MAK 12

A gato tavalu huri ira leogoro talui vaen

1Ko i Jisas mo veve lawera lo gato tavalu vena: “A tangaloi gatagale mo rivu na talui vaen, mo hakovi na ara goroe, mo geli na walu huri na tanoi mwasi vaen hi ram toqe vuravurara aie ko mo hakovi na tuleo. Siu mo siregi na talui vaen lawera leogoro talu wagineu ko mo vano lo vanue wagineu. 2Lune a mwasigi vaen ram matue mo rarai ve rain, hora na nona tangaloi tabanagi gatagale lawera leogoro, ve vin lei denire na nona duvi mwasi vaen denire. 3Ira leogoro talu ram wiri bibie, ram talie ko ram horae taligu vurogi. 4I tagi talu mo hora na nona tangaloi tabanagi gatagale vage; ira leogoro ram talie lo qatune ko ram vai maemae ginie. 5Ko nge mo horae gatagale vage, ko ingere ram ue vagamatea; ko ingere rau sao vage, lavasigi ram talire ko lavasigi ram ue vagamatera. 6Nge gatagale vagasigi mo tino, i netune a mweratabe. Siu mo horae vagasigi lawera leogoro, mo veve vena, ‘Ngere rain ladomavagi netuku.’ 7Nge ira leogoro hi ram veve veveginire vena, ‘A tangaloi hi ngehi vin hako hougi na talu. !Da, da ue vagamatea! ko a talui vaen ngaha vin voragi na bulada!’ 8Siu ram wiri bibie, ram ue vagamatea ko ram tuli vohoginie den talui vaen.”

9I Jisas mo hui vena, “?I tagi talu vin vei na hava gineu? Nge vin vonai, vin uevagamate ra leogoro talu hi ko vin siregi na talu lawera leogoro wagineu. 10?Wa gimiu ne he valu na Reve reve Gogona ngaha tea?

‘A vatu ira basabasao rau vei siasiae

ve hatie gineu lune, nge siserigi ngaha,

mo voragi na muei vetu togaibibi

lawera doluegi.

11A Huqe u veie ngaha,

a gineu garigiana lo matada!’ ”

12Ira tomtomuegi ram vai leo ve ran wiri bibi Jisas, huri ram ilo ve nge u veve na gato tavalu ngaha hurire. Nge ram matagugi na sinobu, ko ram sireginie ram vano denie.

A leo huhui huri vilevile takis

13Lo tagugi ngaha ingere ram hora lawe Jisas ira lawua nora duvi Israel ram hora na Varise lavasigi ko lavasigi dena burigi noi Herot ram vaileo ve rain holie lo nona leo huihui. 14Ram vonai lobena, ram veve vena, “Huhui, gamai gam ilo ve iniko a hogo. Go he matagu tea gi na tangaloi, a vevenagi gohe lado na nagoi tangaloi tea, nge gom huhui na matahala noi God hogo hurire tangaloi. ?Gon veve lawe gamai, wa u vovohoi mena Leo hora ve gain voli takis lawe na Kavman ta Rom? ?Dain voli sige hatie? 15Nge i Jisas mo ilo na hava gineu ram tarani ve rain vaie, mo duvi gorora vena, “?Huri hava gineu nem vai leo ve nein holieu? Nen bete na mane laweau, nain lehe.” 16Ko ingere ram bete mane vatu gatagale lawea. Nge mo huire vena, “?A nunui hine ko a henai hine ngaha?” Ram duvi goroe vena, “A noi sisa.” 17Siu i Jisas mo veve lawera vena, “Nen bete lawe Sisa a hava gineu a noi Sisa, ko nen bete lawe God a hava gineu a noi God.” Ko ram awogi hurie.

A huihui huri na maraga taligu dena mateana

18Ira Sadusi lavasigi ram veve ve a sinobu rain he maraga taligu tea dena mateana. Ram vanai lobei Jisas ram huie vena, 19“Huhui, i Mosis u reve na tau leo ngaha lawe gamai vena: ‘Tare ve a tangaloi vin mate den gahorana, nge hatie reneture, i tuana vin lei na maduana, vin hakovi na maresu lawe i tuana hi u mate beno.’ 20Lo taro gatagale ira reretehigi ingere gaibitu. A togagi mo lagi na vavine; siu mo mate, he hako te maresu. 21Su hurie mo laie; siu mo mate, he hako te maresu. Gaitoligi mwere hi vage. 22Ko ingere gaibitu doluegi rau legi na vavine hi, rau mate, rahe hako te maresu. Lo vagasigi a vavine mo mate vage. 23?Nge lo bongi maragaana, a vavine vin voragi gahorai hine? Huri ingere gaibitu rau legi meie.”

24I Jisas mo duvi gorora vena, “?Igimiu neu vagasile. ?Wa igimiu nehe ilo na Reve reve Gogona tea,? Ko nehe ilo na huireana noi God tea vage? 25Huri lo maraga taligu ingere rain mwere ira engsel ta eulu, a mwera ko a vavine rain he lagi tea taligu. 26Nge hurire rau mate i God u veve rain maraga taligu, ?Wa igimiu nehe vatu na Buk noi Mosis tea hi u laqagi huri na avi u gao lo soko qaroqaro? Ngehi u uli ve i God u veve lawe Mosis vena, ?Ineu a God noi Ebraham, a God noi Aesaka, ko a noi Jekob.’ 27Mwere hi nem ilo ve ingeie i God a nora hi ram mwaso, hatie nora hi rau mate. Igimiu neu vagasile vohogi!”

A Leo hora lawua

28A huhui gatagale talo Leo Hora noi Mosis aie u rongora rau vuigarogi, mo leo huri ve i Jisas u duvi vurugegi na nora huhui, mo vonai lobena, mo huie vena, “?A Leo hora nge hilogo u lawua garagara?” 29I Jisas mo duvi vena, “A Leo hora hi u lawua garagara nge ngaha: ‘Igimiu nen rongo ira duvi Israel, a Huqe noda God ingeie a Huqe gatagale hogosie. 30Igimiu nen tabe na Huqe a nomiu God gina loloi taqangimu doluegi, ko gina tamatemu doluegi, ko gina domimiu doluegi, ko gina nomu huireana doluegi.’ 31Ko a Leo hora tuegi nge ngaha: ‘Gon tabe na tangaloi wagineu mwereigo sibomu.’ Hatie Leo hora vage ve u lawua taligu denire ngaha.” 32Siu a huhui talo Leo hora noi Mosis hi mo veve lawe Jisas vena, “Huhui, u garea u liu! A hogo gom veve ve ingeie a huqe i God gatagale hogosie, ko hatie god wagineu denie. 33Ko a Leo hora gairue ingere ngaha, huri ve a tangaloi vin tabe God gina loloi taqangine doluegi ko gina domine doluegi ko gina nona huireana doluegi ko huri ve vin tabe na tagi vanuana mwere hi mo tabea sibona. Ngehi mo enhageliu ve dain tabe na leohora gairue ngaha denie hi dam rugurugu gina kakarue lo tanoi rugurugu ko a rugurugu wagineu vage hi dain bete lawe God.” 34I Jisas mo leo ve u duvie gina mataisao, mo veve lawea vena, “Iniko gohe vagahao tea dena ute hi i God mo ratahigi lolona.” Lo tagugi ngaha ihine he vai lei tea vena huie taligu huri hava gineu.

A huihui huri Kraes

35Lune i Jisas mo huhui lo Sara Gogona, nge mo huire vena, “?Ira huhui talo Leo Hora noi Mosis ram veve mwere hilogo ve i Kraes i netui Devet? 36I Devet sibona u veve gina managi noi Vui Gogona vena:

‘A Huqe mo veve lawe na noku Huqe vena:

Gon toga lo Matueku,

vin dadari nain teu na nomu tavului vuro

lo vavai kerumu.’

37I Devet sibona mo ware Kraes huri ve a nona Huqe. ?Nge vin voragi netui Devet mwere hilogo?”

I Jisas mo veve matagute hurire huhui

A sinobu lawua ram ronghuri Jisas gina havuhevu. 38Lune ingeie mo huhuire, mo veve vena: “Nein leo huri gimiu denire huhui talo Leo Hora noi Mosis, ram tarani ve ram dige lategi mena luqara rau raka, ko ve a tangaloi rain veve gareaginire lo tanoi mageti, 39ram tarani na muei tanoi togatoga lo valei soneana, ko a muei tanoi togatoga lo taroi gaganie lawua. 40Ram vagamaro na valera vavine madue, ko ingere ram sagera huri ram vai na tataro rau qaqaravu. A leo vevegi lawera vin esi garagara.”

A hogogi noi vavine madue

41Lune i Jisas mo toga lo Sara Gogona kakarani lobei tanoi tuli homu, nge mo lehi na sinobu ram tuli homu siu lolona. Ko ira tagi hako gineu rau sao ram tuli na homu rau lawua. 42Nge a vavine madue gatagale u mahogi mo vonai, mo tuli na homu wuwerigi gairue, u tatarise mena vatu gatagale. 43I Jisas mo warera nona rorongtagi vonai lobena, mo veve lawera vena, “A hogo, nam veve lawe gimiu vena, a vavine madue hi u tuli na homu u liure denire doluegi. 44Huri ingere doluegi ram tuli na duvi nora homu rau hako dore; nge a vavine hi, a mahogi, u tuli na nona lalaie doluegi, ngehi ve vin mwaso lune.”

Currently Selected:

MAK 12: HNT

Highlight

Copy