хабар рабгъура.
6Шли Узʼина вуйи хъугъвал дубградарш, думу бахтавар ву.
Месигьди Ягьʼяйин гьякьнаан шагьидвал апӀура
7Дурар гъушу вахтна Исайи халкьдиз Ягьʼяйикан пуз хъюгъну:
– Ягьʼяйихьна ичӀи чюлиз фтиз лигуз гъушнийчва? МикӀлу тӀубччвурайи чӀеъдиз лигуз гъушнинчвахъа? 8Шлиз лигуз гъушунчва дина? Багьа палтар али касдиз? Багьалу палтар алидар паччгьарин дараматариъ ади шулу. 9Дици даш, шлиз лигуз гъушунчва учву? Пайгъамбриз лигуз? Ав, кӀуразачвуз, пайгъамбартӀан аьхюриз лигуз гъушунчва.
10Гьадму Ягьʼяйикан ву гьамци дибикӀнайиб: «Магьа, Яв улихьди Узу Йиз кас гьаъраза: дугъу Яв улихь Яв рякъ ккабалгиди».
11Дюзди кӀуразачвуз: жиларин зиин дишагьлийикан гъахьидарик штуан апӀру ЯгьʼятӀан зурба кас гъахьундар, хъа Аьршарин Паччагьлугъдиъ айидарикан варитӀан бицӀир думутӀан зурба ву.
12Штуан апӀру Ягьʼяйин вахтарихъанмина гьамусдиз Аьршарин Паччагьлугъ, саспидар дидиъ гужниинди учӀвуз чалишмиш шулашра, мюгькамди артмиш шула.
13Фицики Ягьʼя гъяйиз вари пайгъамбрари ва Мусайин къанунди мидкан улихь ккимиди дупна.
14Учвуз ккундуш, Гирами китабариъ дупнайиси, дуфну ккуни Илʼяс пайгъамбар Ягьʼя ву.
15Ебхьуз ибар кайидариз гъит ебхьри!
16Хъа гьаму заманайин насил шлихь тевза?
17Дурар, чиб-чпиз чӀигъар апӀури, раццариъ гьамци кӀури деънайи бицӀидариз ухшар ву: «Учу учвуз швутӀрамар йивури гъахьунча, хъа учву ялхъвнаркьан гъапӀундарчва; учу учвуз ишлар апӀури гъахьунча, хъа учву ишузкьан гъишундарчва».
18Ягьʼя гъафну, дугъу ипӀурдайи ва убхъурдайи, дурари дугъаз «Дугъаъ жин а» кӀуйи.
19Инсаниятдин Бай гъафну, Дугъу ипӀуру ва убхъуру, ва дурари Дугъаз: «Лигай, магьа уьж ва пияниска, налукар гъюдюхрударинна гунагькрарин дуст», кӀура. Аькьюллувал ляхнариинди улупну ккун.
Хътругъру шагьрар
20Хъасин Исайи вартӀан гизаф Чав аьламатар улупу шагьрариз тягьнийир йивуз хъюгънийи, гьаз гъапиш дурари чпин гунгьар гардандиъ гъидисундайи.
21– Гьял пис хьибдияв, Хоразин! Гьял пис хьибдияв, Вифсайда! Учвуз Узу улупу гьяйбатар Тириз ва Сайдайиз гъяркънийиш, дурарин агьалйири ухдитӀан, чпихъ яснан палтар хъахьну ва кӀулʼин рюкъ алабхьну, тахсрар чпин гардандиъ дисидийи.
22Амма кӀуразачвузки: суддин йигъан учвузтӀан Тиризна Сайдайиз рягьятди хьибди!
23Хъа увура, Кафернагьум, аьршаризкьан за хьибдиза кӀурайна? Ваъ, гурбагуриъ абхъдиву, фицики учвухь улупу аьламатнан ляхнар Узу Содомдиъ улупнийиш, думу гьамусра сагъ-саламатди гъубздийи.
24Гьаддиз кӀуразачвузки, гъиямат йигъан учвузтӀан Содомдин агьалйириз рягьятди хьибди.
Узухьна гъачай, эргвал йивидичва
25Хъасин Исайи гъапи: «Адаш, заваринна жиларин Агъа! Аьяндрарихьанна аькьюллударихьан гьитӀибкӀнайиб бицӀи касариз ачухъ апӀбаз Увуз чухсагъул!
26Ав, Адаш, Увуз думу Яв ужувлан ният гьаци дубхьну ккундувуз.
27Йиз Адашди Узуз вари тувну. Адашдилан гъайри, Бай фуж вуш, саризра аьгъдар, ва БализтӀан гъайри, Адаш саризра аьгъдар. Хъа Бали шлиз ачмиш гъапӀиш, гьадгъаз Адаш аьгъю хьиди.
28Эргну хъадахънайидар вари Узухьна гъачай, ва Узу учвуз рягьятвал тувдиза.
29Узу гъюдлир ва фурс ктрур вуза. Йиз табшуругъарин юрккагъ учвʼин иливай ва Узхъан вари дубгъай – архаинвал хьибдичвуз.
30Гьаз гъапиш Узу учвухьна тувру юрккагъ – ужʼвал ву, ва Узу учвʼин иливру гъагъра пучӀуб ву».
Currently Selected:
Матта 11: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
