MAK 1

A toretore noi Jon Garuhigogona

1Nge ngaha a Roro Garea huri Jisas Kraes, Netui God. 2U teuvuigi mwerehi a tangaloi ligoligogi i Aesaea u uli: “I God mo veve vena, ‘Nge ngaha a noku gaihora, nam horae tomue denigo huri vena vagatai na turegi hurigo.’

3A diloi hine tea hine tea tangaloi mo ware lolo vanue vurogi mo veve vena: ‘Nen vagatai na matahalai Huqe, nen vai na turegi ran vovohoi hurie.’ ”

4I Jon u dadari lo vanue vurogi, mo garuhigogonagi na sinobu, ko mo toretore mo veve vena: “Nen tudori den nomiu galegaleasi, ko nen lai na garuhigogona; siu i God vin ladovohogi na bugumiu.” 5A tangaloi u sao talo vanue Judia meire vage ta Jerusalem rau vano ram rorongtagi Jon mo laqa ko ram veve sere na bugure, ko i Jon mo garuhigogona ginire lolo wai Jodan.

6I Jon mo luqegi na vinui kamel, ko mo wasigi na vinui bulugi; mo gani na diso mena nubui bi talolo labute. 7Mo veve lawe na sinobu vena: “Ihine hi vin vanai lo taguku, u lawua denieu. Na he tatarise tea ve nai siolo hivo ko nai taga na garoi nona butu. 8Ineu nam garuhigogonagi gimiu gena wai hogosie, nge ingeie vin garuhigogonagi gimiu gina Vui Gogona.”

I Jon mo garuhigogonagi Jisas

9Lo tagugi i Jisas u vonai den Nasaret lo duvi vanue Kalili, ko i Jon mo garuhigogona-ginie lolo wai Jodan. 10Ko siserigi lune i Jisas mo mwalue dena wai, mo dada hage eulu mo lehi na dodo mo waga, ko a Vui mo hivo lo ulune mwere na rangamea. 11A dilogi mo himei dena eulu mo veve vena: “Iniko i Netuku, a mweratabe. Ineu nam rongarea ginigo.”

Satan mo kali Jisas

12Siserigi a Vui mo vaie mo vano lo vanue vurogi. 13U toga lo vanue vurogi a rani ngavulu gaivesi. I Satan mo kalie lehie, ko ingeie u toga meire kakarue turu, ko ira engsel ram vanai ram buluie.

I Jisas mo tau vuigi na nona tabanagi

14Lo tagugi hi rau teu Jon lolo valei vauveu, i Jisas mo vano lo vanue Kalili, ko mo toretoregi na Roro Garea hi mo vonai den God, 15mo veve vena: “A tarogi vovohoi u mo vonai, ko a mwasoana garaqa hi i God mo ratahigi lolona mo kakarani! Nen tudori dena nomiu galegaleasi, ko nen ladohogo gina Roro Garea!”

I Jisas mo ware na tangaloi loli ige gaivesi

16I Jisas mo vano lo mwararai Wei ta Kalili, ko mo lehi na tangaloi loli ige gairue, Saemon tona tuana Andru rom tuli nora gabe lolo wai. 17I Jisas mo veve lawera vena: “Nero hurieu ko ineu nai huhui gimiru neri loli na tangaloi.” 18Siserigi rom siregi na nora gabe rom hurie.

19Ingeie mo dige qilodo vano mo lehi netui Sebedi gairue, Jemis tona tuana Jon rom vai vurugegi na nora gabe lolo aka. 20I Jisas mo lehire, mo warera siserigi; rom maraga dei tamara Sebedi mo toga lolo aka mena nora tangaloi tabanagi, rom huri Jisas.

A tangaloi mena vui esi

21I Jisas meire nona rorongtagi ram vanai a Kabeniam. Lo Rani mangaana i Jisas mo ahu lolo valei soneana, mo tauvuigi mo huhuire. 22A sinobu ram rongoe ram awogi hurie, huri nge mo huhuire gena managi, nge hatie mwere nora huhui talo Leo Hora noi Mosis. 23A tangaloi gatagale mo vanai mo ahu vano lolo valei soneana a vui esi lune. Nge mo ulo, mo veve vena: 24“?Gom tarani na havagineu mei gamai Jisas ta Nasaret? ?Sige iniko gom vonai ve gon vai vohogi gamai? Nau ilogo, iniko a gai hora gogona noi God!” 25I Jisas mo gato goro na vui esi hi mo veve vena, “Toga rorongo, gon mwalue denie!” 26A tangaloi hi a vui esi u veie mo rurururu gi, ko mo ulo gena dilogi u lawua, mo mwalue denie. 27Ira sinobu ram garigi garagara huri, ko ram vuihuiginire, ram veve vena, “?Hava gineu ngaha? ?A lengai huhui garaqa? Mo gato goro na vui esi ko ram rong tabea!” 28Ko a roroi Jisas mo vano vataha vanue doluegi a Kalili.

I Jisas u vagamwasoi na tangaloi sao

29I Jisas meire nona rorongtagi ram siregi na valei soneana, ram vano tuturedu huri na valei Saemon tona Andru; Jemis tona Jon rom hurire vage. 30Tubui qeligei Saemon mo mahagi mo eno lolo vale, ko lo taro ram lehi Jisas ram veve sere lawea hurie. 31I Jisas mo ahu vano lobena, mo hako lo limana, mo hau ragasie, ko a mahagite hi mo rovo denie. Siu mo maraga, mo vai rarai na gara hinaga.

32Mo revirevi, lo tagui matenaho roro, a sinobu ram lai na tangaloi segesege meire hi a vui esi lure lawe Jisas. 33A tangaloi doluegi lolo togagi venue rau vonai ram labe lo matai vale. 34Ko i Jisas mo vagamwasoi na sinobu u sao dena lalangai segeana, ko mo livu vohogi na vui esi u sao denire. He siregi na vui esi tea ve ran laqa, a vevenagi rau iloe beno.

I Jisas mo toretore lo vanue Kalili

35Lolo robongi siaga, mo leleo duruduru, Jisas mo maraga mwalue dena vale, mo vano lo mahoi ute, ko mo tataro. 36Nge i Saemon meire buluine ram vano ve ran hikesie. 37Lune ram haqea, ram veve vena, “A sinobu doluegi ram hikesigo.” 38Nge i Jisas mo duvi mo veve lawera vena, “Igide da vano lo togagi venue ram toga dali bulu ve nan toretore lawera vage; a vevenagi nau vonai huri na gineu ngehi.” 39Ko nge mo vano vataha vanue a Kalili, mo toretore lolo valei soneana, ko mo vuro lue na vui esi.

I Jisas mo vagamwasoi na tangaloi segesege

40A tangaloi a vohavono mo vonai lobei Jisas mo veve vena, “Tare ve gom tarani, goin vei leieu ve nan mwasara.” 41I Jisas u horo gina hahagavi, mo vugeri na limana, mo tango vano lune, mo veve vena, “Nam tarani, gon mwasara!” 42Ko siserigi a vohavono hi mo rovo denie, ko mo mwasara. 43Ko i Jisas mo gato siaga lawea, mo hora vena vano, mo veve vena, 44“Gon rongo, go mese veve lategi lawe hine tea beno, nge gon vano tuturedu lobena rugurugu huri ingeie vin lehigo tomue. Ko gon bete nom hogogi mwere a Leo Hora noi Mosis u veve, a gigilegi lawera ve gu mwasara.” 45Nge a tangaloi hi mo vano mo tauvuigi mo laqagi lategi hurie vataha vanue. A vevenagi hi i Jisas he vano lai tea lo vanue lo ute lawua, nge mo toga gahea lo mahoi venue, ko a tangaloi u sao ram vonai lobena den vataha vanue.

Currently Selected:

MAK 1: HNT

Highlight

Copy