MATIU 28

A maraga taligu noi Jisas

1Lune a Rani Mangaana mo rovo, lolo robongi siaga, a muei rani talo wik, i Meri ta Makdala mei Meri tuegi rom vano ve roin lehi na qaru. 2Siserigi a ruru lawua mo ruru; huri a engsel noi Huqe mo hivo den eulu, mo lulugi vohogi na vatu ko mo toga lune. 3A varavarana mwere na vile ko a gavune u mevute garagara. 4A tangaloi leogoro ram matagu liu, ram ruru ruru ram mwere na tangaloi rau mate. 5A engsel mo veve lawera vavine vena, “Nero mese matagu. Nau ilo ve gimiru nerom hikesi Jisas rau toto vehavehaginie lo gai saroutu. 6Nge hatie tangaha, huri nge u maraga taligu mwere u veve tau. Nero vonai nero lehi na tanogi hi u eno aie. 7Nero vano siseri, nero veve lawe na nona rorongtagi vena: ‘Nge u maraga taligu dena mateana ko siserigi ngaha nge mo vano tomuegi gimiu a Kalili, nein lehe aiehi!’ Nam veve lawe gimiu ngaha.

8Siu rom vano siseri dena qaru, rom matagu ko rom havuhevu garagara, ko rom toa rom vano huri ve roin veve lawera nona rorongtagi. 9Siserigi i Jisas mo bulu meire, mo veve vena, “Garea lawe gimiru.” Ngere rom vonai lobena rom sisiqeu goroe ko rom tango lo karune. 10Jisas mo veve lawera vena, Nero mese matagu. Nero vano nero veve lawe retueku ve rain vano a Kalili ko rain lehieu aiehi.

A Leo veve sere nora tangaloi leogoro

11Lo tarogi a vavine rom mule taligu, a tangaloi vuro lavasigi rau leogoro na qaru ram mule lolo vanue ram veve lawera muei rugurugu huri na gineu doluegi rau rovo vonai. 12Ira muei rugurugu meire tamaragai ram sone bubugi ko ram tau na nora leo; ram bete a homu lawua lawera tangaloi vuro 13ko ram veve vena, “Gimiu nen veve huri ve nona rorongtagi rau vonai lolo bongi ko ram balu na betune lo tarogi hi gimiu nem maturu. 14Ko tare ve a Kavman mo rongo huri ngaha, gamai gain vovohoigi na gineu ngehi lawea, ko gamai gain veie ve gimiu nein mese vano lo asigi huri na gineu hi.” 15Ira leogoro ram lai na homu ko ram vai mwerehi ira muei rugurugu rau veve lawera. A rorogi hi mo vano dolueginire ta Judia mo dadari bagataha.

I Jisas mo serelue lawera nona rorongtagi

16Ira rorongtagi hangavulu domwagi gatagale ram vano lo vusi hi a Kalili i Jisas u horara ve rain vano aie. 17Lune ram lehie ram sisiqeu goroe, nge ingere lavasigi ram lado gairue. 18I Jisas mo vonai lobera ko mo veve lawera vena: “Nau lei na managi doluegi beno lo eulu ko lo vavagi. 19Siu nen vano lobera sinobu doluegi vataha ute ko nen vaire ran voragi noku rorongtagi: nen garuhigogona ginire lo henai Mama ko i Netui ko i Vui Gogona, 20ko nen huhuire ve ran rongo huri na gineu doluegi nau veve lawe gimiu. Ko leo! Ineu mei gimiu vataha bongi, vin dadari lo rovonai ure.”

Currently Selected:

MATIU 28: HNT

Highlight

Copy