MAK 11

I Jisas mo ahu lolo Jerusalem gina qoragiana

1Lune ingere ram vano kakarani a Jerusalem, a Betvas ko a Betani, ram vonai lo Vusi Oliv. I Jisas mo hora na nona rorongtagi gairue rom vano gitomue, 2mo veve lawera vena, “Neri vano lo togagi venue hi. Ko lune neri ehu lolona, siserigi neri haqe na natui as rau ligo bibie, a tangaloi he toga te tau lune. Neri torosie, nerom laie vonai. 3Ko tare ve ihine tea vin veve lawe gimiru vena, ‘?Huri hava gineu nerom vai mwere ngaha?’ Neri veve lawea vena, ‘A Huqe mo taranie ko inge vin horae vonai taligu vin siseri.’ ” 4Siu rom vano, rom haqe na natui as hi lo turegi lawua rau vohogi bibie lo mataivale. Lune rom torosie, 5a tangaloi lavasigi ram labe aie ram veve lawera vena, “?Nerum vai na hava gineu, huri nerum torosi na natui as?” 6Ngere rom duvi lawera mwere i Jisas u horara huri, ko ram sireginire rom vano. 7Ngere rom lai na natui as vanai lawe Jisas, ram vugeri na luqara loului gaiherena, ko i Jisas mo toga lune. 8A tangaloi u sao ram vugeri na luqara lo turegi ko lavasigi ram siu na rangai gei rau tei lolo talu. 9A sinobu lavasigi ram tomue ko lavasigi ram tutagu, ingere doluegi ram ulo vena: “Waregareagi God! !God gon vaigarea giniehi, mo vanai lo henai Huqe! 10!God gon vaigareagi na tangaloi lawua noi ratahigi Devet hi i tamamai! Gamai gam waregarea ginigo God! Hosana lo eulu!” 11I Jisas mo ahu a Jerusalem ko mo vano lolo Sara Gogona, ko mo leo dalibulugi na gineu vatahae. Nge a vevenagi u revirevi beno, siu nge mo vano a Betani meire rorongtagi hangavulu domwagi gairue.

I Jisas mo warai na vui duledule 12Lo rani tuegi, ram vonai taligu den Betani, i Jisas mo mwaruruhi. 13Nge mo lehi na vui duledule u mala vagahao mo tugi raugi, siu nge mo vano lobegi mo hikesi na mwasigi; nge he haqe na mwasigi tea nge a raugi hogosie, a vevenagi hatie tarogi vovohoi ve vin wei mwasigi. 14I Jisas mo veve lawe na vui duledule hi vena, “Ihine tea vin he gani na mwasigi tea denigo taligu vin tuei!” Ko ira nona rorongtagi ram rongoe.

I Jisas mo hage lolo Sara Gogona

15Lune ram dadari a Jerusalem, i Jisas mo ahu lolo Sara Gogona, ko mo tauvuigi mo vuro luara hi ram voli ko ram sosogagi lolo Sara Gogona, ko mo talulugi dori na tanoi homu noi rahine ram lealeahi homu ko a tanoi togatoga noi rahine ram sogagi na rangamea, 16ko he siregi tea ve ihine vin weli na hakohako vena dige turu lolo Sara Gogona. 17Siu ingeie mo huhui na sinobu vena, “U reve beno lo Reve reve Gogona ve i God u veve vena, ‘A valeku vin waregi ve a valei tataro huri na soqei vao doluegi.’ Nge igimiu nem vaie mo voragi na malangai belu!”

18Ira muei rugurugu meire huhui talo Leo Hora noi Mosis ram rongoe, ram tauvuigi ram hikehike ve ran vai vagamatea mwerehiligo. Ngere ram matagu ginie, a vevenagi a sinobu doluegi ram awogi huri na nona leo huhui.

19Lolo revirevi hi teu, i Jisas meire nona rorongtagi ram mwalue den Jerusalem.

A domiana huri na vui duledule mo koru

20Lo rani tuegi lolo robongi siaga ram dige mo vano lo turegi, ram lehi na vui duledule u koru doluegi. 21Ko i Bita mo lado haqe na leoi Jisas, mo veve vena, “Huhui, leo, a vui duledule gu waraie mo koru.” 22I Jisas mo duvi lawera vena, “A hogo, nam veve lawe gimiu vena, 23tare ve gimiu nem ladohogogi God, nei veve lai lawe na vusi ngaha vena, ‘Maraga, gon tuligo sibomu lolo tahi.’ Tare ve gimiu ne he lado gairue tea lolo taqangimiu, nge nem ladohogo ve a hava gineu nem vevea vin vei, vin vei mwere hi lawe gimiu. 24Giniehi, nam veve lawe gimiu vena, a hava gineu tea nem navu huri lo tataro, nein ladohogo ve neu leie beno, ko vin vei lawe gimiu. 25Lune nem labe nem tataro, nein ladovohogi na hava gineu mo toga lumiu mei hine tea wagineu, huri ve i Tamamiu eulu vage vin ladovohogi na bugumiu. 26Tare gimiu nehe ladovohogi na bugui tangaloi wagineu tea, i Tamamiu eulu vin he ladovohogi na bugumiu tea.

Ram hui Jisas huri na nona managi

27Siu ingere ram vonai taligu a Jerusalem. Lune i Jisas mo dige lategi lolo Sara Gogona, ira muei rugurugu meire huhui talo Leo Hora noi Mosis meire tamaragai ram vonai lobena, 28ram huie vena, “?Gom vai na gineu mwere ngaha gina managi mo vonai logo? ?Ihine u bete na managi ngaha lawego ve gon vai na gineu ingere ngaha?” 29I Jisas mo duvi lawera vena, “Ineu nain hui gimiu gina leo gatagale, ko tare ve gimiu nein duvi goroau, nain veve lawe gimiu ve nam vai na gineu ingere ngaha gina managi mo vonai logo. 30Nen duvi laweau, ?I Jon u lei na managi logo vena garuhigogona: den God sige dena tangaloi? 31Ingere ram tauvuigi ram vuigarogi sibora vena, “Tare ve dam duvi goroe vena, ‘Den God,’ nge vin veve vena, ‘?Huri hava gineu gimiu ne he ladohogo tea ginie?’ 32Nge tare ve dam veve vena, Dena tangaloi, ram matagugi na sinobu, a vevenagi ingere doluegi ram lado siaga ve i Jon ingeie a tangaloi ligoligogi. 33Giniehi, ram duvi goro Jisas vena, “Gahe ilo tea.” Ko i Jisas mo veve lawera vena, “Ko ineu vage nain he veve tea lawe gimiu ve nam vai na gineu ingere ngaha gina managi mo vonai logo.”

Currently Selected:

MAK 11: HNT

Highlight

Copy