Матта 12
12
Султ йигъкан гьюжат
1Саб султ йигъан Иса дяхин дубзнайи хутӀлиантина гъягъюру. Гаш дубхьнайи Дугъан ученикари, дяхнин кӀулар улдутӀну, китӀишну, итӀуз хъюгъру. 2Му гъябкъю фарисйири Исайиз гъапи:
– Магьа Яв ученикари султ йигъан Къанунди гъадагъа дапӀнайи ляхин апӀура.
3Хъа Исайи дурариз кӀуру:
– Чазна чахъди хъайидариз гаш гъабхьи вахтна Давудри гьапӀнуш, Гирами китабариан гъурхундарнучва? 4Фици думу Аллагьдин хулаъ учӀвнуш ва дугъуна дугъахъди хъайидари я чаз, я чан юлдшариз итӀуз гъадагъа вуйи, хъа анжагъ маллйиризтӀан итӀуз ихтияр адру Аллагьдиз бахш дапӀнайи уьлер фици гъитӀнуш, гъурхундарнучва? 5Ясана учву, Аллагьдин хулаъ маллйири султ йигъандин къайда чӀур апӀурашра, дурар тахсиркрар гьисаб дарапӀбакан Къанундиъ гъурхундарнучва? 6КӀуразачвузки: мушвахь Аллагьдин халтӀанра зиина Вуйир хьа. 7Эгер учвуз: «Гъурбан апӀуб ваъ, хъа рягьим апӀуб ккундузуз», кӀуру гафарин мяна аьгъяйиш, учву тахсир ктрудар тахсиркар ву, пидайчва, 8фицики Инсаниятдин Бай султ йигъʼинра Агъа ву.
Хил деебццнайи кас сагъ апӀуб
9Хъасин Думу жугьдарин мистаз гъягъюру. 10Душваъ хил деебццнайи сар кас айи. Исайик саб тахсир кипбан бадали, маллйири Дугъхьан гьерхру:
– Мусайин Къанундиинди султ йигъан иццурайир сагъ апӀуз хай шулин?
11Исайи дурариз гьамци жаваб туву:
– Учвкан сарира султ йигъан ичӀаъ абхъу чан чарва ададабгъди гъибтрин? 12Хъа чарватӀан инсан гизаф багьа даринхъа? Гьаци вуйиган, султ йигъанра ужʼвал апӀуз хай шулу.
13Хъасин Исайи хил деебццнайириз кӀуру:
– Яв хил гьачӀабкк.
Дугъу хил гьачӀабккуру, ва гьадмусяаьт думу гьатмуну хилси сагъ шулу. 14Душвʼан фарисйири, чӀатинди удучӀвну, Иса фици пуч апӀуруш, йикьрар йитӀуру.
Магьа йиз гъуллугъчи
15Хъа Исайиз мидкан аьгъю шулу ва дишла удучӀвну гъягъюру. Дугъан кьяляхъди гизафдар гъягъюру, ва Дугъу иццурайидар вари сагъ апӀуру. 16Ва Чакан шлизкӀа жарадариз пуб гъадагъа апӀуру. 17Му вари мици, Аллагьди Ишая пайгъамбрин мелзналан гьамци гъапиб кӀулиз удубчӀвбан бадали гъабхьнийи:
18«Магьа Узу кадагънайи Йиз Гъуллугъчи.
Узуз Ккунир. Дугъʼин Йиз юкӀв рази ву.
Дугъахьна Йиз Рюгьра гьаъраза.
Ва Дугъу вари жугьуд дару халкьариз,
гьякьвалин вахт улубкьна кӀури, хабар тувди.
19Думу я гьюжатназ удучӀврур дар,
я чӀигъар апӀрур дар,
ва кючйириъ саризра Дугъан сес ебхьидар.
20Дугъу, улубкьну ккуни гьякьвал
гъалибвалихьна дархидикьан гагьди,
дюбгъну кебхнайи чӀеъ ктубтӀидар
ва хъудубгурайи гъахма ктӀубшвидар.
21Ва вари миллетари Дугъахъ йирфар
хъирчну хьибди».
Иса ва иблис
22Дидин кьяляхъ Исайихьна, жинар кади, дярябкъру ва чӀал дибиснайи сар кас хуру, Дугъу думу кас сагъ апӀуру, гьаци думу чӀалниинара гъюру ва дугъан улариз рябкъюзра хъюгъру.
23Му ляхниин вари халкь аьжайиб шулу ва дурари гьамци кӀуру: «Гьаяман гьаму Давудгъярин Бай вушул гьа?»
24Хъа мидкан деебхьну, фарисйири кӀуру:
– Дугъу жинар жараси ваъ, хъа жинарин аьхюр вуйи Велзевулин кьувватниинди ктаура.
25Амма Исайи, дурарин фикрар аьгъяди, гьамци гъапи:
– Чан айитӀ душманвал ади, пай гъабши гьарсаб паччагьлугъ ичӀи шул, арайиъ душманвал айи я саб шагьур, я саб хизан гъудрубзур. 26Эгер шейтӀни шейтӀан ктаураш, думу чав чаз къаршу дубхьна: дидин паччагьлугъ фици сагъди гъубздихъа? 27Ва эгер Узу жинар Велзевулин кьувватну ктаураш, ичв адмийири дурар шлин кюмекниинди ктаура? Магьа гьамди учву гьякь дарувал улупура. 28Дугъриданна, Узу жинар Гирами Рюгьниинди ктаураш, ичв арайиз Аллагьдин Паччагьлугъвал магьа хъубкьна.
29Гьаци дарш сарихьанра, гуж кайирин хулаз дуфну, душв тӀараш апӀуз хьибдар – эгер эйси йитӀну адарш; гъийитӀган, хал тӀараш апӀуз шул. 30Фуж Узухъди дарш, думу Узуз къаршу ву ва шли Узухъди уч апӀурадаш, дугъу зяя апӀура.
31Гьаддиз кӀуразачвуз: адмийирин гьарсаб гунгьилан ва Аллагьдиз къаршу гафналан хил алдабгъиди, хъа Гирами Рюгьназ къаршу гафналан хил алдабгъидар. 32Эгер шли Инсаниятдин Бализ къаршуди чӀуру гаф гъапиш, дугълан хил алдабгъиди, хъа шли Гирами Рюгьназ гъапиш, дугълан я гьамус, ясана гъюз имбу уьмриъ хил алдабгъидар.
Гьар ва дидин бегьер
33Учву гьарра ва дидин йимишра гъяниб ву йипай, ясана гьарра ва дидин йимишра чӀуруб ву йипай; гьар йимишдиз лигну аьгъю шулу.
34Эй битӀракан гъахьидар! Учвхьан, пис юкӀвар ади, ужуб гаф пуз фици хьибдичвухьан?! Фицики инсандин мелз, чан юкӀв фти абцӀнаш, гьаддикан улхури шулу. 35Ужур касди чан хазнайиан ужуб, хъа чӀуру касди чан хазнайиан чӀуруб адабгъуру. 36КӀуразачвузки, инсанари чпин гьарсаб гьавайи гафнан жаваб гъиямат йигъан тувди. 37Фицики, яв гафариз дилигну, уву гьякь вая нягьякь апӀиди.
Исайикан аьламат улупуб ккун апӀуб
38Гьадмуган къанунчйириканна фарисйирикан бязидари Исайиз кӀуру:
– Мялим! Учуз уву АллагьдихьантӀан даршлу саб аьламат улупну ккундучуз.
39Хъа Исайи дурариз жаваб вуди гъапи:
– Хътругъру ва аьрбатан гьамусдин адмийири аьламатнан лишнар улупуб ккун апӀура, хъа дурариз, Юнус пайгъамбрин кӀулʼина гъафи аьламатналан гъайри, жара аьламат рябкъидар. 40Юнус пайгъамбар фици шубуд йигъанна шубуд йишван зурба балугъин фуниъ ади гъахьнуш, гьаци Инсаниятдин Байра шубуд йигъанна шубуд йишван жилин айитӀ хьиди. 41Гъиямат йигъан суд апӀру вахтна Ниневия шагьрин агьалйир гьамусдин адмийирин гунгьарин шагьидарди гъудужвиди, фицики дурари Юнусди улупу аьгъюваларихъ хъебехъну, гунгьар гардандиъ гъидисну; хъа мушвахь ЮнустӀанна зурба Вуйир хьа.
42Гъиямат йигъан суд апӀру вахтна кьиблайин паччагь-ханумди, гьамусдин адмийириз къаршу гъудужвну, дурар тахсиркар апӀиди, фицики думу дюнʼяйин тму кӀулиан Сулеймандин фагьумлувалихъ хъпехъуз гъафнийи; хъа магьа мушвахь СулеймантӀан зурба Вуйир хьа.
Жин кьяляхъ хътабкуб
43Чиркин рюгь, инсандиан удубчӀвиган, шид адрушвариъ либцури, чаз архаинвал абгури шулу, дибрихъиган, 44кӀуру: «Узу утӀубкку йиз хулаз хътабкидиза». Хътабкубдиз хал ичӀиди, ичӀибкнади ва марцц дапӀнади рябкъюру. 45Гьадмуган диди, дубшну, хъана ургубсан жин чахъди хуру, дурар дугъаъ учӀвну яшамиш шулу, ва думу касдиз улихьдитӀан гьамус артухъ пис шулу. Гьациб хьибди гьамусдин хътругъру адмийиризра.
Исайин дада ва чвйир
46Исайи халкьдиз гьаму гафар кӀури имиди, магьа Исайин дадана чвйир дуфну, Дугъахъди гаф-чӀал апӀуз ккунди, чӀат дугъужвнади шулу. 47Ва сар шли-вуш Дугъаз кӀуру:
– Магьа Яв дадана чвйир, Увухъди гаф-чӀал апӀуз ккунди, чӀат дийигъна.
48Чаз гьамци гъапириз Исайи кӀуру:
– Йиз дада фуж ву ва Йиз чвйир фужар ву?
49Хъа Чан ученикарихьинди хил гьачӀабккну, кӀуру:
– Магьа Йиз дада ва Йиз чвйир, 50фицики Аьршарин Йиз Адашдин гаф тамам апӀрур Йиз чвера, чира, дадара вуйиз.
Currently Selected:
Матта 12: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
