Матта 10

Исайин йицӀикьюр вакил

1Мидин кьяляхъ саб ражари, Чан йицӀикьюр ученикдиз Чахьна дих дапӀну, инсанарикан жинар ктауз ва гьарсаб уьзур ва гьарсаб иццрушин сагъ апӀуз кӀури, Исайи дурариз жинарин зиин гьюкум тувру. 2Магьа йицӀикьюр ученикдин ччвурар: сарпир Петр кӀури шлу Симон ва дугъан чве Андрей, Зеведейин бай Якьубна дугъан чве Югьан, 3Филип ва Варфоломей, Фома ва налукар уч апӀру Матта, Алфейин бай Якьуб ва Фадей, 4Шимон Кананит ва кьандиси Иса масу туву Искариот лакӀам хъайи Ягьуда.

ЙицӀикьюр ученикдиз табшуругъ

5Гьаму йицӀикьюр кас Исайи, гьамциб насигьят тувну, гьаъру:

– Жугьдар дарудар яшамиш шулайи йишвариз мягъянай ва Самарияйин саб шагьриъкьан муучӀванай; 6хъа улдугну чарвйирси айи Израил халкьдихьна гъарахай, 7ва варишвариъ лицури, аьгъювалар улупури, Аьршарин Паччагьлугъ улубкьура кӀури, хабар тувай. 8Иццурайидар сагъ апӀинай, гъийихдар чӀиви апӀинай, жузам кайидар марцц апӀинай, жинар кучӀвнайидарикан кадаай; чӀанади гъадабгъуб, чӀанади тувай. 9-10Кьялʼан идибтӀру чӀулиъ ивну, жвувахьди гъизилин, арсран, ясана йифрин пул, я тавра, я кьюб жар палат, я ликариин алахьрудар, ясана чумакъ рякъюз магъадабгъанай. Фицики лихрур ипӀрубдиз лайикьлу ву. 11Учву фуну шагьриъ вая гъулаъ учӀвишра, душваъ лайикьлу вуйи касдихь дергай ва, дилин удучӀвну гъягъяйиз, гьадгъан хулаъ гъузай. 12Хъа хулаъ учӀвруган, хулан эйсийиз гьамци салам тувай: «Яв хулаъ мясляаьт ибшрияв». 13Эгер думу хал лайикьлу вуш, душваъ мясляаьт убчӀвди. Эгерки думу хал лайикьлу даршиш, ичв мясляаьт учвухьна кьяляхъ хътабкиди. 14Хъа эгер шли учву кьабул дарапӀиш ва учвухъ хъпебехъиш, дугъан хулʼан вая гьадму шагьриан удучӀвурайиган, ичв ликарик кайи биширугра кмиди кадабхьай. 15Гьякьди кӀуразачвуз: гъиямат йигъан, Содомна Гоморра шагьрариз гьадму шагьризтӀан ужу хьибди.

Улукьуз ккимбу хъергбар

16Магьа Узу учву жанаврарихьна гьаърайи марччарси гьаъраза: битӀарси фагьумлудар ва луфарси аьмал кадрудар йихьай. 17Адмийирихьан ихтият апӀинай, фицики дурари учву судариз гъахиди ва чпин мистариъ урччвиди. 18Ва, учву Йиз ученикар ву кӀури, гьякимдрарихьна ва паччгьарихьна гъахиди, дураринна аллагьсузарин улихь Узкан шагьидвал апӀбан бадали. 19Учву гъидисган, учву фу ва фици кӀуруш, дидин гъайгъушнаъ махьанай, фицики гьадму арайиъ, учву фу дупну ккундуш, учвуз дишлади ачмиш апӀиди, 20фицики думу учву ваъ, хъа учвуъ айи ичв Адашдин Рюгьну пиди.

21Чвуччву чве йикӀуз масу тувди, хъа адашди – бай. Веледари, абйир-бабариз къаршу удучӀвну, дурар йихиди.

22Йиз ученикар хьпаз лигну, учву варидариз даккун хьиди. Хъа шли аьхиризкьан аьгь гъапӀиш, думу дюрхну хьиди.

23Саб шагьриан учву утӀуккруган, жара шагьриз жаргъай. Фицики дюзди кӀуразачвуз: учву Израилин вари шагьрар-гъуларилан илдицну ккудубкӀайиз, Инсаниятдин Бай гъиди.

24Ученик чан мялимтӀан заан дар, ва гьич сар гъуллугъчира чан агъатӀан заан дар. 25Ученик – чан мялимсир, хъа гъуллугъчи чан агъасир гъахьиш, рази духьну ккун.

Шилхьан гучӀ дапӀну ккунду

26Гьаци вуйиган, адмийихъан гучӀ мапӀанай: учв ачухъ даршлу гьич саб гьитӀибкӀуб адар ва ашкар даршлу гьич саб жиниб адар. 27Узу учвуз мучӀушнаъ кӀурайиб аквнахь йипай, ва Узу ичв ибахъ гъапиб гъваълан атӀабгну йипай. 28Беден йибкӀрударихьан гучӀ мапӀанай, фицики дурарихьан рюгь йикӀуз шулдар; хъа ичв беденра дубкӀну, жегьеннемдиъ ичв рюгьра пуч апӀуз Удукьрурихьан гучӀ апӀинай.

29Саб кепкихъ кьюб гъуланжакьв масу тувдаринхъа? Ичв Адашдиз даккунди дурарикан гьич сабра жилʼина абхъидар. 30Ичв кӀулʼин али чӀарарра кмиди Дугъу гьисаб дапӀна. 31Гьаддиз гучӀ мапӀанай: гизаф гъуланжакьвартӀан учву заан вучва.

Месигьдин аьгъювалар

32Гьаддиз Узу адмийирин улихь кьабул гъапӀу гьарсар кас Узура Йиз Адашдин улихь кьабул апӀидиза. 33Хъа шли Узу адмийирин улихь кьабул дарапӀиш, думу Узура Йиз Адашдин улихь кьабул апӀидарза.

Узуз лайикьлу вуйир

34Учву фикир мапӀанайки, Узу жилиина мясляаьт хуз Дуфнайир ву кӀури; Узу мясляаьт хьади ваъ, хъа дяви хьади Дуфнайир вуза. 35Фицики Узу адашдихьан – бай, дадайихьан – риш, сижарихьан – швушв жара апӀуз дуфназа. 36Ичв хизандиъ айидар учвуз вартӀан пис душмнар хьиди.

37УзутӀан чан адаш вая дада артухъ ккун гъапӀур Узуз лайикьлу вуйир дар; ва УзутӀан чан бай вая риш артухъ ккун гъапӀур Узуз лайикьлу дар. 38Хъа фуж, хач чан кьялʼин алди#10:38 Яна чаин улукьру аьзабар аьгь апӀрур., Йиз кьяляхъди дарфиш, гьадмура Узуз лайикьлу дар. 39Шли чан уьмур уьбхюз чарйир гъизигиш, дугъан думу дубгди, хъа Узу бадали чан уьмур пуч гъапӀуриз ккудудубкӀру уьмур хьибди.

Пешкеш

40Учву кьабул апӀрури Узу кьабул апӀура, хъа Узу кьабул апӀрури Узу му дюнʼяйиз Гьаур кьабул апӀура. 41Пайгъамбар, думу пайгъамбар хьпаз лигну, кьабул апӀруриз пайгъамбризсиб пешкеш хьибди, ва дугъри кас, думу дугърир хьпаз лигну, кьабул апӀруриз, дугъри касдиз туврубсиб пешкеш хьибди. 42Хъа шли, Йиз ученик хьпаз лигну, гьаму бицӀисдарикан сарнуриз саб кӀифкьан мичӀли шид тувиш, гьякьди кӀуразачвуз, дугъаз чан пешкеш хьибди.

Currently Selected:

Матта 10: ТабГК

Highlight

Copy